On wara kekn̂e hara Moises Ixaw Yana komo ya, Ero yinhîrî wow tîtketken̂e tak. Basan yesamarî yaw tak tîhcetken̂e. Ero yaw kîwcetaw so Oki tak mokyakn̂e kwaparî komo me hara. Basan pono komo kayaritomon mîk xakn̂e. Tmaywen komo n̂ekyakn̂e sowtatu pen komo. Etîrei pona kepor̂atken̂e so.

2 Ero yimaw on wara kekn̂e Kporin komo owya, Noro pona erasîra xa marha ehcoko. Anar̂marî komo me marha wiirî noro pen, maywenînhîrî pen komo marha, yîrowonthîrî marha. Ero ke noro pen waihkacoko, Sion pen mîwaikace Amohew komo kayaritomonînho pen, Esbon pononho pen ha, ero wa xa marha noro pen waihkacoko hara Oki pen ha, kekn̂e owya.

3 Ero ke Oki pen nar̂mapekn̂e Kporin komo kîwya so Basan pono kayaritomon pen. Maywenînhîrî pen komo marha nar̂mapekn̂e kîwya so. Ero ke n̂examro pen tîtwaiketken̂e. Waipîn komo yîmtora ro makî tîxatken̂e.

4 Ero yinhîrî noro pen yewtontho komo marha tahsîyatken̂e ahnoro. 60 xakn̂e ewtonthîrî komo. Knahsîrî pîn exihra ro mak tak xakn̂e noro pen yewtontho. Ahkobi pono komo tahsîyatken̂e ahnoro. Ero wa tahsîyatken̂e Oki yewtontho komo, Basan pono kom ha.

5 Twacayem komo mîn xakn̂e ewtonthîrî komo. Kawno ke twacaye so xakn̂e kopi. Tmetatai marha xakn̂e wacanthîrî. Yahkotono ke cecehke xakn̂e metatan komo. Ewtoci marha xakn̂e mer̂pora. Ero komo tahsîtîketken̂e.

6-7 Ero pononho pen komo marha tîtwaiketîketken̂e. Sion maywenînho pen komo tîtwaiketîketken̂e ero wa xa marha Oki maywenînho pen komo tîtwaiketken̂e hara. Kîrkomo pen tîtwaiketîketken̂e, wooxam pen komo marha, rikomo pen komo marha ahnoro ewto pono komo cirihtîkaxi ro. Iyokuthîrî komo reha taar̂atken̂e koh komo me. Emyawnonhîrî komo marha tahsîyatken̂e ewtonthîrî komo pononho.

8 Ero wa Amohew komo kayaritomon pen rowontho tahsîyatken̂e, asak hakno rowontho rma. Xotaw xehxan tahsîyatken̂e, kaamo yepatakacho n̂ixan ha. Ahnon Yarenarî pona rorono komo tahsîyatken̂e Ehmon Yîpîn pona rorono komo marha.

9 Sirion Yîpîn mîn, kexe Siton pono komo ero poko, Ehmon Yîpîn poko. Sen̂i Yîpîn mîn, kexe Amohew komo reha ero poko.

10 Oki pen yewtontho tahsîyatken̂e ahnoro woskara pono komo. Xireace tahsîyatken̂e ahnoro, Basan marha tahsîyatken̂e Sawka pona rorono, Etîrei pona rorono marha. Ero wa tahsîyatken̂e Oki pen yewtontho komo, Basan pono kom ha.

11 Oki makî tî xakn̂e Hepain pen komo poyinonho. Basan pononho pen komo kayaritomonînho mîk xakn̂e. Pehu ciixapu xakn̂e noro pen yetîrapotoponho. 4 metru ehyatkawnon mîn xakn̂e okyo, 1,8 metru xakn̂e akwerî hara. Nai rma ero Haba po, noro pen yetîrapotoponho, Amon yepamtho komo yewton po ha.

12 Taa, apoyino komo rowon me tak wekamyakn̂e knahsîthîrî kom ha. Aroe mkaino wîmye Huben yepamtho komo ya, Kace yepamtho komo ya marha. Ahnon yepu yecihtawno wîmye yîwya so. Nai îîpî mko Xireace po. Ero raconho marha wîmye yîwya so. Iitono komo marha wîmye yîwya so ewto komo, Xireace raconho pono kom ha.

13 Xireace raconho hara wîmye Manases yepamtho poyino komo ya hara. Basan marha wîmye yîwya so Oki pen rowontho ha. Hepain pen komo yekenho, kacho mîn xakn̂e ahnoro Ahkobe, Basan marha.

14 Xai reha cekn̂e Ahkobe pono pen komo yar̂maxi. Manases yepamtho mîk cekn̂e. Iitono komo nar̂mekn̂e miya rorono komo Xesuru yemyatwono komo meero, Maakacita komo yemyatwono komo marha. Iitono komo nar̂mekn̂e noro. Ero ke iitono komo tak n̂osohcekn̂e ewto komo, tosotî me rma nosohcekn̂e. Ero ke ero yinhîrî rma tak Basan n̂etahcaxe Apoce-Xai me.

