Taa, ero yinhîrî Repita yantoman̂e komo tak mokyatken̂e Ereasa yaka, Kporin komo yaka cewomsom yaka. Xoswe yaka marha mokyatken̂e Nun pen mumutho yaka. Ixaw Yana komo yantoman̂e komo yaka marha mokyatken̂e tribu komo yantoman̂e komo yaka ha.

2 Siro po xatken̂e ero yimaw, Kanan pono po ha. On wara ketken̂e yîwya so, Ai apa komo, on wara tî kekn̂e Kporin komo Moises pen ya, Repita komo ya ewto mko tîmcoko amn̂e eken komo me. Woskara komo marha tîmcoko yîwya so ewto mîtwono rma, cuh ken̂arî tîmcoko iyoh komo nahrî me, kekn̂e yîwya, ketken̂e. Ero wara ketken̂e Repita komo tpoyino komo ya.

3 Ero ke Kporin komo mtapotachonho tak n̂ewehcatken̂e Ixaw Yana komo. Cewton komo poyino rma nîmyatken̂e Repita komo ya. Ero panawno marha nîmyatken̂e yîwya so woskara komo cuh ken̂arî.

4 Yihcirî me ka Koace yepamtho komo ya tîmsom men̂eketken̂e. Men̂ekacho nar̂metken̂e xa hara ero komo men̂ekachome hara. Araw pen yepamtho me xatken̂e anarî komo Repita kom ha. Yîwya so tak nîmyatken̂e 13 ewto. Xuta komo rowon pono mko nîmyatken̂e yîwya so, Simeaw komo rowon pono mko marha, Benxamin komo rowon pono mko marha. Ero wara nîmyatken̂e Araw yepamtho komo ya, Kporin komo yaka cewomsom yepamtho komo ya ha.

5 Anarî komo marha xatken̂e Koace yepamtho komo rma. N̂examro ya tak nîmyatken̂e anarî mko hara ewto mko, 10 nîmyatken̂e. Men̂ekacho yar̂marî ke nîhtînoyatken̂e. Eprain rowon pono komo nîmyatken̂e yîwya so, Taan rowon pono komo marha, Manases poyino rowon pono komo marha. Iitono nîmyatken̂e ewto mko Koace yepamtho komo ya.

6 Xehson yepamtho komo ya marha nîmyatken̂e ewto mko, 13 ha. Ase yepamtho komo rowon pono komo nîmyatken̂e, Nahtari komo rowon pono komo marha, Manases komo poyino rowon pononho marha. Iitono ewto mko nîmyatken̂e Xehson yepamtho komo ya.

7 Merari yepamtho komo ya nîmyatken̂e 12 ewto. Huben komo rowon pono komo nîmyatken̂e, Kace komo rowon pono komo marha, Seburon komo rowon pono komo marha. Ero wara ewto mko nîmyatken̂e Merari yepamtho komo ya.

8 Ero wicakî ewto nîmyatken̂e Ixaw Yana komo Repita komo ya. Woskara komo marha nîmyatken̂e yîwya so ewto mîtwono mko ha. Kporin komo kekn̂e Moises pen ya ero yaw roro rma nîmyatken̂e.

9 Taa, anarî ewto yosotî tan wetahcas hara Xuta rowon pono komo yosotî, Simeaw rowon pono komo yosotî marha.

10 Araw yepamtho komo ya mak ero mko nîmyatken̂e. Repita rma mîkyam Araw yepamtho komo, Koace yepamtho mak ha tko. Yihcirî me n̂examro ya tîmsom nîhtînoyatken̂e ewto mko. Men̂ekacho yar̂marî ke nîhtînoyatken̂e.

11 Ahba pen yewtontho nîmyatken̂e yîwya so. Ebronî rma mîn Ahba. Woskara marha nîmyatken̂e yîwya so ero panawno rma. Xuta rowon pono mîn Ahba yewtontho, îh ken̂arî pono ha. Enake pen yîîm pen mîk xakn̂e Ahma pen.

