Ero yinhîrî takî tî on wara ketken̂e Eprain yepamtho komo Xiteaw ya, Ahce kacho ero wa amna miire kica? Ahce kacho amna yan̂ikîra mîxakn̂e kica Micianita komo yar̂maxi awcetaw ha?, ketken̂e tî yîwya. Cerewre ro makî tî ketken̂e kica.

2 On wara tko tî n̂eyukyakn̂e Xiteaw yîmtaka so, Amyamro xa matko armano rin̂e xa. On wara wîîkes apoko so, Eprain yepamtho poko ha. Anatîrî komo wara rma maxe, uupa wara. Mer̂pora xa nasî anatîrî yeperîrî, kirwan xa ha. Wahra n̂he mak nasî Abiese pono komo natîrî uupa yeperîrî enmexapu rma ahnoro. Ero ke n̂examro natîrî wara mak was owî reha.

3 Awya so reha Micianita kayaritomon pen komo nahsîpoi Kaan, Orebe pen, Sebe pen kom ha. Noro pîntho komo waihkan̂enho makî reha ow, kekn̂e tî yîwya so. Ero wa kacho yentarî ke takî tî yîrwomra n̂he xatken̂e Xiteaw poko. Ero wa tî xatken̂e Eprain yepamtho komo.

4 Ero yinhîrî takî tî Xiteaw cekn̂e Micianita komo wenari rma. 300 komo yakro rma tî cetken̂e. N̂ekar̂ketken̂e ro makî tî okwe. Wara rma weken̂emekno rma tî n̂iir̂atken̂e. Xotaw yecihtaka roro tî cetken̂e, wacetken̂e marha tî.

5 Ero yinhîrî Sukoce pona takî tî cetken̂e. On wara tî kekn̂e Xiteaw iitono komo ya kîrkomo ya, Omaywen komo yuru cma re mîmyaxe. Cekar̂katîkaxi thakwa naxe okwe. Micianita komo kayaritomon yahsîso kîwcesî, Seba, Sawmuna kom ha, kekn̂e tî yîwya so.

6 On wara tko tî n̂eyukyatken̂e Sukoce pono komo, antomano rin̂e kom ha, Seba komo yamotho ma re nai ahyaw so oroto Sawmuna komo yamotho marha? Ahce kacho ma re amaywen komo yuru amna nîmya hara? ketken̂e tî yîwya.

7 On wara tî Xiteaw n̂eyukyakn̂e yîmtaka so, Taa, amn̂e Seba rma nahsîpesî owya Kporin komo, Sawmuna kom ha. Ero yinhîrî on wara kiir̂axe so ero wa karî poyero awya so, kîkararakexe so kr̂a cekyekyem ke comota chewno ke, kekn̂e tî yîwya so.

8 Ero yinhîrî takî tî en̂exa cekn̂e Penuew pona hara. Yîwya so tak kekn̂e hara, Omaywen komo yuru cma re mîmyaxe, kekn̂e. Pîra, ketken̂e hara tî kica Sukoce pono komo wara xa marha.

9 Ero ke on wara takî tî kekn̂e Xiteaw yîwya so hara, Omokyataw hara Micianita pen komo yar̂man̂enho ontho mîîmo pen wixkesî an̂irithîrî komo kawnonhîrî, kekn̂e tî. Ero wa tî kekn̂e Xiteaw Penuew pono komo ya.

10 Taa, Seba tî xakn̂e Kahko po, Sawmuna kom ha. 15.000 makî tî xatken̂e akro so sowtatun komo. Ero wicakî makî takî tî n̂etîmcetken̂e resce n̂ixan komo sowtatun pen komo, waihkan kom ha. 120.000 pen tî waihyatken̂e kacipara imo ke cemyarkemînhîrî pen komo rma.

11 Xiteaw tî cekn̂e mehxa roona ke tîmîyem komo yesamarî yaw, Nooba tî xakn̂e n̂examro yewton, Xokbea ti xakn̂e anarî iitono komo yewton. Mehxan yaw tak tî cetken̂e Xiteaw resce n̂ixan yaw. En̂exa takî tî yuu yuu ketken̂e Xiteaw komo Micianita komo wece. Waapa ponarora exitaw so makî tî yuu yuu ketken̂e.

