Taa, ero yinhîrî on wara tî xatken̂e Amohew kayaritomon komo, Ixaw Yana komo ya watotoponhîrî tî n̂encetken̂e. Xotaw Yepu tî nîhkocekn̂e Kporin komo Ixaw Yana komo ya watotome kopi, kacho tî n̂encetken̂e. Ero wa n̂encetken̂e Xotaw mehxan komo, oesce n̂ixan kom ha. Kananew kayaritomon komo marha tî n̂encetken̂e, tuuna imo yecihtawno komo. Ero yipu yentarî ke tî n̂eraswatken̂e ro mak tak Ixaw Yana komo pona. Nahwoketken̂e ro makî tî.

2 Ero yimaw on wara tak kekn̂e Kporin komo Xoswe ya, Ai Xoswe, mariya me cirko saama, yaake cirko. Iike tak Ixaw Yana komo anpikakî. Pahxa anpikano miir̂atken̂e ero wa kasko xa hara, kekn̂e.

3 Ero ke saama tak n̂iir̂akn̂e Xoswe mariya me. Yaake tî n̂iir̂akn̂e. Iike tak Ixaw Yana komo nanpikapekn̂e kîrkomo yupun komo poko.

4 On wara xatken̂e Ixaw Yana komo, kîrkomo, Exitu poi mohxapu komo, waihyatken̂e okwe axawa imo pore etar̂ataw so. Poritomo komo pen mîkyam waihyatken̂e, sowtatu me cehsom pen kom ha. Noro yipu pen komo tî waihyatken̂e ahnoro okwe.

5 Anpikaxapu komo re mîkyam waihyatken̂e. Yîmxîkrî komo tko n̂ewruyatken̂e axawa imo po exitaw so, Exitu poi mokyataw so. N̂examro reha etanpikan me xatken̂e okwe.

6 Pahkî tî n̂etar̂atken̂e Ixaw Yana komo axawa imo pore, 40 cimn̂ipu n̂enatketken̂e. Ero wa etar̂ataw so waihyatken̂e kîrkomo, Exitu poi mohxapu komo sowtatu pen kom ha. Ahnoro waihyatken̂e okwe Kporin komo mtapotarî yewetîra cexirî ke so. On wara rma tî re kekn̂e Kporin komo n̂examro porin pen komo ya, Kanan wîmyas awya so amn̂e. Paaka mown pen nas iito mer̂pora ro mak okre, ween pen marha. Ero yipu wîmyas awya so arowon komo me, awepamthîrî komo ya marha wîmyasî, Yaaro xa wîîkesî cemaro pîn me ro mak, kekn̂e pahxa yîwya so. Ero yipu poko rma tko kekn̂e Exitu poi mohxapu komo ya hara, Enîhra ro mak men maxe okwe, kekn̂e. Yaaro xa marha wîîkesî cemaro pîn me, kekn̂e. Ero wa kekn̂e Kporin komo yîwya so.

7 Ero ke yumumuthîrî komo n̂iir̂akn̂e Kporin komo yîîmînhîrî pen yîhretawno me. N̂examro tak nanpikekn̂e Xoswe anpikara exirî ke so esama yaw cetar̂ataw so ha.

8 Ahnoro nanpiketken̂e kîrkomo. Ero ke ka ahna so na tohra xatken̂e. Iito makî ka xatken̂e ecihrî poko anpikatoponhîrî kom ha.

9 Ero yinhîrî on wara kekn̂e Kporin komo Xoswe ya, Oroto tak Exitu pono komo nîwîrîyakarî me awehtoponhîrî komo tak wow. Miya yîhmamaxaputho wara wiirî. Ero ke iitono tî nosohcetken̂e Xiwkaw me. Ero wa nosohcetken̂e ewto.

10 Taa, iito rma ka xatken̂e Ixaw Yana komo Xiwkaw po. Xer̂ko woskaran pono mîn Xiwkaw. Iito rma ka cexitaw so Watono Ritoponho nukukmetken̂e. Ero nuun̂i po rma nukukmetken̂e 14-nhîrî kaamo po. Kokmamche n̂ihciyatken̂e tak ceseresmacho komo me.

11 Twatotoponhîrî me ceseresmache so tak, ero yenmapuche rma Kanan po atîhtaxapu yeperîrî tak nahyatken̂e. Puruma yeperîrî mîn nahyatken̂e yupuxapu. Aixapu marha nokyatken̂e wahrututpamnî ha. Ero yipu nokyatken̂e.

12 Ero yenmapuche xa hara etakîtora tak xakn̂e maana. Maana exihra ro mak tak xakn̂e Ixaw Yana komo yuru hara. Kanan po atîhtaxapu yeperîrî mak tak nahyatken̂e. Ero wa tî xatken̂e ero cimn̂ipu po.

13 Taa, ero yinhîrî tak Xoswe n̂etar̂akn̂e, Xer̂ko mîtkoso cekn̂e. Iito cexitaw tooto n̂een̂akn̂e kîîrî, ceepatai cececetoso. Kacipara imo ke cemyarkem Mîk xakn̂e. Yîhyaka tak cekn̂e Xoswe. On wara kekn̂e yîwya, Amna xatî amoro? Amna xatî pîn komo yakrono kat amoro? kekn̂e yîwya.

14 Pîra ro mak, kekn̂e yîn̂enîthîrî. Kporin komo sowtatun komo yantoman̂e me mak kmoko, kekn̂e. Ero ke yohno rma tak nutupenwakn̂e Xoswe cesewnaposo ro. Oporin xa Amoro ham, kekn̂e. On wara marha kekn̂e Xoswe yîwya, Amaywen mak ow ha Apa. Ahce wa ka xe mai owya, kekn̂e.

15 On wara n̂eyukyakn̂e Kporin komo sowtatun yantoman̂e, Iipo masî roowo ero nasî Kaan rowonî ro me. Ero ke tak ehtakakî, kekn̂e. Ero ke n̂ehtakekn̂e Xoswe ero yimaw rma. Ero wa mak xakn̂e.