Taa, ero yinhîrî takî tî on wara xakn̂e Abimereke Xerubaaw pen mumutho, Siken pona tî cekn̂e. Iito cexitaw takî tî n̂esencekn̂e tînocwan yîîm yanan komo yakro.

2 On wara tî kekn̂e yîwya so, Ai oyakno komo, on poko cma re mesencexe tantono komo yakro Siken pono komo yakro, Onoke xa cexpore nai kîkayaritomon komo me. 70 komo Xerubaaw mumutho kom ha? Cewn̂e mak katî cexpore nai akayaritomon komo me awya so? kacoko yîwya so. On wara rma tko yîhtînocoko ow wasî apun komo me rma, ayochîrî komo me marha, kekn̂e. Ero wa tî kekn̂e Abimereke tînocwan yîîm yanan komo ya.

3 Ero ke yîmtapotachonhîrî takî tî n̂ekatîmyatken̂e yînocwan yanan komo iitono komo ya, Siken pono komo ya ha. Ero ke takî tî Abimereke xatî me xatken̂e. Kakno komo rma mîkro ha, ketken̂e tî. Ero ke noro ciri xe tî xatken̂e tîkayaritomon komo me.

4 Ero yinhîrî takî tî Abimereke ya nîmyatken̂e puranta. 70 sikru nîmyatken̂e yîwya Baaw Berice mîn yawnonho ha. Ero takî tî nîmyakn̂e Abimereke kîrkomo ya hara, kir̂wan pîn komo ya, tweeno pîntho komo ya ha. Amohcoko tak oyakro, kekn̂e tî yîwya so. Ero ke cetken̂e noro yakro.

5 Tîîm pen yekenho pona takî tî cekn̂e Abimereke. Iito tak takno komo waihkekn̂e okwe 70 komo ahnoro ha re. Xerubaaw mumutho komo mîkyam waihkekn̂e okwe. Ero re toh po rma tî waihkano n̂iir̂akn̂e. Xotaw tko tî n̂eseyamyakn̂e. Ero ke waipîra tî xakn̂e noro makî reha. Xerubaaw mumuru komo mahtîkîtho tî mîk xakn̂e Xotaw.

6 Ero yinhîrî takî tî ahnoro Siken pono komo n̂esenmekyatken̂e, Bece Miro pono komo marha. Siken po tî nai toopu. Kawno tî mîn toopu, piirino. Kahpar̂u yepu mîtwo nai, porin mîtwo. Iina tî n̂esenmekyatken̂e Abimereke ciitome tîkayaritomon komo me.

7 Ero yinhîrî takî tî Xotaw n̂encekn̂e Abimereke ciitoponho kayaritomo me. Ero ke Xeresin Yîpîn takî tî nawnukyakn̂e. Ero meretîn̂i takî tî nîmtapowakn̂e Siken pono komo n̂entarî me. Kar̂pe ro makî tî kekn̂e. On wara tî kekn̂e, Ai, Siken pono komo amyamro, omtapotarî ka entacoko. Omtapotarî entacoko amtapotarî komo yentachome tak Kaan ya hara.

8 Anarî kaamo po tîkayaritomon komo ciiso cetken̂e weewe komo. Yihcirî me tî ka ketken̂e oripera ya. Amna kayaritomon me esko amoro, ketken̂e tî yîwya.

9 On wara tko tî n̂eyukyakn̂e oripera, Pîra ro mak. Katî ciitopo poko mak tan wasî. Kir̂wan̂he nasî on̂iritho katî. Ero ke rma tooto komo n̂ecir̂atu enîno rin̂e me, tîmsom pokono me marha. Ero yipu ciitopo ma re wahsîpînke powpow kachome mak owya weewe komo yepore? kekn̂e tî yîwya so.

