Taa, ero yimaw on wara tî xatken̂e Xer̂ko pono komo, cewton komo wacan metatanî mko tî nahruyatken̂e ahnoro. Ewto poi epatakara ro mak takî tî xatken̂e iitono komo. Ewto pona ewomura marha tî xatken̂e waaca mkaino kom hara. Ero wa nahruyatken̂e Ixaw Yana komo pona cerahtîke so.

2 Taa, ero yimaw on wara kekn̂e Kporin komo Xoswe ya, Ai Xoswe, Xer̂ko pono komo wiirî anar̂marî komo me, enko xe. Iitono komo kayaritomon war̂mapesî awya so, sowtatu komo marha war̂mapesî, noro yipu komo wiirî anar̂marî komo me.

3 Ero ke etocoko Xer̂ko mamriso. Amoro etoko, amaywen komo arko awakro ahnoro sowtatu kom ha. Cewn̂e ro makî ka mamricoko. Enmapuche xa hara cewn̂e ro xa marha mamricoko hara. Ero wa mamricoko 6 kaamo po roro.

4 Ero wa awcetaw so omtapotacho yen ywapu tocowpe 7 tîmsom pokono komo. Raatî ke cemyarke so tocowpe. Kahn̂eru meretîtho naacowpe raatî. Ero yinhîrî 7-n̂hîrî kaamo po tak Xer̂ko mamricoko 7 ro ero kaamo po rma. Tuu kacowpe tîmsom pokono komo ewto mamrikyataw roro awya so.

5 Ero wa mamritîkache awya so tuu kacowpe tîmsom pokono komo, pahkî n̂he tak kacowpe. Ero yipu yentache tak awya so sowtatu komo tak n̂emtarakacowpe hara kar̂pe xa. Ero wa emtaraketaw so Xer̂ko wacan tak n̂emacakesî ro mak. Emacakache sowtatu komo tak tocowpe ceepatai so ewto pona, kekn̂e. Ero wa kekn̂e Kporin komo Xoswe ya.

6 Ero ke tîmsom pokono komo tak nan̂ikyakn̂e Xoswe. On wara kekn̂e yîwya so, Kporin komo mtapotacho yen tak aacoko. Poturme tocowpe tîmsom pokono komo, anarî komo mak. 7 mak tocowpe raatî ke cemyarkem kom ha.

7 Ero yinhîrî sowtatu komo ya kekn̂e hara Xoswe, Taa, etocoko tak ha. Ewto mamricoko. Amyamro etocoko Kporin komo mtapotarî yen ywapu sowtatu komo, kekn̂e. Ero wa kekn̂e Xoswe sowtatu komo ya.

8 Taa, ero wa Xoswe yîmtapotache n̂examro yakro, timsom pokono komo tak cetken̂e ewto mamriso, 7 ha. Raatî ke cemyarke so cetken̂e Kporin komo yamatan ywapu. Kahn̂eru meretîtho mîn xakn̂e yîratîn komo. Tuu ketken̂e tîcetaw so. Yîmkai so tak cetken̂e Kporin komo mtapotacho yen yaan̂e kom hara.

9 Sowtatu komo ka cetken̂e poturme. Yîmkai so tak mokyatken̂e tîmsom pokono komo, tuu kan̂e kom ha. Taa, Kaanî mtapotarî yen mapitaw tak mokyatken̂e sowtatu kom hara. Ero wa cetaw so tuu ketken̂e raatî yecen̂e kom ha.

10 On wara kekn̂e Xoswe torî me so, Emtarakara ro mak men ka ehcoko awcetaw so. Eeei, kahra ehcoko. Yîmtapotara ro mak ehcoko Xer̂ko mamrikyataw awya so. Amn̂e mak anarî kaamo po mak, Emtarakacoko tak ha, wîîkes tak awya so. Ero yimaw mak tak memtarakexe, kekn̂e tî Xoswe yîwya so.

11 Ero ke Kporin komo mtapotarî yen narpekn̂e Xoswe yîwya so. Xer̂ko tmamriso ro naar̂atken̂e. Cewn̂e ro makî ka mamrikyatken̂e. Mamrîkîche cetarî komo yaka tak n̂etîrametken̂e hara. Iito tak cetarî komo yaw n̂enmayatken̂e.

12 Enmapuche hara pahxaxa ro pakekn̂e Xoswe. Ero yimaw Kporin komo mtapotarî yen nanîmyatken̂e xa hara tîmsom pokono komo.

13 N̂examro ka cetken̂e, 7 ha. Kahn̂eru meretîtho ke cemyarke so cetken̂e xa hara Kporin komo yamatan ywapu. Tuu ketken̂e tîcetaw so. Poturme xa cetken̂e sowtatu komo. Anarî komo cetken̂e Kporin komo yamatan mapitaw, sowtatu kom hara. Tuu karo cetken̂e raatî ke cemyarkem komo.

14 Ero wa cetken̂e 2-înhîrî kaamo po. Cewn̂e ro xa hara ewto mamrikyatken̂e. Mamritîkache cetarî komo yaka tak n̂etîrametken̂e xa hara. Ero wa Xer̂ko mamrikyatken̂e 6 kaamo po roro.

