Ero yinhîrî Ixaw Yana komo tak nan̂ikpekn̂e xa hara Xoswe. Ahnoro tribu komo nan̂ikpekn̂e Siken pona. Poritomo komo nan̂ikpekn̂e, antomano rin̂e komo, cesen̂ekaxmu yentan̂e komo, enîno rin̂e komo, noro yipu komo ahnoro nan̂ikpekn̂e. Ero ke iina mokyatken̂e Kaan yaka ha.

2 On wara tak kekn̂e Xoswe yîwya so, Oyakno komo, on wara kesî Kporin komo awya so, ponaro Ixaw Yana komo yehtopo, Pahxa aporin pen komo xatken̂e Ewpratesî yeco pono me. Iito cexitaw so anarî ro komo poko nahwowatken̂e ponaro cehtopo komo poko okwe. Ero wa tî xakn̂e Tera pen, Abraaw porin pen, Nao komo porin pen ha.

3 Abraaw penî tko wekyakn̂e Ewpratesî yepu yeco poi on pona Kanan pona. Kanan pore waar̂akn̂e mapitaka roro. Wepamnoyakn̂e marha mer̂pora cehso ro. Isake wîmyakn̂e yîwya yumumuru me.

4 Isake ya wîmyakn̂e Xako, Esau komo. Sei Yîpîn wîmyakn̂e Esau ya eken komo me. Xako reha cekn̂e Exitu pona tîhyawno komo yakro rma.

5 Ero yinhîrî tak Moises wen̂epekn̂e aporin pen komo yaka Araw yakro. Ero yimaw Exitu pono komo wîwîrîmekn̂e. Anarmerpan wekpekn̂e yîwîrîmacho komo. Ero yinhîrî kekyatken̂e so en̂exa Exitu poi hara.

6 Taa, aporin pen komo yekîche Exitu poi tuuna imo yecihtaka mîmokyatken̂e. N̂examro wenari tko mokyatken̂e Exipsiu komo, tarara yaw so, kawaru mkaw so marha. Cucurem Yewku yecihtaka roro mokyatken̂e wenari so kopi.

7 Ero ke oyakro nîmtapowatken̂e aporin pen komo. Amna men akronomak Apa, ketken̂e tî cerewre ro mak owya, Aporin komo ya. Ero ke awarpan tî n̂iir̂akn̂e akpacho komo me. Xehxa mîxatken̂e amyamro, awarpan mehxa xatken̂e Exipsiu kom hara. Ero yinhîrî tuuna imo n̂ekyakn̂e hara Exipsiu pen komo yenorinokan̂e okwe. Exipsiu komo yîwîrîmachonho yenîn̂enho rma amyamro, waihkachonhîrî yenîn̂enho marha. Awewru komo ke rma meen̂atken̂e. Ero yinhîrî pahkî mîxatken̂e axawa imo po.

8 Ero yinhîrî kekyatken̂e so Amohew komo rowon pona, Xotaw yeco pono komo rowon pona. N̂etar̂metken̂e tak n̂examro awakro so. Iyopo so rma tko kiir̂atken̂e so n̂examro pen yekenho yahsîtome tak awya so. N̂examro pen waihkapetîkekn̂e awya so.

9 Ero yimaw marha Barake tmoku xe xakn̂e awaparî komo me, Siporo mumuru, Moabita komo kayaritomon ha. Awar̂ma xe so xakn̂e. Ero ke Baraw nan̂ikpekn̂e Beo mumuru. Aweremkan̂e komo me tî nan̂ikpekn̂e.

10 Baraw mtapotarî tko entara wîxakn̂e. Ero ke awakrecho komo xa matko n̂ekatîmyakn̂e noro yaake ro. Kukurunpetken̂e so, awemetanmekpora so wîxakn̂e yîwya.

11 Ero yinhîrî Xotaw mîwacetken̂e. Xer̂ko mîtkoso mîmokyatken̂e. Iitono komo n̂etar̂metken̂e awakro so. Anarî komo marha n̂etar̂metken̂e awakro so, Amohew komo, Peresew komo, Kananew komo, Etew komo, Kihkasew komo, Epew komo, Xebusew komo, noro yipu komo n̂etar̂metken̂e awakro so. Ahnoro rma tko war̂mapekn̂e awya so.

