Taa, ero wa Xotaw Yepu wacetken̂e Ixaw Yana komo ahnoro rma. Watotîkache yîwya so on wara kekn̂e hara Kporin komo Xoswe ya,

2 12 kîrkomo men̂ekacoko Ixaw Yana komo. Cewn̂e so men̂ekacoko atribun komo poko hakî.

3 On wara kasko etacixapu komo ya, Toopu anîmcoko Xotaw yarinho rakatawnonho ha. Tîmsom pokono komo n̂ecececexe, iitono anîmcoko. Aacoko miya, oroto cetakriyaxe iina, kasko yîwya so, kekn̂e. Ero wa kekn̂e Kporin komo Xoswe ya.

4 Ero ke toopu yaan̂e komo tak men̂ekekn̂e Xoswe 12 kîrkomo. Cewn̂e so men̂ekekn̂e tribu poko hakî. N̂examro tak nan̂ikyakn̂e.

5 On wara kekn̂e yîwya so Aporin komo Kaanî mtapotarî yen mehxa etocoko Xotaw yarinho rakataka. En̂exa tak toopu anîmcoko cewn̂e so. Amotaka so anîmcoko. 12 tribu amyamro, Ixaw Yana tribun komo. Ero ke 12 xa marha toopu anîmcoko hara.

6-7 Awya so watotoponhîrî komo kuknon me n̂expe toopu mko. Amn̂e on wara na ket amxîkrî komo amn̂e awya so, Apa, ahce kacho on menmekyatken̂e oona toopu ha? ketu na. Ero wa ketaw awya so on wara eyuhcoko, Okopuci, taixa Xotaw yepu amna wacekn̂e. Kaanî mtapotacho yen ka naar̂atken̂e tîmsom pokono komo eepu watotome. Ero yanme tuuna tak n̂ehkocekn̂e, yîhtora tak xakn̂e. Ero ke on toopu amna n̂enmekyakn̂e Ixaw Yana komo n̂enîrî, amna ya watotoponho ponaro ehtome so miya roro eponarononkan me, kacoko yîwya so, kekn̂e. Ero wa kekn̂e Xoswe toopu yenmekn̂e komo ya.

8 Ero ke Xoswe mtapotarî tak n̂ewehcatken̂e Ixaw Yana komo. Xotaw yarinho rakatawno nanîmyatken̂e toopu, 12 mak. Kporin komo kekn̂e Xoswe ya ero yaw roro rma nanîmyatken̂e. Ixaw Yana tribun komo yecenarî nanîmyatken̂e, 12 mak ha. Cetakritopo komo pona roro naar̂atken̂e. Iina n̂iir̂atken̂e.

9 Anarî xa hara n̂enmekyakn̂e Xoswe toopu, 12 xa hara. Xotaw yarinho rakatawnonho xa marha mîn n̂enmekyakn̂e. Iina rma tî ero mko reha n̂enmekyakn̂e, tîmsom pokono komo n̂ecececetken̂e iina rma, Kaanî mtapotacho yen yaan̂e komo yececetotopo to. Iito rma nas oroto. Ero wa nasî toopu enmexapu.

10-11 Taa, iito rma xatken̂e tîmsom pokono komo, Kaanî mtapotarî yen yaan̂e komo, Xotaw yarinho rakataw rma ka n̂ecececetken̂e. Kporin komo kekn̂e Xoswe ya, ero yaw roro rma xatken̂e Ixaw Yana komo, Moises kekn̂e Xoswe ya ero yaw roro marha. Ero yaw roro ehtîkacho pona roro iito rma n̂ecececetken̂e Kaanî mtapotarî yen yaan̂e komo. Cerekan̂e wacetken̂e Ixaw Yana komo. Watotîkache tak yîwya so Kporin komo mtapotarî yen tak naar̂atken̂e tîmsom pokono komo ecihtaka. Ixaw Yana komo wero ro rma naar̂atken̂e.

12 Huben yepamtho komo wacetken̂e Ixaw Yana komo poturme, Kace yepamtho komo marha, Manases yepamtho poyinonho komo marha. Moises penî mtapotachonho yaw roro rma wacetken̂e. Kîrkomo mîkyam wacetken̂e tukuruyem kom ha.

13 40.000 mîkyam wacetken̂e tukuruyem komo. Xer̂ko woskaran pona cetken̂e etar̂maxi. Kporin komo yanme cetken̂e. Ero wa cetken̂e.

14 Ero po tak yukurumîkno me xa Xoswe n̂enpekn̂e Kporin komo. Ixaw Yana komo n̂enîrî me ero wa n̂enpekn̂e. Ero ke Xoswe yewetîn̂e me tak xatken̂e waihtopo pona roro. Moises pen yewetîn̂e me xatken̂e noro pen waihtoponho pona roro, ero wa xa marha xatken̂e Xoswe yewetîn̂e me hara.

15-16 Ero yinhîrî tak on wara kekn̂e Kporin komo Xoswe ya, On wara kasko omîn yenîn̂e komo ya, omtapotacho yen yaan̂e komo ya ha, Xotaw yarinho rakataw naxe, n̂examro ya kasko, Amohcoko tak ecihtaka, kasko, kekn̂e.

17 Ero ke ero wa kekn̂e Xoswe tîmsom pokono komo ya. Amohcoko tak Xotaw yarinho yai, kekn̂e.

18 Ero ke mokyatken̂e tak ecihtaka, rakataw ececetoxapunhîrî komo. Kporin komo mtapotacho yen yaan̂e komo mîkyam mokyatken̂e. Îh pona mohtîkache so tak Xotaw Yepu tak nukmekn̂e hara. Porin me cehso ro nukmekn̂e arenarî yopo, yihcirme xakn̂e ero wa xa marha tak xakn̂e hara.

19 Yihcirî nuun̂i po tak Ixaw Yana komo nawomyatken̂e Xotaw yarinho yai. 10-înhîrî kaamo po nawomyatken̂e. Xiwkaw pona tak cetken̂e. Iina n̂etakriyatken̂e Xer̂ko rowon wokpan porero. Mehxa xakn̂e Xer̂ko oesce n̂ixa.

20 Iina tak toopu n̂enmekyakn̂e Xoswe, Xiwkaw pona ha. Ixaw Yana komo n̂ekîtho mîn n̂enmekyakn̂e.

21 Ero yimaw on wara kekn̂e Xoswe Ixaw Yana komo ya, Amn̂e on wara na ketu awepamthîrî komo tîîm komo ya, Ahce kacho on menmekyatken̂e toopu ha? ket ha na awya so.

22 Ero wa ketaw on wara eyuhcoko, Xotaw Yepu amna wacekn̂e Ixaw Yana kom ha. Yarinho yari amna wacekn̂e, kacoko yîwya so.

23 Ero wa awesamarî komo nuturpamnoyakn̂e Aporin komo Kaan, Xotaw Yepu watotome awya so. Pahxa awesamarî komo nuturpamnoyakn̂e Aporin komo Kaan Cucurem Yewku watotome kîwya so, ero wa xa marha Xotaw Yepu n̂iir̂akn̂e hara.

24 Ero wa n̂iir̂akn̂e on wara kachome roowo poko hakno komo ya, Karitî xa Mîk ham Kporin komo, kachome. Amyamro marha twerî awexi xe so nasî tpoko miya roro yîtîhkan me ro mak. Ero wa awehtome so ero wa n̂iir̂akn̂e, kekn̂e. Ero wa kekn̂e Xoswe Ixaw Yana komo ya.