Taa, ero yimaw iito rma xakn̂e Xireace pono, Xehte noro yosotî. Karitî tî mîk xakn̂e sowtatu me tîtosom xa. Xireace tî xakn̂e yîîm yosotî. Yînocwanî reha tî xakn̂e kîîrî pohkan̂e ro me cehsom kica.

2 Xireace pici marha tî xakn̂e. Noro takî tî n̂ewruyakn̂e yaake ro Xireace mumuru komo. Ero yinhîrî takî tî n̂examro por̂mamyatken̂e. Tpor̂mamche so tak tî Xehte n̂en̂epetken̂e tîhyai so. Anarî xîkîtho mak amoro kica. Ero ke kr̂a etoko. Amna yemyawno raconho yahsîra ro mak masî amorotho, ketken̂e tî yîwya.

3 Ero ke takî tî n̂emahciyakn̂e Xehte. Takno komo yawhra takî tî xakn̂e okwe. Miya takî tî cekn̂e Tobe pono komo cheka. Iito exitaw takî tî n̂esenmekyatken̂e anarî komo yîhyaka. Noro pîntho komo makî tî mîkyam xatken̂e. Xehte maywen me takî tî xatken̂e.

4-6 Ero yinhîrî takî tî Amon yepamtho komo mokyatken̂e Ixaw Yana komo waparî me. Ero ke Xireace pono komo takî tî cetken̂e Xehte yaka poritomo kom ha. Tobe rowon poi arî xe tî xatken̂e tîhyaka so hara. On wara tî ketken̂e yîwya, Oyakno, amna yaka cma re mîmokyas hara. Amon yepamtho komo yakro etar̂maxi tîto xe nasî amna. N̂examro wece cma re amna maar̂asî, ketken̂e tî yîwya.

7 On wara tko tî n̂eyukyakn̂e Xehte, Okyo, ooxera re mîxatken̂e hara kica. Ow men̂epetken̂e apapa mîn yai okwe. Ahce kacho oroto tak mîmokyatu oyan̂ihso hara awesemetanmekyataw so mak tak ha? kekn̂e tî.

8 On wara tî Xireace pono komo poritomon komo n̂eyukyatken̂e, On wara awehtome amna moko awenso oroto, Aaxe cma re nas amna yaan̂e me Amon yepamtho komo yakro etar̂machome. Amna yenîn̂e me marha tak masî, Xireace pono komo yenîn̂e me ha, ketken̂e tî yîwya.

9 Ai ha, kekn̂e tî Xehte, kmokya rma ha na awan̂e komo me Amon yepamtho komo waparî me. Kporin komo rma tko na oyakronome, n̂examro pen na nar̂mape owya. Ero wa oyexitaw awenîn̂e komo me ma re wai yaaro xa ha re? kekn̂e tî yîwya so.

10 On wara tî Xireace pono komo n̂eyukyatken̂e poritomo kom ha, Kporin komo xa nas amna mtapotarî yentan̂e me. Noro xa nasî amna yemetanmekn̂e me amna mtapotarî yaw roro awirira exitaw amna, ketken̂e tî yîwya.

11 Ero ke takî tî Xehte cekn̂e Xireace pono komo yakro. Ero yinhîrî noro takî tî n̂iir̂atken̂e Xireace pono komo yenîn̂ me, sowtatu yantoman̂e me marha. Ero yinhîrî Xehte takî tî nîmtapowakn̂e Kporin komo yakro Mispa po. N̂esekatîmtîkekn̂e tî yîwya.

12 Ero yinhîrî takî tî tîmtapotarî yekatîmn̂e komo n̂en̂epekn̂e Xehte Amon yepamtho komo kayaritomon yaka. On wara kacho tî n̂ekatîmyatken̂e yîwya, Ai oyakno, ahce kacho amna xera mai ha? Ahce kacho amna waparî me mîmokye ha? kacho n̂ekatîmyatken̂e yîwya.

13 On wara tî Xehte n̂en̂epetho komo n̂eyukyakn̂e Amon yepamtho kayaritomon, Exitu poi mokyatken̂e Ixaw Yana komo pahxa. Ero yimaw orowontho nahsîyatken̂e kica. Xiyan nahsîyatken̂e kica Ahnon yecihtaka roro. Miyan marha nahsîyatken̂e Xaboke yecihtaka roro hara. Takwekem xa nahsîyatken̂e Xotaw kwaka roro marha. Ero ke ero tak tîmcoko hara owya, anahsîthîrî komo, etar̂mara kehtome so tak, kekn̂e tî.