12 Seba komo takî tî n̂emahciyatken̂e xa hara, Sawmuna yakro, Micianita komo kayaritomon kom ha. Wenari so rma tko tî cekn̂e Xiteaw komo. Nahsîyatken̂e takî tî asakno roro rma. Sowtatunînhîrî komo takî tî nakpayatken̂e ahnoro.

13 Ero yinhîrî takî tî Xiteaw Xoas mokyakn̂e hara Micianita komo yar̂man̂enho. Erese yîpîn yesamarî yaw tî mokyakn̂e.

14 Mokyataw takî tî Sukoce pono nahsîyakn̂e kar̂pamxan. On wara tî ketken̂e yîwya, Ekatîmko me owya Sukoce pono komo yantoman̂e komo yosotî, poritomo komo yosotî marha. Ero ke noro takî tî mewrekn̂e n̂examro yosotî antomano rin̂e komo yosotî, poritomon komo yosotî marha. 77 kîrkomo yosotî tî mewrekn̂e.

15 Ero yinhîrî Sukoce pona takî tî n̂epatakekn̂e Xiteaw. On wara tî kekn̂e iitono komo ya kîrkomo ya, Moxam ha Seba, Sawmuna kom ha. Moxam poko ow mîwîrîyaketken̂e ha. Seba yamotho ma re nai ahyaw so oroto, Sawmuna yamotho marha? mîîketken̂e owya. Ahce kacho amaywen komo yuru amna nîmya ha ekar̂kaxapu komo ya ha? mîîketken̂e marha owya kica, kekn̂e tî yîwya so.

16 Ero ke takî tî antomano rin̂e komo panarekn̂e. Kararakekn̂e oko cekyekyem ke comota pono ke ha.

17 Ero yinhîrî takî tî Pen̂uew pono n̂ixkekn̂e mîîmo kawnonhîrî pen ha. Kîrkomo marha tî waihkekn̂e iitononhîrî pen kom ha. Ero wa tî ciino n̂iir̂akn̂e Xiteaw.

18 Ero yinhîrî takî tî on wara kekn̂e Xiteaw Seba komo ya, Sawmuna komo ya, Onoke warai komo xa mîkyam, kîrkomo mîwaiketken̂e pahxa Tabo po n̂examro ha? kekn̂e tî. Awyipu komo xa mîkyam xatken̂e ahnoro. Kayaritomo mumuru yewke rma xatken̂e, ketken̂e tî.

19 On wara tî kekn̂e Xiteaw, Oyakno komo mîkyam xatken̂e okwe onocwanî ro mrerî kom ha. N̂examro waihkara awexitaw so ketaw ha re awaikara so was ha re. Yaaro wîîkesî, Kporin komo nasî waipîra yaaro xa ero wara xa marha wîîkesî yaaro xa, kekn̂e tî.

20 Ero yinhîrî takî tî tumumuru nantomekn̂e poturme ewruxapu ha. Xete tî xakn̂e noro yosot ha. Moxam tak waihkak amoro, kekn̂e tî yîwya. Tkaciparanî tko tî mohkara rma xakn̂e. N̂eraswakn̂e tî kar̂pamxan me mak cexirî ke.

21 On wara tko tî ketken̂e Seba, Sawmuna komo, Amoro xa kasko. Kar̂pe mîxakn̂e amna yar̂machome, ero ke kar̂pe rma mas ha, ketken̂e tî yîwya. Ero ke yîhyaka so takî tî cekn̂e Xiteaw. N̂examro pen takî tî waihkekn̂e. Ero yinhîrî iyokuthîrî porokutho takî tî nahsîyakn̂e, kameru pîmtawnonho. Ero wa tî xakn̂e Xiteaw.

22 Ero yinhîrî on wara takî tî ketken̂e Ixaw Yana komo Xiteaw ya, Amna kayaritomon me tak esko amoro ha. Amn̂e amumuthîrî mak hara nas amna kayaritomon me, noro retawno me tak nas hara aparî amn̂e amna kayaritomon me. Ero wa ehcoko, kes amna awya Micianita komo yai amna town̂enho me awexirî ke, ketken̂e tî yîwya.

23 On wara tko tî kekn̂e Xiteaw yîwya so, Akayaritomon komo me oyexi xera ro mak wasî, omumuru marha exi xera wasî akayaritomon komo me. Kporin komo mak xa nasî akayaritomon komo me.

