Ero yinhîrî tak on wara kekn̂e hara Moises Ixaw Yana komo ya, Ai, oyakno komo, Ixaw Yana komo amyamro. Omtapotarî ka entacoko. Kporin komo ya apanatanmetopo komo tan wekatîmyas awya so. On yaw roro men ehcoko waipîn me awehtome so, arowon komo yahsîtome marha awya so. Ero tî nîmya awya so Kporin komo, ponaro aporin pen komo yehtopo ha. Ero yahsîso mîîcexe omtapotarî ponaro ro rma awexitaw so.

2 Omtapotarî men yîhremara ehcoko amtapotarî komo ke rma kica. Omtapotarî yîhkotora marha ehcoko ero poyino yewetîtome mak awya so. Aporin komo Kaanî mtapotarî poko tan kpanatanmekyaxe so. Ero ke ewetîcoko.

3-4 Amyamro rma meen̂atken̂e Kporin komo rwonîmtoponho Baaw Peo po kexitaw so. Apoyino pen komo waihkekn̂e ahnoro Baaw Peo pokononho pen komo. Amyamro reha maxe waipîra rma ahnoro Kporin komo Kaan yewetîn̂e komo reha.

5 Apanatanmekrî komo poko oyantomekn̂e Oporin Kaan ha. Owya n̂ekatîmyakn̂e ero rma wekatîmyas awya so hara. Ero ke yîmtapotachonhîrî poko kpanatanmekyaxe so ero yaw roro rma awehtome so amn̂e arowon komo pona awtoche so, aweken komo me mahsîyaxe ero pona awtoche so ha.

6 Ero ke apanatanmetopo komo men ewetîcoko. Ewehcataw awya so kir̂wan me tak mesenpexe anarî yana komo ya. Apanatanmetopo komo rma wa n̂encexe amn̂e. Entache on wara kexe apoko so, Kyopono komo xa mîkyam okre. Takîhsom me xa nat ham, yuhnari yîhtînon̂e me ham, kexe apoko so.

7 Ahce wa natu anarî yana kom hara, mer̂pono pîn me cehsom kom ha? Ponaro kehtopo komo warahra ro mak nasî ponaro n̂examro yehtopo. Meyehra reha nasî Kporin komo Kaan. Apa, ow cma re makronomesî, tîtkexe yîwya ahce na poko kîmtapota xe kexitaw so rma.

8 Kpanatanmetopo komo cma re nasî kîhyaw so, kir̂wan me kehtopo komo. Kir̂wanî ro xa mîn kîhyawno kpanatanmetopo komo. Nai ha ma re ero yipu anarî rowon pono komo yaw mer̂pono pîn me cehsom komo yaw ha?

9 Awehtopo komo ponaro men ehcoko. Twerî men ehcoko anarme awehtîkacho komo poko. Anarme awehtîketaw so an̂enîthîrî komo men mîhcamnoyaxe okwe, ponaro so exihra tak maxe okwe. Twen̂ekarî tak men maxe ero poko awaitopo komo pona roro okwe. On poko marha amxîkrî komo panatanmecoko, aparî komo marha.

10 Orebe po awexitaw so Aporin komo Kaan yeepataino me mesenmekyatken̂e ero yimawno xa ekatîmcoko yîwya so. On wara kekn̂e Noro owya ero kaamo po, Ixaw Yana komo enmeko ohyaka. Omtapotarî xa tan wekatîmyasî yîn̂entarî me so oponaro xa tak ehtome so miya roro, roowo po cehtopo komo yecenarî. Tîmxîkrî komo ya marha n̂ekatîmcowpe amn̂e omtapotarî tîn̂entathîrî kom ha, kekn̂e. Ero wa kekn̂e Kporin komo owya.

11 Ero ke mesenmekyatken̂e îîpî yamrinaka. Wehto ke n̂etahsîyakn̂e xa oco îîpî. Kah yaka roro nawomyakn̂e wehto. Cicwiye xakn̂e îîpî meretîrî tuuna yewru warai ke kopi.

12 Ero yimaw Kporin komo nîmtapowakn̂e awakro so wehto chew rma. Yîmtapotarî mak mencetken̂e, yupun yenîhra ro mak mîxatken̂e.