10 Ero yinhîrî piiku yepu ya takî tî ketken̂e hara weewe komo, Amoro xa esko amna kayaritomon me, ketken̂e tî.

11 On wara tko tî n̂eyukyakn̂e piiku yepu, Pîra ro mak. Oyepetacho poko mak tan wasî. Kir̂wan mîn oyeperîrî tîkporem. Ero yipu yepetacho ma re wahsîpînke powpow kachome mak owya weewe komo yepore? kekn̂e tî yîwya so.

12 Ero yinhîrî uupa yatî ya ketken̂e hara weewe komo, Amoro xa esko amna kayaritomon me, ketken̂e tî.

13 On wara tko tî n̂eyukyakn̂e uupa yatî, Pîra ro mak. Wooku ciin̂e me mak tan wasî. Kaan yahworecho mîn on̂iritho, tooto komo yahworecho marha mîn ha. Ero yipu ciitopo ma re wahsîpînke powpow kachome mak weewe komo yepore? kekn̂e tî yîwya so.

14 Ero yinhîrî cekyekyem ya takî tî ketken̂e hara weewe komo, Amoro xa esko amna kayaritomon me ha, ketken̂e tî.

15 On wara tko tî n̂eyukyakn̂e cekyekyem, Yaaro xa ori xe awexitaw so akayaritomon komo me amohcoko omamaka, awarpanaka ha. Yaarora awexitaw so tko wehto tak n̂epatakape cekyekyem yai setru yepu komo yakn̂in̂e me, Ribanu pono komo yakn̂in̂e me ha, kekn̂e tî yîwya so.

16 Taa, ahce wa mehce amyamro Abimereke ciir̂ataw akayaritomon komo me? Yaarono me ma re mehce, kemîknon̂e pîn me ro mak? Kir̂wan̂he ma re mehce Xerubaaw pen poko, noro yanan pen komo poko marha? Kir̂wan̂he ma re noro mepance? Kir̂wan̂he awiice so, ero wa xa marha noro miice hara?

17 On wara xakn̂e apapa pen, n̂etar̂mekn̂e apînînke so. Awaparî komo tî nukurunkekn̂e Micianita komo awemetanmekîra tak ehtome so.

18 On wara takî tko maxe oroto apapa pen yananînho komo poko okwe, yiixatî pîn me tak maxe okwe. Noro pen mumutho pen komo marha mîwaiketken̂e 70 pen komo rma okwe. Toh po rma mîwaiketken̂e erore po rma. Abimereke tak miice akayaritomon komo me, apapa pen yantonînho mrerî ha. Siken pono komo kayaritomon me miice noro ayanan komo me exirî ke mak.

19 Ahce wa ma mehce Xerubaaw pen poko, iyananînhîrî komo poko marha? Kir̂wan̂he ma re mîîxatken̂e ero wa ciir̂ataw awya so, emîknono ciin̂e pîn me ha? Ero wa cehsomînhîrî me awexitaw so tahwore ehcoko Abimereke poko, noro marha n̂expe tahwore apoko so hara.

20 Ero wa cehsomînhîrî me exihra awexitaw so tko wehto tak n̂epatakape Abimereke yai awakn̂itome so. Siken pono komo amyamro, Bece Miro pono komo marha amyamro, awakn̂in̂e komo me n̂epatakape wehto Abimereke yai. Taa, ahyai so marha n̂epatakape wehto Siken pono komo yai hara, Bece Miro pono komo yai marha. Abimereke pen yakn̂in̂e me tak n̂epatakape ha, kekn̂e tî. Ero wa tî kekn̂e Xotaw, Xiteaw pen mumutho.

21 Ero yinhîrî takî tî n̂emahciyakn̂e Xotaw miya Bee pona. Iina takî tî n̂esekenmekn̂e cerahtîmrî ke. Takno pona tî n̂eraswakn̂e Abimereke pona.

22 Ero yinhîrî takî tî Ixaw Yana komo kayaritomon me xakn̂e Abimereke 3 cimn̂ipu mak.

23 Ero yinhîrî takî tî kicicitho yekatî n̂en̂epekn̂e Kaan yîropotaka so. Etîxatî pîn me ciino rin̂e mîk n̂en̂epekn̂e. Siken pono komo xera takî tî xakn̂e Abimereke. Abimereke xera marha tî xatken̂e Siken pono kom hara. Abimereke yar̂ma xe takî tî xatken̂e emku me mak.

