Ero yinhîrî takî tî kicicme Ixaw Yana komo n̂een̂akn̂e xa hara Kporin komo. Ero ke Micianita komo mamawno me makîrha takî tî n̂examro pen komo n̂iir̂akn̂e. 7 cimn̂ipu tî ero wa xatken̂e.

2 Ixaw Yana pen komo tî n̂emetanmekyatken̂e Micianita komo miya xe ro mak okwe. Ero ke Ixaw Yana komo takî tî n̂eseyamyatken̂e toopu yetahkaxapu yaw so mak, ewtarî yaw so marha. Twacan komo marha tî n̂iir̂atken̂e. Ero yipu yaw tî nîwînîkyatken̂e îh po so.

3 Tmararîn komo rma tî re n̂iir̂atken̂e Ixaw Yana komo. Ero yinhîrî tak mokyatken̂e roro Micianita komo, Amarekita komo marha, mîk hak yana komo mak mokyatken̂e kaamo yepatakacho n̂ixan komo.

4 Noro yipu komo tak cetarî komo n̂iir̂atken̂e Ixaw Yana komo rowon pona rma. Ixaw Yana pen komo mararîn pono nakn̂iyatken̂e miya rorono rma, Kasa pona rorono ha. Yînaputhîrî komo yîmtora ro makî tî xatken̂e okwe. Iyokuthîrî komo marha tî naatîketken̂e okwe, oper̂a pen komo, paaka pen komo, buhu pen komo marha.

5 Tokye so tî mokyatken̂e emetanmekn̂e komo, tîmîye so marha mokyatken̂e. Mer̂pora ro mak mokyatken̂e makaka wara ro mak kopi. Yukuknomarî yopo ro makî tî xatken̂e n̂examro, iyoh komo marha tî xakn̂e yukuknomarî yopo, kameru kom ha. Ixaw Yana komo rowon yîwîrîmatîkaxi mokyatken̂e okwe.

6 Miya xe ro mak Ixaw Yana pen komo n̂esemetanmekyatken̂e. Ero ke Kporin komo yakro takî tî nîmtapowatken̂e cerewre ro mak.

7-8 Ero ke yîmtapotarî komo takî tî n̂encekn̂e Kporin komo, Amna pen nîwîrîmexe ro mak okwe Micianita komo, kacho ha. Ero ke takî tî weronoman̂e komo n̂en̂epekn̂e yîhyaka so. On wara tî kekn̂e noro yîwya so, On wara men tî nîîke Kporin komo awya so, ponaro Ixaw Yana komo yehtopo ha, Exitu poi kekyatken̂e so. Iitono komo napickarî me mîxatken̂e etowîn me ro mak okwe.

9 Exipsiu komo yai tak kowyatken̂e so. Anarmerpan komo yai marha kowyatken̂e so awemetanmekn̂enhîrî komo yai. Noro yipu komo war̂mapekn̂e awya so yîrowonthîrî komo yahsîtome awya so.

10 On wara wîîkekn̂e awya so, Aporin komo Kaan Ow ha. Ero ke ponaro Amohew komo yehtopo ponarora ro mak men ehcoko, ekenhîrî komo po tak maxe ponaro n̂examro yehtopo poko exihra ro mak ehcoko, wîîkekn̂e awya so. Omtapotarî tko ewetîra mîxatken̂e kica, nîîke Kkporin komo awya so, kekn̂e. Ero wa tî kekn̂e Kporin komo mtapotarî yekatîmn̂e Ixaw Yana komo ya.

11 Ero yinhîrî takî tî Kporin komo yancun mokyakn̂e. Opra pona tî mokyakn̂e. Iito xakn̂e kahpar̂u yepu Xoas yeken po. Ero yapomyaka tî n̂eremekn̂e ancu. Abiese pono mîk xakn̂e Xoas. Iito tî xakn̂e Xoas mumuru Xiteaw. Puruma yeperîrî tî nîpîpîtîkekn̂e uupa yewkukacho po. Iito xakn̂e ceseyamso esenpora cehtome Micianita komo ya.

12 Noro ya takî tî n̂esenpekn̂e Kporin kom yancun. On wara tî kekn̂e yîwya, Ai Xiteaw, sowtatu xa amoro karitî. Awakro nasî Kporin komo, kekn̂e tî yîwya.

13 Okyo, kekn̂e takî tî Xiteaw, amna yakro exitaw Kporin komo ahce kacho amna pen n̂esemetanmekya ro mak hara okwe? Ahto xa nai kar̂pe Noro yehtopo, cirihnî ciitopo ha. Ero yipu ciitoponho rma n̂ekatîmyatken̂e amna ya amna porin pen komo. Exitu poi amna n̂ekyakn̂e Kporin komo, ketken̂e cma re. Oroto tak amna nahsîpînkesî mak okwe Kporin komo. Micianita komo n̂emetanmekrî me mak amna n̂iirasî, kekn̂e tî Xiteaw.

14 Xiteaw wece takî tî n̂een̂akn̂e Kporin komo. On wara tî kekn̂e yîwya, Kar̂pe rma mai. Ero ke etoko rma. Ixaw Yana komo tak towko Micianita komo yai. Ow xa Ow kantomesî ero poko, kekn̂e tî yîwya.