13 Kakronomexe so omtapotarî yewehcataw awya so, kacho n̂ekatîmyakn̂e awya so. 10 xakn̂e apanatanmetopo komo. Ero poko apanatanmekyatken̂e so. Ero wa men ehcoko, kekn̂e awya so. Ero wa katîkache ero wa apanatanmetopo komo mewrekn̂e toh poko, enporixapu poko, asak hakno poko ha.

14 Ero yimaw marha miyan poko rma oyantomekn̂e Kporin komo apanatanmetopo komo poko hara. On wara kekn̂e owya, Ixaw Yana komo panatanmeko xa hara, ero ponaro marha ehtome so tîrowon komo pona tîtoche so, eeco pona tîtoche so ha, kekn̂e owya.

15-16 Orebe yamrinaw kexitaw so Kporin komo nîmtapowakn̂e wehto chew rma. Ero wa yîmtapowataw yupun yenîhra rma mîxatken̂e. Ero ke kir̂wan̂he awehtopo komo ponaro xa ehcoko kicicme exihra awehtome so. Ero wa ehcoko mîk hak warai cirihra awehtome so. Ponaro awehtopo komo me cirihra ro mak ehcoko, kîîrî warai cirihra, woosî warai marha cirihra ehcoko.

17-18 Ero yipu komo cirihra ro mak cexpore nasî kica, tamopo tîtosom komo warai, tarin̂em komo warai marha, sehrere me tîtosom warai ha na, yukwawno komo warai ha na, yuhnawno warai kica. Noro yipu kuknon cirihra ro mak ehcoko ponaro awehtopo komo me.

19 Anarimaw kahsî na meen̂atu. Kaamo na meen̂atu, nuun̂i anarimaw, xir̂ko anarimaw. Mer̂pono pîn mîn kah yawno komo, ero komo na meen̂atu. Ero komo mamakan me tak tutupentacerî, kacho na mencetu an̂entarî mexan me. Ero wa kacho yewetîra ro mak men ehcoko. Ero komo poko ahwotara ro mak ehcoko. Ero yipu komo Kporin komo Kaan nakîhcekn̂e kweyuru komo me mak, ahnoro kaapu mamawno komo weyuru me rma.

20 On wara tko awir̂atken̂e so Kporin komo, tîyanan me awahsîyatken̂e so amyamro reha. Wehto yen yawno wara mîîxatken̂e, pehu ciixapu yawno wara, Ero wa mîîxatken̂e Exitu po awexitaw so. En̂exa tak awekyatken̂e so tîyanan me awitome so, tîwyanî ro me awahsîtome so ha. Ero ke ero warai me tak maxe oroto.

21 Opoko tko nîrwonakn̂e Kporin komo apoyero so. Ero ke on wara kekn̂e owya, Xotaw Yepu watohra ro mak esko. Kir̂wan pona xa tohra esko roowo pona. Ixaw Yana komo ya wîmyasî eken komo me ero pona tohra esko, kekn̂e owya. Yaaro xa kekn̂e owya, cemaro pîn me ro mak.

22 Ero ke tanî rma thakwa kwaihyasî on po rma. Xotaw Yepu watohra wasî owî reha. Amyamro reha mîwacexe. Kir̂wan tak mahsîyaxe amyamro reha aweken komo me.

23 Kir̂wan̂he awehtopo komo ponaro rma tko ehcoko. Aporin komo Kaanî mtapotachonho yîhcamnopîra ro mak ehcoko, Omtapotarî ewetîcoko awakronomachome so owya, kacho. Mîk hak warai komo cirihra ro mak men ehcoko. Noro yipu poko kîtwermetken̂e so. Cirihra ro mak ehcoko, wîîkekn̂e. Ero ke ero wa kachonho ponaro men ehcoko.

24 Wehto mak Mîk Aporin komo Kaan, kakn̂in̂e xa oco. Kewyoman̂e xa Mîk ha.

25 On wara tko na matu amn̂e, amxîkrî komo tak n̂ewruyaxe. Ero yinhîrî aparî komo n̂ewruyaxe hara. Poritomotho me tak mehtîkexe amyamro arowon komo po ero yimaw tak na kicicme matu kica. Mîk hak warai na miir̂atu anarimaw, ponaro awehtopo komo. Kicicme men ero yipu ciitopo n̂een̂asî Aporin komo Kaan. Ero ke Noro yîrwonmekn̂e me men maxe.

