Taa, Euce pen waipuche takî tî kicicme xa hara tî Ixaw Yana komo n̂een̂akn̂e Kporin komo.

2 Ero ke Xabin mamawno me takî tî Ixaw Yana komo n̂iir̂akn̂e hara Kporin komo. Kananew komo kayaritomon mîk xakn̂e Xabin. Aso xakn̂e noro yewton yosotî. Sisera tî xakn̂e noro sowtatun komo yantoman̂e me. Arosece pono tî mîk xakn̂e Sisera, Xenciu komo yewton pono ha.

3 Mer̂pora ro mak xakn̂e Xabin tararan pehu ciixapu komo, 900 ha tî. Pahkî tî Ixaw Yana pen komo n̂emetanmekyakn̂e Xabin, 20 cimn̂ipu. Cerewre ro makî tî n̂emetanmekyatken̂e oko. Ero ke Kporin komo yakro takî tî nîmtapowatken̂e Ixaw Yana komo takronomacho komo poko. Cerewre ro makî tî ketken̂e yîwya.

4 Ero yimaw takî tî Tebora xakn̂e Ixaw Yana komo yentan̂e me. Weronomaro rin̂e tî mîk xakne. Rapitoce pici tî mîk xakn̂e.

5 Yow yepu warai xakn̂e Eprain komo rowon po, îh ken̂arî po. Mehxa xakn̂e Hama, xehxa reha xakn̂e Betew. Iito xakn̂e yow yepu warai. Ero yapomyaka tî n̂eremekn̂e roro Tebora cesen̂ekaxmu komo yentachome. Iina takî tî mokyatken̂e Ixaw Yana komo Tebora mtapotarî yentaxi cesen̂ekacho komo poko.

6 Taa, anarî kaamo po takî tî on wara xakn̂e Tebora, Barake tî nan̂ikpekn̂e, Abinoaw mumuru. Ketes pono tî mîk xakn̂e, Nahtari yepamtho komo rowon pono. On wara tî kekn̂e yîwya, On wara tî nîîke Kporin komo awya, ponaro Ixaw Yana komo yehtopo Mîk kes awya, Etoko tak amoro. 10.000 kîrkomo arko awakro ha. Nahtari yepamtho komo arko, Seburon yepamtho komo marha. Tabo Yîpîn pona aano cirko.

7 Sisera tak wekpesî iina Kison yecihtaka Xabin sowtatun komo yantoman̂e ha. Tîtararan naar̂as iina, sowtatu komo marha, Kison kwaka cexe tuuna yepu kwaka. Iito tak noro pen war̂mapes awya so, kesî Kporin komo awya, kekn̂e tî Tebora.

8 On wara tko tî n̂eyukyakn̂e Barake, Amokyataw mak kîwcesî. Mokuhra awexitaw tohra wasî, kekn̂e tî.

9 Taa, kmokya rma ham awakro, kekn̂e tî Tebora. Wara rma, en̂exa kmokyataw so hara, Sisera yar̂man̂enho mîk Barake okre, kahra naxe amn̂e Ixaw Yana komo. Wooxam ya xa matko tî Sisera pen waihkape Kporin komo, kekn̂e tî. Ero ke cekn̂e takî tî Tebora Barake yakro Ketes pona.

10 Ero ke takî tî kîrkomo komo nan̂ikyakn̂e Barake. Seburon yepamtho komo nan̂ikyakn̂e, Nahtari yepamtho komo marha. Ero ke 10,000 tî mokyatken̂e yîhyaka. Tebora marha tî mokyakn̂e akro so.

11 Taa, on wara xakn̂e Ebe, Kenew yepamtho ha, anarî komo yai ro tî cekn̂e hara Kenew yepamtho komo yai ro. Obabe pen yepamtho komo mîkyam xatken̂e Kenew yepamtho komo, Moises pen tamrunho pen yepamtho kom ha. Tîmîn takî tî n̂iir̂akn̂e Ebe weewe yapomyaw porin yapomyaw ha. Saanin pono mîn weewe, Ketes mîtwono pono ha.

12 Ero yinhîrî on wara takî tî ketken̂e iitono komo Sisera ya, Sowtatu komo naare Barake, Abinoaw mumuru ha. Tabo Yîpîn pona naare, ketken̂e tî yîwya.

13 Ero ke tîtararanî komo takî tî n̂ekpekn̂e Sisera 900 ha. Pehu ciixapu komo mîn n̂ekpekn̂e tarara. Sowtatu komo marha naar̂akn̂e ahnoro. Arosece poi takî tî naar̂akn̂e, Xenciu komo yewton poi. Kison Yepu yecihtaka roro naar̂akn̂e.

