1-2 Ero yinhîrî on wara kekn̂e hara Kporin komo Xoswe ya, On wara kasko Ixaw Yana komo ya, Ai oyakno komo, on wara kesî Kporin komo awya so, ewto mko tak men̂ekacoko waihkano rin̂enho komo kurun me. Pahxa wîîkekn̂e Moises pen ya ero yipu mko men men̂ekacoko.

3 Ero yipu tmen̂ekapore nasî iina tak emahcitome so tanmenkera ro mak waihkano rin̂enho komo. Ero pona so cemahciyataw so tukurui so tak naxe. Iina so tohra ro mak n̂ehcowpe waihkaxapunhîrî yepanîn̂e kom ha.

4 Ero pona emahciyataw waihkano rin̂enho, ewto potaw ka n̂ececetope. Iito tak cehtoponhîrî komo n̂ekatîmpe iitono komo ya poritomo komo ya. Ehtoponhîrî yentache, Taa, amok ha. Tan esko amna chew. Mînto nasî amîn ha amna chewno me awehtome, kacowpe yîwya iitono poritomo komo.

5 Anarimaw waihkaxapunhîrî yepanîn̂e cee rma na iina. Iina cetaw waihkano rin̂enho yenpora ro mak n̂ehcowpe yîwya. Tîmîtwono waihkai tanmenkera ro mak. Yiixatî pîn me exihra ro mak xakn̂e. Ero ke epanîn̂e ya enpora ro mak n̂ehcowpe.

6 Iito rma n̂expe waihkano rin̂enho ewto po rma. Amn̂e Ixaw Yana komo yesenmekyataw noro yipu yehtoponho n̂entacowpe. Ero yinhîrî iito rma n̂ehcowpe Kaan yaka cewomsom waipîra exitaw. Noro pen waipuche tak tîmîn yaka tak tompe hara waihkano rin̂enho, ewto poi n̂emahciyakn̂e ero pono yaka hara, kacoko. Ero wa kacoko Ixaw Yana komo ya, kekn̂e. Ero wa kekn̂e Kporin komo Xoswe ya.

7 Ero ke Ketes men̂eketken̂e Karireia pono. Nahtari komo rowon pono mîn, îîpî ken̂arî pono. Siken marha men̂eketken̂e Eprain komo rowon pono, matîwîn ken̂arî pono. Kiriace Ahba marha men̂eketken̂e Xuta komo rowon pono, îîpî ken̂arî pono. Ebronî rma mîn Kiriace Ahba.

8 Xotaw yeco pono marha men̂eketken̂e resce n̂ixan pono, Xer̂ko yecentono ha. Bese mîn men̂eketken̂e Huben komo rowon pono. Iito woskara nasî îh pono rma ha re. Axawa me nasî ero woskara. Ero pono mîn ewto, Bese. Hamoce marha men̂eketken̂e Xireace pono, Kace yepamtho rowon pono ha. Koran marha men̂eketken̂e Basan pono, Manases komo yeken pono.

9 Ero mko men̂eketkekn̂e ewto mko Ixaw Yana komo kurun me, yîchewno komo kurun me marha. Tanmenkera ro mak waihkano rin̂enho yemahcitopo me nasî tukurui tak ehtome, waihkaxapu yepanîn̂e nwaikarî mera ehtome. Waihkan̂enhîrî yehtoponho yentara ka exitaw so Ixaw Yana komo tukurunpepore nasî. Ero wara ehtome so ero mko men̂eketken̂e ewto mko ha. Ero wa xatken̂e.