15-16 Taa, Xireace reha wîmye Maki ya. Xireace mkaino wîmye Huben yepamtho komo ya reha, Kace yepamtho komo ya marha. Miya rorono wîmye yîwya so Ahnon kwaka rorono ha. Ahnon rakatarî nasî onmîtho wokpan me. Xaboke kwaka rorono meero wîmye yîwya so. Amon yepamtho komo rowon wokpan mîn Xaboke yepu.

17 Mehxa wece nasî Xotaw tuuna yepu. N̂examro rowon wokpamacho me rma nas ero hara. Kinerece yecihtai cesî n̂examro wokpan me. Miya rorono wîmye yîwya so Araba N̂ikithon kwaka rorono. Yîmîtî Ken̂arî kacho rma mîn Araba N̂ikithon. Ero yecihtari cesî n̂examro wokpan resce n̂ixan porero tuuna yechîrî porero. Piska Yîpîn yamrinari rma cesî. Ero warai wîmye yîwya so yîrowon komo me, Huben yepamtho komo ya, Kace yepamtho komo ya marha.

18 Ero yinhîrî on wara n̂examro wantomekn̂e, Taa, tantono nîmye Kporin komo Kaan aweken komo me. Ero ke on wara wîîkes awya so kîrkomo ya, Etocoko rma amyamro Xotaw yeco pona, karitî komo mak. Tuwuhreke etocoko ayanan komo poturme, Ixaw Yana komo poturme.

19 Tanî rma tînomcoko apici komo, amxîkrî komo marha. Ewto komo po tînomcoko awya so onmîtho komo po rma. Awoh komo marha tînomcoko. Mer̂pora ween̂asî awoh komo.

20 Amn̂e cepokaresom me tak Kporin komo n̂iir̂asî apoyino komo, etar̂macho komo yîtîhkache. Iitono tak nahsîyaxe cekenî ro kom hara. Kporin komo Kaan nîmyasî yîwya so ero rma nahsîyaxe Xotaw yeco pono ha. Ahsîche tak arowonî ro komo pona amohcoko hara, wîmye awya so ero pona, kekn̂e. Ero wa kekn̂e Moises Huben yepamtho komo ya, Kace yepamtho komo ya, Manases yepamtho komo ya marha.

21-22 Ero yimaw Xoswe marha panatanmekyakn̂e. On wara wîîkekn̂e yîwya, Awewru ke rma Kporin komo Kaan nar̂matho komo meen̂asî. Kayaritomonhîrî pen komo mîkyam xatken̂e yînar̂mathîrî asak ha. Ero wa xa marha tak anarî pen komo nar̂mes hara kayaritomo pen komo yîhyari so mîîcexe n̂examro pen kom ha. Erasîra ro mak esko pona so. Aporin komo Kaanî rma Mîk ar̂mano n̂irpes awya so, wîîkekn̂e yîwya.

23-24 Ero yinhîrî cerewre kîmtapowakn̂e Kporin komo yakro hara. On wara wîîkekn̂e yîwya, Kaan Amoro Apa Oporin. On wara cma re wîîkes awya, Awanton mak ow ha. Takîhsom me xa awehtopo menpes ha re owya, kar̂pe xa awehtopo marha. Ero yihcitopo makî tko ka menpes owya. Amoro makî Kaan, anarî exihra ro mak nasî awarai, cirihnî ciin̂e xa. Kar̂pe cehtopo yenpon̂e marha exihra ro mak nasî anarî awarai. Kah yaw exihra nasî, roowo po marha exihra nasî.

25 Ero ke owî cma re men̂epesî Xotaw yeco pona. Iitono yenî xe cma re wasî kir̂wanî ro roowo. Îîpî yenî xe marha wasî kir̂wan komo. Ribanu yenî xe marha wasî, wîîkekn̂e yîwya.

26 Riiwoxe rma tko xakn̂e Kporin komo opoko apoyero so. Omtapotarî yewetîra rma xakn̂e. N̂ex ha, kekn̂e mak owya. Ero poko yîmtapotara tak esko oyakro.

27 Piska Yîpîn xa matko awnuko meretkoso roro. En̂exa tak enko Kanan rowon, oesce n̂ixan, nohce n̂ixan marha, suu n̂ixan marha, resce n̂ixan marha. Awewru ke mak enko. Xotaw rma watohra mas okwe.

28 Xoswe xa matko antomakî aano ritopo poko. Noro ahworeko, Kar̂pe men esko, kasko yîwya. Noro xa Ixaw Yana komo naar̂asî Xotaw yeco pona. Noro marha yîrowon komo nahsîpesî yîwya so eken komo me. An̂enîrî rma mîn nahsîpesî yîwya so, kekn̂e owya. Ero wa kekn̂e Kporin komo owya.

29 Ero ke iito rma ka tîxatken̂e woskara po rma, Bece Peo yemtacho po rma, kekn̂e. Ero wa kekn̂e Moises yîwya so.