On wara xa hara kekn̂e Moises Ixaw Yana komo ya, Amn̂e Aporin komo Kaan awar̂axe so aweken komo me cehsom pona. Iitono komo nar̂mapes awya so. Yaake nar̂mapesî awya so kayaritomo pen komo, maywen pen komo yakro rma. Etew komo nar̂mapesî awya so, Kihkasew komo, Amohew komo, Kananew komo, Perisew komo, Epew komo, Xebusew komo. 7 mîkyam kayaritomo komo anar̂marî pen komo. Mer̂pora naxe n̂examro maywen komo ayopono me so, kar̂pe so marha naxe ayopono me so. Ero wa so naxe etîme re.

2 Noro yipu komo rma tko nar̂mapesî Kaan awya so. Ar̂mache tak awya so waihkatîkacoko men yîmton me ro mak. Cetkurunpecerî, kacho poko yîmtapotara ro mak ehcoko n̂examro yakro. Yîpînîn yaw so exihra ro mak ehcoko.

3-4 N̂examro wosîn komo ahsîra ro mak ehcoko apici komo me. Awemsîrî komo tîmîhra marha ehcoko yumumuru komo pici me. N̂examro yemsîrî komo marha ahsîra ehcoko amumuru komo pici me. N̂examro yemsîrî komo yahsîyataw rma amumuru komo ya, amumuru komo ropotarî men naknamexe okwe oponarora tak ehtome so. Ponaro cehtopo komo pokono me n̂iir̂axe hara okwe. Ero yanme Aporin komo tak men nîrwonasî apoko so. Ponan̂e rma tak awaikexe so okwe.

5 On wara xa ciicoko iitono komo, yixkacoko kr̂a yînakîtothîrî komo, tîmsom yakn̂itoponho, akuhr̂apocoko piiri yin̂irithîrî komo toopu, mîk hak warai me wakiknoxapu komo marha akn̂icoko weewe komo. Mîk hak warai me ciixapu komo marha akn̂icoko. Ero wa yîhcamnocoko kr̂a anarî ro ponaro ehtoponhîrî komo.

6 Aporin komo yanan xa amyamro, Kaan yanan xa. Ero warai me awahsîyatken̂e so anarî ponarono pîn me mak awehtome so. Amyamro makî reha awahsîyatken̂e so tîyanan me, yîpînîmîkno me xa tak awehtome so tîwya. Ero wa ahsîra reha nas anarî komo reha, roowo poko hakno komo reha.

7-8 Mer̂pora xa naxe n̂examro, ero ke oyanan me wahsîyasî, kahra xakn̂e Kporin Komo apoko so. Miyan komo xawyaka xa matko maxe asak makî n̂he. Aaxe so mak xakn̂e tanmero. Tîmtapotachonhîrî yaw roro rma cexi xe marha tî xakn̂e. Yaaro xa tan wîîkesî, cemaro pîn me ro mak, Oyanan me xa maxe, kekn̂e aporin pen komo ya, ero wa kachonho yaw roro cexi xe xakn̂e. Ero ke kar̂pe xa cehtopo n̂enpekn̂e awowrî komo poko. Paraw yanton me mîxatken̂e ahsîpînkan me ro mak. Kaanî tko awahsîpînkapetken̂e so yîwya, Exipsiu komo kayaritomon ya ha.

9 Ero ke on wara xa kacoko Aporin komo Kaan poko, Noro mak Mîkî Kaan, Kemîknon̂e pînî ro mak. Tîmtapotachonhîrî yaw roro rma kakronomexe so, kîpînîn yaw so marha nasî. Ero wa nasî miya rorono komo poko, 1.000 ro ehretawnomaxapu komo poko. Ero wa tîîxatî komo nakronomesî, tîmtapotarî yewetîn̂e kom ha.

10 Tîîxatî pîn komo poko reha n̂esepanîyasî kir̂wantaw rma. N̂examro pen waihkesî. Wara mak esepanpîra nasî tîîxatî pîn komo poko. Kir̂wantaw so rma n̂esepanîyasî poko so.

11 Ero ke apanatanmetopo komo wekatîmyas awya so oroto, On wara men ehcoko, kacho, Ero warahra reha ehcoko kicicme exihra awehtome so, kacho kom ha. Ero wa kacho ponaro men ehcoko ewetîtome roro awya so.

12 Taa, pahxaro tak apanatanmetopo komo ponaro maxe okre, mewehcaxe marha. Ero wa awexirî ke so tîmtapotachonhîrî yaw roro rma tak awakronomexe so Aporin komo Kaan, Kakronomexe so amn̂e, apînîn yaw so wasî, kekn̂e aporin pen komo ya. Yaaro xa tan wîîkesî, cemaro pîn me ro mak, kekn̂e yîwya so. Ero ke ero wa kachonho yaw roro rma awakrexe so.

