Taa, on wara Ixaw Yana komo n̂iir̂akn̂e Kporin komo, Kanan pono komo rma nîmcekn̂e ar̂man me. Ixaw Yana komo yukukman̂e me n̂examro nîmcekn̂e. Kanan pono pen yakro etar̂matoponhîrî komo yenîhra xatken̂e pahxan pen komo yepamtho komo. Noro yipu komo yukukman̂e me anarî yana komo nîmcekn̂e.

2 Ero wa xakn̂e Kporin komo, ar̂mapono ciitîkara xakn̂e Ixaw Yana pen xîkîtho komo ya yîhcamhokachome sowtatu me totopo komo poko. Camkî xatken̂e ketar̂macho poko enîhra exirî ke so. Noro yipu komo yîhcamhoka xe xakn̂e.

3 On wicakî xatken̂e ar̂man komo rma, Piristew kayaritomon komo, 5 kom ha, Kananew komo ahnoro, Siton pono komo, Epew komo, îîpî chewno komo, Ribanu pono chewno ha. Baaw Ehmon Yîpîn pona roro xatken̂e n̂examro, Amace potaka roro marha xatken̂e.

4 N̂examro n̂etîmcetken̂e Ixaw Yana komo yukukman̂e me. Iike so rma n̂examro nukukmekn̂e, Omtapotachonho na n̂ewehcatu, kachome. N̂examro porin pen komo ya n̂ekatîmyakn̂e Moises pen ke ero wa kachonho na n̂ewehcatu, kachome ha. Ero wa kachome n̂etîmcetken̂e.

5 Ero ke Ixaw Yana komo xatken̂e iitono komo chew mak. Kananew komo, Etew komo, Amohew komo, Peresew komo, Epew komo, Xebusew komo, ero yipu komo chew xatken̂e okwe.

6 N̂examro yemsîrî komo nahsîyatken̂e Ixaw Yana komo cipici me so, cemsîrî komo marha nîmyatken̂e n̂examro mumuru komo ya. Ponaro n̂examro yehtopo komo poko marha xatken̂e kica.

7 Ero ke kicicme tî Ixaw Yana komo n̂een̂akn̂e Kporin komo. Tporin komo nîhcamnoyatken̂e okwe Kaan ha. Baaw komo poko tak xatken̂e kica, Astaroce komo poko marha kica.

8 Ero ke Ixaw Yana komo poko nîrwonakn̂e xa Kporin komo. Ero ke n̂examro nîmyakn̂e Kusan-Risatain yanton me. Mesopotamya pono komo kayaritomon mîk Kusan-Risatain ha. Noro yanton me xatken̂e 8 cimn̂ipu okwe.

9 Ero yinhîrî Kporin komo yakro tak nîmtapowatken̂e Ixaw Yana komo cerewre ro mak towrî komo poko. Ero ke towno rin̂e me tak n̂iir̂akn̂e Kporin komo, Ocn̂iew, Kenas mumuru ha. Karebe yakno mumuru mîk xakn̂e Ocn̂iew, mahtîkîthîrî mumuru ha. Noro tak Ixaw Yana komo nowyakn̂e Kusan-Risatain yantonînho kom ha.

10 On wara xakn̂e noro, Ocn̂iew, Kporin komo Yekatî takî tî mokyakn̂e yîropotaka. Ero ke Ixaw Yana komo panatanmekn̂e me takî tî xakn̂e. Ixaw Yana komo tak naar̂akn̂e Kusan-Risatain waparî me. Noro pen yukurunkan̂e me takî tî Ocn̂iew n̂iir̂akn̂e Kporin komo. Ero wa xakn̂e Ocn̂iew.

11 Ero yinhîrî tak waapa komo mokuhra ka xatken̂e pahkî, 40 cimn̂ipu ha. Ocn̂iew pen waihtopo pona roro tîtken̂e makî ka xatken̂e Ixaw Yana komo, n̂examro waparî komo mokuhra exirî ke so.

12 Ero yinhîrî tak kicicme xa hara Ixaw Yana komo n̂een̂akn̂e Kporin komo. Ero wa exirî komo poyero n̂examro pen takî tî nar̂mapekn̂e hara Kporin komo Ekron ya okwe. Moabita komo kayaritomon mîk xakn̂e Ekron.

13 Amon yepamtho komo tî nan̂ikpekn̂e Ekron, Amarekita komo marha. N̂examro yakro takî tî mokyatken̂e Ekron yaka Ixaw Yana komo waparî me. Ixaw Yana komo yopono me takî tî xatken̂e okwe. You warai ken̂arî tak nahsîyatken̂e cewton komo me.

14 Ero ke tak Ekron yepeman̂e me roro xatken̂e Ixaw Yana komo 18 cimn̂ipu roro okwe.

15 Ero yinhirî Kporin komo yakro takî tî nîmtapowatken̂e xa hara Ixaw Yana komo cerewre ro makî. Ero ke anarî tak n̂iir̂akn̂e Noro n̂examro town̂e me xa hara. Euce tî mîk n̂iir̂akn̂e ero me. Xera mumuru tî mîk xakn̂e, Benxamin yepamtho mumutho ha. Poowa me krapa yesîn̂e tî mîk xakn̂e. Noro tî ka xakn̂e Ixaw Yana komo puranta yaan̂e me, Ekron ya tîmsom ro yaan̂e me ha.