12 Okomo wen̂epekn̂e aywapu so. Noro rma n̂examro pen n̂en̂epekn̂e kr̂a ekenhîrî komo poi awesamaka so. Amohew kayaritomon komo wen̂epekn̂e awepatai so. Akaciparan komo ken̂ehra rma n̂examro pen wen̂epekn̂e, akrapan komo ken̂ehra marha.

13 Anaiwathîrî pîn komo wîmyakn̂e awya so aweken komo me, ewto komo wîmyakn̂e awya so an̂irithîrî pîn komo. N̂examro yewtontho pono me tak maxe. Yînatîthîrî komo yeperîrî marha mahyaxe uupa yatî yeperîrî, oripa yeperîrî marha. An̂irithîrî pîn komo yeperîrî mîn mahyaxe.

14 Ero ke Kporin komo poko twerî tak ehcoko. Noro mak ewetîcoko yaaro mak. Anarî ro komo poko xatken̂e aporin pen komo Ewpratesî yeco pononho pen komo. Anarî ro komo poko marha xatken̂e aporin pen komo Exitu po cexitaw so. Ero yipu komo kr̂a ar̂macoko. Kporin komo mak ewetîcoko.

15 Poxumra katî nai Kporin komo yewetîtopo awya so? Ero wa exitaw awya so an̂ewetîrî komo tak men̂ekacoko oroto. Anarî ro komo yewetî xe katî matu, Ewpratesî yeco po xatken̂e aporin pen komo. Ponaro n̂examro yehtopo katî mewehcatu? Amohew pen komo marha xatken̂e anarî ro komo ponaro kica. Yîrowonthîrî po tak maxe n̂examro poko wîîkesî. Ponaro n̂examro yehtoponho xa katî mewehcatu? On wara was owî reha, Kporin komo mak wewehcasî. Ero wa xa marha naxe ohyawno komo, kekn̂e. Ero wa kekn̂e Xoswe Ixaw Yana yenîn̂e komo ya.

16 On wara tko n̂eyukyatken̂e Ixaw Yana komo, Kporin komo yahsîpînka xera ro mak nas amna, ponaro anarî yana pen komo yehtoponho ponaro cexi xera ro mak nas amna.

17 Kporin komo Kaan xa Mîk kekn̂enhîrî komo Exitu poi, kporin pen komo yekn̂enho marha Mîk ha. Kyopo so ro mak kapickan̂enhîrî komo yanton me thakwa tîxatken̂e. Kowyatken̂e so tko Kporin komo okre. Kar̂pe xa cehtopo n̂enpekn̂e kwero ro so rma. Kukurunpetken̂e so esama yaw kmokyataw so pahkî. Anarî yana komo chere kmokyataw so kukurunpetken̂e so.

18 Anarî yana komo marha n̂en̂epekn̂e krowon komo poi. Amohew komo meero n̂en̂epekn̂e iitononhîrî kom ha. Ero ke amna marha Kporin komo n̂ewehcasî. Ponaro kehtopo komo xa Mîk ha, ketken̂e. Ero wa ketken̂e Ixaw Yana komo Xoswe ya.

19 On wara tko n̂eyukyakn̂e Xoswe yîmtaka so, Mehn̂exe thakwa ha tko Kporin komo ya apanatanmetopo komo poko. Kîrwanî ro xa Mîk Kaan ha. Kewyoman̂e marha Mîk ha. Awya so tanwetoponhîrî yîhcamnopîra ro mak nasî, kicicme awehtoponhîrî kom ha.

20 Noro yahsîpînketaw awya so, ponaro anarî yana komo yehtopo poko awexitaw so tak, Kporin komo marha tak awahsîpînkexe so. Awemetanmekyaxe so tak Noro okwe. Awaikexe so tak awakronoman̂enhîrî komo rma, kekn̂e Xoswe yîwya so.

21 On wara tko n̂eyukyatken̂e Ixaw Yana komo Xoswe mtaka, Pîra, Kporin komo mak xa yo amna n̂ewehcasî, ketken̂e.

22 Ero ke on wara tak kekn̂e Xoswe, Taa, awakno komo mtapotarî yentan̂e me rma maxe. N̂examro marha naxe amtapotaraî yentan̂e me naxe hara. Kporin komo xa mak amna nîhtînoyasî tîn̂ewetîrî komo me, kacho yentan̂e me maxe, kekn̂e Xoswe. Nhnk, Ero wa kachonho yentan̂e me rma nas amna, ketken̂e.

