Taa, ero yimaw Xerusaren pono komo kayaritomon xakn̂e, Aton̂i-Seteke tî osotî. Noro takî tî Xoswe yehtoponho n̂encekn̂e. Ai pononho pen komo nar̂metîkekn̂e Xoswe. Yîmînthîrî komo nakn̂itîkekn̂e ahnoro, kacho tî n̂encekn̂e. Ai pononho komo kayaritomon pen waihkekn̂e Xer̂ko pononho pen komo kayaritomon pen wara xa marha, kacho tî n̂encekn̂e. Xibeon pono komo reha tî nîmtapowatken̂e Ixaw Yana komo yakro cetkurunpetopo komo poko. Ixaw Yana komo chew tak n̂esekenmetken̂e, kacho marha tî n̂encekn̂e.

2 Ero wa xa marha tî n̂encetken̂e noro maywen komo. Ero ke n̂eraswatken̂e xa takî tî. Ewto imo mîn xakn̂e Xibeon, kayaritomo yewton warai rma. Ai yopono mîn xakn̂e Xibeon. Karitî komo marha mîkyam xatken̂e iitono komo.

3 Ero ke on wara takî tî xakn̂e Aton̂i-Seteke, kayaritomo komo tî nan̂ikpekn̂e yaake. Oaw, Ebron pono komo kayaritomon, Piraw, Xahmuce pono komo kayaritomon, Xapia, Rakis pono komo kayaritomon, Tebi, Ekron pono komo kayaritomon, iitono kayaritomon komo tî nan̂ikpekn̂e.

4 On wara kacho tî n̂ekatîmyakn̂e yîwya so, Oyakronomaxi men amohcoko. Xibeon pono komo tar̂macerî. Xoswe yakro tî nîmtapotace cetkurunpetopo komo poko kica, Ixaw Yana komo yakro ha. Ero ke amohcoko Xibeon pono komo yar̂maxi kr̂a oyakro, kacho tî n̂ekatîmyakn̂e yîwya so.

5 Ero ke Amohew kayaritomon komo takî tî mokyatken̂e iina re 5. Xerusaren pono komo kayaritomon, Ebron pono komo kayaritomon, Xahmuce pono komo kayaritomon, Rakis pono komo kayaritomon, Ekron pono komo kayaritomon, iitono kayaritomon komo tî mokyatken̂e Aton̂i-Seteke yakronomaxi. Sowtatu ke tmaywei so tî mokyatken̂e. Ero yimaw takî tî cow wara so cetken̂e Xibeon pono komo yar̂maxi. Ewto mamcetken̂e, iitono komo yar̂machome.

6 Ero ke tîmtapotarî yekatîmn̂e komo takî tî n̂en̂epetken̂e Xibeon komo Xiwkaw pona, Xoswe yaka. On wara kacho n̂ekatîmyakn̂e yîwya, Apa, awanton komo rma amna. Ero ke amna emîknopîra men ehcoko. Yohno men amohcoko amna yukurunpeso, amna akronomatamcoko. Mohce men Amohew komo kayaritomon komo ahnoro. Îh pono komo mîkyam mohce. Iina re n̂esenmece kopi. Amna yar̂ma xe men naxe okwe, kacho n̂ekatîmyatken̂e Xoswe ya.

7 Ero ke Xiwkaw poi tak cekn̂e Xoswe. Sowtatu komo ahnoro naar̂akn̂e karitî kom ha.

8 On wara kekn̂e Kporin komo Xoswe ya torî me so, Ai, Xoswe, erasîra esko n̂examro pona. N̂examro marha wiirî anar̂marî komo me. Awar̂mara so ro mak naxe, kekn̂e.

9 Ero ke cetken̂e tak Xoswe komo, kosope cetken̂e cenmakaxi ro. Enmarî yakro ro tak yuu yuu, ketken̂e Amohew komo wece. Ponan̂e ketken̂e.

10 Ero yimaw Amohew pen komo nar̂mapekn̂e Kporin komo Ixaw Yana komo ya yuu yuu ketaw. Ero ke n̂examro pen waihketken̂e ro mak Ixaw Yana komo. Xibeon panaw rma ka waihkano n̂iir̂atken̂e. Weken̂emekno marha tak n̂iir̂atken̂e Bece-Oron yesamarî yaw. Aseka pona roro waihkano n̂iir̂atken̂e, Maketa pona roro marha.

