Ero yinhîrî on wara kekn̂e Kporin komo Xoswe ya, Ai, Xoswe, on wara wîîkes hara awya, erasîra esko. Ahwokara marha esko. Ai pono komo yar̂maxi tak etoko xa hara. Sowtatu komo arko ahnoro. Ai pono komo kayaritomon tak war̂mapo awya so, maywenînhîrî komo yakro rma. Ewtonthîrî komo marha wîîm awya so, yîrowonthîrî komo marha. Ahnoro wîîm awya so. Enko xe.

2 Kokon̂oro Xer̂ko pono pen komo mar̂mace, kayaritomon komo pen marha. Ero wa xa marha Ai pono pen komo ar̂macoko, n̂examro kayaritomon pen marha. Anarî me tko wîîkes awya so emyawnonhîrî komo poko, iyokuthîrî komo poko marha. Ero yipu tak maar̂axe yiixe awexitaw so awemyawno komo me, awoh komo me marha. On wara xa n̂examro pen ar̂macoko, sowtatu komo en̂epeko ewto mehxa anarî komo mak. En̂epa me en̂epeko. Ewto mehxa n̂he n̂eseyamcowpe, kekn̂e. Ero wa kekn̂e Kporin komo Xoswe ya.

3 Ero ke cekn̂e tak Xoswe Ai pono komo waparî me xa hara. Sowtatu komo naar̂akn̂e ahnoro. Yihcirî me ka anarî komo mak men̂ekekn̂e sowtatu komo. Yaake men̂ekekn̂e 30.000. N̂examro tak n̂en̂epekn̂e kosope rma.

4 N̂examro cetaw on wara kekn̂e yîwya so, Ai oyakno komo, omtapotarî men entacoko. On wara etocoko amyamro, Ai mkai etocoko en̂epa me mak. Iito tak eseyamcoko ewto pahnoke. Mooxe tohra ehcoko ewto mehxa. En̂exa rma tko amna mokrî encoko.

5 Enmapuche tak amna cesî yuu yuu kaxi ewto wece. Amna yeen̂ataw iitono komo ya amna yar̂maxi mokyaxe hara. Kokon̂oro mokyatken̂e kaknonhîrî pen komo yar̂maxi ero wa xa marha mokyaxe hara. N̂examro mokyataw tak amna n̂emahciyasî xa hara.

6 Ero ke amna wenari mokyaxe. On wara kexe, Ixaw Yana komo n̂emahciyaxe xa hara, entamko xe. Kokon̂oro n̂emahcice ero wa xa marha n̂emahciyaxe hara, kexe amna poko. Ero wa kachome yîwya so amna n̂emahciyasî.

7 Ero yimaw tak amohcoko amyamro ewto yar̂maxi. Aporin komo Kaan tak nîmyas awya so anar̂marî komo me.

8 Iitononhîrî pen komo waihkatîkache yîmînthîrî komo tak akn̂icoko. Ero wa kesî Kporin komo owya. Ero ke Noro mtapotarî yaw roro etocoko. Ero wa men wîîkes awya so, kekn̂e. Ero wa kekn̂e Xoswe eseyamso tîtosom komo ya.

9 Ero ke tak n̂examro n̂en̂epekn̂e Xoswe. Ero ke eseyamso cetken̂e. Ai mkai n̂eseyamyatken̂e oesce n̂ixa. Mehxa n̂he xakn̂e Betew hara. Iito n̂eseyamyatken̂e Ixaw Yana komo. Eeta yaw rma ka xakn̂e Xoswe tpoyino komo yakro rma.

10 Enmayataw tak eeta yawno komo tak nan̂ikyakn̂e Xoswe sowtatu komo. N̂examro tak naar̂akn̂e Ai pono komo waparî me. Ixaw Yana poritomon komo yakro rma cetken̂e.

11 Ero ke Xoswe komo tak cetken̂e ewto wece. Iito ka n̂eremetken̂e Ai pahnoke. Mehxa xakn̂e Ai suu n̂ixa. Xehxa n̂he xakn̂e aporî. Ero mkai xatken̂e Ixaw Yana komo. Ero wa xatken̂e.

12 En̂exa tak anarî komo xa hara n̂en̂epekn̂e Xoswe eseyamso hara 5.000. Oesce n̂ixa n̂eseyamyatken̂e n̂examro hara. Mehxa xakn̂e Ai, xehxa xakn̂e Betew. Iito tî n̂eseyamyatken̂e.