24 Ero wa tak Kaan n̂iir̂akn̂e Xerubaaw pen mumutho komo waihkarî ke, 70-nhîrî pen komo rma. Ero yanme ero wa Kaan n̂iir̂akn̂e etîxatî pîn me. Noro yakno pen komo n̂epanîyakn̂e, n̂examro pen waihkarî ke Abimereke ya, Siken pono komo ya akronomarî ke marha takno komo waihkarî poko. Ero ke etîxatî pîn me tî n̂examro n̂iir̂akn̂e.

25 Ero ke on wara tî xatken̂e Siken pono komo, Abimereke waparî komo takî tî n̂en̂epetken̂e esama yakumyaw eseyamtome. Îîpî meretkoso tî n̂en̂epetken̂e. Iito cexitaw so iito xa re tîtosom komo nahsîyatken̂e, emyawnonhîrî komo naar̂atken̂e okwe. N̂examro yeseyamtopo tko tî n̂encekn̂e Abimereke.

26 Ero yinhîrî takî tî Kaaw cekn̂e Siken pona, Ebece mumuru ha. Tîyanan komo yakro rma tî iina cetken̂e. Noro yewetîn̂e me takî tî xatken̂e Siken pono komo.

27 Ero yinhîrî takî tî mararî pona cetken̂e Siken pono komo uupa yeperîrî potuso. Potuxapu tî n̂iiratken̂e wok me tahwotachome so. Ero yinhîrî n̂eseresmetken̂e tak ponaro cehtopo komo mîn yaw. Anarî ro poko xatken̂e kica, Kaan pîn poko, noro mîn yaw tî n̂eseresmetken̂e. Ceseresmetaw so iito, wok yeer̂ataw marha Abimereke tî n̂eremketken̂e.

28 On wara takî tî kekn̂e Kaaw, Ebece mumuru, Onok mîk ha Abimereke? Onoke xa kîwyam hara Siken pono kom ha? Ahce kacho Abimereke maywen me tat hara? Xerubaaw pen mumutho kyam mak mîk. Sebu kyam mak nasî noro maywen me. Amo pen yepamtho komo maywen me xa cexpore nasî, Siken yîîm pen yepamtho maywen me ha. Ahce kacho Abimereke maywen me tat hara kica?

29 Tantono komo kayaritomon me oyexitaw ketaw ha re Abimereke pen wowyasî kayaritomo mera tak ehtome. Yîwya wîîkes ha re, Asowtatun komo an̂ihko. Cetar̂macerî tak, wîîkes ha re, kekn̂e tî. Ero wa tî kekn̂e Kaaw.

30 Ero yinhîrî takî tî ero wa kacho n̂encekn̂e Sebu, ewto pono komo kayaritomon. Kaaw mtapotachonho tî n̂encekn̂e Ebece mumuru mtapotachonho. Ero ke takî tî nîrwonakn̂e ro mak.

31 Ero ke ekatîmn̂e komo takî tî n̂en̂epekn̂e Abimereke yaka. En̂epa me tî n̂en̂epekn̂e. On wara tî ketken̂e yîwya so, On wara men kacoko Abimereke ya, Oona mokye Kaaw, Ebece mumuru Siken pona. Tiyanan komo yakro rma mohce. Kicicme so nîmtapowaxe apoko tantono komo yakro.

32 Ero ke kosope tak apakacoko. Asowtatun komo yakro amohcoko mararî pona. Iina tak eseyamcoko.

33 Enmapuche tak kaamo yepataketaw rma ewto wece tak amohcoko ewto pono komo waparî me. Ero yimaw tak na Kaaw cee ewto poi takrono komo yakro awakro so etar̂maxi. Ero yimaw ahce wa na n̂examro pen ciitopo mîhtînoya ero wa cirko awanme ro mak, kacoko yîwya, kekn̂e tî. Ero wa kacho tî n̂ekatîmyakn̂e Sebu Abimereke ya.

