1-2 Ero yinhîrî tak nîmtapowakn̂e xa hara Kporin komo Moises yakro. Moabe woskaran po exitaw so rma kekn̂e, Xer̂ko yecen̂e exitaw so, Xotaw yecihtaw ha. On wara kekn̂e yîwya, Ai Moises, on wara kasko Ixaw Yana komo ya, Oyakno komo, awewton komo yahsîche awya so amn̂e ero poyinonho tîmcoko Repita komo ya n̂examro yewtonî ro me. Woskaranî ro komo marha tîmcoko yîwya so ewton komo mamhokono. Cuh ken̂arî tîmcoko yîwya so woskara, iyoh komo nahrî me.

3 Ero yipu tîmîche yîwya so cewtoi ro so tak naxe Repita komo. Cewtonî ro komo po so n̂enmayaxe ewto po. Woskaranî ro komo marha nasî iyoh komo nahmacho me, paaka nahmacho me, oper̂a nahmacho me, mîk hak komo, iyoh komo nahmacho me.

4 Ewto wacan poi yukuknomacoko 450 metru. Ewto mamhokono rma tîmcoko ero wicakî so waaca poi yukuknomaxapu.

5 Ewto poi marha yukuknomacoko 900 metru. Resce n̂ixa yukuknomacoko ero wicakî. Suu n̂ixa, oesce n̂ixa, nohce n̂ixa, ero wicakî so. Ero wicakî so Repita komo woskaran yukuknomacoko ewton komo mamhokono. Ero wicakî so ero ciicoko ero pono komo rowon me. Ero yipu rakataw rma nasî ewton komo.

6 On wara ciicoko anarî komo ewto, Repita komo ya tîmxapu komo, waihkano rin̂enho komo yemahcitopo me ciicoko. 6 ewto ciicoko ero warai me. Ero komo ciicoko waihkano rin̂enho yemahcitopo me. Anarî ewto komo marha tîmcoko yîwya so hara Repita komo ya. 42 yakenon xa hara tîmcoko yîwya so n̂examro yewton me.

7 Ero ke 48 yakenon me tak nasî ewto mko Repita komo yewton me tîmsom komo. Woskara marha tîmcoko yîwya so ero komo mamhokono.

8 On wara men yîhtînocoko ewto mko yetahcataw Ixaw Yana komo nîmrî Repita komo ya, mer̂pora na nai anarî yepamtho komo yewton. Noro yipu yewton tîmcoko yaake n̂he Repita komo ya. Asakî mak na nai anarî yepamtho komo yewton hara. Noro yipu komo yewton tîmcoko asakî n̂he mak Repita komo ya tîmsom hara. Ero wa men etacicoko yîwya so tîmsom ewto mko.

9-11 Ero yinhîrî on wara kekn̂e hara Kporin komo Moises ya, On wara kasko xa hara Ixaw Yana komo ya, On wara ehcoko Xotaw watoche awya so Kanan pona, ewto komo marha men̂ekacoko waihkano rin̂enho kurun me, anmenkera waihkano rin̂enho komo kurun me ha. Iina tak n̂emahcicowpe amn̂e waihkano rin̂enho komo waipîra cehtome so.

12 Iina so n̂emahcicowpe waixa pen yananînho yai ewto pona so. Waihkaxapu pen yananînho men mokya waihkaxapu pen yepanso. Noro yipu yai yukurunpecoko waihkan̂enhîrî ero yipu po ewto po. Ixaw Yana komo ka n̂entacowpe waihkan̂enhîrî yehtopo, Kicicme n̂ehxe ham, kachome, Kir̂wan̂he rma n̂ehxe ham, kachome anarimaw.

13-15 Yaake mîmyaxe ewto komo Repita komo ya. Ero poyino ciicoko 6 ewto komo waihkano rin̂enho yemahcitopo me. On pono komo ciicoko 3 ewto. Mehxa eeco po 3 xa hara ciicoko ewto kom hara Kanan pono kom ha. Iina so n̂emahcicowpe waihkano rin̂enho komo, Ixaw Yana komo, acheka so mohxapu komo marha, pawana komo marha. Ahnoro anmenkera waihkano rin̂enho komo iina so n̂emahcicowpe waipîra cehtome so.

16 Anarî tko na pehu ke n̂etape tooto pen twaihkaxi ro. Tooto wapatho xa mîkro, kacho me nasî noro yipu. Ero ke men waihkacoko.

17 Anarî toh ke cemyarke na nai porin ke ha, waihkano ritopo ke. Ero yipu ke na tooto pen n̂etape twaihkaxi ro. Tooto wapatho mîkro, kacho me marha nasî noro yipu hara. Noro yipu men waihkacoko.

