Taa, ero yinhîrî on wara tak xakn̂e Xoswe, Nun pen mumutho, Kanan pono komo yerasman̂e komo n̂en̂epekn̂e. Sicin poi n̂en̂epekn̂e en̂epa me mak. On wara kekn̂e yîwya so, Eeco pono komo erasmatatko. Xer̂ko pono komo, Ero wa na natu, kachome kîwya so, kekn̂e yîwya so. Ero ke cetken̂e takî tî erasman̂e komo Xer̂ko pona. Iito cexitaw so takî tî wooxam mîn yaka cetken̂e, kîîrî pohkan̂e ro mîn yaka. Haabe tî mîk xakn̂e wooxam yosotî. Noro mîn yaka tî n̂etakriyatken̂e.

2 Ero yinhîrî takî tî Xer̂ko pono komo kayaritomon n̂encekn̂e mohtopo komo. Ixaw Yana komo mohcow oroto kosope. Kerasman̂e komo tî mîkyam mohcow ha, krowon yenîn̂e komo, kacho tî n̂encekn̂e.

3 Ero ke tî tmaywen komo n̂en̂epekn̂e Haabe yaka. On wara tî ketken̂e n̂examro yîwya, Ai aaci, tooto komo tî mohcow oroto ahyaka. Kerasman̂e komo tî mîkyam kica, krowon komo yenso mohxapu tî. Miyanî rma tî n̂een̂atu ewto mko. Ero ke n̂examro en̂emhatakakî, ketken̂e yîwya.

4 Tîhyaka mohxapu komo tko tî naar̂akn̂e wooxam eyamso. On wara makî tî kekn̂e kayaritomo yanme mohxapu komo ya, Nhnk, mohcow rma re kîrkomo ohyaka. Ahn̂ixan komo na moxam? wîîka makî.

5 Kosope tak tocow hara ewto wacan metatan yahruyataw. Ahna na tocow, enîhra so weexi. Wenari etocoko yohno. Mahsîyatu rma na, kekn̂e tî wooxam yîwya so.

6 On wara tko tî n̂examro n̂iir̂akn̂e wooxam, tîmîn kanahtaka tî naar̂akn̂e capahno pona. Iito tî xakn̂e riin̂u yeputho cenmeso. Ero makataka tî n̂eyamyakn̂e.

7 Ero ke takî tî eposo cetken̂e kayaritomo maywen komo, Esama yaw tî cetken̂e Xotaw watotopo yesamarî yaw tî. Ewto poi toche so rma takî tî ewto wacan metatan nahruyatken̂e enîn̂e komo. Ero wa tî xatken̂e.

8-9 Ero yinhîrî takî tî wooxam cekn̂e hara tîmîn kanahtaka xa hara. Eyamxapu komo yîwînkîra ka exitaw so tî cekn̂e. On wara tî kekn̂e yîwya so, On wara wîîkes ow, Kanan nîmye ham awya so Kporin komo, wîîkesî yaaro xa. N̂eraswaxe ro mak apona so on pono komo ahnoro. Nahwokexe marha okwe apoko so.

10 Cucurem Yewku watotoponho awya so amna n̂encekn̂e. Exitu poi amokyataw so ero napainokekn̂e Kporin komo awesamarî komo me. Ero yinhîrî Xotaw yeco pono komo tî mar̂metken̂e hara Amohew kayaritomon pen komo, Xotaw yeco pono pen kom ha. Sion pen tî mar̂metken̂e, Oki pen marha. N̂examro pen tî mîhcamnoyatken̂e ro mak.

11 Ero yentarî ke n̂eraswakn̂e xa tak amna. Nahwoketken̂e ro mak tak ahnoro apoko so. Noro xa Mîk ham Kaan ponaro awehtopo komo. Ponaro kah yawno komo yehtopo xa Mîk Noro. Ponaro roowo pono komo yehtopo marha Mîk ha.

