Ero yinhîrî tak on wara kekn̂e xa hara Moises Ixaw Yana komo ya, Apanatanmetopo komo tan wekatîmyasî awya so. On ekatîmko yîwya so, nîîkai owya Kporin komo. On wara cexpore nasî, kacho komo, Kir̂wan̂he kiir̂axe so on wara awexitaw so, kacho komo marha. Ero wa kacho komo tî wekatîmya awya so ewetîtome awya so amn̂e arowon komo po awexitaw so, tuuna yepu mîwacexe eeco pona awesekenmachome so ero po awexitaw so ha.

2 Ero wa kacho tî cewetpore nai twerî awehtome so Aporin komo Kaan poko, amxîkrî komo marha twerî ehtome Noro poko, aparî komo marha. Ero wa tî cexpore nai apanatanmetopo komo yewetîtîkan̂e me awehtome so miya roro awaitopo komo pona roro, pahkî awehtome so waipîra. Ero wa tî cewetpore nai apanatanmetopo komo, awya so wekatîmyasî ero.

3 Ixaw Yana komo amyamro, awya so wîîkesî, omtapotarî entacoko. Apanatanmetopo komo ponaro men ehcoko awakronomachome so Kaan ya, awepamtome so marha mer̂pora cehso ro. Ero wara mepamyaxe amn̂e iito arowon komo po, kekn̂e rma Kaan aporin pen komo ya. Paaka mown pen nas iito mer̂pora ro mak, ween pen marha, kekn̂e marha yîwya so. Ero wara rma kekn̂e Aporin komo Kaan awya so, ponaro aporin pen komo yehtopo ha.

4-5 Oyakno komo, Ixaw Yana komo amyamro, Ero ke omtapotarî men ka entacoko. Cewn̂an mak Mîk Kporin komo Kaan. Ero ke Noro xe ro mak men ehcoko, ponaro awehtopo komo xe ha. Yaaro xa yiixe ehcoko. Noro ponaro mak ehtîkacoko. Noro yanme marha ekaritotîkacoko.

6 Kporin komo ya apanatanmetopo komo tan wekatîmyas awya so. Ero ponaro xa ehcoko.

7 Ero poko marha amxîkrî komo panatanmecoko. Ero poko panatanmetopo komo ponaro xa men ehcoko. Ero poko amtapotacoko amîn komo yaw awexitaw so ceremaxi, esama yaw awcetaw so marha, awetakriyataw so marha, ahcetaw so hara. Ero yimaw so amtapotacoko apanatanmetopo komo poko.

8-9 Ero marha mewrecoko karita poko. Mewrexapu tak yimicoko awamorî komo poko ponaro rma awehtome so. Apewo so rma yimicoko. Ametatan komo yecepu poko marha mewrecoko, ahroron komo wacan metatan poko marha. Ero wa so mewrecoko ponaro xa awehtome so.

10 Amn̂e Aporin komo Kaan awar̂axe so arowonî ro komo pona. On wîmyas amn̂e awepamthîrî komo ya arowon komo me. Yaaro xa tan wîîkesî cemaro pîn me ro makî, kekn̂e aporin pen komo ya. Abraaw pen ya tî kekn̂e, Isake pen ya marha tî, Xako pen ya marha tî. Ero pona rma tak awar̂axe so. Porin mîn iitono ewto mko, kir̂wanî mko ha. An̂irithîrî pîn komo rma mîn ewto mko. Ero yipu pona awar̂axe so.

11 Iitononhîrî pen komo mîntho mak mahsîyaxe. Copoyem komo mahsîyaxe an̂enmekîthîrî pîn komo ke. Tuuna marha mahsîyaxe anahtothîrî pîn komo. An̂irîthîrî pîn komo marha mahsîyaxe uupa yatî, oripera marha. Ero yipu yeperîrî mahyaxe amn̂e tmaxmitaxi ro.