13 Ero wa xatken̂e Ixaw yana komo. Sowtatu komo xatken̂e cepanatoso so aporî mkai, nohce n̂ixa. Mehxa xatken̂e eseyamxapu komo oesce n̂ixa hara. Kosope tak Xoswe cekn̂e aporî yecihtaka.

14 Taa, Xoswe komo tak n̂een̂akn̂e Ai pono komo kayaritomon. Ero ke saa ketaw ewto pono komo cetken̂e Xoswe waparî me. Kîrkomo naar̂akn̂e kayaritomo, ahnoro naar̂akn̂e ewto pono komo. Kar̂pe tî cetken̂e. Woskara yemyatkoso cetken̂e tînkuknomathîrî komo pona. Iina tîhcexe Ixaw Yana komo yakro etar̂maxi, kacho pona. Ewto mkai naxe anarî komo kopi, kahra ro makî tî xakn̂e.

15 Yohno rma tko Xoswe komo n̂emahciyatken̂e, Ixaw Yana kom ha. Kar̂pen wara ro mak n̂esenpetken̂e. Axawa imo yesamarî yaw n̂emahciyatken̂e.

16 Ero ke ahnoro Ai pono komo tak nan̂ikyakn̂e kayaritomo Xoswe komo waparî me. Xoswe komo wenari cetken̂e kar̂pe. Mooxe cetken̂e.

17 Ero ke Ai po rma exihra ro mak tak xatken̂e kîrkomo. Betew po exihra marha xatken̂e. Ewto wacan metatan yahrura ro makî tî xatken̂e. Ixaw Yana komo yar̂maxi makî tî cetken̂e ahnoro kar̂pe.

18 Ero yinhîrî on wara tak kekn̂e Kporin komo Xoswe ya, Ai Xoswe, Ai wece tak ekanîhko arahnu ke. Awya tak war̂mapesî Ai pono komo, kekn̂e. Ero ke Ai wece tak n̂ekanîyakn̂e Xoswe tîrahnu ke.

19 Ero ke kar̂pe takî tî cetken̂e eseyamxapunhîrî komo. Ewto pona tî cetken̂e ewto wece ekanîyataw Xoswe ya. Iitono komo tî waihketîketken̂e. Yîmînthîrî komo marha tî nakn̂iyatken̂e. Ero wa tî xatken̂e eseyamxapunhîrî komo.

20 Ero yimaw tîmkai so tî n̂een̂atken̂e Ai pono komo, kîrkomo. Yîsîn takî tî n̂een̂atken̂e kopi. Kahsî nawomyakn̂e yîsîn. Emahcitopo komo ken̂ehra tak xatken̂e okwe. Axawa imo wece emahcixapunhîrî komo tak n̂etaknametken̂e twenari so tmohsomunhîrî komo wece hara.

21 On wara tak xatken̂e Xoswe komo, Ixaw Yana komo ahnoro, yîsin tak n̂een̂atken̂e mîîmo mko yecahtopo. Ero ke on wara ketken̂e, Ai pononho pen komo tak waihkacow ham eseyamxapunhîrî komo, ketken̂e. Ero ke n̂etaknametken̂e hara Xoswe komo Ai pono pen kom yar̂machome hara.

22 Ero yimaw marha ewto yakn̂in̂enho komo n̂epataketken̂e ewto poi kîrkomo pen yar̂max hara. Emahcira thakwa xatken̂e okwe n̂examro pen Ai pono pen komo. Eepatai so xatken̂e Ixaw Yana komo, yîmkai so marha. Ero ke n̂examro pen tak paraxketken̂e Ixaw Yana komo. Ahnoro waihketken̂e. Yîmtora ro makî tî xatken̂e. Tîhyai so en̂epera ro mak xatken̂e.

23 Ai pono komo kayaritomon makî tko waihkara xatken̂e. Noro reha naar̂atken̂e Xoswe yaka.

24 Taa, ero wa Ai pono komo pen waihketken̂e Ixaw Yana komo twenari so mohxapunhîrî pen komo. Woskara pona mohxapu komo waihketken̂e, axawa imo pona toxapu komo marha. Kîrkomo waihkatîkache kacipara imo ke Aitho pona cetken̂e hara Ixaw Yana komo. Iitononhîrî pen komo rma waihketîketken̂e hara.

25 12.000 waihyatken̂e ero po rma. Kîrkomo pen waihyatken̂e, wooxam pen komo marha. Ahnoro waihyatken̂e Ai pononho pen komo okwe.