12-13 Ero ke on wara wîîkes awya so, ow kukurunpexe so ero wa xa marha cma re amna mukurunpexe hara amn̂e oyanan komo yakro. Apapa, yememe, oyepeka komo, oyakno komo ahnoro amna cma re waihkara maxe amn̂e. N̂examro yemyawno marha cma re mîmcexe. On wara cma re mîîkexe, Taa, amna akurunpexe so. Yaaro tan wîîkes awya so, cemaro pînî ro mak, mîîkexe cma re, kekn̂e wooxam yîwya so.

14 Taa, ketken̂e tî n̂examro yîwya, amna yehtopo yekatîmra awexitaw akurunpexe so rma amna. Awemîknopîra nas amna. Amna penî rma waihkape Kaan akurunpera so exitaw amna. Tantono komo yeken nîmyasî Kporin komo amna ya. Ero tîmîche akurunpexe so amna. Yaaro amna kes awya, ketken̂e. Ero wa tî ketken̂e Haabe ya.

15 Ero yinhîrî takî tî n̂examro n̂en̂epekn̂e Haabe tîmîn yewkanapan yaro. Ruupu ke tî n̂enîhcekn̂e. Ero wa tî n̂enîhcekn̂e ewto wacan kanahtaw exirî ke yîmîn. Ero wa tî n̂enîhcekn̂e.

16 On wara tî kekn̂e hara wooxam yîwya so, Îîpî pona emahcicoko awenîra ehtome so awepon̂e kom ha. Iito men eseyamcoko 3 kaamo mak. Ero yimaw n̂etîrametu n̂examro hara. Ero ke ero yimaw tak etocoko hara, kekn̂e tî.

17-18 On wara tî ketken̂e hara n̂examro yîwya, On wara kes hara amna awya, amna mokyataw hara amn̂e arowon komo pona on wara men esko, amîn yewkanapan yaro amna menîhto, ero poko rma on yimiko, ruupu, cucurem, Ayanan komo marha eeko amîn yaka. Aamo, anocwan, awepeka komo, ahnoro ekno cirko aamo yanan kom ha. Ero wa men cirko. Ero wa cirihra awexitaw towso tak men nas amna mtapotachonho, Awaikara so amna nasî, kachonho ha.

19 Waapa me amna mokyataw tak ahnoro ayanan komo eeko amîn yaka. Amîn yai etar̂ataw esama yaw waihya rma na noro yipu tak. Amna pona cirihra ro mak nasî Kaan noro yipu waihkachonho, tanme ro mak waihya. Amîn yaw makî exitaw so amna pona Kaan n̂iir̂asî waihkachonhîrî awaiyataw so.

20 Amna yehtopo yekatîmyataw tko apoyino komo ya towso marha nas amna mtapotachonho, Awaikara so amna nasî, kachonho ha, towîhnî me ro mak amna mtapotachonho ha, ketken̂e tî yîwya.

21 Taa, ero wa ham. Amtapotachonhîrî komo yaw roro rma amna nasî, kekn̂e tî wooxam yîwya. Ero ke takî tî n̂examro n̂en̂epekn̂e. Miya takî tî cetken̂e. Toche so ruupu takî tî n̂imiyakn̂e wooxam tîmîn yewkanapan poko. Ero wa tî xakn̂e.

22 Ero yinhîrî takî tî on wara xatken̂e n̂examro, îh pona tî n̂emahciyatken̂e. Iito tî n̂enmayatken̂e osorwaw kaamo. Iito exitaw so epon̂e komo tî n̂eporatken̂e esama yaw miya so. Enîhra rma tî xatken̂e. Ero ke ewto pona takî tî n̂etîrametken̂e hara.

23 Ero yimaw tak eseyamxapunhîrî komo takî tî cetken̂e hara. Îîpî tî n̂enîhcetken̂e. Xotaw Yepu tî wacetken̂e, Xoswe yaka tî cetken̂e hara, Nun mumutho yaka. Yîwya tî n̂esekatîmyatken̂e. Tîtotoponhîrî komo tî n̂ekatîmtîketken̂e.

24 On wara marha tî ketken̂e Xoswe ya, Iitono komo yeken nîmye ham Kporin komo kîwya so, miyan komo rma nîmye ham. N̂eraswaxe xa tak iitono komo kpona so, ketken̂e tî. Ero wa tî ketken̂e roowo yenso toxapunhîrî komo Xoswe ya.