14-15 Ero yentache Xehte ya tîmtapotarî yekatîmn̂e komo tî n̂en̂epekn̂e xa hara Amon yepamtho komo kayaritomon yaka. On wara kacho tî n̂ekatîmyatken̂e yîwya hara, On wara kesî Xehte, Amon rowontho yahsîra ro mak xatken̂e Ixaw Yana komo, Moabe rowontho yahsîra marha.

16 On wara tî xatken̂e Ixaw Yana komo Exitu poi mohxapu rma, axawa imo pore tî cetken̂e Cucurem Yewku kwaka. En̂exa takî tî cetken̂e Kates pona.

17 Ero poi takî tî tîmtapotarî yekatîmn̂e komo tî n̂en̂epetken̂e Etomita komo kayaritomon yaka. On wara tî ketken̂e yîwya, Amna cma re cesî arowon petî pore, ketken̂e tî. Yîmtapotarî komo tko tî ewetîra xakn̂e kica Etomita komo kayaritomon ha. Ero yinhîrî Moabita komo kayaritomon ya takî tî n̂ekatîmyatken̂e xa hara. Ero wa xa marha tî ketken̂e yîwya hara. Noro meero rma tî nanwekyakn̂e yîmtapotarî komo. Ero ke Kates po makî tî xatken̂e Ixaw Yana komo.

18 Ero yinhîrî axawa imo pore thakwa tî cetken̂e. Eton rowon mamrikyatken̂e. Moabe rowon marha mamrikyatken̂e. Yîrowon komo wokpan yaw roro makî tî cetken̂e resce n̂ixan yaw roro ha. Ahnon yeco po makî tî n̂iir̂atken̂e cetarî komo. Moabe rowon pona mokuhra tî xatken̂e. Ahnonî rma xakn̂e n̂examro rowon wokpan me.

19 Ero yinhîrî tîmtapotarî komo yekatîmn̂e komo tî n̂en̂epetken̂e xa hara Ixaw Yana komo Sion yaka, Amohew komo kayaritomon yaka. Esbon pono mîk noro yaka tî n̂en̂epetken̂e. On wara tî ketken̂e yîwya, Arowon pore cma re amna cesî amna rowonî ro pona, ketken̂e.

20 Noro tko tî Ixaw Yana komo nanwekyakn̂e. Kir̂wan komo amyamro. Ero ke, Taa, etocoko rma, kahra tî xakn̂e noro Ixaw Yana komo ya. Tîsowtatun komo takî tî n̂enmekyakn̂e. Xasa pona tî cetarî komo n̂iir̂atken̂e. Iito tî Ixaw Yana komo yakro n̂etar̂metken̂e.

21 Ero yimaw takî tî Sion pen tî nar̂mapekn̂e Kporin komo Ixaw Yana komo ya. Ponaro Ixaw Yana komo yehtopo Mîk nar̂mapekn̂e yîwya so. Noro pen maywenînho komo marha nar̂mapekn̂e yîwya so. Ero ke nar̂metken̂e takî tî. Ero ke Ixaw Yana komo takî tî nahsîyatken̂e iitono, Amohew pen komo rowontho.

22 Ahnoro tî nahsîyatken̂e yîrowonthîrî komo. Ahnon pona roro tî nahsîyatken̂e, Xaboke pona roro marha. Axawa imo pona roro marha tî nahsîyatken̂e, Xotaw kwaka roro marha.

23 Kporin komo xa nar̂mapekn̂e Amohew pen komo Ixaw Yana komo ya, tîyanan komo ya ha. Ero ke ahce kacho yîrowonthîrî komo yahsî xe mai hara amoro?

24 Nai hara re ponaro awehtopo komo Kemos. Awya so yînmîthîrî ahsîra katî matu amyamro? Mahsîyaxe rma wa ha. Ero wa xa marha amna nahsîyasî amna Porin Kaan nîmîtho amna ya.

25 Kir̂wan xa ma re amoro Barake pen yopo? Siporo pen mumutho mîk xakn̂e, Moabita komo kayaritomon ha. Noro reha tî Ixaw Yana komo yeihra xakn̂e, etar̂mara marha tî xakn̂e akro so.

26 Pahkî ro mak xatken̂e Ixaw Yana komo Esbon po 300 cimn̂ipu ha tî. Aroe po marha tî xatken̂e. Yaake naxe ewto komo iito Ahnon yecihtawno ha. Ahce kacho pahxa rma ahsîra mîxatken̂e?