13 Aaxe so nasî, awakronomexe so, awepamnoyaxe so marha. Waipîra so n̂iir̂asî amxîkrî komo. Etwîrîman me marha n̂iir̂asî anatîrî komo yeperîrî, puruma, uupa yukun yaxan, aseci, ero warai. Waipîra so marha n̂iir̂asî awoh komo paaka xîkrî, oper̂a xîkrî marha. Ero wa awakronomexe so Kaan arowonî ro po awexitaw so tak. Ero wîmyas awya so arowon komo me, kekn̂e Noro aporin pen komo ya, ero po awexitaw so awakronomexe so.

14 Anarî komo rma re nakronomesî Kaan. Amyamro xa yo awakrexe so n̂examro yopo. Yîmxîtan me exihra ro mak maxe kîrkomo, wooxam komo marha. Yîmxîtan me exihra marha nas awoh komo, pîra ro mak.

15 Eper̂a yawno mera ro mak tak awir̂axe so. Kicicitho ro mak meen̂atken̂e eper̂a Exitu pono komo pokono. Ero yipu ya awahsîpora nasî. Aaxatî pîn komo poko xa nahsîpesî ero yipu ya.

16 Anarî yana komo waihketîkes awya so Aporin komo Kaan, anarmerpan kom ha. Ar̂mache awya so waihkatîkacoko. Yîpînîn yaw so exihra ro mak ehcoko. Ponaro n̂examro yehtopo komo pokohra ro mak ehcoko. Noro yipu komo poko awexitaw so awemcinon̂e komo me men naxe okwe.

17-18 On wara na mîîketu ahnaw so, Karitî komo xa on pono komo kopi. Ahce wa thakwa re tar̂metu? mîîketu na. Erasîra rma tko ehcoko pona so. Paraw penî n̂emetanmekyakn̂e Aporin komo Kaan. Exipsiu komo ahnoro n̂emetanmekyakn̂e. Emetanmetoponhîrî komo ponaro rma ehcoko.

19 N̂examro pen yemetanmetoponho rma meen̂atken̂e, cirihnî ciitopo ha. Kar̂pe Kaan yehtopo yenpotopo meen̂atken̂e, etapoyankaxapu wara ehtopo rma meen̂atken̂e. Ero yipu ke awowyatken̂e so Aporin komo Kaan. Ero wa xa marha n̂examro nîwîrîmes hara, pona so meraswaxe n̂examro.

20-21 N̂etîmcetu rma tko na anarî komo anar̂marî kom ha. N̂eseyamyatu mak na anarî komo. Noro yipu komo cheka n̂en̂epesî okomo waihkachome tak awya so. Ero ke erasîra ro mak ehcoko n̂examro pona. Karitî ro xa Mîk Aporin komo Kaan. Eraspetono ro mak Mîk. Noro rma nasî awakronoman̂e komo me reha.

22 Iitono maywen komo nar̂mapesî Aporin komo Kaan awya so. Yohno so tko ar̂mapora nasî. Yamoro n̂he mak nar̂mapetîkesî awya so. Yohno so ar̂mapetaw awya so kamara tak na n̂epamya, okoyi komo, onoke na aweskan̂e kom ha.

23 Iitono komo rma tko nar̂mapesî awya so. Amamawno me so n̂iir̂asî tîhcamnoso cehso ro.

24 Iitono kayaritomon komo marha nar̂mapesî awya so. N̂examro pen yosotî meero mîhcamnoyaxe, osotî komo yentara tak ehtome kaapu poko hakno komo. Ayopono komo exihra ro mak naxe. N̂examro pen mîwaiketîkexe.

25 Iitono komo yar̂mache roro awya so ponaro n̂examro yehtopo komo me wakîknoxapu komo akn̂icoko. Ero porokutho poko epohkara ro mak ehcoko prata ciixapu poko, ooru ciixapu poko. Ahsîra ro mak ehcoko. Ero yahsîche rma awamxikn̂e wara rma nas okwe. Kicicme ro mak nasî ero yipu Aporin komo Kaan ya.

26 Kicicitho arîhra ro mak men ehcoko amîn komo yaka. Arîche rma na awya so Kaanî rma men awetahcaxe so amyamro hara twaihkaxmu me hara, amîn yaka an̂arîthîrî komo wara xa marha. Kicicme ro mak yîhtînocoko ero yipu. Anwîrîyakarî komo me yîhtînocoko. Takuhr̂aposom me mak encoko ero yipu. Kaan nîwîrîmarî me cehsom mîn ha. Ero ke yiixera ro mak ehcoko, kekn̂e. Ero wa kekn̂e Moises Ixaw Yana komo ya.