12 Mararî tîmîhra reha xatken̂e yîwya so, Araw yepamtho komo ya. Iitono ewtoci mko marha tîmîhra xatken̂e yîwya so. Karebe ya xa matko nîmyatken̂e ero komo, Xepon̂e pen mumutho ya ha.

13-16 Ewto rma tko nîmyatken̂e Araw yepamtho komo ya Kporin kom yaka cewomsom pen yepamtho komo ya, Ebron nîmyatken̂e yîwya so. Waihkano rin̂enho yukurun me cehsom mîn Ebron. Anarî komo marha nîmyatken̂e yîwya so, Ribna, Xaci, Estemoa, Oron, Tebi, Ain, Xuta, Bece Semes. Ero wa ewto mko nîmyatken̂e Araw yepamtho komo ya. Ewtoci mko marha nîmyatken̂e yîwya so ewto mîtwono komo ha. 9 ewto nîmyatken̂e yîwya so Xuta komo rowon pono, Simeaw komo rowon pono marha.

17-18 Benxamin komo rowon pono marha nîmyatken̂e Araw yepamtho komo ya. Iitono tan wetahcasî, Xibeon, Xeba, Anatoce, Awmon. Iitono mko nîmyatken̂e yîwya so Benxamin komo rowon pono mko. 4 nîmyatken̂e. Woskara komo marha nîmyatken̂e yîwya so ewton mîtwono mko ha.

19 Ero wicakî nîmyatken̂e ewto mko Araw pen yepamtho komo ya. 13 nîmyatken̂e yîwya so. Woskara mko marha nîmyatken̂e yîwya so ewton mîtwono komo.

20 Ero yinhîrî anarî tak nîmyatken̂e ewto mko hara Koace yepamtho komo poyino ya. Eprain komo rowon pono nîmyatken̂e yîwya so.

21-22 Wetahcasî tan yînîmrî komo, Siken, Eprain komo rowon pono, îîpî ken̂arî pono ha. Waihkano rin̂enho yukurun me cehsom marha mîn xakn̂e Siken. Xese marha nîmyatken̂e, Kimsain, Bece Oron. 4 nîmyatken̂e yîwya so. Woskara mko marha nîmyatken̂e yîwya so ewton komo mîtwono mko ha.

23-24 Taan rowon pono komo marha nîmyatken̂e yîwya so, Ewteke, Xibeton, Aixaron, Kace Rimon. 4 marha xakn̂e yîwya so yînmîthîrî komo Taan rowon pono mko ha. Woskara mko marha nîmyatken̂e yîwya so ewton mîtwono komo ha.

25 Manases poyino rowon pono marha nîmyatken̂e yîwya so. Taanake, Kace Himon, 2 mak ha. Woskara komo marha nîmyatken̂e yîwya so ewton mîtwono komo ha.

26 Ero wicakî ewto mko nîmyatken̂e yîwya so, 10 ha. Woskara mko marha nîmyatken̂e ewton mîtwono komo ha. Ero wa nîmyatken̂e Koace yepamtho poyino komo ya.

27 Taa, Xehson yepamtho komo ya tak ewto mko nîmyatken̂e hara. Repita rma mîkyam Xehson yepamtho komo. Manases poyino rowon pono nîmyatken̂e Koran, Basan pono. Waihkano rin̂enho yukurun me cehsom marha mîn xakn̂e. Be-Estera marha nîmyatken̂e. Asakî nîmyatken̂e ewto. Woskara komo marha nîmyatken̂e yîwya so ewton mîtwono kom ha. Ero wicakî nîmyatken̂e Manases raconho rowon pono ha.

28-29 Isaka komo rowon pono marha nîmyatken̂e yîwya so Xehson yepamtho komo ya, Kision, Taberace, Xahmuce, En Kanin. 4 xakn̂e ewto Isaka komo nîmîtho yîwya so.

