Ero yinhîrî tak ahnoro Ixaw Yana komo nan̂ikyakn̂e xa hara Moises. N̂examro mokuche on wara kekn̂e yîwya so. Ai, oyakno komo, omtapotarî entatamcoko xa hara. Kporin komo ya apanatanmetopo komo tan wekatîmyas awya so oroto. Ero ke men ahsîcoko, ewetîcoko marha.

2-3 Pahxa nîmtapowakn̂e Noro kakro so Orebe yamrinaw kexitaw so. Kakronomexe so oyewecataw awya so, kacho n̂ekatîmyakn̂e kîwya so. Kporin pen komo ya reha ekatîmra xakn̂e ero wa kacho. Kîwya so mak ero wa kekn̂e. Tan taxe kîwyam waipîn komo, kîwya so mak kekn̂e.

4 An̂entarî komo me nîmtapowakn̂e Kporin komo. Wehto chew rma nîmtapowakn̂e, îh pono chew ha.

5 Kporin komo mtapotarî wekatîmyakn̂e awya so. Mehxa xakn̂e Kporin komo, xehxa mîxatken̂e amyamro hara. Ayotaw so kecececekn̂e. Meraswatken̂e wehto pona. Îîpî yamrinaka mokuhra mîxatken̂e. Ero ke yîmtapotarî wekatîmyakn̂e awya so.

6 Taa, on wara kekn̂e Kporin komo owya, Aporin komo Ow Kaan ha, Exitu poi awekn̂enhîrî kom ha. N̂examro yanton me mîxatken̂e etowîn me ro mak okwe. Kowyatken̂e so tko Owî.

7 Anarî cirihra ro mak men ehcoko ponaro xa awehtopo komo me oyemtaka hara.

8-10 Ponaro awehtopo komo cirihra ro mak ehcoko. Kah yawno warai me cirihra ehcoko, roowo pono warai me, yukwawno warai me, ero warai me cirihra ehcoko. Ero warai mamaka yutupentara marha ehcoko. Noro yipu poko ahwotara ro mak ehcoko. Aporin komo xa Ow ha, awewyoman̂e komo. On wara wasî apoko so, kicicme exitaw yîîm ero wa ehtoponhîrî komo wiir̂asî epamthîrî komo pona meero. Osorwaw ro na n̂ehretawnometu, 4 ro xa ha na. Ero wicakno komo pona wiir̂asî ooxatî pîn yehtoponho. Etpînîn yawno me kesenpesî ooxatî komo ya reha, owya tpanatanmetopo yewetîn̂e komo ya ha. Ero wa wasî mer̂pono pîn miw komo poko.

11 Twerîhra oyetacira ro mak ehcoko. Aporin komo Kaan Ow ha. Kicicme awehtoponhîrî komo yîhcamnopîra ro mak wasî ero wa oyetaciche awya so.

12-14 Anarme ciicoko awepokaretopo komo po. Aporin komo Kaan ponaro xa awehtopo komo me mak ciicoko. Ero wara rma apanatanmekyatken̂e so Noro. 6 kaamo mak nasî awetapickacho komo me, awemyawno komo ciitopo me ha. 7-nhîrî xa nasî awepokaretopo komo me hara, Aporin komo ponaro awehtopo komo me. Ero po etapickara ro mak ehcoko amyamro, amumuru komo, awemsîrî komo, awanton komo, kîrkomo, wooxam komo, awoh komo, paaka, buhu, onoke warai komo na awoh komo etapickara ro mak n̂ehcowpe. Anarî yana komo marha etapickara n̂ehcowpe achewno komo. Ero kaamo po so epokarecoko mak. Ero wa epokarecoko awanton komo yepokarechome marha kîrkomo, wooxam komo marha. Awara so xa marha n̂epokarecowpe n̂examro.

15 Pahxa awehtoponhîrî komo ponaro xa men ehcoko. Exitu pono komo yanton me thakwa mîxatken̂e iito. En̂exa awekyatken̂e so Kporin komo kar̂pe xa cehtopo ke. Etapoyankaxapu wara awekyatken̂e so en̂exa. Ero wa awekrî ke so ero po awepokarecho komo poko apanatanmekyatken̂e so.

16 Ayopono komo me encoko aamo komo, anocwan komo marha. Ero warai poko apanatanmekyatken̂e so rma Aporin komo Kaan pahxa. Ero wara kekn̂e awya so pahkî awehtome so waipîra, esemetanmekîra marha awehtome so arowon komo po awexitaw so, Aporin komo Kaan nîmyas awya so ero po awexitaw so ha.

