Ero yimaw takî tî Ixaw Yana komo yehtoponho n̂encetken̂e ahnoro Kananew kayaritomon kom ha. Îh pono komo, capahno pono komo, tuuna imo yecihtawno komo, miya rorono komo, Ribanu pona rorono kom ha, Etew kayaritomon komo, Amohew kayaritomon komo, Kananew kayaritomon komo, Peresew kayaritomon komo, Epew kayaritomon komo, Xebusew kayaritomon komo, ahnoro tî n̂encetken̂e iitono komo, Xotaw xehxan kom ha.

2 Ero ke tak iina re takî tî n̂esenmekyatken̂e Ixaw Yana komo waparî me. Xoswe komo yakro etar̂maxi tîtotopo komo poko tî nîhtînoyatken̂e etîme re.

3 Xibeon pono komo marha tî n̂encetken̂e Ixaw Yana komo yehtoponho. Xer̂ko pono pen komo yar̂machonho tî n̂encetken̂e, Ai pono pen komo yar̂machonho marha. Noro yipu pen komo yar̂machonho tî n̂encetken̂e.

4 Ero ke emku me mak takî tî tîtotopo komo nîhtînoyatken̂e n̂examro. Mooxe mohxapu wara cesenpo xe xatken̂e Xoswe komo yaka tîtosom komo, meyeno komo kayaritomon yanme tîtosom komo wara. Ero ke cemyawno yenkayataw kumixi yaka etahxaikaxaputho yaka makî tî n̂enkayatken̂e. Wooku marha narketken̂e okno pichotho yaka, etawkaxaputho yaka mak. Etawkatoponhîrî mak n̂eemiyatken̂e pahxantho wara esenpotome Ixaw Yana komo ya.

5 Pahxantho mak numunukyakn̂e tîhtarî komo cewtakemtho mak, eemixaputho mak. Pahxantho marha namruyatken̂e poonotho. Tuuru komo rma re n̂enkayatken̂e kumixi yaka tporan komo, payantaxaputho mak ha tko.

6 Ero yinhîrî takî tî Xoswe yaka cetken̂e. Xiwkaw po xatken̂e Ixaw Yana komo ero yimaw. Yîhyaka so tîtoche so Xoswe yakro tak nîmtapowatken̂e, Ixaw Yana komo yakro marha kîrkomo yakro. On wara ketken̂e yîwya so, Meyeno amna moko ahyaka so awakro so esentaxi. On wara kes amna awya so, on poko cma re tîmtapowaxe yaaro xa, Cetkurunpecerî, kacho poko, ketken̂e yîwya so.

7 On wara tko Epew komo n̂eyukyatken̂e Ixaw Yana komo, Anarimaw amna mîtwono komo rma na amyamro. Ahce wa thakwa re amna nîmtapowa ero poko awakro so? ketken̂e yîwya so.

8 Pîra ro mak, ketken̂e hara mohxapu komo. Amaywen me mak cexi xe nas amna, ketken̂e. Ero ke on wara tak kekn̂e Xoswe yîwya so, Onoke xa amyamro ha ke? Ahn̂i xa mîmohcow ha ke? kekn̂e yîwya so.

9 Apa komo, ketken̂e tak Xibeon pono komo yîwya so, mooxe ro mak nas amna yeken. Iito rma amna n̂encekn̂e Aporin komo Kaan yehtopo, kyopono me so xa ehtopo amna n̂encekn̂e. Exitu pono pen komo nîwîrîmekn̂e ro mak Noro, kacho amna n̂encekn̂e.

10 Amohew kayaritomon pen komo marha tî nar̂mapekn̂e awya so asakno roro rma. Xotaw yeco pono komo tî nar̂mapekn̂e ahnoro. Sion pen tî nar̂mapekn̂e Esbon pono komo kayaritomon pen ha. Oki pen marha tî nar̂mapekn̂e, Basan pono komo kayaritomon pen, Astaroce pononho pen ha. Ero wa Aporin komo Kaan yehtopo amna n̂encekn̂e.

11 Ero ke on wara ketken̂e amna poritomon komo, ahnoro mak amna poyino komo ketken̂e on wara, Etocoko tak kîrkomo Ixaw Yana komo yaka. Aporan komo aacoko. On wara kacoko yîwya so, Ai, apa komo, awanton komo mak amna. Ero ke ketkurunpetopo komo poko cma re tîmtapotacerî, kacoko yîwya so, ketken̂e amna ya.

12 On amna poran amna n̂ekyakn̂e tîmîn yawno. Aixapu rma ka amna n̂enkayakn̂e kumixi yaka amna mohtopo po rma ha, awenso so amna mokrî me rma. Tpayaye tak nasî kica, ceipu marha okwe, enko xe.

13 Amna wokru yen komo xakn̂e yaxan me amna mokyataw mehxa. Amna narkekn̂e twokru on yaka. Cetawkaxi exirî tak encoko. Pahxantho me tak nas amna ponontho, amna tatho marha. Ero wa nasî mooxe ro mak amna mokrî ke, ketken̂e. Ero wa ketken̂e kica Xibeon pono komo Xoswe komo ya.

14 Ero wa entarî ke tak mohxapu komo wokru poi n̂eer̂atken̂e Ixaw Yana komo, iyuru komo poi marha nokyatken̂e. Kporin komo yakro tko yîmtapotara ro mak xatken̂e okwe ero poko.

