1-2 Ero yinhîrî on wara kekn̂e hara Kporin komo Moises ya, Ai Moises, on wara kasko Ixaw Yana komo ya, Oyakno komo, amn̂e Kanan pona awepatakache so on wara nasî arowon komo wokpan amn̂e, yukuknomacho tan wekatîmyas awya so.

3 Suu n̂ixan ka wekatîmyas awokpan komo, Sin Yaxawan yemyatwo roro cesî, Eton yemyatwo roro marha cesî arowon komo wokpan. Mehxa, resce n̂ixa n̂ihciyasî n̂ikitho imo mapirî n̂ixa, Yîmîtî Ken̂arî mapirî n̂ixa.

4 Akrabin yîpîn yamrinari cesî rma suu n̂ixan wokpa ha. Sin pona roro cesî. Kates panari marha cesî suu n̂ixa. Asa-Aata pona roro, Asmon pona roro marha.

5 Iina tak wow kes hara Exitu Yaporî kwaka roro. Ero kwaw roro rma cesî Tuuna imo kwaka.

6 Tuuna imo nasî arowon komo wokpan me mehxa hara kaamo yemicitopo n̂ixa hara.

7-9 On wara tak nasî arowon komo wokpan hara n̂ixan hara, Tuuna imo yecihtai cesî pataw roro Oro Yîpîn pona roro. En̂exa ces hara Amace potaka roro. En̂exa cesî Setace pona roro hara. En̂exa cesî Sipron pona roro hara. En̂exa cesî Asar Enan pona roro hara. Ero wa nasî awokpan komo nohce n̂ixan ha.

10-12 On wara nasî arowon komo wokpan hara resce n̂ixan hara, Asar Enan poi cesî pataw roro Sepan pona roro. En̂exa cesî Hibra pona roro. Ain yari rma cesî resce n̂ixa. Îîpî yamrinari marha cesî Kinerece N̂ikithon yecihtawno yamrinari. En̂exa tak Xotaw yepu kwaw roro rma cesî n̂ikitho imo kwaka hara Yîmîtî Ken̂arî kwaka. Ero wicakî nasî arowonî ro komo. Ero wa nasî arowon komo wokpan, kasko. Ero wa kasko Ixaw Yana komo ya, kekn̂e. Ero wa kekn̂e Kporin komo Moises ya.

13-15 On wara marha kekn̂e Moises Ixaw Yana komo ya, Taa, ero wicakî nasî roowo anahsîrî komo amn̂e. Yîraconhîrî komo ekamcoko apoyino komo ya aweken komo me. Men̂ekacho ke yîhtînocoko yînahsîrî ro komo. Ero wara rma kekn̂e Kporin komo owya. 9 mak naxe tribu komo iitono yahsîn̂e kom ha, anarî marha nasî tribu poyino kom hara. Meye reha naxe anarî roowo yahsîn̂e kom hara. N̂examro reha nahsîce rma ceken komo. Huben yepamtho komo, Kace yepamtho komo, Manases yepamtho poyino komo. Ero warai komo nahsîce rma ceken komo. On pono rma nahsîce Xotaw xehxan pono rma, resce n̂ixan, kekn̂e. Ero wa kekn̂e Moises Ixaw Yana komo ya.

16-18 Ero yinhîrî on wara tak kekn̂e Kporin komo Moises ya, On wara nasî kîrkomo yosotî, awewton komo yekamn̂e komo yosot ha, Ereasa, ohyaka cewomsom ha, Xoswe marha Nun mumuru. Anarî komo marha men̂ekacoko kîrkomo tribu poyino komo roowo yekamn̂e me. Cewn̂e so mak men̂ekacoko tribu komo poko hak so.

19 Taa, roowo yekamn̂e komo xa tan wetahcasî, Karebe, Xepon̂e mumuru, Xuta yepamtho.

20 Samuew, Amiuce mumuru, Simeaw yepamtho.

21 Eritace, Kisiron mumuru, Benxamin yepamtho.

22 Buki, Xokri mumuru, Taan yepamtho komo yantoman̂e.

23 Xose pen yepamtho poyino marha etacicoko on warai komo, Aniew, Eepoce mumuru, Manases yepamtho komo yantoman̂e.

24 Kemuew, Sihtan mumuru, Eprain yepamtho komo yantoman̂e.

25 Erisapan, Pahnake mumuru, Seburon yepamtho komo yantoman̂e.

26 Pawtiew, Asan mumuru, Isaka yepamtho komo yantoman̂e.

27 Aiuce, Seromi mumuru, Ase yepamtho komo yantoman̂e.

28 Petaew, Amiuce mumuru, Nahtari yepamtho komo yantoman̂e, kekn̂e. Ero wa kekn̂e Kporin komo Moises ya.

29 Ero ke yîmtapotacho n̂ekatîmyakn̂e Moises hara Ixaw Yana komo ya. Oyakno komo, Kporin komo nîhtînoputho rma mîkyam. Ero ke n̂examro ciicoko Ixaw yepamtho komo yeken yekamn̂e me, Kananew komo rowontho yekamn̂e me, kekn̂e. Ero wa kekn̂e Moises Ixaw Yana komo ya.