Taa, ero yinhîrî tak tî ar̂mano ritoponho n̂encekn̂e anarî hara kayaritomo. Xabin mîk xakn̂e Aso pono komo kayaritomon, noro tî n̂encekn̂e. Ero ke anarî komo takî tî nan̂ikpekn̂e kayaritomo komo. Xobabe tî nan̂ikpekn̂e Maton pono komo kayaritomon, Ximron pono komo kayaritomon, Aksape pono komo kayaritomon marha. Iitono kayaritomon komo tî nan̂ikpekn̂e.

2 Nohce n̂ixan komo marha tî nan̂ikpekn̂e îh pono kom ha. Woskara pono komo marha tî nan̂ikpekn̂e, Kin̂erece xehxan kom ha, suu n̂ixan kom ha, tuuna yecihtawno komo marha. Toro pono komo marha tî nan̂ikpekn̂e oesce n̂ixan kom ha. Îh ken̂arî mîn roowo, Toro kacho.

3 Kananew komo marha tî nan̂ikpekn̂e, resce n̂ixan kom ha, oesce n̂ixan komo marha tî. Amohew komo marha tî nan̂ikpekn̂e, Etew komo tî, Peresew komo tî, Xebusew komo tî. Îh pono komo mîkyam nan̂ikpekn̂e. Epew komo marha tî nan̂ikpekn̂e Ehmon xehxan kom ha, Mispa mîtwono kom ha. Ero wicakî tî nan̂ikpekn̂e Xabin, kayaritomo kom ha.

4 Ero ke mokyatken̂e takî tî an̂ihxapu komo. Tmaywen komo tî n̂ekyatken̂e ahnoro sowtatu kom ha. Kawaru marha tî n̂ekyatken̂e mer̂pono pînî ro mak. Tarara marha n̂ekyatken̂e mer̂pono pîn. Mer̂pora ro mak xakn̂e tarara okyo, axawa nasî tuuna imo yecihtaw ero wicakî xakn̂e.

5 Iina re takî tî n̂esenmekyatken̂e Meron N̂ikithon yecihtaka. Iina re marha tî cetarî komo n̂iir̂atken̂e. Ixaw Yana komo yakro etar̂maxi tî cetken̂e iina.

6 On wara tko kekn̂e Kporin komo Xoswe ya, N̂examro pona erasîra ro mak ehcoko. On wara exitaw kaamo pahxaxa n̂examro pen tak naxe Ixaw Yana komo nwaikarî me. Ero wa exitaw iyokuthîrî komo raknu micin tak awotocoko kr̂a. Yîtararanthîrî komo marha kr̂a akn̂icoko, kekn̂e. Ero wa kekn̂e Kporin komo Xoswe ya.

7 Ero ke tak cekn̂e Xoswe n̂examro yakro etar̂maxi tmaywen komo yakro sowtatu komo yakro. Meron N̂ikithon yecihtaw exitaw so ar̂maxi cetken̂e. Ponan̂e rma tak yuu yuu ketken̂e wece so. N̂etar̂metken̂e tak Ixaw Yana komo n̂examro yakro.

8 Kporin komo n̂examro pen nar̂mapekn̂e Ixaw Yana komo ya. Ero ke iyopo so xatken̂e. Emahcixapu komo reha weken̂emekyatken̂e miya ro mak Siton pona roro, ewto imo pona roro ha. Misrepoce-Main pona roro marha weken̂emekyatken̂e, Mispa pona marha woskara pona. Resce n̂ixan pona roro marha cetken̂e ahnoro. Yîmtora ro mak tak xatken̂e n̂examro pen.

9 Ero yinhîrî takî tî Kporin komo mtapotachonho yaw roro rma n̂examro pen n̂iir̂akn̂e Xoswe. Iyokuthîrî komo pen raknu micin kr̂a nawocekn̂e. Yîtararanthîrî komo marha nakn̂iyakn̂e.

10 Ero yinhîrî tak ewtonthîrî komo pona cekn̂e hara Xoswe Aso pona. Ero pono pen komo tak nar̂mekn̂e. Kayaritomon pen komo meero waihkekn̂e kacipara imo ke. On wara tî xakn̂e noro pen, Aso pononho pen komo kayaritomon pen, anarî kayaritomo komo yantoman̂e me ka xakn̂e, wekatmo awya so iitono komo yantoman̂e me xakn̂e. Noro pen tak waihkekn̂e Xoswe.

11 Aso pononho pen komo waihketîketken̂e Ixaw Yana komo. Yîmton me ro mak waihketken̂e cesesîsomînhîrî pen komo ahnoro. Yîmînthîrî komo marha tak nakn̂iyakn̂e Xoswe ahnoro ewto pononho pen komo mîntho.

