Ero yinhîrî takî tî Ixaw Yana komo yaka tî Kporin komo yancun cekn̂e. Xiwkaw poi cekn̂e Bokin pona. On wara kekn̂e, Ai Ixaw Yana komo, on wara wîîkes awya so, Exitu poi kekyatken̂e so Kanan pona. Kanan tak wîmyas amn̂e awepamthîrî komo ya, wîîkekn̂e aporin pen komo ya. Yaaro xa tan wîîkesî esemîknopîn me ro mak, wîîkekn̂e yîwya so. On wara marha wîîkekn̂e awya so, Eroromero was awakronoman̂e komo me. Omtapotachonho towîhra ro mak wasî, pîra ro mak, wîîkekn̂e awya so.

2 Ero ke on wara marha wîîkekn̂e awya so tantono komo poko, n̂examro yakro yîmtapotara ro mak men ehcoko awetkurunpetopo komo poko, wîîkekn̂e. Anarî ro komo ya tîmsom yakn̂itopo komo nasî on po mer̂pora. Ero komo kr̂a tak yixkacoko, wîîkekn̂e marha awya so. Omtapotarî yewetîra tko mat ham okwe. Ahce kacho oyewetîra mat okwe?

3 Ero ke on wara tak wîîkai hara awya so, tantono ro komo yar̂mapora tak was awya so. Cekyem wara mak naxe awawci komo yatpon̂e wara oko. Anarî ro komo ponaro n̂examro yehtopo tak naxe awemcinon̂e komo wara okwe, kekn̂e. Ero wa kekn̂e ancu Ixaw yana komo ya.

4 Ero wa kacho yentarî ke Ixaw Yana komo tak nîwracetken̂e, Kporin komo yancunî mtapotarî yentarî ke ha. Okwe, okwe, ketken̂e kar̂pe.

5 Ero ke iitono woskara tak nosohcetken̂e Bokin me. Iito tak Kporin komo ya tîmsom nakn̂iyatken̂e.

6 Ero yinhîrî takî Ixaw Yana komo n̂en̂epekn̂e hara Xoswe esenmexapunhîrî komo. Ero ke cetken̂e tak n̂examro cekenî ro komo yahsîso, iina so esekenmaxi.

7 Taa, on wara ka xatken̂e Ixaw Yana komo Xoswe exitaw ha ka, Kporin komo mtapotarî n̂ewehcatken̂e. Poritomo komo exitaw marha Noro n̂ewehcatken̂e, Xoswe yakro cesentaxmunhîrî komo exitaw ha ka. Kar̂pe xa cehtopo Kaan n̂enpekn̂e Ixaw Yana komo yakronomachonho poko, ero yipu yenîn̂enho mîkyam. Ero ke Noro ponaro rma ka xatken̂e.

8 Waihyakn̂e ha tko Xoswe pen okwe, Kporin komo yantonînho pen ha. 110 cimn̂ipu xakn̂e noro yewrutoponho waihyataw.

9 Noro pen yokoputho tak nahruyatken̂e ekenhîrî pona rma, Cimnace Eres pona, Eprain yepamtho komo rowon pona, îh ken̂arî pona ha. Kaas Yîpîn mîtwono mîn Cimnace Eres nohce n̂ixan.

10 Amn̂e pahkî exiche Xoswe yimawnonho pen komo meero tak waihyatken̂e. Yîmxîkîthîrî komo tak xatken̂e yîhretawno komo me hara. Kporin komo ponarono pînî reha tak mîkyam xatken̂e. Ixaw Yana komo yakronomacho yenîn̂enho pînî ro mak mîkyam xatken̂e, Kporin komo ya akronomachonhîrî kom ha.

11 Ero yimaw takî tî kicicme ro mak n̂ehtîketken̂e Ixaw Yana komo. Kporin komo kicicme n̂een̂akn̂e ehtopo komo okwe. Baaw komo ponaro tak xatken̂e kica.

12-13 Kporin komo tak nahsîpînketken̂e, ponaro tporin pen komo yehtoponho ha. Exitu poi cekn̂enhîrî komo ponarora tak xatken̂e okwe. Anarî ro komo ponaro tak xatken̂e hara, ponaro yîchew so ehtopo komo ponaro ha. Noro yipu komo mamaka so nutupenwatken̂e kica. Ero ke Kporin komo takî tî nîrwonakn̂e poko so. Noro nahsîpînketken̂e Baaw ponaro tak cehtome so hara, Astaroce ponaro marha kica.

