1-2 Taa, ero kaamo po takî tî waano naar̂atken̂e Tebora komo, Barake yakro Abinoaw mumuru yakro. On wara tî ketken̂e waano yaka, Ixaw Yana komo naar̂atu aano rin̂e komo anarimaw so. Aano rin̂e komo wenari cexe sowtatu me cehsom komo tahwore anarimaw so. Ero ke on wara wîîkesî, Kir̂wan̂he xa Kporin komo nai ham okre, kapore men nasî.

3 Amna wanorî ka entacoko amyamro kayaritomo komo, Entacoko ka antomano rin̂e komo. Kporin komo n̂entarî me tan kewanomesî. Kewanomesî xa tan. Waano waar̂asî Kporin komo n̂entarî me, ponaro Ixaw Yana komo yehtopo n̂entarî me ha.

4 Apa, n̂esewsîyakn̂e xa tak roowo, tuuna marha mokyakn̂e kah yai. Xii kekn̂e ro mak tak tuuna yewru. Ero wa xakn̂e awcetaw Sei poi, Eton poi awcetaw ha.

5 Kporin komo mokyataw n̂esewsîyakn̂e îîpî komo. Sinai yîpîn xa sîkî sîkî kekn̂e Noro mokyataw, ponaro Ixaw Yana komo yehtopo mokyataw ha.

6 Pahxa Sanka pen xakn̂e Anace mumutho pen. Ero yimaw on wara xatken̂e Ixaw Yana komo, esama yaw so tîtosom komo exihra xatken̂e. Esamaci yaw so mak cetken̂e. Ero wa so marha cetken̂e Xaew exitaw hara.

7 Pohnî wara ro mak xakn̂e ewto komo. Ero wa xakn̂e pahkî. Ero yimaw tak ow kmokyakn̂e Tebora ha. Ixaw Yana komo yon me cehsom ow kmokyakn̂e.

8 Pahxa anarî komo poko xatken̂e ponaro cehtopo komo me. Ero yimaw waapa komo tak mokyatken̂e ewto pona rma kopi. Ero wa mokyataw so kecen̂an exihra ro mak xakn̂e Ixaw Yana komo yemyaw okwe. Raapu marha exihra xakn̂e. 40.000 kîrkomo yemyaw exihra ro mak xakn̂e ero yipu.

9 Tawake ro mak wasî Ixaw Yana komo yantoman̂e komo poko. Kpoyino komo yakro rma mokyatken̂e yuwun̂ura. Kir̂wan̂he xa nai ham Kporin komo okre, kacoko.

10 Amtapotacoko tak amyamro buhu mkaw tîtosom komo, tumutwemu mkaw tîtosom kom ha, cesen̂ekaxmu yentan̂e komo ponon yaw cehsom komo marha. Amyamro marha ahtarî po tîtosom komo esama yaw, Kaan ya kakronomacho komo ekatîmcoko.

11 Waano naar̂axe cewanomaxmu komo nakwataw so, mooxe kpanapickan̂e komo yai. Iito tak kir̂wan̂he Kporin komo ya kiitoponhîrî komo n̂ekatîmyaxe. Kir̂wan̂he sowtatu komo yehtoponho marha n̂ekatîmyaxe, Ixaw Yana komo yehtoponho ha. Ero wa ekatîmyataw yîwya so Kporin komo yanan tak cexe ewto metataka so.

12 Apakakî Tebora, apakakî, apakak ha, ewanomakî tak hara. Awomko tak Barake. Anahsîthîrî komo tak arko miya amoro Abinowaw mumuru.

13 Ero yinhîrî etîmtoxapu komo tak mokyatken̂e antomano rin̂e komo yaka. Kporin komo yanan komo mîkyam mokyatken̂e. Karitî komo yar̂maxi mokyatken̂e.

14 Eprain yepamtho komo mokyatken̂e hara, Amareke rowon po nasî n̂examro micin weewe micin warai ha. Benxamin yepamtho komo marha xatken̂e ayanan komo yakro. Maki poi mohce sowtatu yantoman̂e komo. Seburon yepamtho komo rowon poi marha mokyatken̂e antomano rin̂e yamoyin ke cemyarke so ha.

15 Isaka yepamtho yantoman̂e komo xatken̂e Tebora yakro. Nhnk, Barake yakro rma xatken̂e Isaka yepamtho komo, noro wenari mokyatken̂e tuuna yepu yecihtaka roro. N̂eserepoketken̂e xa tak Huben yepamtho komo, anarmerpan pono komo ewto pono kom ha. N̂eserepoketken̂e xa n̂examro cehtopo komo poko rma.

16 Ahce kacho awoh komo wacan mîtwo rma mîxatken̂e amyamro okwe Huben yepamtho komo? Ahce kacho awoh komo yan̂ihtopo yentarî poko mak mîxatken̂e? Huben yepamtho komo rowon pono komo n̂esehtînoyatken̂e anarmerpa so. N̂eserepoketken̂e xa cehtopo komo poko.

