Ero yinhîrî on wara kekn̂e hara Moises Ixaw Yana komo ya, Ero yimaw on wara tak kekn̂e Kporin komo owya, Toopu xa hara enporiko asakî xa hara. Yihcirî me menpor̂akn̂e ero warai rma enpor̂iko xa hara. Weewe marha akîhtoko yamata me.

2 Ero yinhîrî toh poko mewresî xa hara omtapotarî. Yihcirî poko mewreye, mahkaye ero poko, ero yipu xa marha mewres hara. Mewreche owya ero tak enkakî yamata yaka, kekn̂e owya Kporin komo.

3 Ero ke tak yamata wakîhcekn̂e akaxa yepu. Toopu marha wenpor̂akn̂e asakî, yihcirî me wenpor̂akn̂e ero warai xa marha. Ero yinhîrî tak îîpî wawnukyakn̂e xa hara toh ke cemyarke, enporixapu ke ha.

4 Ero poko tak tîmtapotarî mewrekn̂e xa hara Kporin komo. Yihcirî me mewrekn̂e ero yipu xa marha mewrekn̂e apanatanmetopo kom ha. 10 komo marha mewrekn̂e kpanatanmetopo komo. Awya so kekn̂e îh po wehto chew, awesenmetopo komo po kekn̂e awya so, ero yipu rma mewrekn̂e toh poko. Mewreche tak owya nîmyakn̂e.

5 Ero yinhîrî tak îîpî wenîhcekn̂e xa hara. Toopu mewrexapu tak wenkayakn̂e yamata yaka, onakîtotho yaka. Kporin komo kekn̂e owya, ero wa kachonho yaw roro wenkayakn̂e. Iito rma nasî yamata yaw rma.

6 Ero yinhîrî tak Ben̂e Xakan poi cetken̂e Ixaw Yana komo Mosera pona tak. Iito tak Araw pen waihyakn̂e okwe. Iina rma nahruyatken̂e. Ereasa tak xakn̂e Kporin komo yaka cewomsom me Araw yemtakan me hara.

7 En̂exa tak Ixaw Yana komo cetken̂e Kutkota pona hara. En̂exa tak cetken̂e Xocbata pona hara. Yaake nai tuuna yaporî iito.

8 Ero yimaw on pokono me Repi yepamtho komo n̂iir̂akn̂e Kporin komo. Yamata yaan̂e me n̂iir̂akn̂e, tîmtapotarî yen yaan̂e me. Kakronomexe so oyewehcataw awya so, kacho xakn̂e yamata yaw, ero yaan̂e me n̂iir̂akn̂e. Tîhyawno me marha n̂iir̂akn̂e, tîmîn yawno poko ehtome so, Ixaw Yana komo poko tîmtapotaxmu me so marha. Apa, n̂examro akronomakî ayanan me exirî ke so, kan̂e ro me n̂iir̂akn̂e. Ero warai pokono me Repi yepamtho komo n̂iir̂akn̂e. Ero warai me rma naxe oroto.

9 Ero warai me cexirî ke so tîrowonî ro komo yahsîra rma naxe Repi yepamtho komo. Ero yipu yahsîyataw poyino komo ya ahsîra naxe n̂examro reha. Kporin komo xa nasî n̂examro nahsîrî me. Ero wara rma kekn̂e Kporin komo yîwya so Repi yepamtho komo ya.

10 Taa, iito rma wîxakn̂e îh po. 40 ro kenmayakn̂e iito, 40 ro xa marha kîkokmamyakn̂e iito. Yihcirî me iito wîxakn̂e ero wicakî xa marha kenmyakan̂e iito xa hara. Omtapotarî n̂encekn̂e Kporin komo ero yimaw xa hara. Awaikacho komo tak yîhtînopîra xakn̂e.

11 On wara mak kekn̂e Kporin komo owya, Etok hara. Ixaw Yana komo arko rma tîrowonî ro komo pona cesekenmachome so. N̂examro porin pen komo ya wîîkekn̂e, On men wîmyas awya so amn̂e Kanan rowon. Yaaro xa tan wîîkesî cemaro pîn me ro mak, wîîkekn̂e. Ero ke aano cirko rma iina cesekenmachome so, kekn̂e owya, kekn̂e. Ero wa kekn̂e Moises yîwya so.

12-13 On wara marha kekn̂e Moises yîwya so, Taa, on wara wîîkes hara awya so Ixaw Yana komo, ahce warai poko apanatanmekyatu so Aporin komo Kaan? On warai poko xa apanatanmekyaxe so ha, Aporin komo Kaan ponaro xa men ehcoko. Yiixe ro mak ehcoko yaaro xa. Ero wa yiixe ehcoko tahwore xa ewetîtome awya so. Kporin komo ya apanatanmetopo komo marha ewetîcoko. Awya so wekatîmyasî oroto ero ewetîcoko kir̂wan̂he awitome so yîwya okre, kacho poko apanatanmekyaxe so.

14 Aporin komo Kaan yîwyan me nasî kaapu komo, mehxan komo, yîmkaino komo meero. Yîwyan me marha nasî roowo, roowo pono komo marha ahnoro.

15 Noro yipu rma tîpîn̂e n̂een̂akn̂e Aporin pen komo, yiixe so tî xakn̂e. Ero ke n̂examro yepamtho komo tak nahsîyakn̂e tîyanan me xa. Encoko xe awehtopo komo oroto, iyanan me xa maxe okre. Anarî yana komo reha ahsîra xakn̂e ero yipu me.

16 Ero ke anpikaxapu wara rma ciicoko aropotarî komo. Tîpîmîyewaxkem me tak exihra ro mak ehcoko.

17 Noro mak Mîkî Kaan, Aporin komo. Ponaro cehtopo komo n̂iir̂axe anarî komo noro yipu komo yopono ro mak Mîkî. Kayaritomo komo kayaritomon marha Mîk ha. Takîhsom xa Mîkî, karitî marha, yukurumîkno xa. Moso xa wen̂ekesî, noro reha en̂ekara wasî, kan̂e pînî ro mak Mîkî. Cepethîrî yahsîn̂e pîn marha Mîkî kicicitho komo yen̂ekara cehtamci.

18 Yîmîhnî komo kurunpen̂e Mîkî, iin̂o waixapu komo kurunpen̂e marha. Acheka so mohxapu komo xatî marha Mîkî. Noro yipu komo nînahmesî, pononmesî marha.

19 Ero ke amyamro xa marha acheka mohxapu komo xatî me ehcoko. Anarî yana komo chew xa marha mîxatken̂e amyamro hara Exitu pono komo chew.

20 Aporin komo Kaan ponaro xa ehcoko. Noro ewetîcoko. Ahsîpînkan̂e pîn me ro mak ehcoko. Amtapotarî komo yewetîtopo yetaci xe awexitaw so Noro mak etacicoko.

21 Awakro so Noro exiri ke mak, Kir̂wan komo mîkyam okre, kacho me maxe. Ponaro awehtopo ro komo Mîk ha, cirihnî ciin̂e xa. Awero ro so rma ero yipu n̂iir̂akn̂e, aweserepokacho komo xa.

22 Asak makî tî xatken̂e aporin pen komo Exitu pona tîcetaw so, 70 makî tî xatken̂e. Oroto tak awepamnoyaxe so Aporin komo Kaan. Mer̂pora ro mak tak maxe oroto, mer̂pora nai xir̂ko komo, ero wa xa marha tak maxe amn̂e, kekn̂e. Ero wa kekn̂e Moises Ixaw Yana komo ya.