14 Ero ke nîrwonakn̂e xa tak Kporin komo Ixaw Yana komo poko. Ero ke n̂examro pen nar̂mapekn̂e emyawnonkan̂e komo ya. Ixaw Yana pen komo yemyawnonho naar̂atken̂e mer̂pora, yînaputhîrî komo marha naar̂atken̂e. Yiixatî pîn komo mamawno me Ixaw Yana komo pen n̂iir̂akn̂e Kporin komo yîmîtwono komo mamawno me rma okwe. Kar̂pera tak xatken̂e okwe Ixaw Yana pen komo twaparî komo yar̂marî yarohra thakwa okwe.

15 Ixaw Yana sowtatun komo cetaw so yiixatî pîn komo xa matko nakronomekn̂e Kporin komo Ixaw Yana pen komo yar̂machome tak okwe. Tîmtapotachonhîrî yaw roro rma wa nar̂mapekn̂e yiixatî pîn komo ya. Ero ke ahwora ro mak tak xatken̂e Ixaw Yana pen kom okwe.

16 Ero wa exitaw so tak yukurunpeno rin̂e komo tak n̂enpekn̂e Kporin komo. N̂examro tak Ixaw Yana komo nowyatken̂e emyawnonkan̂e komo yai.

17 Tukurunpen̂e komo mtapotarî yentara rma tko xatken̂e kica. Ponaro anarî komo yehtopo mamaka tak nutupenwatken̂e kica, cipici yairono wara kica. Tporin pen komo yehtoponho yaw rorohra ro mak tak xatken̂e kica. Kporin komo mtapotarî n̂ewehcatken̂e n̂examro porin pen komo. Ero warahra ro mak takî tî xatken̂e epamthîrî komo okwe.

18 Yukurunpen̂e komo ciir̂ataw tak Kporin komo ya, noro tak nakronomekn̂e. Ixaw Yana komo tak nukurunpekn̂e, yiixatî pîn komo ya ar̂mapora tak xakn̂e yukurunpeno rin̂e exitaw ha ka waipîra. Ixaw Yana komo pînîn yaw thakwa xakn̂e Kporin komo. Okwe okwe, ketken̂e cerewre ro mak cemetanmekrî ke so tîîxatî pîn komo ya. Ero ke yîpînîn yaw so xakn̂e.

19 Yukurunpeno rin̂enho waipuche tko yaw xa marha n̂etaknametken̂e xa hara Ixaw Yana komo. Kicicme so xa tak n̂ehtîketken̂e kica tporin pen komo yopo xa tak kica. Anarî ro komo poko tak n̂ehtîketken̂e. Poko ro so mak xatken̂e kica, mamaka so nutupenwatken̂e marha kica. Tanmerono me cehtoponhîrî komo yahsîpînka xera ro mak xatken̂e kica, kanwekn̂e me cehtoponhîrî ha.

20 Ero ke nîrwonakn̂e xa tak Kporin komo Ixaw Yana komo poko. On wara tak kekn̂e poko so, Omtapotachonho yewetîra tak naxe okwe Ixaw yana komo, Oyewehcataw awya so kakronomexe so, kachonho owya. N̂examro porin pen komo ya wîîkekn̂e ero wa kachonho yewetîra tak naxe kica. Omtapotarî yentan̂e pîn me tak naxe okwe.

21 Ero ke anarî yana komo yarmapora tak wasî yîwya so. Yîrowon komo po rma xatken̂e anarî komo Xoswe pen waihyataw, noro yipu komo yar̂mapora tak wasî yîwya so.

22 Ixaw Yana komo kukman̂e me xa matko n̂examro wîmcesî. On wara kachome wukukmesî, kirwanî ro me oyehtopo ponaro na natu, ero wa oyehtopo yaw roro na natu tporin pen komo xatken̂e ero wara, kachome owya wukukmesî, kekn̂e. Ero wa kekn̂e Kporin komo.

23 Ero ke iitono me rma n̂examro nîmcekn̂e Kporin komo Kananew kom ha. Ahnoro rma ar̂mapora xakn̂e Xoswe pen ya. Ero wa nîmcekn̂e.