17-20 Waihkano cirihra marha ehcoko. Apici komo yai ro exihra ehcoko. Wooxam kom hara, aan̂o komo yai ro exihra marha ehcoko. Emyawnano poko en̂epamra ehcoko. Amîtwono komo poko cemarontara ehcoko.

21 Amîtwono komo pici poko epohkara marha ehcoko. Amîtwono komo mîn poko epohkara ehcoko, mararîn poko, anton poko, kîîrî poko, wooxam poko marha. Iyok poko epohkara ehcoko paaka poko, buhu poko. Ahce na poko epohkara ro mak ehcoko amîtwono komo yemyawno poko, kekn̂e Kporin komo owya, kekn̂e Moises yîwya so.

22 On wara marha kekn̂e yîwya so, Ero warai poko apanatanmekyatken̂e so Kporin komo cesenmeso awexitaw so. Kar̂pe xa nîmtapowakn̂e an̂entarî komo me. Îh po cexitaw rma nîmtapowakn̂e wehto chew, kaweresî chew marha, awarpan chew marha, cîkînînîhno chew ha. Ero wa mak kekn̂e owya, anarî poko apanatanmetopo poko kahra xakn̂e. Ero wa kache tîmtapotarî tak mewrekn̂e toh poko enporixapu poko. Asak hakno poko mewrekn̂e. Mewreche tak ero nîmyakn̂e owya, kekn̂e Moises.

23 On wara marha kekn̂e Moises yîwya so, Ero wa Kaanî mtapotarî mencetken̂e, awarpan chewno mtapotarî ha. Îîpî n̂etahsîyakn̂e wehto ke oco. Yîmtapotarî yentache tak awya so awantoman̂e komo mokyatken̂e ohyaka atribun yantoman̂e kom ha. Poritomo komo marha mokyatken̂e.

24 On wara ketken̂e owya, Kporin komo Kaan tak n̂enpo ham kir̂wanî ro me cehtopo, kayaritomo me xa cehtopo marha. Yîmtapotarî marha centacow wehto chew tîmtapotaxmu rma kopi. Oroto tak on wara kes amna, Kaanî mtapotarî rma xa cencexe kopi waipîra rma cma ha ka.

25 Ahce poyero amna waihya? Amna rma tko na nakn̂iya wehto oco porin. Amna mak waihyasî Kaanî mtapotarî yencetîketaw, Kporin komo mtapotarî ha.

26 Ahto ma re nai Kaanî mtapotarî yentan̂e, waipînî ro mtapotarî yentan̂e waipîn rma ha? Nai ha ma re wehto chew tîmtapotaxmu yentan̂e kopi waipîn. Noro yipu rma amna n̂enta kopi.

27 Ero ke amoro mak xa etoko Kaan mîtkoso yîmtapotarî yentatîkaxi. Entache amok hara amna ya ekatîmso. Amtapotarî reha amna n̂encesî, amna marha n̂ewehcasî, mîîketken̂e owya.

28 Amtapotarî tko tî n̂encekn̂e Kporin komo oyakro amtapowataw so. Ero ke on wara kekn̂e owya, Moxamu mtapotarî wenta, awya kacow ero. Takîhso kacow, kicicme kahra.

29 Kir̂wan̂he exi xe ro makî tko wasî yîropotarî komo. Oponaro xa exi xe so ro mak was miya roro. Owya tpanatanmetopo komo yewetîn̂e me roro exi xe so ro mak wasî miya roro. Ero wa exitaw so esemetanmekîra naxe. Yîmxîkrî komo marha esemetanmekîra naxe miya rorono kom ha.

30-31 Ero ke en̂epeno ka ciita amoro Moises. Amîn komo yaka etocoko hara, kasko yîwya so. Ero yinhîrî omîtkoso amok hara amoro mak. Apanatanmetopo komo wekatîmtîkes awya. Entache awya n̂examro panatanmeko amoro makîrha. On wara kasko yîwya so, Ero wa kacho xa ewetîcoko arowon komo po awexitaw so, Kporin komo nîmyasî arowon komo ero po awexitaw so ha, kasko yîwya so, kekn̂e owya. Ero wa kekn̂e Kporin komo owya.

32-33 Ero ke ero wara rma wîîkes awya so okopuci komo, Aporin komo Kaan ya apanatanametopo komo men ewetîcoko. Etowra ro mak ehcoko, kaari n̂ixan wara etowra, poowa n̂ixan wara marha etowra. Apanatanmetopo komo yaw roro mak ehcoko waipîra awehtome so pahkî. Esemetanmekîra marha awehtome so marha arowon komo po awexitaw so, aweken komo me anahsîrî komo po awexitaw so ha, kekn̂e. Ero wa kekn̂e Moises Ixaw Yana komo ya.