26 Pahkî n̂ekanîyakn̂e Xoswe tîrahnu ke. Ai pono pen komo waihkatîkache mak tak ekanpîra tak xakn̂e hara.

27 Ero yinhîrî iitononhîrî komo yemyawnonho tak naar̂atken̂e Ixaw Yana komo, iyokuthîrî komo marha. Kporin komo kekn̂e Xoswe ya ero yaw roro rma naar̂atken̂e.

28 Ero yimaw ewto pen nakn̂itîkekn̂e Xoswe iitononhîrî pen. Wemronho me mak tak n̂iir̂akn̂e ewtotho eroromero. Ero wara rma nasî oroto.

29 Ero yimaw marha Ai pono komo kayaritomon pen n̂exewnukyakn̂e Xoswe weewe pona. Iito rma xakn̂e okoputhîrî tamhosotoso kokmamso ro. Kokmamyataw tak okoputhîrî n̂enîhtopekn̂e Xoswe. Ewtotho wacan metataka rma nar̂mapekn̂e. Toopu marha n̂enmekyatken̂e okoputhîrî pona tukuhkaw xa. Iito rma nasî toopu oroto. Ero wa Ai pononho pen komo nar̂metken̂e.

30-31 Taa, ero yinhîrî Ebaw Yîpîn pona tak Kporin komo ya tîmsom yakn̂itopo nakîhcekn̂e Xoswe, ponaro Ixaw Yana komo yehtopo ya tîmsom yapon ha. Pahxa rma Moises kekn̂e Ixaw Yana komo ya, Ero wa Kporin komo ya tîmsom yakn̂itopo akîhtocoko, kekn̂e. Kporin komo yanton mîk kekn̂e. Ero wa kacho marha nasî tmewreso kpanatanmetopo yaw Moises nmewretho yaw ha. Ero wa kachonho yaw roro nakîhcekn̂e. Toopu n̂enmekyakn̂e enporinî ro mak, pehu ke enporinî ro mak, ero yipu n̂enmekyakn̂e apon me. Ero pona tak nakn̂iyatken̂e tokuthîrî komo puntho Kporin komo ya tîmsom. Takn̂itîkaxmu nakn̂iyatken̂e, Aaxe xa wasî, kacho marha nakn̂iyatken̂e iina.

32 Iina marha Moises penî mtapotachonho mewrekn̂e Xoswe, kpanatanmetopo kom ha. Toh poko rma mewrekn̂e Ixaw Yana komo wero ro rma.

33 Ero yinhîrî tak îh po n̂esenmekyatken̂e Ixaw Yana komo ahnoro. Cececetoso so xatken̂e. Poritomo komo xatken̂e iito, antomano rin̂e komo marha, en̂ekano rin̂e komo marha. Yîcheka so mohxapu komo marha xatken̂e iito, yîchew so ewruxapu komo marha. Iito xakn̂e Kporin komo mtapotarî yen. Ero yaan̂e komo wece cewru n̂ecececetken̂e xehxa mehxa wara. Tîmsom pokono komo mîkyam xatken̂e ero yaan̂e komo, Repita kom ha. Ero wa n̂ecececetken̂e Ixaw Yana komo. Yîraconhîrî komo n̂ecececetken̂e Ebaw Yîpîn yexenaw, yîraconhîrî kom hara xatken̂e Xeresin Yîpîn yexenaw. Ero wa n̂ecececetken̂e Moises mtapotachonho yaw roro rma, Kporin komo yantonî mtapotachonho yaw roro ha. Ero wa Ixaw Yana komo yakronomacho ekatîmcoko, kekn̂e tî yîwya so. Ero wa kachonho yaw roro tak n̂iir̂atken̂e.

34 Ero yimaw tak kpanatanmetopo komo nîmtapotaretîkekn̂e Xoswe yîn̂entarî komo me. Akronomacho komo nîmtapotarekn̂e, yîwîrîmacho komo marha.

35 Ahnoro Moises penî mtapotachonho nîmtapotaretîkekn̂e watohra ro mak. Ero yîmtapotareko amn̂e, kachonho nîmtapotarekn̂e. Ixaw Yana komo n̂entarî me nîmtapotarekn̂e miyan komo n̂entarî me rma. Iito rma xatken̂e wooxam komo meero, rikomo komo meero. Anarî yana komo marha xatken̂e iito yîchewno kom ha. Noro yipu komo n̂entarî me nîmtapotarekn̂e Xoswe Moises pen nmewretho. Ero wa nîmtapotarekn̂e.