Taa, ero yinhîrî takî tî, pahxaxaro rma pakekn̂e Xerubaaw. (Xiteaw rma mîkî) Noro maywen komo marha tî paketken̂e. Ahnoro takî tî cetken̂e Aroce kwaka tuuna pîtho kwaka. Iina tî n̂etakriyatken̂e. Mehxa n̂he tî xakn̂e Micianita komo yetarî nohce yaw roro. More yîpîn mîtwo xatken̂e n̂examro woskara po.

2 Ero yinhîrî takî tî on wara kekn̂e Kporin komo Xiteaw ya, Mer̂pora xa naxe amaywen komo. Ero wicakî exitaw so Micianita komo yar̂mapora wasî Ixaw Yana komo ya. Ero wicakno ya rma ar̂mapetaw n̂ehcoyoponketu men kica. On wara ketu, Karitî komo xa kîwyam ham. Kanme ro so mak tar̂macow okre Micianita komo, ketu men kica, kekn̂e tî.

3 Ero ke on wara kasko amaywen komo ya, Meraswat ha na anarî komo. Mîtatanatu ha na awerahtîmrî ke so. Ero wa awexitaw so etocoko hara xehxa Xireace Yîpîn poi, kasko men yîwya so, kekn̂e tî. Ero ke tî ero wa kekn̂e Xiteaw tmaywen komo ya. Ero wa karî ke tak 22.000 tî cetken̂e hara en̂exa. 10.000 makî tî xatken̂e iito rma.

4 On wara xa hara tko tî kekn̂e Kporin komo Xiteaw ya, Mer̂pora xa rma naxe amaywen komo. Ero ke ka aano cirko tuuna yecihtaka. Iito tak n̂examro wukuknomesî, amaywen komo me cehsom xa tak wetahcasî. Moxam xa awakro tîtosom komo, wîîkesî anarî komo poko. Ero ke n̂examro arko awakro. Moxam reha men tohra n̂ehcowpe awakro, wîîkesî anarî komo poko hara. Ero ke noro yipu komo men arîhra esko awakro, kekn̂e tî. Ero wa tî kekn̂e Kporin komo Xiteaw ya.

5 Ero ke tmaywen komo takî tî naar̂akn̂e Xiteaw tuuna yecihtaka. Iito exitaw so tak on wara tî kekn̂e Kporin komo yîwya, Akpano tak cirko. Anarî komo tuuna n̂eer̂axe xapari wara mak tun̂uru komo ke. Noro yipu komo cirko xiya. Anarî komo reha n̂eremetu tosokmuru komo po. Noro yipu komo cirko miya hara, kekn̂e tî yîwya.

6 300 makî tî tuuna n̂eer̂atken̂e tamorî ke so, tun̂uru ke so rma ha re. Anarî komo reha tî n̂eremetken̂e tosokmuru komo po tuuna yeetome. Ero wa tî xatken̂e.

7 Ero yinhîrî on wara takî tî kekn̂e Kporin komo Xiteaw ya, 300 mak tuuna n̂eecow tun̂uru komo ke so. Noro yipu komo ya mak tak Micianita komo war̂mapes Ow awowtome so. N̂examro ke Micianita komo wiir̂asî anar̂marî me. Anarî komo reha tocowpe hara ceken komo pona hara, kekn̂e tî.

8 Ero ke tosokmuru komo po eremaxapunhîrî komo takî tî n̂en̂epekn̂e Xiteaw eken komo pona hara. 300 komo makî tî nîmcekn̂e tmaywen me. N̂examro takî tî nahsîyatken̂e cetîramaxmu komo naputho, yîratînthîrî komo marha. Îh po tî xatken̂e Xiteaw komo. Mehxa tî xatken̂e Micianita komo puhyaw woskara po ha.

9 Ero yinhîrî kosope takî tî on wara kekn̂e Kporin komo Xiteaw ya, Ai, Xiteaw awomko, Micianita komo yetarî yawno komo waparî me tak etocoko. N̂examro rma wiirî anar̂marî komo me.

10 Meraswa tko na anarimaw. Ero wa awexitaw etoko ka Micianita komo yetarî mîtkoso mak. Awanton marha arko awakro, Pura.

11 Iito awexitaw so tak yîmtapotarî komo entacoko. Ero yentache tak tahwore masî. Erasîn me ro mak tak yuu yuu mîîkesî Micianita komo wece, kekn̂e tî. Ero ke takî tî Xiteaw cekn̂e tanton yakro, Pura yakro. Micianita komo yetarî potawno komo mîtkoso tî cetken̂e.

12 Woskara po tî xatken̂e Micianita komo, Amarekita komo, anarî yana komo marha resce n̂ixan komo. Mer̂pora ro makî tî xatken̂e makaka wara ro mak kopi. Mer̂pora marha tî xatken̂e iyoh komo kameru. Axawa wara ro mak xatken̂e, tuuna imo yecihtarino wara. Yukuknomarî yopo marha tî xakn̂e iyoh kom hara.

13 N̂examro yetarî mîtkoso takî tî cekn̂e Xiteaw. Ero yimaw tî Micianita mtapotarî tî n̂encekn̂e. Twosotîmtoponhîrî tî n̂ekatîmyakn̂e takrono ya. On wara tî kekn̂e, Ai oyakno, kwosotmo kopi. On warai wenwo owosoto, mehxa moko cuure sepata aixapu, mehmere mehmere. Micianita komo yetarî yaka rma moko. Mîîmo tak n̂etapa kar̂pe ro mak. Mîîmo pen tak macaka. Cewnapo tak n̂eexi, cixkaxi ro mak okwe. Ero warai wenwo owosoto, kekn̂e tî.