30-31 Ase komo rowon pono komo marha nîmyatken̂e yîwya so ewto mko ha, Misaw, Abiton, Ewkace, Heobe. 4 xakn̂e n̂examro nîmîtho. Woskara mko marha nîmyatken̂e yîwya so ewton komo mîtwono ha.

32 Nahtari komo rowon pono marha nîmyatken̂e yîwya so ewto mko, Ketes, Karireia pono ha. Waihkano rin̂enho yukurun me cehsom marha mîn ha. Amoce Toru, Kahtan. 3 xakn̂e n̂examro nîmîtho. Woskara mko marha nîmyatken̂e yîwya so ewton komo mîtwono ha.

33 Ero ke 13 xakn̂e ahnoro ewto Xehson yepamtho komo ya yînmîthîrî kom ha. Woskara mko marha nîmyatken̂e yîwya so ewton komo mîtwono.

34-35 Taa, Merari yepamtho komo ya marha nîmyatken̂e ewto mko. Repita komo rma mîkyam Merari yepamtho komo. Wetahcasî tak yînîmîthîrî komo yîwya so, Seburon rowon pono ka nîmyatken̂e, Xokneaw, Kahta, Cimna, Naaraw. 4 xakn̂e ewto n̂examro nîmîtho. Woskara mko marha nîmyatken̂e yîwya so ewton komo mîtwono.

36-37 Huben komo rowon pono marha nîmyatken̂e, Bese, Xasa, Ketemoce, Mepace. 4 xakn̂e ewto n̂examro nîmîtho yîwya so. Woskara mko marha nîmyatken̂e yîwya so ewton komo mîtwono.

38-39 Kace komo rowon pono marha nîmyatken̂e, Hamoce, Xireace pono ha. Waihkano rin̂enho yukurun me cehsom marha mîn xakn̂e. Maanain, Esmon, Xase. 4 xakn̂e ewto n̂examro nîmîtho yîwya so. Woskara mko marha nîmyatken̂e yîwya so ewton komo mîtwono.

40 12 xakn̂e ewto Merari komo ya yînîmîthîrî komo. Repita komo rma mîkyam Merari yepamtho komo.

41-42 Yaake xakn̂e Repita komo yewton, 48. Ixaw Yana komo rowon pono rma mîn n̂examro yewton ha. Woskaran komo xakn̂e ewton komo mîtwono, etpoyino pîn mîtwono. Ero wa nahsîyatken̂e Repita komo.

43 Ero wa tak Kanan nîmyakn̂e Kporin komo Ixaw Yana komo ya. N̂examro porin pen komo ya kekn̂e pahxa, Kanan rowon wîmyas amn̂e awepamthîrî kom ya, kekn̂e. Yaaro xa tan wîîkesî, cemaro pîn me ro mak, kekn̂e yîwya so. Ero wa kachonho yaw roro rma nîmyakn̂e yîwya so. Ero ke ero tak nahsîyatken̂e. Ero pona tak n̂esekenmetken̂e.

44 Ixaw Yana komo waparî mokuhra ro mak tak xakn̂e ero yimaw. N̂examro porin pen komo ya kekn̂e Kporin komo pahxa. Yaaro xa tan wîîkesî cemaro pîn me ro mak, kekn̂e, ero yaw roro rma tak xakn̂e. Yiixatî pîn komo rma re ka xatken̂e. Ixaw Yana komo yopono komo exihra ro makî tko xatken̂e etar̂metaw so. Yiixatî pîn komo nar̂mapekn̂e Kporin komo yîwya so.

45 Ehn̂ara ro mak xakn̂e Kporin komo tîmtapotachonhîrî poko, Ixaw Yana komo ya kekn̂e ero wa kachonho komo poko ha. Ahnoro rma n̂iir̂akn̂e tîmtapotachonhîrî yaw roro rma. Ero wa n̂iir̂akn̂e.