26 Ero wa awexitaw so yohno men mîwaiyaxe. Arowon komo po exihra tak maxe ero yimaw. Xotaw mîwacexe roowo yahsîtome ero po exihra tak maxe okwe. Pahkî exihra maxe iito. Mîwaiyaxe men okwe. Yaaro tan wîîkes awya so. Kah yawno komo wan̂ikyasî, roowo pono komo marha wan̂ikyasî. Ero warai komo wan̂ikyasî kicicme awehtopo komo yekatîmn̂e me xa hara amn̂e.

27 Ero wa awexitaw so awakpayaxe so men okwe Kporin komo mîk hakî yana komo cheka. Iito tak asak mak mehtîkexe okwe. Kporin komo awen̂epexe so mîk hak rowon pono komo cheka. Iito tak maxe n̂examro chew asak mak tak okwe.

28 Iito awexitaw so tooto n̂iritho poko mak mahwowaxe kica. Ero yipu tak nasî ponaro awehtopo komo me. Weewe ciixapu ponaro maxe, toopu ciixapu ponaro marha na. Kenîn̂e pînî ro mak mîk noro yipu komo, kentan̂e pîn, eseresman, kesunukn̂e pîn marha. Ero yipu ponaro maxe kica iito anarî yana komo chew.

29 Iito awexitaw so tko Aporin komo Kaan mepor̂at hara na. Cerewre xa tak na mepor̂atu, yaaro xa tak. Ero wa epor̂ataw awya so n̂eseporpesî tak hara awya so.

30 Mesemetanmekyaxe xa amn̂e, awya so wekatîmyasî ero yipu chew. Ero manhîrî yimawno pahnoke exitaw tak ero wa maxe okwe. Ero yimaw tak Aporin komo Kaan ponaro tak maxe hara, ponaro awehtopo komo ro me xakn̂e, Noro ponaro tak maxe hara. Yîmtapotarî tak mewehcat hara.

31 Kîpînîn yawno xa Mîk Aporin komo Kaan. Ero ke awahsîpînkara so nasî, awaikatîkara so marha. On wara kekn̂e aporîn pen komo ya, Yaaro xa tan wîîkesî, cemaro pîn me ro makî. Omtapotarî yewehcataw awya so kakronomexe so, kekn̂e. Ero wa kachonho poko yîtwen̂ekarîntara ro mak nasî.

32 Keserepokacho ro Noro n̂enpekn̂e awya so. Anarî komo katî ero yipu n̂een̂atu? Kacoko ika kaapu poko hakno komo ya rma. Pahxan pen komo poko marha kacoko, kakîhtotoponhîrî n̂ixa rononho pen komo poko ha. Ero yipu ma re n̂een̂atken̂e n̂examro pen? Ero yipu ma re n̂encetken̂e anarî komo ya entoponho hara?

33 Kaanî mtapotarî mencetken̂e amyamro wehto chew tîmtapotaxmu rma kopi. Waipîra rma mîxatken̂e ero yipu yencetaw. Anarî komo ma re ero wa xatken̂e hara?

34 Exitu po awexitaw so awahsîso cekn̂e iina, anarî rowon pono komo chewnonho yahsîso ha. Tîyanan me awitome so ero wa xakn̂e. Exipsiu pen komo n̂emetanmekyakn̂e, cirihnî nîir̂akn̂e wero ro so, eserepokacho komo me xa. Tamokaritî me n̂esenpekn̂e n̂examro pen yîwîrîmetaw, etapoyankaxapu wara xa. Ero wa Exipsiu pen komo n̂iir̂akn̂e awero ro so.

35 Ero warai rma n̂enpekn̂e Kporin komo awya so, Noro xa Mîk Kaan ham, anarî exihra ro mak nasî, kachome tak awya so ero yipu n̂enpekn̂e awya so reha.

36 Kah yaw cexitaw rma tîmtapotarî n̂ekatîmyakn̂e awya so. Roowo po rma tak twehtorî n̂enpekn̂e awya so porinî ro mak. Yîmtapotarî mencetken̂e wehto chei tîmtapotaxmu rma kopi.