14 Ero yimaw tî on wara kekn̂e Tebora Barake ya, Etoko tak ha. Oroto tak Sisera pen nar̂mapo ham awya so. Aywapu tomo Kporin komo oroto. Yîhtînopîra ma mex ha? kekn̂e tî. Ero ke Tabo Yîpîn takî tî n̂enîhcekn̂e Barake. Sowtatu komo naar̂akn̂e 10.000 ha.

15 Taa, ero yimaw takî tî Sisera komo nar̂mapekn̂e Kporin komo Ixaw Yana komo ya. Yîtararanthîrî yaan̂e komo marha tak nar̂mapekn̂e, sowtatunthîrî komo pen marha. Kacipara imo ke n̂examro pen paraxketken̂e Barake maywen komo. Ero ke takî tî tîtararanthîrî nahsîpînkekn̂e Sisera. Tîhtarî po mak takî tî n̂emahciyakn̂e.

16 Tarara komo wenari rma tko tî cetken̂e Barake komo, sowtatu komo wenari marha. Miya cetken̂e Arosece pona roro, Xenciu yewton pona roro ha. Ahnoro Sisera sowtatun pen komo waihyatken̂e kacipara imo ke tparaxkaxi so. Cewn̂anî n̂hema etîmtora ro makî tî xakn̂e.

17 Miya reha tî n̂emahciyakn̂e Sisera. Xaew mîn yaka tî cekn̂e Ebe pici mîn yaka ha. Kenew yepamtho pici mîk xakn̂e. Tawake tî xatken̂e etpoko Xabin, Aso pono komo kayaritomon, Ebe yanan komo yakro, Kenew yepamtho yanan yakro ha.

18 Sisera mokyataw tîmîn yai takî tî n̂epatakekn̂e Xaew Sisera yîmtapotareso. Amok ha apa omîn yaka, kekn̂e tî yîwya. Erasîn me esko, kekn̂e. Ero ke yîmîn yaka tî cekn̂e. N̂etîrapekn̂e tak noro iina. Noro takî tî namuhcekn̂e Xaew yahcono ke.

19 Owokru xe cma re was okre, kekn̂e tî Sisera yîwya. Tuuna xe cma re was owokru, kekn̂e tî. Paaka mownu ke xa matko tî wokpekn̂e Xaew. Een yaw tî xakn̂e paaka mownu, tahrusom yaw. Ero ke nahrunkekn̂e wokpachome. Ero yinhîrî tak noro namuhcekn̂e xa hara Xaew.

20 On wara takî tî kekn̂e Sisera Xaew ya, Amîn potaw cma re ka mecececesî. Ahyari na mokyatu waapa komo. Tanî na nai tooto ahyaw? nîîke na awya. Ero wa ketaw, Exihra nasî, kasko men yîwya so, kekn̂e tî.

21 Cekar̂kaxi ro makî tî xakn̂e Sisera pen okwe. Ero ke yuhnari tî nîwînîkyakn̂e. Yîwînîkyataw rma takî tî roona mici yecetî namekyakn̂e Xaew, aama marha. Yamoro makî tî cekn̂e Sisera yaka. Ero yinhîrî roona mici yecetî ke takî tî paraxkekn̂e, panakumtaw rma tî paraxkekn̂e. Aama ke tî ecetî n̂etapekn̂e miya roro yîhtîpîrî yaka. Mehxa n̂epatakekn̂e roowo cheka roro. Ero ke waihyakn̂e thakwa Sisera pen okwe.

22 Ero yinhîrî takî tî Barake mokyakn̂e yîhyari Sisera wenarinonho. Noro yenso tî cekn̂e Xaew. Amok ha xiya, kekn̂e takî tî yîwya. An̂eporîrî rma wenpes awya, kekn̂e tî. Ero ke yîmîn yaka tî n̂ewomyakn̂e Barake Xaew wenari. Iito takî tî Sisera pen n̂een̂akn̂e twaihso. Roona mici yecetî ke tparaxkaxi xakn̂e panakumtaw oko. Ero wa tî n̂een̂akn̂e.

23 Ero po rma Xabin pen yopono me tak Kporin komo n̂iir̂akn̂e Ixaw Yana komo, Kananew komo kayaritomon yopono me ha.

24 Ero yinhîrî tak miya xe xa takî tî n̂ekaricetîketken̂e Ixaw Yana komo. Xabin yopono me xa takî tî n̂ehtîketken̂e, Kananew komo kayaritomon yopono me ha. Amn̂e takî tî Xabin pen waihketken̂e. Ero wa tî xatken̂e Ixaw Yana komo ero yimaw.