On wara kekn̂e xa hara Moises Ixaw Yana komo ya, Omtapotarî men ka entacoko oyakno komo, Ixaw Yana komo amyamro. Kîmtapowasî rma ka awakro so. Pahnoke xa tak nasî Xotaw watotopo awya so. Ero mîwacexe arowon komo pona. Mîk hak maywen komo yekenho yahsîso mîîcexe. Ayopono komo mîkyam mer̂pono pîn, ayopono komo marha mîkyam karitî komo xa. Porin marha mîn n̂examro yewton komo twacayem kom ha. Kawno marha mîn n̂examro yewton wacan, kah yaka rorono mak mîn ha.

2 Kawno komo marha mîkyam iitono komo, karitî marha. Enake yepamtho komo mîkyam kopi. N̂examro yekaci rma re mencexe. Onoke ma re nai Enake yepamtho komo yopono me kopi? kacho mencexe.

3 On wara kacho ponaro tko ehcoko, Aporin komo xa cesî apoturme so, ponaro awehtopo komo. Wehto warai me xa cesî, porin warai me. Noro rma n̂examro pen waihkesî, nar̂mapesî rma awya so. Ero ke ewtonthîrî komo poi men̂epexe. Mîwaikaxe marha yohno rma. Ero wa n̂examro pen mîwaikexe yohno so Kporin komo mtapotarî yaw roro rma.

4 Ero ke ero wa Aporin komo Kaan ya n̂examro yar̂mapoche awya so on wara kahra ro mak ehcoko ahnaw so, Kir̂wan ham kîwyam. Ero ke wa kehce so Kporin komo oona on yahsîtome keken komo me, kahra ehcoko ahnaw so. Kicicme ro makî tko naxe iitono komo. Ero yanme nar̂mapes awya so.

5 Kir̂wan̂he awehtopo komo yanme awarîra so nasî arowon komo pona. Kir̂wan̂he exirî ke aropotarî komo awarîra so nasî iina. Kicicme xa matko naxe iitono komo. Ero yanme mak nar̂mapes awya so Aporin komo Kaan. Tîmtapotachonhîrî yanme marha nar̂mapes awya so. Yaaro xa tan wîîkesî, cemaro pîn me ro mak. N̂examro war̂mesî, kekn̂e aporin pen komo ya, Abraaw pen ya, Isake pen ya marha, Xako pen ya marha. Ero ke ero wa kachonho yaw roro rma nar̂mapesî iitono pen komo awya so.

6 Ero ke on wara men kahra ro mak ehcoko, Kir̂wan̂he kehtopo komo yanme on roowo nîmyasî kîwya so krowon komo, kir̂wan ha, kahra ehcoko. Tîpîmîyewaxkem komo xa matko amyamro kica.

7 Kicicme awehtoponhîrî komo poko yîtwen̂ekarîntara ro mak ehcoko. Aporin komo Kaan mîrwonmekyatken̂e kica axawa po kexitaw so. Ero wa awehtoponhîrî komo ponaro rma ehcoko. Exitu poi amohtoponhîrî komo n̂ixa ro oona amohtoponhîrî komo pona roro Kporin komo yanwekn̂e me roro mîxatken̂e okwe.

8 Pahxa Orebe Yîpîn yamrinaw kexitaw so Kporin komo mîrwonmekyatken̂e ro mak kica. Awaikatîka xe so makî tî xakn̂e okwe.

9 Iito kexitaw so îîpî wawnukyakn̂e toopu yahsîso enporixapu. Kakronomexe so oyewehcataw awya so, kacho rma mîn xakn̂e Kporin komo mtapotarî. Iito wîxakn̂e pahkî îh po. 40 ro kenmayakn̂e iito, 40 ro xa marha kîkokmamyakn̂e iito rma. Oyuru tokuhra ro mak wîxakn̂e ero yimaw, tuuna yerîhra marha.

10 Ero yimaw toopu nîmyakn̂e Kporin komo owya enporixapu, asakî. Kaan yamoyaran ke rma mewrexapu mîn xakn̂e. Ero poko tmewreso xakn̂e Kporin komo mtapotarî. Apanatanmekyatken̂e so Noro awesenmekyataw so. Îh po nîmtapowakn̂e wehto chew rma ero rma mîn xakn̂e yîmtapotarî ahnoro toopu rataw tmewreso.

11 40 kaamo yenatîche tak, 40 ro kokmamche marha, toopu nîmyakn̂e Kporin komo owya mewrexapu, asak hakî, Oyewehcataw awya so kakronomexe so, kacho ha.

12 Ero yinhîrî tak on wara kekn̂e hara Kporin komo owya, Ahtoko hara yohno. Kicicme ro mak tak naxe ayanan komo okwe, Exitu poi an̂ekîthîrî kom ha. Owya tpanatanmetopo komo nahsîpînkace yohno rma okwe. Paaka warai n̂iicow ooru yukuixapu kica, kekn̂e owya.