37 Aporin pen komo xe tî xakn̂e Kporin komo. Ero ke awahsîyatken̂e so tîyanan me, n̂examro yepamtho kom ha. Ero ke marha Exitu poi awekyatken̂e so Cekatî ke rma awekyatken̂e so kar̂pe ro mak cexirî ke.

38 Mîk hak rowon pono komo nîhcamnopesî marha awya so ekenhîrî komo yahsîtome awya so. Mer̂pora ro mak naxe n̂examro anîhcamnorî komo, ayopo so naxe. Kar̂pe marha naxe ayopo so. Awar̂axe so tak ekenhîrî komo pona yîrowonthîrî komo tîmtome awya so aweken komo me. Oroto rma nîmyas awya so.

39 Ero ke on wara kacho ponaro xa ehcoko oroto, Kaan xa Mîk Kporin komo. Ponaro xa naxe kah yawno komo, roowo pono komo marha. Noro yipu Mîkî Kaan, anarî exihra ro mak nasî, kacho ponaro ehcoko. Ero wa kacho ponaro xa ehcoko.

40 Ero ke marha Noro ya apanatanmetopo komo ewetîcoko, awya so wekatîmyasî oroto ero. Ero yewetîche kir̂wan̂he tak maxe esemetanmekîra. Amxîkrî komo marha esemetanmekîra naxe awaipuche so. Pahkî ro mak maxe arowon komo po waipîra. Eroromero Aporin komo Kaan nîmyas awya so aweken komo me, kekn̂e. Ero wa kekn̂e Moises Ixaw Yana komo ya.

41-42 Ero yinhîrî tak ewto komo n̂etahcakn̂e Moises tooto wapatho yemahcitopo me. Anarimaw so tpoyino na waihketu anarî kom ha. Tanmerora ro mak waihketu, Noro xera ro mak wasî, kan̂e pîn me. Noro yipu komo yemahcitopo me n̂etahcakn̂e ewto komo, waipîra ehtopo kom ha.

43 On warai komo n̂etahcakn̂e, Bese, axawa pono, woskara pono ha. Huben yepamtho komo yemahcitopo me xakn̂e ero. Hamoce tak n̂etahcakn̂e Kace yepamtho komo yemahcitopo me hara. Xireace pono mîn Hamoce. Koran tak n̂etahcakn̂e Manases yepamtho komo yemahcitopo me hara. Basan pono mîn Koran. Ero warai komo n̂etahcakn̂e Moises tooto wapatho yemahcitopo me.

44-46 Taa, ero warai poko Ixaw Yana komo panatanmekyakn̂e Moises. Exitu poi mokuche so ero warai n̂ekatîmyakn̂e yîwya so. Ero yimaw woskara po xatken̂e Ixaw Yana komo. Bece-Peo yecento xatken̂e ero yimaw, Xotaw xehxa ha ka. Sion pen rowontho po xatken̂e, Amohew komo kayaritomon pen rowontho po. Esbon xakn̂e noro pen yewtontho. Noro pen nar̂metken̂e Moises komo, Ixaw Yana komo, Exitu poi mokuche so. Noro pen rowontho po xatken̂e Ixaw Yana komo ero yimaw.

47 Noro pen rowontho nahsîyatken̂e ceken komo me. Oki pen rowontho marha nahsîyatken̂e Basan pono komo kayaritomon pen rowontho ha. Ero wa xatken̂e Amohew komo kayaritomon pen, asakno roro rma. Xotaw xehxantho mîkyam xatken̂e resce n̂ixan kom ha.

48-49 On wicakno mîn xakn̂e yîrowonthîrî komo, Aroe pona rorono mîn xakn̂e Ahnon yecihtawno pona rorono ha. Sion Yîpîn pona rorono marha mîn xakn̂e. Ehmonî rma mîn Sion Yîpîn. Woskara marha xakn̂e yîrowonthîrî komo me Xotaw xehxan mak ha, resce n̂ixan ha. Araba N̂ikithon pona rorono marha mîn, Piska Yîpîn yamrinawno pona rorono ha. Ero wicakno mîn xakn̂e yîrowonthîrî komo Ixaw Yana komo nahsîtho tak. Ero wicakno nahsîyatken̂e ceken komo me.