15 Taa, on wara tak xatken̂e n̂examro 7-nhîrî po hara, saa ketaw rma paketken̂e. Xer̂ko mamrikyatken̂e xa hara. Yihcirî me mamrikyatken̂e ero wa xa marha mamrikyatken̂e hara. 7 ro tko mamrikyatken̂e ero po rma.

16 7 ro mamritîkache tak tuu ketken̂e xa hara tîmsom pokono komo. Tuu ketaw tak on wara kekn̂e Xoswe, Ai, emtarakacoko tak ha. Oroto tak ewto nîm ha Kporin komo awya so, kekn̂e Xoswe yîwya so.

17 On wara marha kekn̂e noro yîwya so, On wara men wîîkes awya so, Kporin komo nîwîrîmarî me nas on ewto, on pono komo marha, emyawno komo marha, iyoh komo marha, ahnoro mak nasî yînwîrîmarî me. Haabe makî tko waihkara ehcoko kîrkomo pohkan̂enho ha. Yîmîn yawno komo marha waihkara ehcoko. Ewto yenso kn̂en̂epethîrî komo n̂eyamyakn̂e noro, ero ke waihkara ehcoko.

18 Ahce na yeen̂ataw awya so tîhcamnosom komo yemyawnonho, ahsîra ro mak ehcoko. Ero yipu yahsîyataw awya so tîhcamnosom me xa marha tak men maxe amyamro hara okwe. Ixaw Yana komo ahnoro tak naxe tîwîrîmaxmu me apoyero so rma okwe. Cemetanmesom amna miir̂axe okwe.

19 On wara tko nasî iitononhîrî pen komo yemyawnonho, ahce na me ciixapu, prata, ooru, bronse, pehu, mîn hak me ciixapu ero yipu komo nasî Kporin komo ya tîmxapu me. Noro purantan yen yaka mak cenkapore nasî, kekn̂e. Ero wa kekn̂e Xoswe sowtatu komo ya.

20 Ero ke tuu ketken̂e tak raatî yecen̂e komo. N̂emtaraketken̂e marha sowtatu komo. Tuu kacho yentache n̂emtaraketken̂e n̂examro. Ero wa ketaw so rma tak Xer̂ko wacan n̂emacakekn̂e ro mak okyo. Ero ke ceepatai so tak cetken̂e sowtatu komo ewto pona. Ewto pono komo tak waihketken̂e.

21 Waihkatîkano n̂iir̂atken̂e. Kîrkomo pen waihketken̂e, wooxam pen komo, kar̂pamxan pen komo, emasî pen komo, poritomo pen komo, nocwakomo pen komo marha. Paaka pen marha waihketken̂e, oper̂a pen, buhu pen, ahnoro waihketken̂e kacipara imo ke.

22 On wara kekn̂e Xoswe ewto yenso toxapunhîrî komo ya, Iito tîmîn yaw rma nasî wooxam, kîîrî pohkan̂e ro. Yîhyaka ewomtatko, noro ehcoko xiya iyanan komo yakro rma. Awaihkara nas amna amn̂e, mîîketken̂e yîwya. Yaaro kesî amna cemarontan me ro mak, mîîketken̂e. Ero ke tak ehtatko xiya, kekn̂e Xoswe.

23 Ero ke cetken̂e tak kar̂pamxan komo, Kanan pono komo yerasman̂enho komo. Haabe tak n̂ekyatken̂e ewto poi, yîîm, yînocwan, epeka komo, ahnoro n̂ekyatken̂e ewto poi. Ixaw Yana komo yetarî panaka naar̂atken̂e. Iina makî ka n̂ekenmetken̂e.

24 Ero yinhîrî tak mîîmotho mko nakn̂iyatken̂e, ero yawnonho marha ahnoro. Ahce na me ciixapu reha akn̂ipîra xatken̂e, prata, ooru, bronse, pehu, ero ciixapu yakn̂ipîra xatken̂e. Naar̂atken̂e Kaan yen yaka. Iina n̂iir̂atken̂e yupurantan yîmtotopo yaka. Iina n̂iir̂atken̂e.

25 Haabe reha waihkara xakn̂e Xoswe kîrkomo pohkan̂enho, iyanan komo marha, emyawno komo marha nîmcetken̂e. Ero wa n̂examro waihkara xakn̂e Xer̂ko yerasman̂e komo yeyamrî ke Haabe ya, Xoswe n̂en̂epetho komo eyamrî ke ha. Ero ke Ixaw Yana komo chewno me tak xakn̂e Haabe. Yîchew so rma nas oroto.

26 Taa, ero yimaw on wara kekn̂e Xoswe, Kporin komo nîwîrîmarî me tak n̂expe on ewto ciin̂e xa hara, Xer̂ko ciin̂e hara. Yumumuthîrî rma waihyasî mapatan cirirî me, potuthîrî pen ha. Anarînhîrî yumumuthîrî hara waihyasî mahtîkîthîrî pen tak ewto wacan metatan cirirî me hara, kekn̂e. Ero wa kekn̂e Xoswe.

27 Ero wa tî xakn̂e Xoswe, Kporin komo nakronomarî me xa xakn̂e. Ero ke miya ro mak Xoswe n̂ekaiwakn̂e ahnoro iitono komo n̂entarî me. Ero wa xakn̂e Xoswe ero yimaw.