24 On wara makî cma re wîîkes awya so, on xe mak wasî, owya cma re mîmyaxe apanatarînthîrî komo cewn̂e so mak. Micianita komo yemyawnonho poyinonho cma re mîmyaxe, kekn̂e tî. Tpanatarîyem tî mîkyam xatken̂e Ismaew yepamtho komo, ooru ciixapu mîn xakn̂e panatarîn komo.

25 Taa, kir̂wan̂he, amna nîmyasî, ketken̂e tî. Ero ke takî tî poono n̂ehyatketken̂e. Ero pona takî tî tînahsîthîrî komo poi tak n̂enmekyatken̂e, Micianita pen komo panatarîntho poi ha.

26 Yînmîthîrî komo takî tî nukuknometken̂e panatarî yawsîn. 19,5 kiru xakn̂e awsîn. Anarî marha tî nîmyatken̂e Xiteaw ya Micianita pen komo porokutho komo, exenawnonhîrî komo, poono tîswayem, Micianita pen komo kayaritomonînho komo ponontho, kanawa mici warai marha ooru ciixapu, kameru pîmtawnonho ha. Ero yipu tî nîmyatken̂e yîwya.

27 Ero komo tî nahsîyakn̂e Xiteaw. Ero takî tî n̂iir̂akn̂e kahsom me. Kahyakn̂e takî tî eepoci me. Ero takî tî n̂iir̂akn̂e Ohra pona. Ero poko takî tî xatken̂e okwe Ixaw Yana pen komo. Ciin̂o yairono wara tî xatken̂e ero poko kica. Xiteaw yîwîrîmacho me tî xakn̂e, iyanan komo yîwîrîmacho me marha kica. Ero wa tî xakn̂e kica.

28 Taa, ero yinhîrî twerî takî tî xatken̂e Micianita komo Ixaw Yana komo poko. N̂examro waparî me mokuhra ro makî takî tî xatken̂e. Mokuhra ro makî tî xatken̂e waapa komo Xiteaw exitaw ha ka, 40 cimn̂ipu ha tî.

29 On wara tî xakn̂e Xerubaaw, Xoas mumuru. Tîmîn yaka takî tî cekn̂e. Iitono ro me makî tî xakn̂e.

30 Yaake tî xatken̂e noro mumuru komo 70 ha tî okyo. Mer̂pora tî xatken̂e yipici komo.

31 Xakn̂e anarî wooxam hara Xerubaaw pici wara cehsom, Siken pono tî mîk xakn̂e. Noro takî tî n̂ewruyakn̂e, kîîrî ciki, Xerubaaw mumuru hara. Abimereke me tî noro ciki nosohcekn̂e.

32 Ero yinhîrî Xiteaw pen takî tî waihyakn̂e okwe Xoas mumutho. Poritomotho me takî tî xakn̂e. Okoputhîrî takî tî nahruyatken̂e yîmînhîrî pen yokoputho yawxaka rma. Noro pen yekenho po rma tî xakn̂e ewtarî, yîîm pen yahrutoponho, Ohra po ha, Abiese po ha.

33 Xiteaw pen waipuche rma takî tî Ixaw Yana komo kicicme xatken̂e xa hara. Ciin̂o yairono wara xatken̂e kica. Baaw poko xatken̂e hara kica. Baaw Berice tî n̂iir̂atken̂e ponaro cehtopo komo me xa kica.

34 Tporin komo Kaan takî tî nîhcamnoyatken̂e hara, town̂enhîrî komo rma tî nîhcamnoyatken̂e. Mehxarpa tî xatken̂e yiixatî pîn komo, mer̂pora ro mak ha. Kaan tko nukurunpekn̂e. Tukurunpen̂enhîrî komo ponarora rma tko tî xatken̂e okwe.

35 Xerubaaw pen yananînho komo yakronomara marha tî xatken̂e okwe. (Xiteaw rma mîk Xerubaaw.) Ixaw Yana komo yakronoman̂enho xa tî mîk xakn̂e. Takronomacho yepantopo komo ponarora ro makî tko tî xatken̂e okwe. Ero wa tî xatken̂e okwe Ixaw Yana komo.