On wara marha kekn̂e Moises Ixaw Yana komo ya, Okopuci komo, on wara marha wîîkes awya so, Aporin komo Kaan xe ehcoko. Yîmtapotarî men ewetîcoko, apanatanmetopo komo. On wara men ehcoko, kacho, Ero warahra reha ehcoko, kacho marha. Ero wa kacho komo ewetîcoko. Ero wa ehcoko.

2 Amxîkrî komo pîn tan panatanmekyasî. Aporin komo Kaan ya apanaretoponhîrî komo yenîn̂enho pîn komo n̂examro. Kayaritomo me xa Kporin komo yehtopo yenîn̂enho pîn marha n̂examro, kar̂pe xa ehtopo yenîn̂enho pîn marha, etapoyankaxapu wara esenpotoponhîrî yenîn̂enho pîn ha.

3 Cirihnî komo n̂iir̂akn̂e Kporin komo Exitu pono pen komo chew. Paraw pen n̂emetanmekyakn̂e Exipsiu komo kayaritomon pen ha. Yîrowonthîrî marha nîwîrîmekn̂e.

4 Sowtatu pen komo meero waihkekn̂e Aporin komo, Exipsiu pen kom ha. N̂examro yokutho pen marha waihkekn̂e kawaru pen. Yîtararanthîrî komo marha wakrokekn̂e. Awenari so mokyataw so n̂examro tuuna tak nîmtawnukyakn̂e hara Kporin komo, Cucurem yewku ha. Ero wa Exitu pono pen komo nîhcamnoyakn̂e. Eronhîrî rma tîwîrîmaxi naxe. Ero wa kar̂pe cehtopo n̂enpekn̂e Kporin komo awya so.

5 Ero yinhîrî tak, axawa pore amokyataw so anahmetken̂e roro so, akurunpetken̂e roro so marha. Oona amohtopo komo pona roro awakronometken̂e so.

6 Ero yinhîrî Tatan pen komo waihkekn̂e Kporin komo, Abiraw pen kom ha. Eriabe mumutho komo mîkyam xatken̂e Huben pen yepamtho komo. Cemcaxmu me mak xakn̂e roowo okwe. Ixaw Yana komo rakataw rma n̂emcayakn̂e. Tatan pen komo n̂ermomyakn̂e okwe, towsuru. Yîhyawnonhîrî pen komo marha n̂ermomtîkekn̂e okwe, yîmînthîrî pen komo marha, emyawnonhîrî komo marha ahnoro. Ero yipu n̂ermomtîkekn̂e roowo okwe.

7 Ero yipu yenîn̂enho pînî rha amxîkrî komo. Amyamro reha meen̂axe karitî me ciino ritopo Kporin komo ya.

8 Ero ke apanatanmetopo komo men ewetîcoko ahnoro, wekatîmyas awya so oroto ero. Ero men ewetîcoko kar̂pe awehtome so, arowon komo yahsîso awtotome so, Xotaw Yepu mîwacexe ahsîtome ero.

9 Apanatanmetopo komo yewehcataw awya so pahkî tak maxe waipîn me arowon komo po. Aporin pen komo ya tî kekn̂e Kporin komo, On wîmyas amn̂e awya so awepamthîrî komo yeken me, Yaaro xa tan wîîkesî, cemaro pîn me ro mak, kekn̂e. Kir̂wan mîn roowo. Paaka mown pen nasî iito, ween pen marha. Ero yipu po maxe pahkî apanatanmetopo komo yewehcataw awya so.

10 Exipsiu komo rowon warahra nas anahsîrî komo roowo, yiipoi mîmokyatken̂e ero warahra nasî. Exitu po awexitaw so ka anatîrî komo meyamyatken̂e. Ero tak mîhyatken̂e ahtarî komo ke wahra exirî ke anatîrî komo yewtî.

11-12 On wara tko nasî arowon me tahsîsom, Xotaw mîwacexe ahsîtome ero. Îh ken̂arî mîn, woskara ken̂arî marha. Tuuna yeen̂e roro mîn roowo, kah yai mohxapu yeen̂e ha. Aporin komo Kaan nasî enîn̂e me kir̂wan̂he ciitome. Cimn̂ipu yihciyataw n̂een̂asî, miya roro marha n̂een̂asî cimn̂ipu cenatkaxi ro.

13-14 Ero ke apanatanmetopo komo men ewetîcoko miya roro, awya so wekatîmyasî oroto ero ha. Kaan xe ehcoko Aporin komo. Yiixe ro mak ehcoko yaaro xa. Ero wa yiixe ehcoko ewetîtome xa tak awya so. Ero wa awexitaw so tuuna wekmexpesî amararîn komo yatîkrecho. Tuuna mohtopo me exitaw roro wekmexpesî. Yihcirî ka wekmexpesî, mahyakan marha. Ero wa so tuuna wekmexpesî anatîrî komo yeperîrî yenmetome roro puruma. Uupa yukun marha nasî awokru komo me, aseci marha nasî an̂emerî komo me.

15 Cuupu marha watîkresî awoskaran komo pore. Ero yipu watîkresî awoh komo nahrî me. Ero wa atîkrerî ke owya tmaxmitaxi ro tak meseresmexe okre.