14 On wara tî n̂eyukyakn̂e akrono, On wara kacho rma mîn awosotîmtoponhîrî, kwaparî me tak mokya ham Xiteaw, Xoas mumuru, Ixaw Yana ha. Kar̂mapetu so ham Kaan yîwya. Ahnoro kar̂mapetu so Micianita pen komo, eeta yawno pen kom ha, kekn̂e tî yîwya.

15 Yîmtapotarî komo tî n̂encekn̂e Xiteaw, twosotîmtoponhîrî yekatîmrî, Xiteaw pokono xa mîn ha an̂enîthîrî, kacho marha, tî n̂encekn̂e. Ero ke Kaan mamaka takî tî nutupenwakn̂e Xiteaw. Kir̂wan̂he xa mai ham Apa, kekn̂e yîwya. Ero yinhîrî cekn̂e hara Ixaw Yana komo yetarî yaka. On wara tî kekn̂e iitono komo ya, Kaikatko tak ha, Micianita pen komo ahnoro tak nar̂mape ham Kporin komo awya so, n̂examro yetarî yawno pen komo, kekn̂e tî yîwya so.

16 Ero ke takî tî 300 komo nakpayakn̂e Xiteaw 100 me so. Osorwaw xatken̂e tpomxem komo 100 me so cehsom komo. Ero yinhîrî raatî mko n̂ekamyakn̂e Xiteaw yîwya so, parakwe marha. Ramha xakn̂e parakwe yaw so potuhtoxapu ha. Ero yipu ke so tmaywen komo n̂emyarîcekn̂e.

17 On wara tî kekn̂e marha Xiteaw yîwya so. Ow men encoko amn̂e. Owara xa marha men kacoko. N̂examro yetarî mîtwo kexitaw so owara xa marha kacoko.

18 Tuu wîîkesî tak amn̂e. Tuu kexe marha oyakrono komo. Ero yipu yencetaw awya so tuu kacoko amyamro hara. Ero yinhîrî on wara tak kacoko, Kporin komo yanmen amna ha, Xiteaw yanmen marha, kacoko, kekn̂e tî. Ero wa tî kekn̂e Xiteaw tmaywen komo ya.

19 Taa, ero yinhîrî takî tî cetken̂e Xiteaw komo 100 komo yakro. Micianita komo yetarî mîtkoso tî cetken̂e. N̂examro mokyataw iina Micianita sowtatun komo tî xatken̂e iito, waapa me tmohsom yenîn̂e komo. Ero yimaw mohxapu rma mîkyam xatken̂e, rakatawro mohxapu kom ha. Iito exitaw so n̂examro tuu ketken̂e takî tî Xiteaw komo. Parakwe marha tî nahketken̂e cemyawnonhîrî pen komo.

20 Ero ke anarî komo marha tuu ketken̂e 100 me so cehsom kom hara. Tparakwen komo marha nahketken̂e. Ramha takî tî nahsîyatken̂e poowa me, raatî tî nahsîyatken̂e kar̂me tuu kachome tak. Kar̂pe takî tî n̂emtaraketken̂e, Kporin komo yanmen amna tkaciparayem ha, Xiteaw yanmen marha amna, ketken̂e. Kar̂pe xa tî ketken̂e.

21 N̂ecececetken̂e makî tî Ixaw Yana komo. Mehxa xatken̂e anarî komo, xehxa xatken̂e anarî kom hara. Micianita komo reha tî n̂emahciyatken̂e. N̂emtaraketken̂e tî cemahcirî me so.

22 On wara tî Micianita komo n̂iir̂akn̂e Kporin komo tuu ketaw 300 komo ya, takrononhîrî pen komo paraxkan̂e me rma tî n̂iir̂akn̂e kacipara imo ke rma okwe. Ero wa tî n̂iir̂akn̂e ahnoro eeta pono komo. Waipîn komo takî tî n̂emahciyatken̂e Serera yesamarî yaw, Bece Sita pona roro tî. Abew Mehora rowon wokpan yaka roro marha cetken̂e, Tabace pahnoke tî cetken̂e.

23 Ero yimaw takî tî Ixaw Yana komo mokyatken̂e, Nahtari yepamtho komo, Ase yepamtho komo, Manase yepamtho komo, noro yipu komo tî mokyatken̂e. N̂examro meero takî tî cetken̂e Micianita komo yar̂maxi.

24 An̂ikno rin̂e komo marha n̂en̂epekn̂e Xiteaw Eprain yepamtho komo rowon pore îh ken̂arî pore. Amohcoko Micianita komo yar̂maxi, ketken̂e tî Xiteaw n̂en̂epetho komo. Xotaw Yepu yecihtaka men porohkano ciitatko ha. Miya roro porohkano ciitatko Bece Bara pona roro, ketken̂e tî. Ero ke mokyatken̂e kîrkomo Eprain yepamtho komo. Xotaw Yepu watotopo komo to tî n̂ecececetken̂e miya rorono to, Bece Bara pona roro to ha.

25 Micianita komo kayaritomon marha tî nahsîyatken̂e n̂examro, Orebe, Sebe, ero wa. Orebe tî waihketken̂e Orebe Topun po. Sebe tî waihketken̂e uupa yewkukacho mîtwo. Sebe tî mîn xakn̂e uupa yewkukacho yosotî. Miya rma tî Micianita komo weken̂emekyatken̂e. Anarî komo tî naar̂atken̂e Orebe pîtho Xiteaw yaka, Sebe pîtho marha tî. Xotaw yeco po tî xakn̂e Xiteaw ero yimaw. Ero wa tî xatken̂e.