On wara marha kekn̂e Moises Ixaw Yana komo ya, Apanatanmetopo komo wekatîmyas awya so oroto. Ero men ewetîtîkacoko etpoyira ro mak. Waipîra so n̂he awehtome so ewetîcoko, awepamtome so n̂he marha, arowon komo pona awtotome so marha. Aporin pen komo ya tî kekn̂e Kporin komo, Ero men wîmyas amn̂e arowon komo me, kekn̂e tî yîwya so. Ero pona tak mîîcexe amn̂e esekenmaxi. Ero wa awehtome so ewetîcoko on apanatanmetopo komo.

2 Axawa pore awatoponhîrî komo yîhcamnopîra ehcoko. Aporin komo Kaan Mîk awar̂atken̂e so ero pore. 40 cimn̂ipu awar̂atken̂e so ero pore kar̂pen me tak awesehtînotome so, aropotarî komo yukukmachome marha, Omtapotarî na n̂ewehcatu, ewetîra katî nat okwe, kachome ero yipu pore awar̂atken̂e so.

3 Kar̂pen me cesehtînosom me awiri xe so xakn̂e. Ero ke rooma poko awir̂atken̂e so. Maana ke tak awurmetken̂e so. Maana enîhra mîxatken̂e pahxa. Aporin pen komo marha enîhra xatken̂e. Ero yipu ke awurmetken̂e so on wara kachome awya so, Kuru komo mak pîn mîn kecehton̂e komo, waipîra kiitopo kom ha. Kporin komo mtapotarî marha nasî kecehton̂e me, etpoyira ro mak ha, kachome awya so. Ero wa kachome awya so rooma poko awir̂atken̂e so.

4 40 cimn̂ipu metar̂atken̂e. Ero yimaw aponon komo yetahyaxkara xakn̂e. Yupurutara marha xakn̂e ahtarî komo.

5 Ero ke on wara men yîhtînocoko, tumumuru panaresî yîîm ero wa xa marha apanarexe so Aporin komo Kaan.

6 Ero ke Aporin komo Kaanî ya apanatanmetopo komo men ewetîcoko. Noro yehtopo yaw roro mak ehcoko. Noro ponaro xa men ehcoko.

7-9 Kir̂wanî ro mak mîn arowon komo, iina awar̂axe so Aporin komo Kaan ero. Tuuna nasî iito tatkem. Woskara po so nasî tuuna pîtho, îh po so marha. Arowon komo po puruma natîkwasî, sepata marha, uupa marha, piiku yepu, roman kom ha. Iito marha nasî aseci, ween marha. Iito awexitaw so iyurucme exihnî me maxe. Turke xa matko maxe ha. Ero exihra nai ham tan okwe, kahra ro mak maxe iito ahce na poko. Ahnoro wa nai ha iito yiixe awehtopo komo. Pehu me nasî toopu iitono ha. Kobre marha mowyaxe îîpî yatumnai.

10 Iito meseresmexe roro tmaxmitaxi ro okre. Ero wa aweseresmache so on wara men kacoko Aporin komo Kaan ya, Apa, kir̂wanî ro pona amna mekenmai ham okre, kacoko men yîwya.

11 On ponaro mak ehcoko, Aporin komo Kaan yîhcamnopîra ehcoko. Yîwya apanatanmetopo komo yîhcamnopîra marha ehcoko awya so wekatîmyas oroto ero ha.

12-14 On wara tko na mat amn̂e, tmaxmitaxi ro meseresmetu, amîn komo marha miir̂atu kir̂wan. Ero yipu yaw tak menmayatu. Awoh komo marha tak n̂epamya paaka, oper̂a marha. Awemyawno komo marha n̂epamya prata, ooru, ahnoro awemyawno n̂epamya. Ero wa awexitaw so on wara tak na matu, mehcoyoponketu ha na kica, Aporin komo Kaan marha na mîhcamnoyat okwe, Exitu poi awekn̂enhîrî kom ha. Ahsîpînkan me Paraw yanton me awexitaw so awowyatken̂e so, Noro poko na mîtwen̂ekarînwatu okwe.

15 Axawa pore awan̂enhîrî komo Mîk kicicintari. Ero po so xakn̂e keskan̂e komo, okoyi komo, cikiri kom ha. Tuuna ken̂arî pîn pore awar̂atken̂e so. Tuuna ke rma tko awokpetken̂e so toopu yatumnaino ke, saama yatumnaino ke ha.

16 Ero pore awetar̂ataw so maana ke awurmetken̂e so. Aporin pen komo yuru warai pînî ro mak mîn nîmyakn̂e awya so. Ero yipu ke awurmetken̂e so ehcoyoponkan me ro mak awitome so. Ero yipu ke marha akukmetken̂e so awakretome so tak amn̂e akukmacho komo yenatîche.

17 On wara tak na mîîket amn̂e, Yukurumîkno me xa wai ham okre, kar̂pe marha nasî oyamorî. Ero ke rma on wahsîye ham oyemyawno pen mer̂pono pîn, mîîket ha na kica.

18 On wara xa matko kacoko aropotaw so, Oporin mak oriyasî oyemyawno yahsîn̂e me, Kaan mak ha. Tîmtapotachonhîrî yaw roro rma oriya ham, kacoko. On wara kekn̂e oporin pen komo ya, Yaaro xa tan wîîkesî, cemaro pîn me ro mak, Kakronomexe so men amn̂e, kekn̂e matko oporin pen komo ya. Ero ke ero wa kacho yaw roro rma oyemyawno yahsîn̂e me wa or̂iyasî, kacoko.

19 On wara tko na mat amn̂e ahce wa na awexiche so, Aporin komo poko rma na mîtwen̂ekarînwat okwe, Kaan poko. Ponaro anarî komo yehtopo tak na mewehcatu okwe. Oporin amoro, mîîketu na noro yipu ya. Ero ke on wara men wîîkes awya so, ero wa awexitaw so mîwaitîkexe men okwe.

20 Mîk hak rowno pono komo nar̂mapes awya so Kporin komo ero wa xa marha tak mîwaiyaxe amyamro pen hara okwe. Aporin komo Kaanî mtapotarî yewetîra awexirî komo yanme mîwaiyaxe okwe, kekn̂e. Ero wa kekn̂e Moises Ixaw Yana komo ya.