11 Beci-Oron pore n̂emahciyatken̂e Amohew komo. Pupyaka cetaw so saraipa tak n̂ekpekn̂e Kporin komo porin komo ro mak oko, etapacho komo. Aseka pona roro ero yipu mokyakn̂e oko n̂examro pen waparî me. Mer̂pora rma re waihketken̂e Ixaw Yana komo kacipara imo ke. Ero yopo tko waihyatken̂e saraipa ke hara. Ero wa waihyatken̂e Amohew pen komo.

12 Ero yimaw tak Xoswe nîmtapowakn̂e Kporin komo yakro. Amohew pen komo nar̂mapekn̂e Kporin komo Ixaw Yana komo ya ero po rma nîmtapowakn̂e. On wara kekn̂e, Kaamo amoro, ececetoko tak Xibeon yepoi xa. Nuun̂i, amoro ececetoko Aixaron yepoi hara, aporî yepoi ha, kekn̂e. Ero wa kekn̂e Xoswe Ixaw Yana komo wero ro rma.

13 Ero ke n̂ecececekn̂e tak kaamo, nuun̂i marha n̂ecececekn̂e yiixatî pîn komo yar̂matîkachome. Kamarakataw n̂ecececekn̂e kaamo. Iito rma n̂ecececekn̂e pahkî okyo, cewn̂e kaamo wicakî. Ero wara kacho rma nasî tmewreso Xase Komo kacho yaka, karita yaka.

14 Ero wara exihra ro makî ka xakn̂e kaamo pahxa ha kapu. Ero yinhîrî tak ero wara exihra xa hara nasî oroto. Ero yipu poko tooto mtapotarî yewetîra xa hara xakn̂e Kporin komo. Ixaw Yana komo yakronoman̂e me xa xakn̂e ham Kporin komo etar̂metaw so.

15 Ero yinhîrî cetarî komo yaka tak n̂etîrametken̂e hara Xoswe komo, Ixaw Yana kom ha. Xiwkaw pona n̂etîrametken̂e hara.

16 Taa, ar̂mano riyataw Ixaw Yana komo ya Amohew kayaritomon komo tî n̂emahciyatken̂e 5 kom ha. Maketa pona tî n̂emahciyatken̂e. Iito xakn̂e ewtarî îîpî yexenaw, ero yaka tî n̂ewomyatken̂e ceseyamtome so.

17 Xoswe ya tko n̂ekatîmyatken̂e. Mînto tî natu kayaritomo komo 5. Maketa Yîpîn yexenaw tî natu ewtarî yaw, ketken̂e yîwya.

18 Ero ke on wara kekn̂e Xoswe tmaywen komo ya, Ewtarî ahrutatko toh ke porin komo ke. Yîhmamacoko ewtarî potaka ahru tome tak. Sowtatu komo marha antomacoko ewtarî yentopo poko.

19 Amyamro reha yîtîtmamra ro mak men etocoko. Aaxatî pîn komo weken̂emecoko rma, yuu yuu kacoko rma. Yîmkai so rma etocoko waihkaxi. Tohra ro mak n̂ehcowpe cewton komo pona. Anar̂marî komo me n̂iirî Aporin komo Kaan. Ero ke ar̂mano ciitîkacoko, kekn̂e. Ero wa kekn̂e Xoswe tmaywen komo ya.

20 Ero ke ar̂matîkano tak n̂iir̂atken̂e Xoswe komo, Ixaw Yana kom ha. Waihkatîkano n̂iir̂atken̂e ha re. Anarî komo rma tko tî n̂emahciyatken̂e cewton komo pona so, twacayem pona so ha.

21 Ero yinhîrî takî tî sowtatu komo mokyatken̂e hara Xoswe yaka eeta yaka, Maketa pono yaka. Erasîra tak xatken̂e. Ero yimaw takî tî Ixaw Yana komo yîwîrîyakacho poko yîmtapotara ro mak xatken̂e iitono komo. Ero wa tî xatken̂e.