13 On wara marha kekn̂e Kporin komo owya, N̂examro yehtopo ween̂asî. Tîpîmîyewaxkem komo ro mak mîkyam kica.

14 Ero ke oyakro yîmtapotara tak esko n̂examro poko waihkachome so tak owya. Osotîthîrî komo wîhcamnotîkapesî kr̂a kaapu mamawno komo ya. Awepamrî komo xa yo wepamnoyas hara amn̂e n̂examro pen yopo. Kar̂pe marha n̂examro wiir̂asî n̂examro yopono me ro mak ehtome so, kekn̂e Kporin komo owya.

15 Ero ke îîpî tak wenîhcekn̂e hara wehto ke etahsîyataw rma. Ececoka wahsîyakn̂e toopu mewrexapu asakî, Oyewehcataw awya so kakronomexe so, kacho ha. Ero wa wekyakn̂e.

16 Ero yinhîrî tak keen̂atken̂e so. Kicicme awehtopo komo tak ween̂akn̂e kica. Aporin komo Kaan manwekyatken̂e. Paaka xîkrî warai mîîr̂atken̂e kica yukuixapu. Kporin komo ya apanatanmetoponhîrî komo mahsîpînkace ro mak okwe yohno rma.

17 Ero ke toopu pen war̂mekn̂e roowo pona asakno roro rma, mewrexapu ha. Wahkekn̂e awero ro so rma.

18 Ero yinhîrî Kporin komo mamakan me kesewnapekn̂e xa hara. 40 ro kenmayakn̂e xa hara iito, 40 ro marha kîkokmamyakn̂e xa hara iito rma. Oyuru tokuhra xa hara wîxakn̂e, tuuna yerîhra marha. Ero wa wîxakn̂e kicicme awexirî komo yanme. Kicicme ro mak mîxatken̂e Kporin komo ya. Noro mîrwonmekyatken̂e okwe.

19 Kporin komo pona tko keraswakn̂e. Nîrwonasî xa tak men kopi, wîîkekn̂e. Yaaro, nîrwonakn̂e xa okwe. Awaika xe so xakn̂e okwe. Omtapotarî ponaro tko xakn̂e, pahxa oyencekn̂e ero wa xa marha.

20 Araw poko marha nîrwonakn̂e Kporin komo. Noro waihka xe marha tî xakn̂e okwe. Ero ke Araw poko xa marha kîmtapowakn̂e ero yimaw rma.

21 Ero yimaw marha kicicitho wahsîyakn̂e paaka warai an̂irithîrî komo. Wehto ywaka kr̂a war̂mekn̂e. Ero yinhîrî wakuhr̂apekn̂e, wakihyakn̂e tak pin̂ipici me cehso ro roowo pupuntho wara ro mak. Ero yinhîrî tak war̂mekn̂e aporî kwaka, îh poi tîhtosom kwaka.

22 Ero yinhîrî Tabera po kexitaw so hara Kporin komo mîrwonmekyatken̂e xa hara, Masa po marha, Kibroce-Ataapa po marha.

23 Ero yinhîrî tak Kates Bahn̂eia poi awen̂epetken̂e so Kporin komo. Etocoko arowon komo yahsîso, awya so wîmyasî ero yahsîso, kekn̂e. Aporin komo Kaanî mtapotarî tko manwekyatken̂e. Noro pona enîn̂e pîn me mîxatken̂e okwe, ewetîra mak mîxatken̂e okwe.

24 Kporin komo yanwekn̂e me ro mak maxe meexa rononhîrî rma. Yihcirî me kîhtînoyatken̂e so eronhîrî rma maxe kanwekn̂e me okwe.

25 Taa, 40 kaamo kesewnapekn̂e roro Kporin komo mamakan me, 40 ro marha kîkokmamyakn̂e ero poko rma. Ero wa wîxakn̂e Kporin komo mtapotarî yentarî ke owya, Moxam waihkesî, kacho yentarî ke ha.

26 On wara tko wîîkekn̂e yîwya, Apa, Kaan xa Amoro, amna Porin ha. Ayanan komo cma re waihkara masî. Amxîkrî me cehsomu rma mîkyam. An̂epemathîrî komo mîkyam porin me xa awexirî ke. Exitu poi an̂ekîthîrî komo mîkyam kar̂pe xa awexirî ke.

27 Awanton komo ponaro rma esko, Abraaw ponaro, Isake ponaro, Xako ponaro. Kanwekn̂e me rma re naxe moxamu reha. Ero wa ehtopo komo ponarora cma re masî, kicicme ehtopo komo ponarora, kicicme ehtopo komo ponarora ha.

28 Moxam waihketaw awya on wara men kexe hara Exitu pono komo, N̂examro cma re naar̂akn̂e Kporin komo on poi. Kanan rowon wîmyas awya so, kekn̂e cma tî re yîwya so. N̂ehn̂ekn̂e mak ham iina roro aatopo komo poko. Yiixera so rma xakn̂e ham. Ero ke Exitu poi aano n̂iir̂akn̂e waihkaxî mak axawa pona, kexe men okwe iitono komo, wîîkekn̂e.

29 Ayanan komo rma tko mîkyam Apa, amxîkrî me cehsom ha. Exitu poi an̂ekîthîrî mîkyam. Kar̂pe xa awehtopo menpekn̂e towtopo komo poko. Etapoyankaxapu wara mîxakn̂e towtome so awya, wîîkekn̂e yîwya, kekn̂e. Ero wa kekn̂e Moises Ixaw Yana komo ya.