12 Ahnoro iitono pen komo waihketken̂e ewto pono pen kom ha. Iitono komo kayaritomon komo mokyatken̂e etar̂maxi n̂examro pen waihketken̂e maywenînhîrî pen komo yakro rma. Kacipara imo ke waihketken̂e ahnoro. Yîmtora ro mak xakn̂e. Moises pen kekn̂e yîwya, Kporin komo yanton ha, ero wara rma n̂iir̂akn̂e.

13 Anarî ewto komo yakn̂ipîra xatken̂e Ixaw Yana komo, yîtîwîn pono kom ha. Aso mak reha nakn̂iyakn̂e Xoswe.

14 Iitononhîrî pen komo yemyawnonho tko naar̂atken̂e Ixaw Yana komo, iyokuthîrî komo marha nahsîyatken̂e tok me so. Tooto komo reha waihketîketken̂e kacipara imo ke exihra cehso ro tak. Yîmtora ro mak xatken̂e.

15 Pahxa rma Kporin komo nantomekn̂e Moises pen, tanton pen ha. Ero yinhîrî Xoswe tak nantomekn̂e Moises pen hara. Ero ke ero wara rma xakn̂e Xoswe. Kporin komo kekn̂e Moises pen ya ero wa kachonho watohra ro mak xakn̂e Xoswe. Ahnoro rma n̂ewehcakn̂e.

16 Kanan nahsîtîkekn̂e Xoswe ahnoro. Îh ken̂arî nahsîyakn̂e, Suu n̂ixan, Kosen ahnoro. Woskara marha nahsîyakn̂e. Xotaw yecihtawno marha nahsîyakn̂e woskara hara. Îîpî ahnoro nahsîyakn̂e Ixaw Yana komo rowon pono ha, tuuna yecihtawno marha nahsîyakn̂e.

17 Arake Yîpîn pona rorono nahsîyakn̂e, Sei yemyatwono pona rorono ha. Miya rorono nahsîyakn̂e hara Baaw Kace pona rorono hara. Ribanu Woskaran pono mîn Baaw Kace, Ehmon xehxa n̂he nasî. Ero pona rorono nahsîyakn̂e Xoswe iitono pen komo rowontho. Iitono komo kayaritomon pen komo marha nahsîyakn̂e, waihkekn̂e marha kacipara imo ke.

18 Pahkî n̂etar̂mekn̂e Xoswe iitononhîrî pen komo yakro kayaritomo pen komo yakro ha.

19 Cetkurunpecerî kacho poko yîmtapotara ro mak xatken̂e ewto pono pen komo Ixaw Yana komo yakro. Epew komo mak nîmtapowatken̂e, Cetkurunpecerî, kacho poko, Xibeon pono kom ha. Anarî pen komo reha ahnoro nar̂metken̂e Ixaw Yana komo.

20 Kporin komo rma ceipamnoyakn̂e yîropotarî komo etar̂machome so tak Ixaw Yana komo yakro. Ero wa etar̂ma xe so xakn̂e yîhcamnotome so tak. Ahnoro waihkatîkapekn̂e Ixaw Yana komo ya. Yîpînîn yaw so exihra ro mak xakn̂e. Ero ke ero wa waihkatîkano n̂iir̂akn̂e Xoswe. Moises pen ya kekn̂e Kporin komo ero yaw roro rma waihkano n̂iir̂akn̂e.

21 Ero yimaw marha cekn̂e Xoswe Anakin pen komo yar̂maxi îh pononho pen komo. Ebron pononho pen komo nar̂mekn̂e, Tebi pononho pen komo, Anabe pononho pen komo, ahnoro nar̂mekn̂e Xoswe, îh pononho pen komo, Xuta rowon pononho pen kom ha, Ixaw Yana rowon pononho pen komo marha. Ahnoro nar̂mekn̂e Xoswe iitononhîrî pen komo. Ewtonthîrî komo meero marha nakn̂iyakn̂e.

22 Anakin pen komo etîmtora ro mak xatken̂e Ixaw Yana komo rowon pononho pen komo. Kasa po mak n̂etîmcetken̂e rma, Kace po marha, Astoce po marha. Ero po n̂etîmcetken̂e rma Anakin komo.

23 Kanan rowon nahsîtîkekn̂e Xoswe. Moises pen ya kekn̂e Kporin komo ero yaw roro rma nahsîyakn̂e. Ahsîxapu tak Ixaw Yana komo ya tak n̂ekamyakn̂e, tribu komo ya nîraconkekn̂e. Ero yimaw tak tîtken̂e xakn̂e Kanan pono komo, etar̂macho ken̂ehra tak xakn̂e. Ero wa xakn̂e.