Taa, ero yinhîrî on wara takî tî xatken̂e Xoswe komo, Ixaw Yana kom ha, Sicin poi tî cetken̂e. Pahxaxaro kaamo rma tî cetken̂e Xotaw yecihtaka. Iina takî tî n̂etakriyatken̂e eepu watohra ka.

2-3 Ero yinhîrî tak osorwaw ro enmapuche Ixaw Yana yantoman̂e komo cetken̂e yîchere so. On wara tî ketken̂e yîwya so, Amn̂e tak tîmsom pokono komo naar̂axe Aporin komo Kaanî mtapotacho yen. Repita komo mîkyam naar̂axe. Ero yeen̂ataw awya so awetathîrî komo tak ahsîpînkacoko. Kaanî mtapotacho yen wenari tak etocoko, ketken̂e tî yîwya so.

4 Mooxe n̂he rma tko etocoko. Kaanî mtapotacho yen ka naacowpe. 900 metru moxenon wenari so tak n̂examro amohcoko. Meyehra xa tohra men ehcoko awesamarî komo yentome tak awya so. Taixa mokuhnînhîrî amyamro, esama yenîhra maxe, ketken̂e tî yîwya so.

5 Ero yinhîrî tak Xoswe nîmtapowakn̂e hara Ixaw Yana komo yakro. On wara kekn̂e yîwya so, Oyakno komo, Kaan ponaro xa tak ehcoko oroto. Pahxaxa tak cirihnî n̂iir̂asî Kporin komo awero ro so, kekn̂e. Ero wa kekn̂e Xoswe Ixaw Yana komo ya.

6 Ero yinhîrî tak tîmsom pokono komo ya kekn̂e hara Xoswe on wara, Kaanî mtapotacho yen tak anîmcoko. Tuuna tak watocoko apoyino komo ywapu, kekn̂e yîwya so. Ero ke Kaanî mtapotacho yen tak nanîmyatken̂e tîmsom pokono komo. Tpoyino komo ywapu tak cetken̂e esama yaw.

7 Ero yinhîrî tak Kporin komo nîmtapowakn̂e xa hara Xoswe yakro. On wara kekn̂e yîwya, Oroto tak wihciyasî yukurumîkno me xa awenpotopo poko. Ero wa kenpesî ahnoro Ixaw Yana komo ya. Ero wa awehtopo yeen̂ataw tak on wara kexe apoko, Moises nakronomekn̂e Kporin komo ero wa xa marha Xoswe nakronome hara mî, kexe tak apoko.

8 On wara kasko tîmsom pokono komo ya, omtapotacho yen yaan̂e komo ya, Xotaw yecihtaka awtoche so tak yukwaka n̂he etocoko. Iito tak ececetocoko yukwaw, kasko yîwya so, kekn̂e yîwya.

9 Ero yinhîrî on wara kekn̂e hara Xoswe Ixaw Yana komo ya, Oona ka amohcoko Aporin komo mtapotarî yentaxi.

10 Oroto kar̂pe xa cehtopo n̂enpes awya so. Ero ke on wara tak mîîkexe, kîchew so xa nai ham Kaan waipînî ro. Ero ke kîîxatî pîn komo nar̂mapesî Noro kîwya so. Kananew pen komo, Etew pen komo, Epew pen komo, Peresew pen komo, Kihkasew pen komo, Amohew pen komo, Xebusew pen komo, n̂examro pen ahnoro nar̂mapesî kîwya so, mîîkexe tak oroto.

11 Kaanî mtapotacho yen tak cesî aywapu so Xotaw kwaka. Ero ponaro men ehcoko amn̂e. Ahnoro roowo pono komo Porin Mîk ha. Noro mtapotacho yen ces ha.

12 Ero ke 12 kîrkomo men̂ekacoko, 12 naxe Ixaw Yana tribun komo. Cewn̂e so men̂ekacoko tribu komo poko hakî so 12 me cehso ro.

13 Poturme ka tocowpe tîmsom pokono komo, Kporin komo mtapotacho yen yaan̂e komo. Roowo poko hakno komo Porin Mîk Noro mtapotacho yen mîn naar̂axe. Xotaw kwaka roro naacowpe. Xotaw kwaka cama ketaw tak yîwya so yasîno tak n̂ehkocesî tuuna. N̂esenmekyasî tak ceipuru wara, tukuhkaw cehso ro, kekn̂e. Ero wa kekn̂e Xoswe Ixaw Yana komo ya.

14 Ero ke cetathîrî komo tak nahsîpînketken̂e Ixaw Yana komo. Xotaw watoso tak cetken̂e. Yîywapu so cetken̂e tîmsom pokono komo, Kaanî mtapotacho yen yaan̂e kom ha.

15-16 Porin me xakn̂e tuuna. Tarinarî yopo nukmesî roro Xotaw Yepu puruma yenmetopo yimaw. Ero yipu kwaka cetken̂e tîmsom pokono komo, Kaanî mtapotacho yen yaan̂e kom ha. Yukwaka toche so wahra makî, tîî, yasîno tak yîhtora xakn̂e tuuna. N̂esenmekyakn̂e ceipuru wara tukuhkaw cehso ro tak. Mooxe tî n̂esenmekyakn̂e ewto yecento rma, Ataw yecento ha. Saretan mîtwono mîn Ataw. Uuma tîhtosom tak napaitîkekn̂e, Araba N̂ikithon kwaka tîhtosom ha. Yîmîtî Ken̂arî rma mîn Araba N̂ikithon. Ero ke tuuna yarinho tak wacetken̂e Ixaw Yana komo. Xer̂ko yecento rma wacetken̂e.

17 Xotaw yarinho rakataw rma n̂ecececetken̂e tîmsom pokono komo, Kporin komo mtapotacho yen yaan̂e kom ha. Turpe tak xakn̂e iito yarinho me. Ecececetaw so rma yîhyari so cetken̂e Ixaw Yana komo ahnoro turpem pore. Wacetîketken̂e tak. Ero wa xatken̂e.