16 On wara takî tî xakn̂e noro, tîkaciparan n̂iir̂akn̂e ececokan iyorî. 0,5 metru wicakn̂o tî mîn xakn̂e kacipara. Ero takî tî n̂imiyakn̂e tpetî poko kaari n̂ixan poko. Tponon mamaw rma n̂imiyakn̂e.

17 Ero ke takî tî cekn̂e. Puranta tî nîmyakn̂e Ekron ya Moabe komo kayaritomon ya. Twepakyem xa tî mîk xakn̂e Ekron.

18 Ero yinhîrî takî tî takrononhîrî komo n̂en̂epekn̂e hara Euce, puranta yekn̂enho kom ha.

19 N̂examro yakro rma tî ka cekn̂e noro, Xiwkaw pona ha. Iito tî xakn̂e mîk hak me enporixapu komo, ponaro iitono komo yehtopo. En̂exa takî tî n̂etîramekn̂e Euce Ekron yaka xa hara. On wara tî kekn̂e yîwya, Ai kayaritomo, on yekatîm xe cma re was awya. Anarî komo n̂entarî pîn mak tan. Awya makî ekatîm xe wasî, kekn̂e tî yîwya. Ero ke, Tîtken̂e ehcoko, kekn̂e takî tî kayaritomo tmaywen komo ya. Ero ke ahnoro takî tî cetken̂e anana hara. Kayaritomo mak takî tî xakn̂e iito.

20 Ero yinhîrî kayaritomo yaka takî tî cekn̂e Euce. Cewn̂e xakn̂e ceremaxi. Tîmînî yaw tî xakn̂e epoyino yaw. On wara tî kekn̂e Euce yîwya, Kaanî mtapotarî ka wekatîmyas awya apa, kekn̂e tî. Tok sai, nawomyakn̂e takî tî kayaritomo piiri.

21 Ero yimaw tak kacipara mohkekn̂e Euce tpetî poko yimixapunhîrî, kaari n̂ixa yimixapunhîrî ha. Poowa me tak nahsîyakn̂e. Krow kekn̂e tak, kayaritomo pen takî tî paraxkekn̂e wethîrî poko.

22 Miya ro mak n̂ewomtîkekn̂e kacipara mosututho meero. Iyorî nahruyakn̂e noro pen katîtho. Noro pen wexkiririntho takî tî n̂epatakekn̂e okwe. Kacipara rma tî mohkara xakn̂e Euce.

23 Ero yinhîrî Euce takî tî cekn̂e mîîmo mahremacho yari. Kayaritomo yamtakpon metatan takî tî nahruyakn̂e, n̂ewkekn̂e marha tî.

24 Euce toche kayaritomo maywen komo tak mokyatken̂e. Kayaritomo yamtakpon metatan tî n̂een̂atken̂e cewkaxi. Nnn, ketken̂e tî, n̂expe ha ka, weke na ka wa ha twekacho ro yaka, ketken̂e tî.

25 Pahkî tî momokyatken̂e maywen komo. Mokuhra rma tî xakn̂e okwe kayaritomo pen. N̂eserepoketken̂e takî tî. Ero ke ewkacho takî tî n̂een̂atken̂e. Metata takî tî n̂ewketken̂e. Iito takî tî n̂een̂atken̂e tîkayaritomonînhîrî pen komo cepîrkaxi kurara pona. Twaihso thakwa tî xakn̂e okwe.

26 Euce tko n̂emahciyakn̂e, Ahce wa na nai kayaritomo, ketaw rma maywen komo ya. Mîk hak warai me enporixapu komo yari tî cekn̂e Seira pona takî tî.

27 Iito takî tî tuu kekn̂e. Eprain yepamtho komo rowon po xa tuu kekn̂e îh ken̂ari po. Ero ke takî tî mokyatken̂e Ixaw Yana komo yîhyaka. Iîpî tî n̂enîhcetken̂e Euce yakro. N̂examro takî tî naar̂akn̂e noro.

28 Owenari men amohcoko, kekn̂e tî Euce yîwya so, Moabita pen komo tak nar̂mapesî Kporin komo awya so, aaxatî pînînhîrî pen komo kr̂a, kekn̂e. Ero ke noro wenari cetken̂e puhyaka. Xotaw yecihtaw cexitaw so Moabe rowon yesamarî watotopo komo to tî n̂ecececetken̂e watohra ro mak ehtome so Moabita komo.

29 Ero yimaw rma takî tî Moabita pen komo waihketken̂e mer̂pono pîn. 10.000 tî waihketken̂e sowtatu pen komo. Karitî komo pen mîkyam waihketken̂e. Emahcira ro makî tî xatken̂e. Ahnoro tî waihketken̂e.

30 Ero ke ero po rma Moabita komo takî tî xatken̂e Ixaw Yana komo mamawno me hara. Ero yinhîrî Ixaw Yana komo waparî mokuhra takî tî xatken̂e pahkî, 80 cimn̂ipu ha.

31 Ero yinhîrî Euce pen waipuche tak anarî xakn̂e hara Ixaw Yana komo kurunpen̂e me. Sanka mîk xakn̂e, Anace mumuru ha. Noro tî Piristew komo waihkekn̂e yaake okyo. 600 tî waihkekn̂e paaka maxkacho ke mak. Ero wa Ixaw Yana komo yukurunpen̂e me xakn̂e Sanka hara.