15 Cetkurunpetopo komo poko tak nîmtapowakn̂e Xoswe. On wara kekn̂e yîwya so, Awaikara so nas amna. Awaparî komo mokyataw awakronomaxi so amna mokyasî, kekn̂e. Ero wa xa marha ketken̂e Ixaw Yana yantoman̂e komo. Yaaro xa ero wa kes amna, cemaro pîn me ro mak, ketken̂e. Ero wa ketken̂e antomano rin̂e komo Xibeon pono komo ya.

16 Ero yinhîrî tak osorwaw ro n̂enmayakn̂e, Cetkurunpecerî, kachonho Xibeon pono komo ya. Ero yimaw on wara tak n̂examro yehtopo n̂encetken̂e hara Ixaw Yana komo, Amîtwono komo rma mexe mîkyam, Akurunpexe so amna, awaikara so ro mak nas amna, mîîketken̂e yîwya so n̂examro. Amîtwono komo rma mexe mîkyam meyeno pîn komo ro mak, kacho n̂encetken̂e.

17 Ero ke Xibeon pono komo yaka tak cetken̂e Ixaw Yana komo. Asakî ro n̂etakriyatken̂e esama yaw ewton komo pona cepatakachome so tak. On wara xakn̂e ewton komo, Xibeon, Sepira, Beeroce, Kiriace Xearin. Ero wa xakn̂e ewton komo yosotî.

18 Ar̂mano cirihra rma tko tî xatken̂e Ixaw Yana komo, Awaikara so nasî amna, karî ke thakwa yîwya so. Awakronoman̂e me mak nas amna miya roro. Yaaro xa tan kes amna, kekn̂e thakwa amna okwe. Kaan n̂etahcatken̂e Ixaw Yana komo Porin. Ero ke ar̂mano cirihra rma xatken̂e. Ahwora tak xatken̂e Ixaw Yana komo tantoman̂e komo poko. Kicicme tî nîmtapowatken̂e poko so.

19 On wara tko n̂eyukyatken̂e antomano rin̂e komo, Yaaro xa thakwa kekn̂e amna yîwya so, Awaikara so nas amna, kekn̂e amna. Kaan amna n̂etahcakn̂e Ixaw Yana komo Porin yaaro xa amna mtapotarî yentachome. Ero ke waihkara thakwa taxe.

20 On wara xa n̂examro ciicerî, waihkara so cehcerî yîrwomra Kaan yehtome kpoko so. Kporin komo men nîrwonasî kpoko so tîmtapotachonhîrî towyataw amna ya. Noro rma amna n̂etahcakn̂e yaaro amna mtapotarî yentachome.

21 Ero ke waipîra rma n̂ehcowpe. Kwehtorî komo rakan̂e me mak ciicerî, kutunarî komo yenmekn̂e me marha, ketken̂e. Ero wa ketken̂e Ixaw Yana yantoman̂e komo. Ero ke ero pokono me rma n̂examro n̂iir̂atken̂e. Tîmtapotachonhîrî komo towîhra rma xatken̂e.

22 Ero ke tak Xibeon pono komo tak nan̂ikpekn̂e Xoswe. On wara kekn̂e yîwya so, Ahce kacho amna memîknoce kica? Meyeno komo xa amna, mîîketken̂e kica amna mîtwono komo rma.

23 Ero ke ero wa karî ke awya so Kaan nîwîrîmarî me tak maxe. Mînto nasî Kaan mîn ponaro oyehtopo mîn ha. Ero yenîn̂e komo wehtorî rakan̂e me tak maxe, yutunarî komo yenmekn̂e me marha. Ero pokono me tak maxe miya roro etowîn me ro mak, kekn̂e yîwya so.

24 On wara n̂eyukyakn̂e Xibeon pono komo, Apa, Aporin komo Kaanî mtapotachonho amna n̂encekn̂e kir̂wantaw ro mak. On wara tî kekn̂e tanton ya Moises pen ya ha, Kanan wîmyas awya so aweken komo me. Ero ke iitononhîrî pen komo ahnoro waihkapesî awya so, kekn̂e tî. Ero ke thakwa amna n̂eraswakn̂e apona so, twaparî me ahtînorî ke so amna ya. Ero yanme xa ero wa amna kai awya so.

25 Oroto awanton komo me mak tak nas amna. Ero ke amna antomacoko takîhso anîhtînorî komo yaw roro rma, Ero wa xa cirpore nasî moxam, kacho yaw roro rma awya so, ketken̂e. Ero wa ketken̂e Xibeon pono komo Xoswe ya.

26 Ero wa Xibeon pono komo nukurunpekn̂e Xoswe. Ixaw Yana komo ya waihkapora xakn̂e.

27 Ixaw Yana komo wehtorî rakan̂e me mak n̂iir̂akn̂e Xoswe, yutunarî komo yenmekn̂e me marha. Kporin komo ya tîmsom yakn̂itopo wehtorî yenmekn̂e me marha n̂iir̂akn̂e. Tîmsom yapon korokacho yenmekn̂e me marha tuuna yenmekn̂e me ha. On wara kekn̂e Xoswe yîwya so, Amn̂e tak Kaan nahsîyasî ewto cewtonî ro me, iina wehto yenmekn̂e me tak maxe, tuuna yenmekn̂e me marha, kekn̂e yîwya so. Ero ke ero wara rma naxe oroto. Ero wa naxe.