18 Anarî watma ke cemyarke na nai waihkano ritopo ke. Ero yipu ke na tooto pen n̂etape. Tooto wapatho mîkro, kacho me nasî noro yipu hara. Noro yipu marha waihkacoko.

19 Waixa pen yananînho rma noro waihkape, tîyananînhîrî pen n̂epanpe. Ahto so na eporîche waihkape iina rma.

20-21 Anarimaw tpoyino xera ro mak na nai apoyino komo. Tanme ro rma na nar̂me ahce ha na yiixera cehtopo wece waihkachome okwe. Anarimaw wapantaw na n̂eseyamya ponan̂e waihkachome yiixera cehtopo pen. Anarimaw rîîwoxe cexitaw tpoyino n̂etape tamorî ke rma na waihkachome. Tooto wapatho mîkro, kacho me nasî noro yipu. Ero ke men waihkacoko. Waixa pen yananînho rma noro yipu waihkape ahto so na eporîche.

22-24 Anarimaw yîrwomnî me ro mak na nai apoyino komo anarî poko. Anmenkera mak na etapano n̂iir̂a. Ponan̂e rma na n̂etape esama yaw momokun me. Toopu na nar̂me wapahtono ritopo wicakno. Twerono pîn wece na nar̂me okwe. Yiixera cehtopo pîn wece na nar̂me, Noro men wetapesî, kan̂e pînî rma. Noro yipu komo yehtopo poko n̂entacowpe Ixaw Yana komo. Etapan̂enhîrî mtapotarî n̂entacowpe, waixa pen yananînho komo mtapotarî marha. Ero wa so n̂entacowpe yaaro xa tak yîhtînotome noro yehtopo. Ero wa men ciicoko omtapotachonho yaw roro rma ha.

25 Ero wa waihkano rin̂enho komo nukurunpecowpe Ixaw Yana komo. Waihkaxapu pen yananînho komo ya etapapora n̂ehcowpe. Ewto pona n̂en̂epecowpe hara yukurunpetopo pona. N̂emahciyakn̂e iina xa hara n̂en̂epecowpe. Ero po tak n̂expe waihkano rin̂enho miya roro ohyaka cewomsom waihtopo pona roro, onîhkapetho waihtopo pona roro ha.

26-27 Anarimaw tko na waihkano rin̂enho cee ewto poi cetkurunpetopo poi, iina n̂emahciyakn̂e ero poi cee hara okwe. Ewto pohra exitaw tak waixa pen yananînho na noro n̂een̂a, waihke tak na. Ero wa waihketaw, Kicicitho moso cewapatosom okwe, kacho mera rma nasî noro yipu.

28 Ewto poi tohra cexpore n̂exirî ha re, mîîkexe noro yipu poko, waihkano rin̂enho kurunpetopo po mak n̂exirî ha re okwe. Ohyaka cewomsom waihtopo pona roro iito rma cexpore n̂asî. Noro pen waipuche mak tak cewtonî ro pona tompe hara.

29 Ero wa kacho ponaro men n̂ehcowpe Ixaw Yana komo ahto so na cexitaw so. Miya rorono komo ero ponaro n̂ehcowpe epamthîrî komo meero.

30 Tooto wapatho mîkro, kacho me exitaw xa apoyino komo, etaparî yenîn̂enho mtapotarî yanme mak waihkacoko. Cewn̂e makî tko exitaw enîn̂enhîrî noro yipu mtapotarî yanme waihkano cirihra ehcoko.

31 Tanme ro rma waihkano rin̂enho mîkro, kacho rma tko na nai anarimaw ahyaw so. Yaaro xa ero wa ehtopo yîhtînopuche awya so waihkacoko ha men. Puranta ahsîra ro mak ehcoko waihkara awehtopo komo yepetho. Waihkacoko ro mak ha.

32 Anarimaw waihkano rin̂enho na n̂emahciya ewto pona etkurunpeso. Noro tko na nîmya puranta awya so cetîramachome hara cewton pona. Ohyaka cewomsom waipîra rma ka exitaw so awepema xe so na nai cetîramachome hara yohno. Ero yipu ahsîra ro mak men ehcoko epethîrî.

33 Arowon komo yikicicirera ro mak men ehcoko. Tooto kamxukutho yen̂epetaw awya so arowonthîrî komo kiciciren̂e me nas okwe, etakir̂waman me ro mak nas ero yipu roowo. Waihkano rin̂enho kamxukutho ke makî tko n̂etakir̂wames hara arowon komo, kicicme ehxapunhîrî.

34 Arowon komo yikicicirera ro mak men ehcoko yiipo maxe ero. Yiipo marha was Ow hara Aporin kom ha. Ixaw Yana komo chewno rma Ow ha, kekn̂e. Ero wa kekn̂e Kporin komo Moises ya.