On wara marha kekn̂e Moises Ixaw Yana komo ya, On wara nas anarî hara apanatanmetopo komo, an̂ewetîrî kom ha. On wara kacho men ewetîcoko arowon komo po tak awexitaw so. Pahkî na matu arowon komo po. Aweken komo me nîmyasî Kporin komo, ponaro aporin pen komo yehtopo, ero po maxe. Pahkî na matu iito waipîra. Ero yecenarî rma apanatanmetopo komo yewetîn̂e me ehcoko.

2 Anarî yana komo yekenho mîn mahsîyaxe. Iito tak meen̂axe ponaro n̂examro yehtoponho, akro yîmtapotachonhîrî komo, poko ahwotachonhîrî kom ha. Îh po so meen̂axe ero yipu komo, matîwîn po so marha, weewe makataw so marha, taakem makataw so. Ero komo kr̂a tak akuhr̂apocoko ahnoro ro mak ha.

3 Anarî ro komo ya tîmsom yakn̂itoponho kra ar̂macoko. Toopu marha ahkacoko piiri ciixapunhîrî, worokyam yakro yîmtapotachonhîrî kom ha. Mîk hak warai me yîn̂irithîrî komo kr̂a akn̂icoko weewe. Mîk hak warai me yînwakîknothîrî mko marha kr̂a amacoko. Noro komo yosotîtho yîhcamnocoko ro mak etacira ro mak ehtome so iitono komo amn̂e.

4 Ero yipu komo ken̂ehra ro mak ahwotacoko amyamro reha Aporin komo Kaan poko.

5-6 On wara nas amn̂e Aporin komo Kaan, Cewn̂e mak ewto men̂ekesî apoyino komo tribun rowon pono ha. Kporin Komo Yewtonî Ro Tan, kacho me tak ero n̂iir̂asî. Cekenî ro me nahsîyasî. Ero ke iina mak aacoko Noro ya anîmrî komo, takn̂itîkaxmu ha. Cisimu me tîmsom komo marha aacoko iina, kahsî tanîmsom me anîmrî komo marha. Iina mak aacoko anîmrî komo ahnoro. Amtapotachonhîrî komo yaw roro tîmsom komo marha aacoko iina, awanme ro so tîmsom komo marha. Awoh komo xîkrî marha aacoko iina poturme ewruxapu komo. Paaka xîkrî, oper̂a xîkrî, ero warai aacoko iina Kaan ya tîmsom me.

7 Iito tak eseresmacoko ahyawno komo yakro, Kporin komo roron po rma, ponaro awehtopo komo roron po ha. Aweseresmetaw so tak ahwotacoko ahce na poko awakaronomarî ke Kaan ya. Aporin komo Kaan ya awakronomachonhîrî komo poko ahwotacoko iito mak.

8-9 On wara reha ka maxe tan, awanme ro so mak mîhtînoyaxe kir̂wan̂he awehtopo komo. Ero wara ka maxe awepokaretopo komo pona ka epatakara awexirî ke so arowon me cehsom pona, Aporin komo Kaan nîmyas awya so aweken komo me ero pona ha.

10 Amn̂e tak tuuna mîwacexe Xotaw. Arowon komo pona tak mesekenmexe, Aporin komo Kaan nîmyasî aweken komo me ero pona tak. Iito awexitaw so tak cepokaresom me tak awir̂axe so Kporin komo. Awaparî komo mokuhra ro mak naxe. Erasîn me mak menmayaxe. Ero wa tak awir̂axe so Kporin komo arowon komo po awexitaw so.

11 Iito awexitaw so tak ewto men̂ekesî Aporin komo Kaan, Kporin Komo Yewton Tan, kacho me. Iina tak aacoko Kaan ya tîmsom ahnoro, Ero yipu tîmcoko, wîîkes awya so ero kom ha. Takn̂itîkaxmu komo aacoko, cisimu me anîmrî komo, kahsî tanîmsom me anîmrî komo, ero warai komo ahnoro aacoko iina. Kir̂wan komo mak aacoko. Amtapotachonhîrî komo yaw roro tîmsom komo marha aacoko iina. Ero yipu komo ahnoro aacoko iina mak, Kporin komo nmen̂ekatho pona mak ha.

12 Iito tak ahwotacoko Aporin komo Kaan roron po rma. Amyamro ahwotacoko, amumuru komo, awemsîrî komo, awanton komo, kîrkomo, wooxam komo, Repita komo marha awewton pono kom ha. Awara sora naxe n̂examro reha, yîrowonî ro komo exihra nasî n̂examro reha. Ero ke awakro so rma nahwotacowpe.

13-14 Mînto mînto wara so na meen̂atu îîpî komo kir̂wan. Iina so tko akn̂ipîra ro mak ehcoko anîmrî komo. Kporin komo nahsîtho po mak ero komo akn̂icoko. Noro rma men̂ekesî ceken, apoyino komo tribon rowon pono ha. Iina mak akn̂icoko anîmrî komo yîwya. Iina marha ciicoko ahnoro omtapotachonho yaw rorono ha.

15 Ahto so na awexitaw so tko awoh komo paraxkacoko awotî komo me. Awakrexe so rma Aporin komo Kaan, awoh komo n̂epamnoyas okre. Ero ke awanme ro so tak tonocoko yupunthîrî kooso mon̂exe, pixkaru kom ha, ero wara rma awotowathîrî komo pun tonocoko. Kicicitho yapen̂enho me awexitaw so rma awanme ro so rma mon̂exe yupunthîrî kicicitho yapen̂enho pîn komo yakro rma.

