Ero yinhîrî Huben komo tak nan̂ikpekn̂e Xoswe, Kace komo marha, Manases poyino komo marha. Noro yipu komo nan̂ikpekn̂e.

2 On wara kekn̂e yîwya so, Taa, kir̂wan̂he mîxatken̂e ham okre. Moises penî mtapotachonho mewetîtîketken̂e Kporin komo yanton penî mtapotachonho ha. Omtapotachonho marha mewetîtîketken̂e.

3 Aporin komo Kaan kekn̂e awya so, Awakno komo ka akronomatatko, kekn̂e. Ero wa kachonho mewehcatken̂e. Awakno komo tînomra mîxatken̂e. Pahkî makronometken̂e.

4 Oroto tak etar̂macho komo pokohra tak awakno komo n̂iir̂asî Aporin komo Kaan tîmtapotachonhîrî yaw roro rma. Ero ke etocoko tak hara amîn komo yaka. Aweken komo nîmyakn̂e Moises pen, Kporin komo yanton pen awya so. Xotaw yeco pono nîmyakn̂e. Iina tak etocoko hara.

5 Kpanatanmetopo tko n̂ekatîmyakn̂e awya so Moises pen, Kporin komo yanton pen, On wara men ehcoko, kacho marha n̂ekatîmyakn̂e. Ero ke Aporin komo xe ehcoko. Noro yehtopo yaw roro ehtîkacoko. Yîwya kpanatanmetopo komo ewetîcoko. Ahsîpînkan me mak Noro poko ehcoko. Yîwya etantomapocoko marha tahwore ro mak, kekn̂e Xoswe yîwya so.

6 Ero yinhîrî Xoswe tak nîmtapowakn̂e Kporin komo yakro n̂examro yakronomacho poko. Ero yinhîrî tak n̂examro n̂en̂epekn̂e tîmîn komo yaka totohme so hara.

7 On wara xatken̂e Manases poyino komo, pahxa n̂he Moises pen nîmyakn̂e yîrowon komo, Basan ha. Xatken̂e anarî kom hara, Manases poyinonho komo. N̂examro ya tak Xoswe nîmyakn̂e on pono hara iyanan komo chewno rma. Oesce n̂ixan mîn nîmyakn̂e yîwya so. Taa, en̂epeno rirî me Xoswe nîmtapowakn̂e Kaan yakro cetîramaxmu komo yakronomacho poko.

8 On wara kekn̂e yîwya so, Taa, etocoko tak hara amîn komo yaka. Mer̂pora ro mak nasî awemyawno komo. Mer̂pora nasî awoh komo. Mer̂pora nas ahyaw so prata, ooru, bronse, pehu. Poono marha nas ahyaw so mer̂pora ro mak. Aaxatî pîn komo pen yemyawnonho mîn ha. Ero ke amîn komo yaw so awexitaw so tak awakno komo yakro akpacoko an̂ekîthîrî komo, kekn̂e. Ero wa kekn̂e Xoswe yîwya so.

9 Ero ke cetken̂e tak Huben komo, Kace yepamtho komo, Manases poyino komo. Ixaw Yana komo nînomyatken̂e Siro po Kanan po ha. Xireace yesamarî yaw cetken̂e xa hara ceken komo pona tîtotome so. Ero rma nahsîyatken̂e Kporin komo mtapotarî yanme. Moises pen ya nîmpekn̂e yîwya so.

10 Taa, n̂examro cetken̂e esama yaw. Xotaw pahnoke cexitaw so Kanan po rma ka on wara tak tî xatken̂e Huben komo, Kace komo, Manases poyino komo marha, Kaan ya tîmsom yakn̂itopo takî tî n̂iir̂atken̂e iito porin. Xotaw yecihtaw rma tî n̂iir̂atken̂e.

11 Taa, ero yipu ciitoponho tak n̂encetken̂e Ixaw Yana komo. Kanan rowon wokpan pahnoke tak Kaan ya tîmsom yakn̂itopo n̂iir̂atken̂e kica tîmîn komo yaka tîtosom kom ha. Xehxan po rma n̂iice Ixaw Yana komo rowon po rma, kacho n̂encetken̂e.

12 Ero yentarî ke Ixaw Yana komo ahnoro cetken̂e Siro pona kîrkomo. Kaan ya tîmsom yakn̂itopo ciin̂enho komo waparî me tîto xe so tî xatken̂e.

13 On wara tko ka nîhtînoyatken̂e, Pin̂eiasî n̂en̂epetken̂e yîhyaka so, Ereasa pen mumutho, Kporin komo yaka cewomsom pen mumutho ha. Xireace pona n̂en̂epetken̂e Huben komo yaka, Kace komo yaka, Manases poyino komo yaka marha.

