1-2 Taa, ero yinhîrî tak Ixaw Yana komo waparî me mokuhra xatken̂e yiixatî pîn komo. Pahkî ro mak ero wa xatken̂e. Ero wara rma Kporin komo ciino n̂iir̂akn̂e. Ero yimaw poritomotho me tak xakn̂e Xoswe pen okwe. Ero ke tak Ixaw Yana komo nan̂ikpekn̂e. Poritomo komo, antomano rin̂e komo, cesen̂ekaxmu yentan̂e komo, enîno rin̂e komo ahnoro, noro yipu komo nan̂ikpekn̂e. On wara kekn̂e Xoswe yîwya so, Ai, oyakno komo, poritomo me tak was okwe.

3 Tanî xatken̂e anarî yana pen komo. N̂examro pen yar̂machonho meen̂atken̂e amyamro, Kporin komo Kaan ya ar̂machonhîrî. Aaxe so cexirî ke mak n̂examro pen nar̂mapekn̂e awya so. Noro rma xakn̂e awakrono komo me ar̂mano ritopo poko.

4 Meen̂atken̂e marha roowo yekamtoponho owya, men̂ekacho yanme ekamtopo. Anarî yana komo yeken wekamyakn̂e awya so ar̂man komo rowonî rma. Onar̂matho komo yekenho marha wekamyakn̂e awya so. Xehxan wekamyakn̂e arowon komo me, Xotaw yeco pono marha wekamyakn̂e tuuna imo yecihtaka rorono, kaamo yemicitopo n̂ixan yecihtaka rorono ha. Atribun komo yeken me wekamyakn̂e.

5 Ero wa xa marha iitono pen komo rma tak n̂en̂epetîkes amn̂e Kporin komo arowon komo poi. Ero yimaw tak n̂examro pen yenîhra tak maxe. Ekenhîrî komo tak mahsîyaxe aweken komo me. Tîmtapotachonhîrî yaw roro rma n̂examro pen yekenho nîmyas awya so.

6 Ero ke ahwokan me xa ehcoko. Moises ya kpanatanmetopo komo nasî tmewreso karita yaw. Ero men ewetîcoko watohnî me ro mak anana etowra awehtome so. Kaari n̂ixan wara etowra ehcoko, poowa n̂ixan wara marha etowra ehcoko.

7 Naxe rma achew so anarî yana komo. N̂examro yakrono me exihra ehcoko. Ponaro n̂examro yehtopo etacira ro mak ehcoko, amtapotarî komo yewetîtopo me meero etacira ehcoko. Ponaro n̂examro yehtopo pokono me exihra ro mak ehcoko, mamaka so yutupentara ro mak ehcoko.

8 Aporin komo Kaan ponaro mak ehcoko. Noro ponaro mîxatken̂e rma ero wara rma ehcoko miya roro.

9 Anarî rowon pono komo n̂en̂epepekn̂e Kporin komo awya so. Mer̂pono pîn komo n̂en̂epepekn̂e, karitî kom ha. Ayopono komo me exihra ro mak xatken̂e n̂examro pen.

10 Ero wa xa marha awir̂axe so xa hara amn̂e, iyopono me so awir̂axe so. 1.000 weken̂emekn̂e me nai cewn̂anî rma. Aporin komo Kaan xa ar̂mano n̂irpes awya so tîmtapotachonhîrî yaw roro rma.

11 Ero ke Noro xe xa men ehcoko, Aporin komo Kaan xe mak.

12-13 Anarimaw na metowyatu, Kanan pono komo pona, achew so etîmtoxapu komo pona, akro so na mîmtapowatu awetkurunpetopo komo poko. N̂examro wosîn na mahsîyatu apici komo me, awemsîrî komo marha na mîmyatu yipici komo me hara. Ero wa awexitaw so on wara men yîhtînocoko, n̂examro yen̂epera tak men nas okwe Aporin komo Kaan arowon komo poi. Iito rma tko naxe awemcinotopo komo wara, axkan komo wara ha, ahyotopo komo wara marha. Cekyem wara marha naxe awewkaxin̂e komo wara oko. Ero wara naxe pahkî awehcamnotopo komo pona roro okwe. Kir̂wan on nîmyakn̂e Aporin komo Kaan arowon komo me. Iipo exihra tko maxe ero yimaw.

14 Pahnoke tak nasî owtotopo, roowo poko hakno komo cexe iina xa marha kîwces ha. On wara rma mîhtînoyaxe aropotaw so, aweroro so xa, Miyan poko rma nîmtapowakn̂e Aporin komo Kaan awakronomacho komo poko. Ero yipu poko ehn̂ara ro mak xakn̂e Noro ham okre. Ahnoro tîmtapotachonhîrî yaw roro rma tak kakronometken̂e so, watohra ro mak, mîîkexe.

15 Awakronomacho komo poko tîmtapotachonhîrî poko ehn̂ara ro mak xakn̂e. Ero ke ero wa xa marha awemetanmetopo komo poko tîmtapotachonhîrî poko ehn̂ara marha nas hara amn̂e. Ero yaw roro awir̂axe so hara watohnî me ro mak. Ero wa tak awaikexe so okwe. Exihra maxe ero yimaw on po kir̂wan po. Awya so yînmîthîrî rma re on arowon komo me, ero po exihra tak maxe okwe.

16 Kakronomexe so oyewehcataw awya so, kekn̂e Kporin komo Kaan awya so. Ero wa kachonho yaw rorohra na matu. Ero wa men ehcoko, kachonho yewetîra na mat ha. Ponaro anarî yana komo yehtopo poko na matu kica, mamaka na mutupenwatu kica. Ero wa awexitaw so nîrwonasî men Kporin komo apoko so. Yohno so men mîwaiyaxe okwe. On po exihra tak maxe kir̂wan po, arowon me anahsîthîrî komo po. Ero wa tak maxe okwe, kekn̂e. Ero wa kekn̂e Xoswe Ixaw Yana yenîn̂e komo ya.