22 Ero yinhîrî tak on wara kekn̂e Xoswe tmaywen komo ya, Ewtarî ahrunkacoko. Kayaritomo komo ehcoko ohyaka 5 kom ha, kekn̂e.

23 Ero ke kayaritomo komo tak n̂ekyatken̂e ewtarî yai 5 kom ha. Xerusaren pono komo kayaritomon, Ebron pono komo kayaritomon, Xahmuce pono komo kayaritomon, Rakis pono komo kayaritomon, Ekron pono komo kayaritomon, iitono kayaritomon komo n̂ekyatken̂e Xoswe yaka.

24 N̂examro yekîche tak Ixaw Yana komo nan̂ikpekn̂e Xoswe. Mokuche so on wara kekn̂e sowtatu yantoman̂e komo ya takro toxapunhîrî komo ya, Amohcoko xiya. Moxam pîmtaka tak apihcoko kayaritomo komo pîmtaka, kekn̂e. Ero ke mokyatken̂e, yîpîmtaka so tak napikyatken̂e.

25 Ero wa exitaw so on wara kekn̂e Xoswe yîwya so, Erasîra ro mak ehcoko aaxatî pîn komo pona, ahwokara marha. Kar̂pe xa matko ehcoko, erasîn me ro mak. On wara xa marha aaxatî pîn komo ahnoro n̂iir̂asî Kporin komo, anar̂marî komo me, kekn̂e. Ero wa kekn̂e Xoswe yîwya so sowtatu yantoman̂e komo ya.

26 Ero ke kayaritomo pen komo paraxkekn̂e Xoswe. Ero wa waihkekn̂e. Ero yinhîrî okoputhîrî komo namhosotopekn̂e weewe pona 5 pona. Iito rma ka xakn̂e okoputhîrî komo tamhosotoso weewe po kokmamso ro.

27 Kokmamyataw tak on wara kekn̂e Xoswe tmaywen komo ya, Kayaritomo komo yokoputho tak enîhtocoko weewe poi. Ewtarî yaka ar̂macoko eseyamtoponhîrî komo yaka rma. Ero yinhîrî ewtarî ahrucoko xa hara toh ke porin ke, kekn̂e. Ero ke ero yaw roro rma n̂iir̂atken̂e Xoswe mtapotachonho yaw roro. Iito rma nasî toopu oroto ewtarî yahruru me rma.

28 Ero yinhîrî tak ero po rma Maketa pona tak cekn̂e Xoswe ar̂mano riso hara. Iitono komo waihketîkekn̂e kacipara imo ke kayaritomo pen meero. Waihketîkekn̂e ahnoro exihra cehso ro. Pahxa Xer̂ko pono komo kayaritomon pen waihkekn̂e, ero wa xa marha Maketa pono pen waihkekn̂e hara. Ero wa waihkekn̂e.

29 Ero yinhîrî tak Maketa poi cetken̂e Xoswe komo, Ixaw Yana kom ha. Ribna pona cetken̂e hara. Yuu yuu ketken̂e tak iitono komo wece hara.

30 N̂examro pen marha nar̂mapekn̂e Kporin komo Ixaw Yana komo ya, kayaritomon pen komo meero waihkapekn̂e yîwya so. Kacipara imo ke waihkatîkano n̂iir̂akn̂e. Waipîn komo yîmtora ro mak xakn̂e. Xer̂ko pono komo kayaritomonînho pen waihkekn̂e pahxa ero wa xa marha Ribna pono komo kayaritomonînho pen waihkekn̂e hara. Ero wa waihkekn̂e.

31 Ero yinhîrî tak Ribna poi cetken̂e hara Xoswe komo, Ixaw Yana kom ha. Rakis pona cetken̂e hara. Ewto tak wamcetken̂e. Ero yinhîrî yuu yuu ketken̂e tak iitono komo wece.

32 Iitono komo marha n̂iir̂akn̂e Kporin komo Ixaw Yana komo nar̂marî me. Enmapuche tak Xoswe n̂epatakekn̂e ewto pona xa tak. Iitononhîrî pen komo tak waihkekn̂e ahnoro kacipara imo ke. Ribna pononho pen komo waihkekn̂e ero wa xa marha Rakis pononho pen komo waihkekn̂e hara.