14 Noro yakro n̂en̂epetken̂e 10 kîrkomo, antomano rin̂e kom ha. Cewn̂e so n̂en̂epetken̂e Ixaw Yana tribu komo poko hakî. Tîyanan komo yantoman̂e rma mîkyam n̂en̂epetken̂e.

15 Ero ke Xireace pona tak cetken̂e, Huben yepamtho komo yaka, Kace yepamtho komo yaka, Manases yepamtho poyinonho komo yaka marha. On wara ketken̂e yîwya so,

16 Ahce kacho ponaro Ixaw Yana komo yehtopo xatî pîn me matu kica? Ahce kacho anarî pona metowce okwe? Kporin komo pîn ya tîmsom yakn̂itopo miice kica, Noro yanwecho ham okwe.

17 Ahce warai me katî mîhtînoyatu kicicme kehtoponhîrî komo Peo po kexitaw so awya so? Kicicme ciki tîxatken̂e ero yimaw wahra mak ha tko, kan̂e me ma matu okwe? Enko, ero yakwenho rma nasî kpoko so okwe, ero yimawnonho yakwenho. Eper̂a chew tak tîxatken̂e Kporin yanan komo ero yimawno poyero.

18 Wara rma Kporin komo yai tak wa metaknamet hara kica? Noro yanwekyataw awya so oroto, amn̂e tak kpoko so men nîrwona hara, ahnoro Ixaw Yana komo poko ha.

19 Anarimaw kicicme na nai arowon komo awya so. Akir̂waman me na meen̂atu. Ero wa exitaw Kporin komo rowonî ro pona tak amohcoko esekenmaxi. Ero po nasî Kporin komo mîn. Amna yaka amokyataw so amna nîraconkesî arowonî ro komo xehxan po rma, Kporin komo mîn nasî tan tantono po ha. Kporin komo anwekîra ro makî tko ehcoko, amna anwekîra marha ehcoko. Amna yanwekn̂e wara mak maxe kica awyanî ro komo cirirî ke, Kporin komo Kaan ya tîmsom yakn̂itopo pîn cirirî ke ha. Nai xa Kporin komo Kaan ya tîmsom yakn̂itopo ro.

20 Ahce wa xa tîxatken̂e kicicme exitaw Akan, Sera mumutho pen. Kporin komo nîwîrîmatho mîn ahnoro Xer̂ko pono komo pen yemyawnonho. Ero ke ahsîra ro mak ehcoko, kacho yewetîra xakn̂e kica. Ero poyero tak Kaan nîrwonakn̂e xa kpoko so, ahnoro Ixaw Yana komo poko okwe. Noro pen mak waipîra xakn̂e kicicme cehtoponhîrî yanme. Anarî pen komo meero waihyatken̂e ero yanme, ketken̂e. Ero wa tî ketken̂e Pin̂eiasî komo iitono komo ya.

21-22 On wara tko tî n̂eyukyatken̂e Huben komo, Kace komo, Manases poyino komo, Ixaw Yana komo yantoman̂e komo mtapotarî n̂eyukyatken̂e on wara, Oyakno komo, on wara kes amna awya so, Noro xa Mîk karitî ro Kporin komo Kaan. Karitî ro xa Mîk Kporin komo Kaan. Noro xa n̂een̂as amna ropotarî. Ixaw Yana komo ya marha amna yehtopo n̂encowpe takîhso. Kporin komo yanwekn̂e me exitaw amna tîmsom yakn̂itopo cirirî ke, amna rma kr̂a yukurunpera tak n̂expe.

23 Amna rma re nakîhtoi tîmsom yakn̂itopo warai. Kporin komo wenarino rma tko amna etowîn me rma. Amna n̂iritho pona akn̂ipîra ro mak nas amna takn̂itîkaxmu, amna natîrî yeperîrî yakn̂ipîra marha, Aaxe xa wasî, kacho komo marha akn̂ipîra nas amna. Ero yipu tîmsom yakn̂itopo me exitaw Kporin komo rma amna panarepe.

24 Ero warahra tko nas amna. On wara mak kekn̂e amna, on wara na ket amn̂e awepamthîrî komo amna yepamtho komo ya, Kporin komo yanan pînî ro mak amyamro kica, ponaro Ixaw Yana komo yehtopo yanan pîn ha.

25 Kporin komo rma Xotaw Yepu n̂iir̂akn̂e kwokpan komo me, kakpacho komo me ha. Xehxa nas amna, mehxa mak maxe amyamro Huben komo, Kace komo marha. Amna yakrono pînî ro mak amyamro kica Kporin komo poko amna exitaw, ket ha na amna yepamtho ya. Ero wa karî ke tak amna yepamtho na n̂iir̂atu Kporin komo ponarono pîn me tak okwe. Ero wa na n̂iir̂atu awepamthîrî komo amn̂e. Ero wa karî pona amna n̂iire.