15 Ahce wa hara Apa? kekn̂e takî tî Xiteaw. Ahce wa thakwa re Ixaw Yana komo wowya ha? Manases yepamtho rma re ow ha, noro pîntho komo mak ha tko oyanan komo, anarî tribu komo xawyakan mak amna, asak mak nas amna yemyawno. Ow marha wasî apapa yawno komo xawyakan me, kekn̂e tî.

16 On wara tî n̂eyukyakn̂e Kporin komo, Awakro rma tko wa was Ow. Micianita komo mar̂mesî cewn̂an yar̂macho wara rma, kekn̂e tî yîwya.

17 On wara takî tî n̂eyukyakn̂e Xiteaw, kar̂pe awehtopo cma re menpes owya, Yaaro xa ham, Kporin komo xa mîk nîmtapota oyakro ham, kachome owya. Tawake awexitaw opoko ero wa kacho cma re menpes owya kekn̂e tî.

18 Ero yinhîrî on wara tî kekn̂e hara Xiteaw, Kîwcesî ka. Tanî cma re ka mas omomokrî poko. Awya tîmsom yehso kîwcesî. Awamrinaka wiir̂asî, kekn̂e tî yîwya. Taa, kekn̂e tî Kporin komo, kmomokyasî ka tan ha, kekn̂e tî.

19 Ero ke cekn̂e takî tî Xiteaw. Kabritu pun takî tî nupur̂akn̂e. Puruma marha xakn̂e yîhyaw 22 ritru. Ero poi nayakn̂e iyuru wahrututpamnî. Wooto takî tî n̂enkayakn̂e kahxapu yaka. Kaxara narkekn̂e tahrem yaka. Ero takî tî naar̂akn̂e ancu yaka. Yîwya tî nîmyakn̂e kahpar̂u yepu yapomyaw exitaw rma.

20 Ero yinhîrî on wara takî tî kekn̂e Kaan yancun yîwya, Wooto anîmko, puruma marha wahrutupamnî. On pona cirko toh pona. Ero pore tak yukmamko kaxara, kekn̂e. Ero ke yîmtapotarî yaw roro rma tî n̂iir̂akn̂e Xiteaw.

21 Ero yinhîrî takî tî cei kekn̂e ancu tamoyin poturu ke. Ero wa tî wooto napeyakn̂e, puruma marha wahrututpamnî. Aperî ke tak n̂epatakekn̂e wehto toh yai. Wooto pen takî tî n̂ecakyakn̂e okyo, puruma pen marha. Ero yinhîrî tak poku, Kporin komo yancun takî tî n̂ehcamnoyakn̂e.

22 Ero yeen̂ataw Xiteaw ya, Kporin komo yancun me xa takî tî ancu nîhtînoyakn̂e. Ero ke on wara tî kekn̂e, Kaan xa Amoro ham. Oporinî ro xa ham Amoro kopi, Kporin komo yancunu rma wenwo, eepatarî xa wenwo kopi, kekn̂e tî.

23 On wara tko tî kekn̂e Kporin komo yîwya, Eserepokara esko. Erasîra marha esko. Waipîra wa mas ha, kekn̂e tî yîwya.

24 Ero yinhîrî takî tî Kporin komo ya tîmsom yakn̂itopo nakîhcekn̂e Xiteaw iina rma. Kerepotanmekn̂e xa Mîk Kporin komo, kacho me tî ero nosohcekn̂e. Iito rma nas ero oroto Opra po, Abiese pono komo chew rma.

25 Ero yinhîrî takî tî ero po rma kosope tak on wara kekn̂e hara Kporin komo Xiteaw ya, Aamo yokutho ahsîko bui, poturme ewruxapu ponan ha. 7 cimn̂ipu ewrutoponhîrî ehxapu mîk noro ahsîko. Baaw ya tîmsom yakn̂itoponho tak yixkakî kr̂a aamo n̂iritho. Ero mîtwononho marha kr̂a tak amakî Asera kuknontho.

26 Ero yinhîrî on po rma tak îh po akîhtoko Aporin komo ya tîmsom yakn̂itopo hara, Kaan ya tîmsom yakn̂itopo ha. Kir̂wan̂he tak akîhtoko toh ke tpapakyem ke. Bui pun tak akn̂iko ero pona owya tîmsom me. Aamo yoku punu rma akn̂iko, poturu ponan pen pun ha. Asera kuknontho rma yîknoko ero kamerî me, kekn̂e. Ero wa tî kekn̂e Kporin komo yîwya.

27 Ero ke tanton komo takî tî nan̂ikyakn̂e Xiteaw 10 mak ha tî. N̂examro yakro takî tî n̂ixketken̂e Baaw ya tîmsom yaponho Kporin komo mtapotachonho yaw roro rma. N̂eraswakn̂e ha tko tî Xiteaw tîîm yawno komo pona, cenmayipu komo pona marha. Ero ke kosope makî tî ero wa n̂ixketken̂e.