33 Iito marha xakn̂e Oraw hara Xese pono komo kayaritomon. Rakis pono komo yakronomaxi mohxapu tî mîk xakn̂e iito. Noro pen meero nar̂mekn̂e Xoswe, maywen pen komo marha. Waipîn komo exihra ro mak tak xakn̂e noro maywen pen kom ha.

34 Ero yinhîrî tak Rakis poi cetken̂e Xoswe komo, Ixaw Yana kom ha. Ekron pona cetken̂e hara. Ero tak wamcetken̂e hara. Ero yinhîrî yuu yuu ketken̂e tak iitono komo wece hara.

35 Ero po rma tak n̂epataketken̂e ewto pona. Iitononhîrî pen komo waihketken̂e kacipara imo ke. Iitono pen komo ahnoro waihketken̂e ero po rma. Rakis pononho pen komo waihketken̂e ero wa xa marha Ekron pononho pen komo waihketken̂e hara.

36 Ero yinhîrî tak Ekron poi cetken̂e Xoswe komo, Ixaw Yana kom ha. Ebron pona cetken̂e hara. Iitono komo wece tak yuu yuu ketken̂e hara.

37 Ewto pona tak n̂epataketken̂e. Itononhîrî pen komo waihketken̂e kacipara imo ke. Kayaritomon pen komo meero waihkekn̂e. Ewtoci pononho pen komo marha waihketken̂e ewto mîtwononho pen komo ahnoro. Yîmtora ro mak xatken̂e. Ekron pononho pen komo waihketîketken̂e ero wa xa marha Ebron pononho pen komo waihketîketken̂e hara. Ero wa waihkano n̂iitîketken̂e.

38 Ero yinhîrî tak n̂etîrametken̂e hara Xoswe komo, Ixaw Yana kom ha. Tebi pona cetken̂e hara. Iitono komo wece yuu yuu ketken̂e hara.

39 Ewto pona n̂epataketken̂e, iitono pen komo waihketken̂e kayaritomon pen komo meero. Ewtoci pono komo meero waihketken̂e ewto imo panawno pen kom ha. Ahnoro waihketken̂e kacipara imo ke. Yîmtora ro mak xatken̂e. Ebron pononho pen komo waihketken̂e, Ribna pononho pen komo marha waihketken̂e kayaritomon pen yakro rma, ero wa xa marha Tebi pononho pen komo waihketken̂e kayaritomon pen komo yakro rma ha. Ero wa waihkano n̂iir̂atken̂e Xoswe komo.

40 Ero wa iitononhîrî pen komo waihkekn̂e Xoswe. Îh pono pen komo waihkekn̂e, suu n̂ixan pen komo, woskara pononho pen komo, îh pono pen komo, ahnoro iitono komo waihketken̂e. Kayaritomon pen komo yakro rma waihketken̂e ahnoro. Yîmtora ro mak xatken̂e. Cesesîsomînhîrî pen komo ahnoro waihketîkekn̂e Ixaw Yana komo Porinî mtapotachonho yaw roro rma, Kaanî mtapotachonho yaw roro ha.

41 Ar̂mano n̂iir̂akn̂e Xoswe miya rorono komo. Kates Bahneia pono pen komo nar̂mekn̂e, Kasa pona rorono pen komo meero, Kosen pono pen komo marha nar̂metîkekn̂e Xibeon pona rorono pen komo meero.

42 Ahnoro iitononhîrî pen komo nar̂mekn̂e Xoswe ero yimaw rma. Kayaritomon pen komo marha nar̂mekn̂e. Yîrowonthîrî komo marha nahsîyakn̂e. Ero wa ar̂mano n̂iir̂akn̂e Ixaw Yana komo yakronomarî ke Kporin komo ya, ponaro Ixaw Yana komo yehtopo ya ha. Noro rma tî n̂etar̂mekn̂e akro so.

43 Ero yinhîrî Xiwkaw pona tak cetken̂e hara Xoswe komo, Ixaw Yana komo marha. Ero wa cetken̂e.