Taa, on wara tî ketken̂e Ixaw Yana komo pahxa rma ka Mispa po cexitaw so, Yaaro men tan tîtkexe esemîknopîn me ro mak, kemsîrî komo men tîmîhra ro mak cehcerî Benxamin yepamtho komo ya yipici komo me, ketken̂e tî.

2 Ero ke Benxamin yepamtho pen komo yar̂man̂enho komo takî tî cetken̂e Kaan mîn yaka xa hara. Iina takî tî n̂eremetken̂e Kaan yepataka. Nîwracetken̂e xa hara cerewre ro makî. Kokon̂i cehso ro tî nîwracetken̂e.

3 On wara tî ketken̂e, Ai Apa, ponaro Ixaw Yana komo yehtopo xa Amoro. Ahce yanme on wara nai amna oroto Ixaw Yana kom ha? Anarî komo pen exihra tak naxe okwe noro re yepamtho komo Ixaw Yana poyinonho pen kom ha, ketken̂e tî tîwratarî me so.

4 Enmapuche tak Kporin komo ya tîmsom yakn̂itopo takî tî nakîhcetken̂e. Pahxaxaro rma takî tî nakîhcetken̂e. Ero pona takî tî nakn̂iyatken̂e Kporin komo ya tîmsom, takn̂itîkaxmu, Aaxe xa wasî, kacho marha tî.

5 Ero yinhîrî on wara takî tî ketken̂e Ixaw Yana komo, Ahtono komo xa mokuhra n̂ehce Kporin komo yaka, kîtribun poyino kom ha? ketken̂e tî. On wara tî ketken̂e n̂examro pahxa Mispa po cexitaw so, Yaaro xa tîtkacerî esemîknopîn me ro mak, Oona mokuhra exitaw so kîrkomo Ixaw Yana kom ha, Kporin komo yaka mokuhra exitaw so tîtwaikacerî men okwe, ketken̂e tî.

6 Taa, Benxamin yepamtho komo pînîn yaw xa takî tî xatken̂e Ixaw Yana komo. On wara tî ketken̂e Benxamin yepamtho pen komo poko, Oroto tak exihra nas anarî komo pen, noro re yepamtho pen komo, Ixaw Yana komo poyinonho pen ha, ketken̂e tî.

7 Ahce wa etîmtoxapunhîrî komo cipihcet ha okwe? Kemsîrî komo men tîmîhra ro mak cehcerî yîwya so, tîtketken̂e. Yaaro xa tîtketken̂e Kporin komo n̂entarî me rma okwe, ketken̂e tî.

8 Ero ke on wara tî ketken̂e hara, Ahtono komo xa mokuhra n̂ehce Ixaw komo tribu poyino? Mispa pona mokuhra n̂ehce Kporin komo yaka ahtono kom ha? ketken̂e tî. Ero yimaw tî on wara nîhtînoyatken̂e, Xabes Xireace pono komo mokuhra n̂ehce ham okwe kesenmekyataw so, ketken̂e tî.

9 Ero ke iitono komo tî nukuknometken̂e. Exihra ro mak tî xatken̂e Xabes Xireace pono komo iito.

10 Ero ke on wara tî xatken̂e, 12.000 sowtatu komo tî n̂en̂epetken̂e Xabes Xireace pona. On wara tî ketken̂e yîwya so en̂eperî me so, Xabes Xireace pono komo waihkatatko ahnoro. Wooxam pen komo meero, rikomo pen komo meero marha.

11 On wara xa ehcoko, Kîrkomo pen waihkatîkacoko, wooxam pen komo marha kîîrî pokononho komo mak ha tko, ketken̂e tî yîwya so.

12 Ero ke sowtatu komo takî tî cetken̂e Xabes Xireace pono komo waihkaxi. Iitono komo yemsîtho tko tî n̂een̂atken̂e kîîrî pokono pînî ro komo mak. 400 tî noro yipu komo n̂een̂atken̂e. Ero ke n̂examro takî tî naar̂atken̂e Ixaw Yana komo yaka Siro pona, Kanan rowon pona ha.

13 Ero yinhîrî takî tî tîmtapotarî komo yekatîmn̂e komo n̂en̂epetken̂e Benxamin yepamtho komo yaka, Himon Topun pono komo yaka. N̂eexi tak ketar̂macho komo. Amohcoko tak, kan̂e komo tî mîkyam n̂en̂epetken̂e yîhyaka so.