27 Kicicme exihnî ro mak ow apoko. Opoko xa matko kicicme mas amoro reha. Kicicme nas amna waparî me amohtopo. Kporin komo xa nasî en̂ekano rin̂e ro me. Noro xa n̂enpope kicicitho, amna katî Ixaw Yana komo rma, amyamro xa katî Amon yepamtho komo. Ero wara kehtopo komo n̂enpope Noro mak, kacho tî n̂ekatîmyakn̂e yîwya.

28 Wara rma Xehte mtapotachonho ponarora ro makî tî xakn̂e Amon yepamtho komo kayaritomon okwe.

29 Ero yinhîrî takî tî Kporin komo Yekatî mokyakn̂e Xehte pona. Ero ke Xireace tî wacekn̂e, Manases yepamtho komo rowon wacetîkekn̂e. Mispa pore tî cekn̂e Xireace pono pore. Ero poi takî tî cekn̂e Amon yepamtho komo yakro etar̂maxi.

30-31 Ero yimaw takî tî Xehte nîmtapowakn̂e Kporin Komo yakro, On wara tî kekn̂e yîwya, Apa kah yawno, Amon yepamtho komo cma re mar̂mapes owya. Ero wa ar̂mapetaw on wara wasî, omîn yaka ketîrames hara amn̂e n̂examro pen yar̂man̂enho. Ero yimaw ahce na n̂epatake omîn yai iina oyepataketaw rma ero tak wîmyas awya, Apa. Ero rma wakn̂iyasî awya tîmsom me. Yaaro xa wîîkesî, cemaro pîn me ro mak, kekn̂e tî.

32 Ero yinhîrî takî tî Xehte cekn̂e Amon yepamtho komo yakro etar̂maxi. N̂examro pen tî nar̂mapekn̂e Kporin komo yîwya.

33 Yaake ewto pononho pen komo tî nar̂mekn̂e, 20 ewto pononho pen komo tî nar̂mekn̂e. Aroe pona rorono pen komo nar̂mekn̂e, Min̂ice pona rorono pen komo marha, Abew Keramin pona rorono pen komo marha. Iitono pen komo tî nar̂mekn̂e Xehte. Ero wa takî Amon yepamtho pen komo n̂iir̂atken̂e Ixaw Yana komo, tmamawno komo me tî n̂iir̂atken̂e. Ero wa tî n̂iir̂atken̂e.

34 Ero yinhîrî takî tî cekn̂e hara Xehte tîmîn yaka Mispa pona. Iina epataketaw tak emsîrî rma takî tî mokyakn̂e tîîm yenso. Maraka ke cemyarke tî xakn̂e. Noro makî tî xakn̂e Xehte xîkrî. Anarî exihra tî xakn̂e yumumuru, emsîrî kom ha.

35 Noro yeen̂ataw Xehte ya tpononthîrî takî tî nahxaikekn̂e. Okwe okopuci, ow mahwokatîka okwe, ow yemetanmekn̂e komo yakrono amoro okwe. Kporin komo yakro kîmtapotai yaaro xa, esemîknopîn me ro mak okwe, kekn̂e tî cemsîrî ya.

36 On wara tko tî n̂eyukyakn̂e emsîrî, Apa, Kporin komo yakro xa mîmtapotai ham. Ero ke ero wara rma ow cirko amtapotachonhîrî yaw roro rma. Awakronomai rma Kporin komo. Aaxatî pînînhîrî pen komo nar̂mapoi awya Amon yepamtho pen komo.

37 On wara makî tko wîîkes awya, owto xe cma re ka wasî îîpî pona etariso. Asakî nuun̂i oyexi xe wasî. Oyetar̂irî me kîwraces oyakrono komo yakro rma. Okwe okwe, wîîkesî, in̂ontanî ro mak ow okwe, wîîkesî, kekn̂e tî.

38 Taa, etok ha, kekn̂e tî yîwya. Ero ke emsîrî takî tî cekn̂e anarî komo yakro emasî komo yakro. Îh pore tî n̂etar̂atken̂e tîwratarî me so. In̂ontara ro mak noro yexirî poko tî nîwracetken̂e.

39 Ero yinhîrî 2 nuun̂i yenatîche takî tîîm yaka tî mokyakn̂e hara. Noro pen takî tî n̂iir̂akn̂e yîîm tîmtapotachonhîrî yaw roro rma. Kîîrî pokono pînî ro makî tî mîk xakn̂e emsîrî.

40 Ero ke noro ponaro rma naxe Ixaw Yana komo oroto. Yicimn̂ipuntaxera cexe emasî komo yîwrataxi Xehte pen yemsîtho pînîn yaw, Xireace pononho yemsîtho pen pînîn yaw. 4 kaamo naxe ero poko yicimn̂ipuntaxera. Ero wa naxe.