17 Mehxa rma tî xatken̂e Xireace pono komo Xotaw watohra rma okwe. Taan yepamtho komo marha, ahce kacho tîkanawarî komo mîtwo rma xatken̂e n̂examro? Tuuna imo yecihtaw rma xatken̂e Ase yepamtho kom hara. Aporî kwaw so rma xatken̂e mokuhnî me mak okwe.

18 Seburon yepamtho komo reha twaparî komo rma nukurunketken̂e. Waihîrî yaro so mak xatken̂e iito kopi. Ero wa xa marha xatken̂e Nahtari yepamtho kom hara. Îh po so rma n̂etar̂metken̂e n̂examro reha.

19 Kayaritomo komo mokyatken̂e etar̂maxi. Kananew komo n̂etar̂metken̂e. Taanake po n̂etar̂metken̂e, Mexito n̂ikithon yecihtaw ha. Prata yarîhra tko xatken̂e. Tînar̂mathîrî komo yemyawnonho yarîhra ro mak xatken̂e.

20 Xir̂ko komo rma n̂etar̂metken̂e kah yawno komo rma. Cesamarî komo yaw rma n̂etar̂metken̂e Sisera yakro.

21 Kison Yepu kr̂a tak aano n̂iir̂akn̂e. Pahxantho mîn ha tuuna yepu, Kison Yepu ha. Oropotarî, etoko rma, kar̂pe xa etoko, wîîkes ow.

22 Kar̂pe ro mak nîyorwakn̂e kawaru tarî tarai wara ro mak. Kar̂pe xa cesî iyoh komo kar̂pe xa ces ha.

23 On wara kekn̂e Kporin komo yancun, Kporin komo yakro amtapotacoko Merosu pono komo yîwîrîmacho poko, emetanmecho komo poko amtapotacoko men cerewre ro mak. Ero wa amtapotacoko mokuhra exirî ke so Kporin komo yakronomaxi, karitî komo yar̂maxi mokuhra xatken̂e Kporin komo yakro.

24 Xaew yakronomapo xe reha wasî Kporin komo ya anarî komo yopono me, wooxam komo yopono me. Ero wa akronoma xe wasî Eebe pici, Kenew yepamtho pic ha. Roona yawno komo rma re nakronomesî Kporin komo wooxam kom ha. Xaew xa yo nakronomesî anarî komo yopo.

25 Owokru eeko tuuna, kekn̂e Sisera yîwya. Paaka mownu ke xa matko noro wokpekn̂e. Kayaritomo tutumuru warai yaw n̂ekyakn̂e paaka mownu kat ha.

26 Tamorî ke rma tko tî roona mici yecetî nahsîyakn̂e. Kaari me takî tî aama nahsîyakn̂e sahsamaxapu pokono ro yaman. Sisera pen takî tî n̂etapekn̂e. Yîhtîpîthîrî nawkekn̂e ro mak. Yîhtîpîrî nahkekn̂e panakumtaw oko.

27 Xaew yamrinaka takî tî n̂esewnapoi noro pen, n̂epîrkai mak tak. Iina mak n̂etîrapekn̂e. Noro yamrinaka xa n̂eremekn̂e, n̂epîrkekn̂e mak. Twaihso tak xakn̂e okwe.

28 Meye tî xakn̂e Sisera yon ewto po. Mîîmo yewkanapan yaro tî n̂een̂akn̂e. Tahruso tî xakn̂e ha re mîîmo yewkanapan weewe ke, taraxi so ciixapu mak xakn̂e, ero yaro tî n̂een̂akn̂e. On wara tî kekn̂e, Ahce kacho pahkî mokuhra nai noro tararan hara? Ahce kacho pahkî esentara nai noro tararan mohtopo? kekn̂e tî.

29 Yîson maywen komo takî tî n̂eyukyatken̂e, takîhsom komo xa. Ero wara xa marha kekn̂e noro rma. On wara ketken̂e,

30 Tînar̂mathîrî komo yemyawnonho poko rma na natu, n̂ekamyatu ha na. Emasî nîmyatu sowtatu komo ya, cewn̂e so nîmyatu, asakî so ha na. Poono kir̂wan nîmyatu Sisera ya yînar̂mathîrî komo yemyawnonho, porokutoxapu poono yucurexapu marha. Poono marha na nahsîyatu ero warai rma twarî komo me ha. Ero yipu yahsîrî poko na natu sowtatu komo, kekn̂e tî re Sisera yon.

31 Taa, ero wa xa marha waihcowpe hara ahnoro aaxatî pîn komo Apa, wîîkesî Kaan ya. Aaxatî komo reha n̂ehcowpe kaamo wara, kipikan̂e me awomxapu wara ha, ketken̂e. Ero wa ketken̂e Tebora, Barake komo waano me. Ero yinhîrî takî tî Ixaw Yana komo waparî komo mokuhra tak xatken̂e pahkî 40 cimn̂ipu ha. Ero wa takî tî xatken̂e.