14 Ero ke mokyatken̂e takî tî Benxamin yepamtho komo. Yîwya so takî tî nîmyatken̂e wooxam komo, Xabes Xireace pononho pen yemsîtho komo, yîmtoxapu kom ha. Ecenarîra rma tko tî xatken̂e okwe.

15 Ero ke Benxamin yepamtho komo pînîn yaw rma tî xatken̂e Ixaw Yana komo. Asak makî n̂he tî anarî tribu n̂iir̂akn̂e Kporin komo, Ixaw Yana komo okwe. Exihra n̂he tak xakn̂e anarînhîrî tribu ha, Ixaw Yana tribun poyinonho okwe. Ero ke yîpînîn yaw so xatken̂e.

16 On wara takî tî ketken̂e poritomo komo. Twaihtîkaxi tak naxe okwe ahnoro Benxamin yepamtho wosîn pen kom ha. Ahce wa thakwa re yipihnî komo cipihcet hara? ketken̂e tî.

17 Naxe rma Benxamin yepamtho kom ha re waipîn kom ha ka. Ahce wa thakwa re n̂epamyat hara. Epamnî me ro mak exitaw so waihketîkexe tak okwe anarînhîrî Ixaw Yana komo tribun.

18 Kemsîrî komo thakwa tîmîhra taxe yîwya so yipici me so. On wara tîtketken̂e, Yaaro xa tan wîîkesî esemîknopîn me ro mak, Kaan n̂emetanmekrî me kr̂a n̂expe Benxamin yepamtho komo ya cemsîrî tîmn̂enho, yipici me so tîmn̂enho, tîtketken̂e thakwa.

19 On wara xa tko nasî yipihtotopo komo, yicimn̂ipuntaxera n̂eseresmexe Siro pono komo Kporin komo poko tahwotachome so. Betew mîtwo n̂esenmekyaxe nohce n̂ixa. Esama nai Betew poi kîwtotopo Siken pona. Ero yakumyaw n̂eseresmexe resce n̂ixa. Rebona pahnoke nasî esenmetopo komo suu n̂ixa. Iito xa n̂eseresmexe on yimaw rma, ketken̂e tî.

20 Ero ke on wara tî ketken̂e Benxamin yepamtho komo ya kîrkomo ya, Iina xa etocoko. Eseyamtatko uupa yatî cheka.

21 Ero chei tak encoko manîmrî komo. Amn̂e tak mokyaxe iitono komo emasî komo manîmso. Ero yimaw tak etocoko kar̂pe uupa yatî chei. Siro pono komo yemsîrî komo tak ahsîcoko apici komo me, cewn̂e so mak ahsîcoko ha. Ero yinhîrî tak etocoko Benxamin yepamtho komo rowon pona hara.

22 Amn̂e na mokyatu yîîm komo, epeka komo. Ahce kacho ero wa mîîketken̂e kica Benxamin yepamtho komo ya, kaxi na mokyat ha. Ero wa ketaw amna ya on wara kes amna yîwya so, N̂examro pînîn yaw cma re maxe amna yanme. Yipici komo yîmtora xakn̂e amna okwe cetar̂metaw. Kicicme maxe kica amtapotachonhîrî komo yaw rorohra, kacho mera rma tko maxe. Awemsîrî komo tîmîhra rma tko mîxatken̂e yîwya so. Tanme ro so kyam mak nahsîce, kesî tak amna yîwya so, ketken̂e tî.

23 Ero ke ero yaw roro rma tî xatken̂e Benxamin yepamtho komo. Emasî komo manataw rma tî cetken̂e ahsîso. Tînahsîthîrî komo takî tî naar̂atken̂e cipici me so. Ero yinhîrî takî tî cetken̂e cekenhîrî komo pona hara. Ewtotho komo n̂iir̂atken̂e xa hara. Iina takî tî n̂esekenmetken̂e xa hara.

24 Ero yimaw marha tî Ixaw Yana komo cetken̂e hara tîyanan komo cheka hara, ceken komo pona.

25 Ero yimaw Ixaw Yana komo kayaritomon exihra ro makî tî xakn̂e. Tanme ro so makî tî nîhtînoyatken̂e ahce wa na cehtopo komo. Ero wa tî xatken̂e.