Taa, ero yinhîrî Moises yaka tak mokyatken̂e Xireace yepamtho yantoman̂e komo. Maki pen mumutho mîk xakn̂e Xireace. Manases pen mumutho mîk xakn̂e Maki. Xose yepamtho mîkyam xatken̂e. Noro yipu komo mokyatken̂e Moises yaka, antomano rin̂e komo yaka, Ixaw Yana komo poritomon komo yaka marha.

2 On wara ketken̂e Moises ya n̂examro n̂entarî me, Ai apa, pahxa Kporin komo nîmtapowakn̂e awakro. On wara kekn̂e awya, Tantono men ekamcoko Ixaw Yana komo ya roowo. Men̂ekacho ar̂macoko yînahsîrî komo yîhtînotome, kekn̂e tî awya. On wara marha tî kekn̂e awya, Seropeace nahsîrî tîmcoko noro pen yemsîtho komo ya, kekn̂e tî awya.

3 On wara tko na natu n̂examro, Seropeace pen yemsîtho komo, anarî tribun poyino komo na nahsîyatu ciin̂o me so. Ero warai komo yahsîyataw yîrowon komo tak nahsîyaxe amn̂e iin̂o tribun kom hara. Ero ke amna tribun komo rowonînho raconho tak nowyaxe okwe. Anarî tribun komo rowon me tak nas okwe.

4 Xubirew cimn̂ipu me exitaw tak Seropeace rowontho nahsîyaxe anarî tribun komo. Amna rowontho raconho tak nas amn̂e n̂examro yin̂o tribun rowon me tak. Ero wa towso amna rowontho nas okwe, ketken̂e. Ero wa ketken̂e Xireace yepamtho komo Moises ya.

5 Ero yinhîrî tak Moises n̂ekatîmyakn̂e yîwya so Kporin komo mtapotacho rma. On wara kekn̂e yîwya so, On wara kesî Kporin komo n̂examro poko, Yaaro rma wa kexe Xose yepamtho komo.

6 On wara kesî Kporin komo Seropeace yemsîtho komo poko, tanme ro so rma re nahsîcowpe ciin̂o komo. Tîîm yanan komo makî tko nahsîcowpe.

7 Ero wara roro n̂ehcowpe Ixaw Yana komo. Anarî yepamtho komo rowontho ahsîra ro mak n̂ehcowpe. Tporin pen komo rowontho mak nahsîcowpe tîrowon komo me. Ero wa n̂ehcowpe ahnoro Ixaw Yana komo.

8-9 Anarimaw awemsîrî komo rma na nahsîyatu roowo. Ero wa exitaw so tîîm yanan komo poyino mak nahsîcowpe ciin̂o komo me anarî yepamtho komo rowontho yahsîra ro mak awehtome so. Aporin pen komo rowontho ahsîcoko eroromero, kekn̂e. Ero wa kekn̂e Kporin komo Moises ya.

10-12 Ero ke ero wa xatken̂e Seropeace yemsîtho komo, Mara, Cihsa, Okra, Miwka, Noa kom ha, tîîmînhîrî pen yaknonho mumuru komo mak nahsîyatken̂e ciin̂o me so. Manases yepamtho komo mak nahsîyatken̂e ciin̂o me so Xose pen mumutho yepamtho kom ha. Ero ke yîrowon komo xakn̂e tporin pen yepamtho komo rowon me rma.

13 Ero yipu n̂ekatîmyakn̂e Moises Ixaw Yana komo ya Kporin komo ya panatanmetopo komo. Moabe woskaran po exitaw so ero wa kekn̂e yîwya so, Xotaw yecihtaw, Xer̂ko yecen̂e ha. Ero wa kekn̂e yîwya so. Ero wa mak nas ekatîmtopo.