Taa, Ixaw Yana komo yehtopo rma tan wekatîmyasî. On wara tko tî xatken̂e, kicicme tî xatken̂e kica. Kporin komo mtapotarî yewetîtîkara tî xatken̂e kica, Xer̂ko pono pen komo yemyawnonho nasî tîhcamnosom me kr̂a, kacho yewetîra xatken̂e kica. On wara tî xakn̂e Akan, Kahmi pen mumutho. Sabici pen parînho tî mîk xakn̂e, Sera pen mumutho pen parînho ha. Xuta yepamtho mîkyam xatken̂e. On wara tî xakn̂e Akan, Ahsîra ro mak ehcoko tîhcamnosomu, kachotho rma tî nahsîyakn̂e kica. Ero ke Ixaw Yana komo poko tak nîrwonakn̂e Kporin komo okwe.

2 Ero yinhîrî tak Xer̂ko poi tmaywen komo n̂en̂epekn̂e Xoswe Ai pona. Bece-Apen mîtwono mîn Ai, Betew mehxan ha, resce n̂ixan. On wara kekn̂e Xoswe tîn̂en̂eperî komo ya, Mîntono komo yerasmaxi etocoko, kekn̂e yîwya so. Ero ke cetken̂e tak Ai pono komo yerasmaxi.

3 Ero yinhîrî tak n̂examro mokyatken̂e hara Xoswe yaka. On wara ketken̂e yîwya, Asak mak natu Ai pono komo. Ero ke ahnoro rma en̂epera cexpore nasî sowtatu komo. 2.000 mak cen̂epepore nasî, 3.000 na anarimaw. Anarî komo cekar̂kaxmu me cirihra cexpore nasî ero poko, ketken̂e Xoswe ya.

4-5 Ero ke 3.000 komo mak cetken̂e sowtatu komo Ai pono komo waparî me. Ixaw Yana komo yopo tko tî xatken̂e Ai pono komo. N̂emahciyatken̂e makî tî Ixaw Yana komo okwe. 36 sowtatu pen komo waihketken̂e okwe Ixaw Yana pen komo. Ai wacan metataka tî ka cetken̂e. En̂exa n̂en̂epetken̂e Ai pono komo. Miya ro mak n̂en̂epetken̂e Sebarin pona. Puhyaka n̂en̂epetken̂e Ixaw Yana pen komo tparaxkaro okwe. Taa, ero wa waihtoponhîrî komo yentarî ke ahwora ro mak takî tî xatken̂e Ixaw Yana pen komo. Nahwoketken̂e ro mak okwe.

6 Ero yipu yentache Xoswe ya tpononthîrî tak nahxaikekn̂e. Roowo pona tak n̂esewnapekn̂e Kporin komo mtapotarî yen mîtkoso. Iito xakn̂e pahkî, kokmamso ro ha. Ero wa xa marha n̂esewnapetken̂e Ixaw Yana poritomon komo. Roowo marha pahyatken̂e tîhtîpîrî komo pore.

7 Ero yimaw on wara kekn̂e Xoswe Kporin komo ya, Kaan Amoro Apa, On wara wîîkes awya. Ahce kacho amna mekye oona okwe? Ahce kacho Xotaw Yepu twatoso ro amna mekye? Amohew komo nar̂marî me makî kat amna mekye xiya? Iito rma cexpore cma re amna xakn̂e Xotaw yeco po rma.

8 Apa, ahce wa thakwa re wîîke tîîxatî pîn komo nar̂marî me exitaw okwe Ixaw Yana pen komo.

9 Amna waihtopo tak men n̂encexe Kananew komo. Ero ke amna tak mamcexe. Amna pen waihketîkexe. Amna yosotîtho nîhcamnotîkexe roowo poko hakno komo eroromero. Karitî me xa mekaiwas Apa. Amna waihketîketaw ahce ke re kar̂pe awehtopo menpe ero yimaw yîwya so? kekn̂e Xoswe Kporin komo ya.

10 On wara tko kekn̂e Kporin komo Xoswe ya, Piiri awomko okopuci. Ahce kacho cewnapo mai?

11 Kicicme n̂ehce Ixaw Yana komo kica. Omtapotarî yewetîra n̂ehce kica. Tîhcamnosom, kacho nahsîyatken̂e kica. N̂en̂epanatken̂e kica. Cemaronwatken̂e marha kica. Cemyawno komo cheka rma n̂iir̂atken̂e kica.

12 Ero yanme mak tîîxatî pîn komo yopono me exihra tak n̂ehcow Ixaw Yana komo. N̂emahcicow okwe. Twaihkaxmu me thakwa tak naxe n̂examro okwe. Awakronomara so men was okwe, Tîhcamnosomu kr̂a mîn ha, kacho yar̂matîkara awexitaw so.

13 Ero ke awomko, oponaro xa tak Ixaw Yana komo cirko. On wara kasko yîwya so, Ai oyakno komo, on wara wîîkes awya so, Kporin komo ponaro xa tak ehcoko ero wara rma awehtome so pahxaxa. On wara men kesî Kporin komo, ponaro Ixaw Yana komo yehtopo ha, Tîhcamnosom, kacho nas achew so kica. Ero yanme aaxatî pîn komo yopono me exihra maxe okwe. Ero yar̂mache mak tak awya so aaxatî pîn komo yar̂man̂e me tak maxe hara.