28 Taa, enmapuche takî tî iitono komo pakache so kîrkomo, Baaw ya tîmsom yakn̂itoponho tî n̂een̂atken̂e. Cixkatîkaxi tî n̂een̂atken̂e okwe. Asera kuknontho marha xakn̂e tamaxi. Bui pun yecakrî tî n̂een̂atken̂e, poturu ponan pen pun. Ciixapu po n̂ecakyakn̂e tîmsom yakn̂itopo po. Ero wa tî n̂een̂atken̂e okwe.

29 Ero ke takî tî n̂esencetken̂e n̂examro re. Onoke xa ero wa n̂iirî okwe? ketken̂e tî. Iitono komo mtapotarî tî n̂encetken̂e. On wara tî ketken̂e, Xiteaw mîk ero wa ciin̂enhîrî, Xoas mumuru ha, ketken̂e yîwya so.

30 Ero ke takî tî on wara ketken̂e iitono komo Xoas ya, Amumuru men eeko xiya waihkachome. Baaw ya tîmsom yakn̂itoponho tî n̂ixka kica. Ero panawnonho marha tî naama Asera kuknontho. Ero ke kr̂a twaihkapore nasî, ketken̂e tî yîîm ya.

31 On wara tko tî n̂eyukyakn̂e Xoas tpoko tîrwon̂em komo mtaka, Ahce kacho Baaw xatî pîn men̂eketu amyamro? Noro katî mukurunpet ha? Noro yukurunpen̂e exitaw noro xa twaihkapore nasî oroto enmayataw rma. Yaaro exitaw Baaw ponaro kehtopo, noro rma n̂en̂ekape tîwya tîmsom yakn̂itoponho yixkan̂enho, kekn̂e. Ero wa tî kekn̂e Xoas, Xiteaw yîîm.

32 Ero ke on wara takî tî Xiteaw nosohcetken̂e, Xerubaaw me tî nosohcetken̂e. On wara karî ke ero wara nosohcetken̂e, Baaw rma n̂en̂ekape tîwya tîmsom yakn̂itoponho yixkan̂enho, karî ke. Ero ke ero wa nosohcetken̂e. Ero wa tî xatken̂e n̂examro.

33 Taa, ero yinhîrî takî tî Micianita komo n̂esenmekyatken̂e xa hara, sowtatu komo. Amarekita komo marha tî nan̂ikyatken̂e, meyeno komo marha resce n̂ixan komo. Xotaw takî tî wacetken̂e. Xisirew woskaran pona tî cetarî komo n̂iir̂atken̂e.

34 Ero yimaw tko tî on wara xakn̂e Xiteaw, Kaan Yekatî tî mokyakn̂e yîropotaka. Ero ke tuu kekn̂e takî tî, Amohcoko owenari sowtatu me, kekn̂e tî Xiteaw. Ero ke Abiese pono komo takî tî mokyatken̂e yîhyaka.

35 Sowtatu yan̂ikn̂e komo marha tî n̂en̂epekn̂e Manases yepamtho komo chere ro, Ase komo chere ro, Seburon komo chere ro, Nahtari komo chere ro. Noro yipu komo chere ro tî sowtatu yan̂ikn̂e komo n̂en̂epekn̂e. Ero ke an̂ihxapu komo takî tî mokyatken̂e sowtatu komo, Xiteaw yaka.

36 Ero yinhîrî Kaan yakro tî nîmtapowakn̂e Xiteaw. On wara tî kekn̂e yîwya, Apa kah yawno, owya rma na Ixaw Yana komo mowpe amtapotaconhîrî yaw roro rma.

37 Onî ika enko, oper̂a picho wiir̂asî katpanaka, puruma yîpîpîtîkacho pona. Enmapuche tak ween̂asî. Cicah ken̂e exi xe wasî oper̂a picho mak. Turpe reha exi xe wasî cuupu, peen marha iitono komo rma. Ero wa exitaw yaarono me xa tak wîhtînoyasî. Ixaw Yana komo mowpe rma ham owya amtapotachonhîrî yaw roro, wîîkesî tak amn̂e yaaro xa, kekn̂e tî Kaan ya.

38 Taa, enmapuche tak tî ero wara xakn̂e. Pahxaxa ro rma tî pakekn̂e Xiteaw. Oper̂a picho namcikîrîrînkekn̂e tutum yaka. Copoyinkekn̂e takî tî tutum tuuna ke.

39 Ero yinhîrî on wara xa hara tî kekn̂e Kaan ya, Apa, opoko cma re yîrwomra masî. Cewn̂e ro xa cma re kîmtapowasî awakro. Cewn̂e ro xa hara amtapotachonhîrî yukukma xe was on ke oper̂a picho ke. Oroto tak esemtaka cma re miir̂asî hara. Turpe tak oper̂a picho yenî xe wasî enmapuche. Cuupu reha cicah ken̂e exi xe was hara, kekn̂e tî.

40 Ero ke ero wara rma tî n̂iir̂akn̂e Kaan. Oper̂a picho makî tî xakn̂e turpe. Cuupu takî tî xakn̂e cicah ken̂e. Ero wa tî xakn̂e.