16 Kamxukre tko tonohra ro mak ehcoko awotî komo. Kamxukuthîrî kr̂a yukmamcoko roowo pona, tuuna mukmamyaxe ero wara xa marha.

17 Kporin komo ya tîmsom komo reha tonohra ehcoko awewton komo po rma. Anatîrî komo yeperîrî na mîraconketu cisimu me anîmrî komo, puruma, sepata, ahce na komo mîraconket ha. Uupa yukun marha na mîraconketu ero wa xa marha, aseci kom ha na. Awoh komo xîkrî marha na mîmyatu poturme ewruxapu, paaka xîkrî, oper̂a xîkrî kom ha. Ero wa men was amn̂e, kachonho marha na mîmyatu, awanme ro so marha na mîmyatu ahce ha na, kahsî tanîmsom marha tîmî xe marha na matu. Ero yipu poko eseresmara ro mak ehcoko awewton komo po rma.

18 Kaan roron po mak ero yipu poko eseresmacoko, ponaro awehtopo komo roron po ha, yînahsîthîrî po ewto po. Ero warai me tîmxapu poko marha na n̂eseresmetu amumuru komo, awemsîrî komo, awanton komo kîrkomo, wooxam komo, Repita komo, awewton komo pono kom ha. Ahce na poko eseresmetaw noro yipu komo Kaan yewton po mak n̂eseresmacowpe Kaan yeepatai ha, ponaro awehtopo komo yeepatai ha. Aweseresmetaw so ahwotacoko iito Kporin komo poko ahce wa na awakronomachonhîrî komo poko yîwya.

19 On wara marha wîîkes awya so, Repita komo poko yîtwen̂ekarîntara men ehcoko. N̂examro men akronomacoko miya roro arowon komo po awexirî komo yecenarî.

20 Amn̂e arowon komo nakweresî Aporin komo Kaan porin me cehso ro. Ero wara rma kekn̂e Kporin komo awya so. Ero wa exitaw tak arowon komo awotî komo xe tak na mat ha. Oyotî xe tak was okre, mîîket ha na. Ero wa awexitaw so awanme ro so tonocoko.

21 Anarimaw mooxe na nai aweken komo, Aporin komo Kaan n̂etacitho mîtwo exihra nai, Kaan Yekenî Ro Tan, kacho mîtwo exihra nai ha. Ero wa awexitaw so awewton komo po rma paraxkacoko awotî komo paaka komo, oper̂a komo. Noro yipu mak nas awotî komo me, wîîkekn̂e awya so, noro yipu komo tonocoko iina rma awewton komo po rma yiixe awehtopo yecenarî rma.

22 Kooso mon̂exe anarimaw so, pixakru komo marha, ero wa xa marha awokuthîrî komo puntho tonocoko yiixe awexitaw so. Kicicme ehxapu komo nonocowpe kicicme exihnî komo wara xa marha.

23-24 Kamxukre tonohra ro mak men ehcoko. Waipîra kiin̂e mîn kamxuku. Ero ke waipîra kiin̂e tonohra cexpore nasî yupunthîrî yakro rma. Roowo pore mak yukmamcoko tuuna mukmamyaxe ero wa xa marha.

25 Kamxukurem tonohra ro mak ehcoko awakronomachome so Kaan ya, awepamthîrî komo yakronomachome marha. Kir̂wan me awen̂ataw so Kporin komo ya ero wa awir̂axe so okre.

26-27 Kporin komo ya tîmsom reha aacoko Kporin komo nmen̂ekatho pona ewto pona. Ero wa men was amn̂e, kacho marha aacoko iina ahnoro. Aporin komo Kaan ya tîmsom yakn̂itopo pona mak akn̂icoko yupunthîrî. Kamxukuthîrî marha yukmamcoko tîmsom yakn̂itopo pona. Yupunthîrî reha mon̂exe.

28 Owya apanatanmetopo komo men ewetîcoko roro. Awya so wekatîmyasî ero yewehcataw roro awya so Kaan nakronomarî me maxe okre, awepamthîrî komo marha naxe yînakronomarî me miya rorono kom ha. Kir̂wan̂he awen̂ataw so Aporin komo Kaan, takîhso awen̂ataw so marha, awakronomexe so tak okre, kekn̂e. Ero wa kekn̂e Moises Ixaw Yana komo ya.

29-30 On wara marha kekn̂e Moises yîwya so, Taa, on wara marha wîîkes awya so, anarî yana pen komo nar̂mapesî Aporin komo Kaan awya so. Ekenhîrî komo tak mahsîyaxe ero pona tak awesekenmachome. Ponaro n̂examro yehtopo marha makuhr̂apexe. Wara rma awemcinotopo wara rma men nasî ponaro iitononhîrî pen komo yehtopo. On wara kahra ehcoko, Ahce wa xa tantononhîrî pen komo nahwowatken̂e ponaro cehtopo komo poko ha? N̂examro pen wara xa marha oyahwota xe was ow hara, kahra ro mak ehcoko.

31 N̂examro pen wara ahwotara ro mak men ehcoko Aporin komo poko Kaan poko. Ponaro cehtopo komo poko tahwowataw so kicicme ro mak naxe kica. Yiixera Kporin komo yehtopo poko naxe kica mîn hak poko kica. Tumumuthîrî komo meero nakn̂iyaxe okwe ponaro cehtopo komo ya tîmsom me. Cemsîthîrî komo marha nakn̂iyaxe okwe.

32 Owya apanatanmetoponhîrî komo mak men ewetîcoko amyamro reha. Yîhremara ro mak men ehcoko, Towhra marha ehcoko, kekn̂e. Ero wa kekn̂e Moises Ixaw Yana komo ya.