Ero yinhîrî takî tî Ixaw Yana komo cetken̂e Mispa pona. Kporin komo yaka tî n̂esenmekyatken̂e iina. Ahnoro tî cetken̂e Tan pona rorono komo, Behseba pona rorono komo marha. Xireace pono komo meero tî cetken̂e. Cetîketken̂e ro mak kîrkomo. Iito re mak nîhtînoyatken̂e Mispa pona tîtotopo komo.

2 400.000 mîkyam cetken̂e sowtatu me cehsom komo, kacipara imo ke cemyarkem kom ha. Iina re tî n̂esenmekyatken̂e Kaan yanan komo re mak. Antomano rin̂e komo tî n̂esenmekyatken̂e, sowtatu komo marha. Ixaw Yana tribun komo n̂esenmekyatken̂e ahnoro.

3 Ero yimaw tak Benxamin yepamtho komo takî tî n̂encetken̂e Ixaw Yana komo yekaci. Mispa pona toce Ixaw Yana komo kopi, kacho tî n̂encetken̂e. On wara tî ketken̂e Ixaw Yana komo. Ahce wa wooxam pen waihyakn̂e okwe? ketken̂e tî.

4 Ero ke on wara tî kekn̂e Repita, waihkaxa pen yin̂onho, Xibea pona kmokye, Benxamin yepamtho yewton pona. Opici wara cehsom yakro rma kmokyakn̂e pawana me mak. Iina mak amna n̂etakriyakn̂e.

5 Kosope tak kîrkomo mohce owece. Mîîmo mamcetken̂e. Owaika xe xatken̂e okwe. Opici wara cehsom xa matko nukukmetken̂e kica. Ero yanme waihyakn̂e thakwa okwe noro pen.

6 Ero ke tak opici wara cehsom pen yokoputho wakpocakn̂e. Yîraconhîrî komo tak warpekn̂e Ixaw Yana komo chere ro. Ero yipu wenpekn̂e yîwya so kicicme ro mak opici wara cehsom pen citoponho yanme. Kîhyapamnoretopo mîn ero wa ciitopo okwe, okwe ro mak, kacho ha. Kicicme ro mak xatken̂e Xibea pono komo, Ixaw Yana komo rma okwe.

7 Ixaw Yana komo xa amyamro. Amtapotarî komo yenta xe wasî. Ahce wa tatu n̂examro poko, waihkan̂enhîrî komo poko? On wara cirpore n̂examro wîhtînoyasî, kacoko ha, kekn̂e tî. Ero wa tî kekn̂e Repita.

8-9 Ero yentarî ke nawomyatken̂e takî tî Ixaw Yana komo. Iito re tî nawomyatken̂e cewn̂e cehsom wara rma. On wara tî ketken̂e, Kîmîn yaka tohra ro makî ka cehcerî, pîra ro mak ha ka. On wara xa cehcerî, Xibea pono komo waparî me kaikatko. Men̂ekacho ka tar̂macerî men̂ekachome tak n̂examro waparî me tîtosom komo.

10 Cetkuknomacerî kîwyamu rma ka. 100 me ketkuknometaw so 10-înhîrî tak tîtmen̂ekacerî ero wicakno poyino, Ixaw Yana komo poyino ha. 1.000 me ketkuknometaw so 100 tîtmen̂ekacerî ero wicakno poyino. 10.000 me ketkuknometaw so 1.000 tîtkuknomacerî ero wicakno poyino. Ero wa men̂ekaxapu komo tak cen̂epecerî sowtatu komo nahrî wece. Anarî komo reha sowtatu komo tocowpe Xibea pona, Benxamin yepamtho yewton komo pona n̂examro panareso. Kicicme ro mak xatken̂e kica. Ixaw Yana komo mîkyam. Ero ke ero wa exihra ro mak cexpore nasî, ketken̂e tî. Ero wara so tî n̂esehtînoyatken̂e Ixaw Yana komo.

11 Ero ke Ixaw Yana komo takî tî cetken̂e Xibea pona. Etîme re rma tî nîhtînoyatken̂e cewn̂e cehsom wara rma.

12 Iito cexitaw so tîmtapotarî yekatîmn̂e komo takî tî n̂en̂epetken̂e Ixaw Yana tribun yantoman̂e komo Benxamin yepamtho komo chere ro totohme so. On wara kaxi cetken̂e, Ai, oyakno komo, Ahce wa mîhtînoyatu kicicme ro mak apoyino komo yehtoponho?

13 Kicicme ro mak xatken̂e kica. Ero ke xiya ehcoko kicicme ehxapu komo Xibea pono kom ha. N̂examro penî kr̂a tak amna waihkesî kicicme kehtopo exihra tak ehtome kîchew so, Ixaw Yana komo chew ha, ketken̂e tî Benxamin yepamtho komo ya. Yîmtapotarî komo tko tî ewetîra ro mak xatken̂e Benxamin yepamtho komo okwe, tpoyino komo mtapotarî tî ewetîra xatken̂e okwe.

14 Cewton komo poi so xa matko tî mokyatken̂e. Xibea pona tak n̂esenmekyatken̂e Ixaw Yana komo yakro etar̂machome so.

15 Yohno rma tî mokyatken̂e 26.000 sowtatu komo kacipara imo ke cemyarkem kom ha. 700 marha tî xatken̂e sowtatu komo Xibea pono komo rma, karitî komo xa.