26 On wara kekn̂e amna, Toopu ka cenmecerî, Kporin komo ya tîmsom yakn̂itopo warai takîhtocerî, koh komo yakn̂itopo mera ha tko, ahce na tîmtopo mera marha, kekn̂e amna.

27 On yenpotopo me xa matko amna n̂iire, amna yehtopo yenpotopo mak, an̂enîrî komo, amna n̂enîrî marha, kepamthîrî komo n̂enîrî marha. On wara amna yehtopo yenpon̂e me nasî, amna meero nahwowasî Kporin komo poko. Noro yanme rma amna nakn̂iyasî takn̂itîkaxmu komo, tînatîrî yeperîrî komo, Aaxe xa nasî amna, kacho kom ha. Amna nakîhtotho yenîrî ke on wara kahra naxe amn̂e awepamthîrî komo amna yepamtho komo ya, Kporin komo pokono pîn me cehsom mak amyamro kica, kahra naxe.

28 On wara marha kekn̂e amna, Kporin komo pokono pînî ro mak amyamro, ketaw amna ya, amna yepamtho komo ya marha na on wara amna n̂eyukyasî, Kporin komo ya tîmsom yakn̂itopo warai n̂iir̂atken̂e amna porin pen komo pahxa. Takn̂itîkaxmu komo yakn̂itopo mera ha tko n̂iir̂atken̂e, tînatîrî komo yeperîrî yakn̂itopo mera marha. Amna yehtopo yenpotopo mak n̂iir̂atken̂e, awya so enpotopo ha, kes amna yîwya so ero yimaw ha.

29 Kporin komo yanwekî xera ro mak nas amna. Noro wenarino me rma cexi xe nas amna etowîn me rma. Takn̂itîkaxmu yakn̂itopo mera amna nakîhtoi. Tînatîrî yeperîrî yakn̂itopo mera, ahce na komo yakn̂itopo mera, ero warai mera ro mak amna nakîhtoi. Nasî reha wa Kporin komo Kaan ya tîmsom yakn̂itopo ro yîmîn potaw, ketken̂e. Ero wa ketken̂e iitono komo yîwya so.

30 Taa, yîmtapotarî komo n̂encetken̂e Pin̂eias komo, Ixaw Yana yantoman̂e komo. Huben komo mtapotarî, Kace komo mtapotarî, Manases poyino komo mtapotarî. Noro yipu komo mtapotarî n̂encetken̂e. Ero ke takî tî tahwore xatken̂e okre.

31 Ero ke on wara tak kekn̂e Pin̂eiasî, Ereasa mumutho, Kporin komo yaka cewomsom mumutho ha, Taa, on wara tak kes amna oroto, Kakro so rma nai ham Kporin komo okre, kesî. Ero wa kes amna Kporin komo yanwekn̂e mera rma awexirî ke so on tîmsom yakn̂itopo yakîhtorî ke awya so. Ero wara awexirî ke so Ixaw Yana komo panarera rma nasî Kporin komo, ketken̂e. Ero wa ketken̂e iitono komo ya.

32 Ero ke n̂etîrametken̂e tak hara Pin̂eias, Ereasa pen mumutho, Kporin komo yaka cewomsom mumutho ha. Ixaw Yana komo yantoman̂e komo marha n̂etîrametken̂e. Xireace poi cetken̂e hara. Huben komo, Kace komo, ero yentan̂enho komo n̂etîrametken̂e. Kanan pona cetken̂e hara. Ixaw Yana komo ya n̂ekatîmyatken̂e mehxan komo mtapotarî ha.

33 Ero ke tawake tak xatken̂e Ixaw Yana komo yîmtapotarî komo yentarî ke. Kir̂wan̂he nai ham okre Kporin komo, ketken̂e tak. Kaikatko meyeno komo yewton yakn̂iso kr̂a, Huben komo yewton, Kace komo yewton, noro yipu komo yewton yakn̂iso kr̂a kaikatko, kahra tak xatken̂e.

34 Taa, on wara tak ero nosohcetken̂e tînakîtothîrî komo, Kporin komo ya tîmsom yakn̂itopo warai ha, Ece, kacho me nosohcetken̂e. On wara ketken̂e, Noro mak Mîk Kaan, Kporin kom ha, kacho yenpotopo me nas ero amna ya, awya so marha, ketken̂e. Ero ke ero wara tînakîtothîrî komo nosohcetken̂e Huben komo, Kace komo marha.