34 Ero ke Abimereke takî tî cekn̂e kosope. Tîsowtatun komo yakro tî cetken̂e. Siken pahnoke cexitaw so n̂etakpayatken̂e 4 yatî me tak ha. Xehxa anarî komo, mehxa anarî komo, mehxa anarî komo, mehxa anarî kom hara. 4 yatî me tî n̂etakpayatken̂e. Ero wara tî n̂eseyamyatken̂e.

35 Enmapuche takî tî Kaaw cekn̂e ewto potaka. Ero yimaw rma Abimereke komo takî tî mokyatken̂e eseyamxapunhîrî komo.

36 N̂examro yeen̂ataw takî tî on wara kekn̂e Kaaw Sebu ya, Enko xe, tooto komo mokyaxe mehxa îîpî meretîn̂i okyo, kekn̂e tî. Apohana, kekn̂e tî Sebu. Îîpî meretîrî yekatî kyam mak na meen̂a tooto wara, kekn̂e tî.

37 Ero yinhîrî takî tî kekn̂e xa hara Kaaw. Tooto rma mîkyam mokyaxe mararî rakatari rma, kekn̂e. Mehxa mokyaxe anarî kom hara weewe n̂ixa, Meonenin n̂ixa ha, kekn̂e tî.

38 Ero yimaw tak on wara kekn̂e Sebu yîwya, Taa, ahto tak nai ha yukurumîkno wara amtapotachonhîrî? Onok ma re mîk Abimereke? Ahce kacho kîkayaritomon me nai noro ha, mîîkekn̂e hara re. Anwîrîyakathîrî komo rma mîkyam mokyaxe. Ero ke n̂examro yakro etar̂mata awto xe awexitaw, kekn̂e tî. Ero wa tî kekn̂e Sebu Kaaw ya.

39 Ero ke takî tî cekn̂e Kaaw Abimereke komo yakro etar̂maxi. Siken pono komo tî naar̂akn̂e. N̂etar̂metken̂e takî tî okwe.

40 Kaaw pen komo takî tî weken̂emekyatken̂e Abimereke komo. Mer̂pono pîn tî n̂epîrketken̂e tooto pen komo okwe. Ewto potaka roro cetken̂e paraxkano rin̂e komo. Ero wa tî n̂etar̂metken̂e okwe.

41 Ero yimaw Abimereke yeken xakn̂e Aruma po. Kaaw komo tko tî n̂en̂epekn̂e Sebu Siken poi. Noro yanan komo yakro rma tî n̂en̂epekn̂e.

42 Enmapuche takî tî Siken pono komo cetken̂e mararî pona. Mohtopo komo tko tî n̂ekatîmyatken̂e iitono komo Abimereke ya.

43 Ero ke tîsowtatun komo takî tî nan̂ikyakn̂e. Akpano tî n̂iir̂akn̂e xa hara. 3 yatî me takî tî akpano n̂iir̂akn̂e. Ero wara n̂eseyamyatken̂e xa hara tî. Ero yinhîrî takî tî Siken pono komo n̂epataketken̂e xa hara ewto pona. N̂examro yepatakache ar̂maxi so takî tî cetken̂e Abimereke komo.

44 Ewto metataka roro tî cetken̂e Abimereke komo kar̂pe. Iito takî tî n̂ececetken̂e. Mehxa takî tî mokyatken̂e anarî komo Abimereke yakrono komo xa hara, 2 yatî yaw. Mararî pono komo wece mokyatken̂e. Iitono pen komo tak waihketken̂e okwe.

45 Siken pono komo yakro n̂etar̂metken̂e Abimereke komo kokon̂intaxi ro. Pahkî tî n̂etar̂metîketken̂e. Ewto takî tî nahsîtîkekn̂e ahnoro. Ero pono pen komo tî waihketken̂e okwe. Mîîmo pen tî nakn̂iyatken̂e. Ero yinhîrî takî tî yîmîtî pahyakn̂e merpora ewtotho poko hakî.