16 Twerî men ehcoko ponaro anarî komo yehtopo poko. Anarimaw na yaarono pîn ponaro mehtîket hara tohnaw ro mak okwe. Kporin komo poko na meponarononketu okwe. Anarî ro komo tak na mewehcatu, Oporin amoro ham okre, mîîketu marha na kica yîwya so.

17 Ero wa awexitaw so nîrwonasî tak men Kporin komo apoko so okwe. Kaapu tak nahruyas hara tuuna mokuhnî me. Ero ke atîhtan me tak nas okwe amararînthîrî komo. Mîwaiyaxe marha amyamro pen. Kir̂wanînhîrî po exihnî me tak maxe okwe, Kporin komo nîmîtho po exihra.

18 Ero ke omtapotarî men ciicoko aropotaka so, yîhtînocoko xa. Awya so wekatîmyasî ero yîhtînocoko, mewrecoko marha yimitome awya so awemeknutaka so, apewo so marha. Ero wa so yimicoko ponaro awehtome so.

19-20 Ero poko xa marha amxîkrî komo panatanmecoko. Ero poko amtapotacoko amîn komo yaw awexitaw so ceremaxi, esama yaw awcetaw so marha, awetakriyataw so marha, ahcetaw so marha. Amîn komo metatan yecepu poko marha mewrecoko, arowon komo wacan potarî yahruru poko marha.

21 Ero wa ehcoko apanatanmetopo komo ponaro pahkî ro mak awehtome so waipîra, pahkî marha amumuru komo yehtome so waipîra. On arowon komo me wîmyasî awya so, kekn̂e Kporin komo aporin pen komo ya. Yaaro tan wîîkesî, cemaro pîn me ro mak, kekn̂e. Ero po maxe pahkî, amxîkrî komo marha. Kaapu nasî roowo yepoi pahkî ro mak ero wicakî pahkî xa marha naxe amxîkrî komo iito arowon komo po apanatanmetopo komo ponaro awexitaw so.

22-23 Apanatanmetopo komo ponaro xa men ehcoko. Awya so wekatîmyasî an̂ewetîrî komo me ero yaw roro ehcoko. Aporin komo Kaan xe mak ehcoko. Noro yehtopo yaw roro mak ehcoko. Noro poko etahsîcoko ahsîpînkan me ro makî. Ero wa awexitaw so iitono komo nar̂mapesî ahnoro awya so. Ayopono komo mîkyam mer̂pora, ayopo so marha naxe kar̂pe. Wara rma n̂examro pen mar̂mexe. Ekenhîrî komo po tak maxe amn̂e.

24 Ahna so na metapikyatu ero rma wîmyasî arowon komo me. Axawa yemyatkoso nasî arowon komo, Ribanu yemyatkoso marha. Ewpratesî yecihtaka roro marha nasî arowon komo, tuuna yecihtaka marha, oesce n̂ixan yecihtaka ha.

25 Awar̂man̂e komo exihra ro mak naxe, cewn̂e n̂hema exihnî me ro mak nasî awar̂man̂e komo. Apona so xa matko n̂eraswaxe ro mak. Ero warai me rma n̂examro n̂iir̂asî Aporin komo Kaan. Ahna so na awtoche so iitono komo n̂eraswaxe apona so. Ero wara wiir̂asî kekn̂e rma awya so.

26-28 Ahce wa xa awexi so na matu? Awakronoma xe so na matu Kaan ya, awîrîma xe kat matu yîwya? Awanmero so yîhtînocoko. Kporin komo mtapotarî yewehcataw awya so awakronomexe so Noro. Ewetîra awexitaw so reha awemetanmekyaxe so okwe. Ero wa na matu anarimaw okwe, Aporin komo poko na meponaronketu, Kaan poko. Noro mtapotarî poko kpanatanmekyaxe so oroto, ero yewetîra na matu anarimaw. Anarî ro komo mak na mewehcatu Kaan pîn kica, ponaro awehtoponhîrî pîn mak ha. Ero we awexitaw so awîrîmexe so men okwe Kporin komo.

29 Amn̂e Aporin komo Kaan ya awarîche so arowon komo pona, aweken me ahsîso mîîcexe ero, Keresin Yîpîn po tak ekatîmcoko awakronomacho komo. Ebaw Yîpîn po reha tak awîrîmacho komo ekatîmcoko hara n̂examro hara.

30 Xotaw yeco pono rma mîn îîpî komo, oesce n̂ixa. More po nasî porin komo weewe ero mîtwono mîn îîpî komo. Kananew komo rowon po nasî, woskara po ha. Xiwkaw panaw nasî. Iito nasî ero komo îîpî.

31-32 Xotaw tak mîwacexe amn̂e arowon komo yahsîtome, Aporin komo Kaan nîmîtho yahsîtome ha. Iina tak mesekenmexe. Ero wa awexitaw so apanatanmetopo komo men ewetîcoko ahnoro rma. Awya so wekatîmyasî oroto ero men ewetîcoko, kekn̂e. Ero wa kekn̂e Moises Ixaw Yana komo ya.