23 Taa, kekn̂e tak Xoswe, ponaro anarî yana yehtopo komo rma tko nas ahyaw so yaake kica. Ero yiputho komo kr̂a tak ar̂macoko. Kporin komo xatî me mak tak ehcoko, ponaro Ixaw Yana komo yehtopo xatî me ha, kekn̂e.

24 On wara Xoswe n̂eyukyatken̂e Ixaw Yana komo, Kporin komo Kaan yewetîn̂e me mak nas amna. Noro mak n̂ewehcas amna, ketken̂e. Ero wa ketken̂e Ixaw Yana yenîn̂e komo Xoswe ya.

25 Ero ke yîmtapotachonhîrî komo n̂encekn̂e Xoswe, yaarono me xa n̂encekn̂e. N̂examro panatanmekyakn̂e, nîtwermetken̂e marha. Ero wa xakn̂e Siken po.

26 Ero yinhîrî karita yaka mewrekn̂e ero wa kacho, Kaan ya kpanatanmetopo yaka. Ero yinhîrî tak toopu n̂ekpekn̂e porin. Ero tak nanîmyakn̂e piiri kahpar̂u yepu yapomyaka. Kporin komo mîn mîtkoso rma n̂iir̂akn̂e.

27 Ero yinhîrî on wara kekn̂e Xoswe Ixaw Yana komo ya, On toopu tak nasî kîmtapotachonhîrî komo ponaronoman̂e. Onî rma n̂enta Kporin komo mtapotachonho, kîwya so kekn̂e ero wa kacho ha. Ero rma nas aweronoman̂e komo me Ponaro Awehtopo komo yanwekîra ro mak awehtome so, kekn̂e. Ero wa kekn̂e Xoswe Ixaw Yana yenîn̂e komo ya.

28 Ero yinhîrî tak Ixaw Yana komo n̂en̂epekn̂e hara Xoswe. Ero ke tak cetken̂e hara n̂examro ceken komo pona hara.

29 Ero yinhîrî tak waihyakn̂e Xoswe pen okwe, Nun mumutho pen. Kporin komo yantonînho mîk xakn̂e. 110 cimn̂ipu xakn̂e ewrutoponhîrî.

30 Ero yinhîrî tak noro yokoputho nahruyatken̂e roowo cheka ekenhîrî pona rma. Cimnace Sera mîn xakn̂e noro yekenho. Eprain komo rowon pono mîn ha, îh ken̂arî pono. Kaas Yîpîn yamrinawno mîn nohce n̂ixan ha. Iina noro pen yokoputho nahruyatken̂e.

31 Taa, Kporin komo poko rma xatken̂e Ixaw Yana komo Xoswe exitaw ha ka, poritomo komo exitaw so marha noro pen maywenînho kom ha. Kporin komo ya Ixaw Yana komo yakronomachonho yenîn̂enho komo mîkyam xatken̂e. N̂examro exitaw rma ka Kporin komo ponaro xatken̂e.

32 Ero yimaw tak Xose pen yocho nahruyatken̂e Siken pona. Ixaw Yana komo n̂ekîtho mîn xakn̂e, Exitu poi yîn̂ekîthîrî kom ha. Iito nasî roowo raconho ciki Xako pen naponkutho. Aamo pen mumutho rowonînho tî mîn nahsîyakn̂e, Siken yîîm rowonînho ha. 100 exepeyu pona nahsîyakn̂e prata ciixapu pona. Ero tak xakn̂e Xose yepamtho komo yeken me. Ero pona Xose yokoputho nahruyatken̂e.

33 Ero yinhîrî tak Ereasa pen marha waihyakn̂e okwe Araw pen mumutho ha. Yumumuthîrî yeken me tîmxapu pona nahruyatken̂e, Pin̂eias yeken me ha. Eprain komo rowon pono mîn noro yeken, îh ken̂arî pono. Iina Ereasa pen yokoputho nahruyatken̂e. Ero wa mak nai ekatîmtopo.