12 Ero wara awexitaw so tak twerî men ehcoko. Kporin komo yîhcamnopîra men ehcoko Exitu poi awekn̂enhîrî kom ha. Iitono komo yanton me mîxatken̂e ahsîpînkan me xa okwe. Kporin komo tko awowyatken̂e so. Ero ke yîhcamnopîra ehcoko.

13 Noro poko mak twerî ehcoko, Aporin komo Kaan poko. Noro ya mak etantomapocoko. Noro yosotî makî reha etacicoko yaaro xa amtapotarî komo yentachome awentan̂e komo ya.

14-15 Anarî komo cirihra ro mak ehcoko ponaro awehtopo komo me. Ponaro amîtwono komo yehtopo ewetîra ro mak ehcoko. On warai Mîk Aporin komo Kaan, awewyoman̂e komo Mîk. Achewno komo rma Mîk ha. Ero ke nîrwonasî tak men apoko so anarî ciir̂ataw ponaro xa awehtopo komo me. Awaikexe so tak okwe, roowo pono mera tak awehtome so.

16 Kporin komo yukukmara ro mak men ehcoko yîrwonmetopo poko. Masa po mukukmetken̂e kica, ero wa kahra tak ehcoko.

17 Kporin komo Kaan ya apanatanmetopo komo men ewetîcoko, On wara men ehcoko, ero warahra reha ehcoko, kekn̂e awya so ero wa kacho ewetîcoko.

18-19 Kir̂wan̂he mak ehcoko takîhsom me awentome so Kporin komo ya. Ero wa ehcoko awakronomachome so yîwya, awtotome so marha arowon komo yahsîso. Kir̂wan mîn arowon komo, ahsîso mîîcexe ero. Ero poko rma wa kekn̂e Kporin komo aporin pen komo ya. Yaaro xa tan wîîkesî esemîknopîn me ro mak, ero wîmyasî amn̂e aweken komo me, kekn̂e. Aaxatî pîn komo rma wa nar̂mapesî awya so tîmtapotachonhîrî yaw roro rma. Ero ke apanatanmetopo komo ewetîcoko.

20 Taa, on wara na nîîke amumuru komo amn̂e pahxaro, Apa, ahce wa kacho mîn Kporin komo ya apanatanmetoponhîrî komo? Ahce warai pokono na mîn, On wara ehcoko, ero warahra reha ehcoko, kachonho? nîîke na awya so.

21-22 Ero wara ketaw on wara eyuhcoko, On wara amna xakn̂e okopuci, Paraw yanton me thakwa amna xakn̂e Exitu po. Etowîn me ro mak amna xakn̂e. En̂exa tko amna n̂ekyakn̂e Kporin komo. Kar̂pe xa cehtopo n̂enpekn̂e amna yowtome. Cirihnî n̂iir̂akn̂e yaake ro amna wero ro rma. Yîwîrîmano ritopo xa mîn n̂iir̂akn̂e. Exitu pono pen komo nîwîrîmekn̂e, Paraw pen marha, Paraw yawno pen komo marha.

23 En̂exa kekyatken̂e so tînîmrî pona tak kaatome so hara. Ero men wîmyas awya so amn̂e, kekn̂e kporin pen komo ya. Yaaro xa tan wîîkesî, cemaro pîn me ro mak. Ero ke ero pona kaatome so kekyatken̂e so Exitu poi.

24 Ero ke ero wa kpanatanmekyatken̂e so Kporin komo Kaan tpoko rma twerî kehtome so. Ahnoro ewetîcoko apanatanmetopo owya, awakronomachome so owya, waipîra n̂he marha awehtome so, kekn̂e. Ero wara rma maxe oroto, ero ke ewetîcoko rma kir̂wan̂he rma awitome so owya, kekn̂e.

25 Ero ke yîwya kpanatanmetopo komo ponaro xa cexpore nasî, cewetpore xa nas ha. Ero wara kexitaw so, Kir̂wan komo mîkyam okre, kacho me tak taxe Kporin komo Kaan ya, kacoko amumuru komo ya, kekn̂e. Ero wa kekn̂e Moises Ixaw Yana komo ya.