46 Iito rma tko tî xatken̂e anarî komo, Siken pono komo. Mîîmo yaw tî xatken̂e kawno yaw. Ewto yakn̂itopo tî n̂encetken̂e. Ero ke takî tî n̂examro cetken̂e Berice mîn yaka, ponaro cehtopo komo mîn yaka ha. Twacayem tî mîn xakn̂e.

47-48 Ero yinhîrî takî tî iina esenmetopo komo n̂encekn̂e Abimereke. Ero ke Sawmon Yîpîn takî tî nawnukyakn̂e takrono komo yakro. Yawaka naar̂akn̂e weewe peremtho yîhkototopo. Nîhkocekn̂e takî tî, nanîmyakn̂e takî tî tmotaka. On wara tî kekn̂e tmaywen komo ya, Yohno men kacoko owara xa marha, kekn̂e tî yîwya so.

49 Ero ke noro maywen komo ahnoro weewe peremtho tî nîhkocetken̂e. Abimereke wenari takî tî cetken̂e. Twacayem mîtkoso tî n̂enmekyatken̂e weewe peremtho, kawno mîtkoso. Wehto takî tî n̂iriyatken̂e ero yawno komo yakn̂itome. Ero ke ahnoro takî tî waihyatken̂e ero yawnonho pen komo, kawno yawnonho pen kom ha. 1.000 tî mîkyam waihyatken̂e okwe. Kîrkomo pen tî waihyatken̂e, wooxam pen komo marha tî okwe.

50 Ero yinhîrî Tebes pona takî tî cekn̂e hara Abimereke komo. Ero marha tî wamcetken̂e ewto, nahsîyatken̂e marha.

51 Ero po tko tî xakn̂e kawno hara mîîmo. Yahcono ke twacayem tî mîn xakn̂e. Ero yaka takî tî n̂ewomyatken̂e ewto pono komo ahnoro, kîrkomo, wooxam komo marha. Metata takî tî n̂ewketken̂e. Mîîmo meretkoso tî kainatken̂e.

52-53 Ero yinhîrî takî tî Abimereke cekn̂e mîîmo mîtkoso rma. Mîîmo potaka xa cekn̂e wehto yiriso xa hara. Ero yimaw rma mehxa kai ro takî tî toopu nar̂mekn̂e wooxam. Porin mîn nar̂mekn̂e puruma yakihtopo tî. Abimereke tîpîrî po tî nar̂mekn̂e oko. Yîhtîpîthîrî tî nahkekn̂e okwe.

54 Ero ke yohno takî tî tukurun yaan̂e nan̂ikyakn̂e Abimereke. Akaciparan mohkakî, kekn̂e tî yîwya. Ero ke tak ow waihkakî, Wooxam n̂etapatho pen mîk xakn̂e, ka xera ro mak was amn̂e kîrkomo ya opoko, kekn̂e tî yîwya. Ero ke Abimereke tî paraxkekn̂e maywenî rma. Ero ke tî waihyakn̂e Abimereke pen.

55 Taa, Abimereke yokoputho takî tî n̂een̂atken̂e Ixaw Yana komo. Ero ke takî tî cetken̂e hara tîmîn komo yaka.

56 Ero wa tî Abimereke yîîm pen n̂epanîyakn̂e Kaan kicicme yumumuru exirî ke. Tîîm pen yîwîrîyakacho rma mîn xakn̂e takno pen komo waihkachonho yîwya, 70 pen komo waihkachonho ha.

57 Siken pono komo poko marha n̂esepanîyakn̂e Kaan. N̂examro pona xa marha n̂iir̂akn̂e kicicme ehtoponhîrî komo ahnoro. Ero wa tî n̂esepanîyakn̂e Xotaw mtapotachonho yaw roro rma, n̂examro yîwîrîmacho poko yîmtapotachonhîrî yaw roro ha. Ero wa tî xatken̂e.