14 Ero ke pahxaxa men amohcoko ohyaka. Tpomxe mak esenmecoko tribu me so. Kporin komo tak n̂etahcasî tribu. Taa, n̂examro tak mokyaxe hara tpomxe hara poritomo yepamtho re. N̂examro poyino n̂etahcasî xa hara Kporin komo anarî poritomo yepamtho komo. Noro yepamtho komo tak mokyaxe hara cewn̂e so mak.

15 Tîhcamnosom mîn, kacho yaan̂enho yîhtînopuche tak awya so noro pen akn̂icoko, yîhyawnonhîrî pen marha ahnoro. Kporin komo mtapotarî yewetîra xakn̂e kica. Ixaw Yana komo yîwîrîman̂e mîk kica. Ero ke akn̂icoko, kekn̂e. Ero wa kekn̂e Kporin komo Xoswe ya.

16 Ero ke enmapuche tak Ixaw Yana komo nan̂ikyakn̂e Xoswe. Amohcoko tpomxe so atribun komo re, kekn̂e yîwya so. Ero ke tribu re mokyataw so Xuta yepamtho komo pona tak xakn̂e men̂ekacho.

17 Ero yinhîrî Xuta yepamtho komo tak mokyatken̂e tpomxe so poritomo komo yepamtho komo re hara. Ero wa mokyataw so Sera yepamtho komo pona tak xakn̂e hara men̂ekacho. Ero yinhîrî Sera yepamtho komo mokyatken̂e tpomxe so yîîm komo yawno hara. Ero wa mokyataw so Sabici pona tak xakn̂e hara yukuknomacho.

18 Ero ke n̂examro tak nan̂ikyakn̂e hara Xoswe cewn̂e so. Ero wa mokyataw so Akan pona tak xakn̂e hara men̂ekacho Kahmi mumutho pona. Sabici parî tî mîk xakn̂e Akan, Sera pen yepamtho ha. Xuta yepamtho mîkyam xatken̂e. Noro pona tak xakn̂e men̂ekacho.

19 Akan men̂ekache tak on wara kekn̂e Xoswe yîwya, Okopuci, kir̂wan̂he xa mai ham, kasko Kaan ya, Ixaw Yana komo Porin ya. Noro ya marha esekatîmko. Owya marha ekatîmtîkakî awehtoponhîrî. Eyamura ro mak tak esko, kekn̂e yîwya.

20-21 Ero ke on wara tak n̂eyukyakn̂e Akan, Yaaro, kicicme wehxe Kaan poko, Ixaw Yana komo Porin poko ha. On wara wehxe, Xer̂ko po ween̂e poono, kir̂wan, Babiron̂a pono komo nkaputho. Prata marha ween̂e 200 sikru wicak okre. Ooru marha ween̂e. Porin mîn ween̂e 50 sikru wicakî. Enîrî ke yiixe wehxe. Ero ke wahsîye. Omîn yaw nasî ceyamso ahtoxapu yaw. Poono makataw nasî prata, kekn̂e. Ero wa cehtoponhîrî n̂ekatîmyakn̂e Akan.

22 Ero ke iika tanton komo n̂en̂epekn̂e Xoswe yîmîn yaka. Ero ke iina cetken̂e kar̂pe. Iito n̂een̂atken̂e yîmîn yaw. Ceyamso xakn̂e. Prata xakn̂e poono makataw.

23 Ero ke tak Akan mîn yai naar̂atken̂e. Xoswe yaka naar̂atken̂e, Ixaw Yana komo yaka marha. Kporin komo yepatai tak panahcetken̂e en̂epanmexapunhîrî.

24 Ero yinhîrî Akan tak naar̂akn̂e Xoswe, Sera pen yepamtho. Ixaw Yana komo yakro noro naar̂atken̂e. Prata naar̂atken̂e, poono, ooru, yumumuru komo, emsîrî komo, iyoh komo paaka, buhu, kahn̂eru, taa, yîmînthîrî, ahnoro mak naar̂atken̂e emyawno komo, yîhyawno komo marha. Akoro pona naar̂atken̂e woskara pona.

25 Ero yinhîrî on wara kekn̂e Xoswe Akan ya, Ahce poyero amna mîwîrîmai okwe? Oroto tak awîrîmes hara Kporin komo, kekn̂e. Ero ke tak noro pen n̂etapetken̂e Ixaw Yana komo toh ke, twaihso ro n̂etapetken̂e. Yîhyawnonhîrî pen komo marha, iyokuthîrî pen marha. Ero yinhîrî tak okoputhîrî komo nakn̂iyatken̂e, emyawnonhîrî marha.

26 Ero yinhîrî tak toopu n̂enmekyatken̂e okoputhîrî pona tukuhkaw cehso ro. Iito rma nas oroto. Ero wa ciriche yîwya so n̂etîrwoxinkekn̂e takî tî Kporin komo yîrwonîmxapunhîrî xa. Taa, on wara takî tî nosohcetken̂e iitono woskara, Akoro me nosohcetken̂e. Ero wara rma n̂etahcaxe iitono komo oroto. Ero wa n̂etahcaxe.