1-2 On wara marha kekn̂e Moises Ixaw Yana komo ya, Anarimaw apoyino komo na n̂esekatîmya aweronoman̂e komo me. Twosotîmtoponhîrî yekatîmn̂e me na nîmtapowa anarimaw. On wara na nîîke, Ero yipu men ceenaxe amn̂e keserepokacho. Enko xe amn̂e, kee ha na. Ero yinhîrî tak yîmtapotachonhîrî yaw roro rma na n̂esenpe aweserepokacho komo. Ero yinhîrî on wara na nîîke hara noro rma, Anarî ro ponaro tak cehcerî hara, ponaro kehtoponhîrî komo pîn. Noro tak cewetîcerî hara, nîîke ha na.

3 Ero wa ketaw awya so yîmtapotarî entara ro mak ehcoko. Anarimaw n̂ekatîmyaxe onoke mtapotarî ha na, wosowa na noro anarimaw. Wara rma yîmtapotarî ponarora ro mak men ehcoko. Aporin komo Kaan akukmexe so mak noro yipu mtapotarî poko ha. Ooxe xa na natu n̂examro oyanan komo, yaaro xa ooxe na natu? Oponaro xa na natu, nîîke. Ero ke noro yipu poko akukmetu so.

4 Aporin komo Kaan wenarino me xa ehcoko. Noro ponaro xa ehcoko. Yîwya apanatanmetoponhîrî komo ewetîcoko, yîmtapotarî ewetîcoko ha. Noro poko mak ahwotacoko. Noro poko mak etahsîcoko.

5 Kicicme naxe kica tonawno poko aweronoman̂e komo. Ero ke ponarora ro mak ehcoko, twosotîmsom komo ponarora marha. Noro yipu komo men waihkacoko, Aporin komo Kaan yanwekn̂e me awirirî ke so okwe. Exitu po awexitaw so Paraw yanton me mîîxatken̂e etowîn me ro mak. Kaanî tko awowyatken̂e so en̂exa awehtome so. Noro yanwekn̂e me awin̂e komo mak mîkyam kica, anarî ro poko apohkamexpon̂e komo. Kir̂wan̂he awehtopo komo poko mak apanatanmekyaxe so marha Kaan. Noro yipu yai awown̂e komo mîkyam kica. Kicicitho mîkyam kica noro yipu komo. Ero ke waihkacoko achewra so tak ehtome.

6 Anarimaw awakno komo rma na apohketu so anarmen poko, anocwanî mrerî rma. Ehtun me na apohketu so. On wara na nîîke, Kaika anarî poko ahwotaxi, ponaro anarî yana komo yehtopo poko, nîîke ha na. Amumuru komo rma na ero wa nîîke awya so, awemsîrî komo anarimaw, apici komo anarimaw awenawno komo rma, awakrono komo anarimaw yiixe awehtopo komo xa. Ponaro awehtoponhîrî komo pîn poko na apohketu so, ponaro aporin pen komo yehtoponho pîn poko marha.

7-8 Anarmen komo ponaro naxe arowon yemyatwono komo, meyeno pîn komo, meyeno komo marha, roowo mapitawno komo meero, xehxan komo, mehxan komo marha. Ponaro noro yipu komo yehtopo poko apohketu so na. Noro yipu poko apohketaw so ewetîra ro mak ehcoko. Yîmtapotarî komo entara marha ehcoko. Yîpînîn yaw so exihra ehcoko. N̂expe rma, kahra ehcoko noro yipu komo poko, eyamura marha ehcoko.

9 Waihkacoko men. Yîmtapotarî yentan̂enho ka n̂ihcipe waihkacho poko. Ero yinhîrî tak ahnoro rma tak waihkacoko.

10 Toh ke waihkacoko, Anarî pona etowcoko, karî ke. Aporin komo Kaan xa awekyatken̂e so Exitu poi. Ahsîpînkan me ro mak awantoman̂enhîrî komo yai awowyatken̂e so, Noro yahsîpînkan̂e me awiri xe so mak nas okwe. Ero yanme waihkacoko toh ke.

11 Noro pen waihkachonho tak n̂encexe Ixaw Yana komo ahnoro. Entache twerî tak naxe ero wa kahra tak cehtome so anarî kom hara, kicicitho me xa exihra cehtome so.

12-13 On wara na matu anarimaw ewto pono komo, keken me so Kaan nîmye ero pono komo rma, Kicicme tî natu kpoyino komo rma okwe, kacho na mencetu. N̂examro tî iitono komo panatanmekyatu ponaro anarî yana komo yehtopo poko. On wara ketu, Kaikatko anarî poko ahwotaxi, ponaro kehtoponhîrî pîn komo poko, ketu tî kica, kacho na mencetu.

14-15 Ero yentache awya so takîhso entatko. Yaaro xa wa ero wa ket ha? kacoko iitono komo ya. Yaaro mak entache awya so, Kicicitho me ro mak nat ham kica kpoyino komo rma okwe, kacho yîhtînopuche tak awya so iitono pen komo tak waihkatîkacoko ahnoro kacipara ke. Iyokuthîrî pen komo meero waihkacoko ahnoro kacipara ke.

16 Ero yinhîrî tak iitononhîrî pen komo yemyawnonho enmecoko ewto roron pona rakataka xa. Yîmînthîrî komo kr̂a tak akn̂icoko, emyawnonhîrî komo marha, enmexapu komo. Aporin komo Kaan yanme rma akn̂icoko. Wemronho me mak n̂expe ero ewtotho eroromero. Iina cirihra ro mak tak ehcoko mîîmo hara.

17 Takn̂isom me kr̂a mak n̂expe on ha, kacoko iitononhîrî komo yemyawnonho poko. Awemyawno komo me ahsîra ro mak ehcoko. Ahsîra awexitaw so n̂etîrwoxinkesî tak Kporin komo rîîwoxe xa ehxapunhîrî. Apînîn yaw so tak nai hara. Awepamnoyaxe so tak. Aporin pen komo ya kekn̂e, ero wa kachonho yaw roro rma wa awepamnoyaxe so.

18 Ero wa awakronomexe so Aporin komo Kaan tîmtapotarî yewetîrî ke mak awya so. Apanatanmetopo komo wekatîmyas awya so oroto ero yewetîtîkarî ke awakronomexe so. Ero wa ewehcataw awya so kiir̂wan̂he awehtopo komo n̂een̂asî Aporin komo. Ero ke awakrexe so, kekn̂e. Ero wa kekn̂e Moises Ixaw Yana komo ya.