Taa, ero yinhîrî takî tî Abimereke pen waipuche tak Tora xakn̂e Ixaw Yana komo kurunpen̂e me hara. Pua pen mumutho tî mîk xakn̂e, Toto pen parînho ha. Isaka yepamtho tî mîk xakn̂e, Sami pono ha. Eprain komo rowon pono mîn Sami, îh ken̂arî pono.

2 Ixaw Yana komo yenîn̂e me tî xakn̂e Tora 23 cimn̂ipu. Cesen̂ekaxmu komo yentan̂e me tî xakn̂e. Ero yinhîrî takî tî waihyakn̂e. Sami pona rma tî noro pen yokoputho nahruyatken̂e. Ero wa tî xakn̂e Tora pen.

3 Ero yinhîrî Xai takî tî xakn̂e Ixaw Yana komo yenîn̂e me hara. Xireace pono tî mîk xakn̂e. 22 cimn̂ipu tî xakn̂e cesen̂ekaxmu komo yentan̂e me.

4 Yaake xatken̂e yumumuru komo, 30 tî xatken̂e. 30 marha tî xakn̂e iyoh kom hara buhu yîmkaw totopo kom ha. 30 marha tî xakn̂e n̂examro yewton Xireace pono kom ha. Apoce Xai, tî mîn xakn̂e n̂examro yewtonî komo yosotî. Ero wara rma n̂etahcaxe iitono komo oroto.

5 Amn̂e tak Xai pen waihyakn̂e. Noro yokoputho tî nahruyatken̂e Kamon pona. Ero wa tî xakn̂e Xai pen.

6 Taa, ero yinhîrî on wara takî tî xatken̂e hara Ixaw Yana komo, kicicme tî xatken̂e xa hara kica. Baaw komo takî tî n̂iir̂atken̂e tîn̂ewetîrî komo me hara, Astaroce komo marha, ponaro Siriu komo yehtopo marha, ponaro Siton pono komo yehtopo marha, ponaro Moabita komo yehtopo marha, ponaro Amonita komo yehtopo marha, ponaro Piristew komo yehtopo marha. Noro yipu komo tî n̂ewehcatken̂e okwe. Kporin komo takî tî nahsîpînketken̂e Ixaw Yana komo. Noro takî tî ewetîra xatken̂e okwe.

7 Ero ke takî tî nîrwonakn̂e Kporin komo Ixaw Yana komo poko. Piristew komo mamawno me tî n̂iir̂akn̂e, Amon yepamtho komo mamawno me marha.

8 Ero cimn̂ipu po takî tî Ixaw Yana pen komo n̂emetanmetîketken̂e okwe. 18 cimn̂ipu tî emetanmekno n̂iir̂atken̂e. Xotaw yeco pono pen komo tî n̂emetanmekyatken̂e resce n̂ixan komo, Xireace pono kom ha. Amohew pen komo rowontho pono komo mîkyam n̂emetanmekyatken̂e.

9 Xotaw Yepu marha takî tî wacetken̂e Amon yepamtho komo Xuta yepamtho pen komo yemetanmeso hara. Benxamin yepamtho pen komo n̂emetanmekyatken̂e, Eprain yepamtho pen komo marha. N̂examro tî n̂emetanmekyatken̂e. Ero ke ahwora ro mak takî tî xatken̂e okwe Ixaw Yana pen komo.

10 Ero yinhîrî takî tî Kporin komo yakro nîmtapowatken̂e Ixaw Yana komo. Cerewre ro makî tî ketken̂e yîwya. On wara tî ketken̂e, Kicicme ro mak nas amna apoko kica. Ponaro amna yehtopo rma cma re Amoro. Wara rma awahsîpînkekn̂e mak amna okwe. Baaw komo mak tak amna n̂ewehcasî kica, ketken̂e tî.

11-12 On wara takî tî Kporin komo n̂eyukyakn̂e, On wara mîxatken̂e pahxa, awemetanmekyatken̂e so rma Exitu pono komo, Amohew komo, Amon yepamtho komo, Piristew komo, Siton pono komo, Amarekita komo, Maonita komo, noro yipu komo awemetanmekyatken̂e so. Ero wa awesemetanmekyataw so tak oyakro mîmtapowatken̂e cerewre awakronomacho komo poko ha. Ero wa amtapowataw so kowyatken̂e so rma awemetanmekîra tak ehtome so.

13 Owî tko mahsîpînketken̂e xa hara okwe. Anarî ro komo tak mewehcaxe hara kica. Ero yanme akurunpera so tak was oroto.

14 Yiixe awehtopo komo yakro takî tko amtapotatko, ponaro awehtopo komo yakro. N̂examro tak akurunpecowpe so awesemetanmekyataw so, kekn̂e tî. Ero wa tî kekn̂e Kporin komo yîwya so.

15 On wara tko tî Ixaw Yana komo n̂eyukyatken̂e, Yaaro, kicicme ro mak nas amna. Ero ke tak amna cirko awanme ro mak. Wara rma amna cma re mukurunpesî oroto amna yemetanmekîra tak ehtome so okwe, ketken̂e tî Kaan ya.

16 Ero yimaw takî tî ponaro cehtoponhîrî komo kr̂a tak nar̂metken̂e, ponaro anarî yana komo yehtopo ha. Kporin komo takî tî n̂ewehcatken̂e hara. Noro marha takî tî xakn̂e yîpînîn yawno me so tak hara. Yînmîra takî tî xakn̂e, okwe okwe kacho yîwya so. Ero wa tî xakn̂e Noro Ixaw Yana komo poko.

17 Ero yinhîrî takî tî tîsowtatun komo nan̂ikyakn̂e Amon yepamtho komo kayaritomon. Xireace pona tî cetken̂e. Iina takî tî n̂iir̂atken̂e cetarî komo. Ero ke Ixaw Yana sowtatun komo marha tî n̂esenmekyatken̂e hara. Mispa pona tî n̂iir̂atken̂e cetarî komo n̂examro reha.

18 Iito cexitaw so takî tî n̂esencetken̂e Xireace pono komo, antomano rin̂e kom ha. On wara tî ketken̂e, Onoke kyam xa aano n̂iir̂a Amon yepamtho komo waparî me kîwtotome so? N̂examro wece kaan̂e komo rma tak n̂expe amn̂e Xireace pono komo kayaritomon me, ketken̂e tî. Ero wa tî ketken̂e.