16 On wara marha tî xatken̂e anarî komo Benxamin yepamtho komo poyino, 700 tî xatken̂e yaana komo xa toopu yar̂macho poko. Poowa me so ar̂man̂e re tî mîkyam xatken̂e. Kîhpoci wece toopuci yar̂metaw cewn̂an wece rma pohcin̂e pînî me ro makî tî xatken̂e. Ero wa tî xatken̂e Benxamin yepamtho sowtatun kom ha.

17 On wicakî tî xatken̂e Ixaw Yana komo Benxamin yepamtho pîn kom ha, 400.000 tî mîkyam xatken̂e sowtatu komo, kacipara imo ke cemyarkem kom ha, ketar̂macho poko ehcamhokaxapu kom ha.

18 Ero yinhîrî Betew pona takî tî cetken̂e Ixaw Yana komo Kaanî mtapotarî yentaxi. Onoke xa poturme nîîce ha Benxamin tribun komo waparî me? ketken̂e tî yîwya. Xuta yepamtho komo xa tocowpe poturme, kekn̂e tî Noro yîwya so.

19 Ero yinhîrî enmapuche takî tî Ixaw Yana komo takî tî cetken̂e Xibea mîtkoso. Iina takî tî n̂iir̂atken̂e cetarî komo.

20 Ero yinhîrî Benxamin yepamtho komo yakro etar̂maxi takî tî cetken̂e Ixaw Yana komo. N̂epanacetken̂e takî tî ewto mîtkoso rma, Xibea mîtkoso.

21 Ero yinhîrî Benxamin yepamtho komo takî tî n̂epataketken̂e ewto poi Ixaw Yana komo wece. Iyopo so rma tko tî xatken̂e Benxamin yepamtho komo. 22.000 tî waihketken̂e Ixaw Yana pen komo ero kaamo po rma.

22 Ero yinhîrî takî tî on wara ketken̂e Ixaw Yana komo, ahwokara cehcerî, ketken̂e rma tko. Ero ke enmapuche takî n̂epanacetken̂e xa hara Benxamin yepamtho komo yakro cetar̂machome so xa hara. Yihcirî me ka n̂epanacetken̂e iina xa marha tî n̂epanacetken̂e.

23 Ero yimaw marha tî Kaan mîn yaka cetken̂e xa hara Ixaw Yana komo. Iito takî tî nîwracetken̂e Kporin komo n̂entarî me rma. Kokon̂i cehso ro tî nîwracetken̂e. On wara tî ketken̂e yîwya, Ai Apa, ahce wa xa amna nai? Amna katî nîîce xa hara tpoyino komo yakro etar̂maxi xa hara, Benxamin yepamtho komo yakro etar̂maxi ha? ketken̂e tî yîwya. Nhnk, etocoko rma etar̂max ha, kekn̂e tî Kporin komo yîwya so.

24-25 Ero ke enmapuche xa hara tî cetken̂e Ixaw Yana komo Benxamin yepamtho komo yakro etar̂maxi. Ero ke Xibea poi tî n̂epataketken̂e xa hara tî Benxamin yepamtho komo. Iyopo so xa hara tko tî xatken̂e okwe. Yaake xa hara tî waihketken̂e Ixaw Yana pen komo, 18.000 tî okwe. Kacipara imo ke cemyarkemînhîrî pen komo rma re mîkyam pen waihketken̂e okwe.

26 Ero yinhîrî Kaan mîn yaka xa hara tî cetken̂e Ixaw Yana komo ahnoro xa tak ha. Iina tî n̂eremetken̂e, nîwracetken̂e Kporin komo n̂entarî me. Eseresmara marha tî xatken̂e kokon̂i cehso ro. Kporin komo ya tîmsom marha tî nakn̂iyatken̂e, takn̂itîkaxmu komo, Aaxe xa wasî, kacho komo marha tî nakn̂iyatken̂e.

27-28 Ero yimaw iito tî xakn̂e Kaan yamatan, yîmtapotacho yen ha. Iito marha tî xakn̂e Pin̂eias, Ereasa pen mumutho, Araw pen parînho ha. Kaan yaka cewomsom tî mîk xakn̂e Pin̂eias. On wara tî ketken̂e iito Kporin komo ya, Amna nîîce xa hara takno komo yakro etar̂maxi, tohra kat amna nai? ketken̂e tî. On wara tî Kporin komo n̂eyukyakn̂e, Etocoko ha. Pahxaxa tak n̂examro pen war̂mapes awya so, kekn̂e tî.

29-30 Ero ke en̂epa me takî tî sowtatu komo n̂en̂epetken̂e Ixaw Yana komo. Xibea mkai ceseyamsom me tî n̂examro n̂en̂epetken̂e. Ero yinhîrî asakî ro enmapuche tak Xibea wece takî tî cetken̂e xa hara pahxa cetken̂e ero wara xa marha.

31 Ero yinhîrî takî tî ewto poi xa hara tî n̂epataketken̂e Benxamin yepamtho komo Ixaw Yana komo wece. Ero ke ewto po exihra takî tî xatken̂e. Ixaw Yana komo takî tî waihketken̂e ha re pahxa waihketken̂e ero wa xa marha. 30 sowtatu pen tî waihyatken̂e Ixaw Yana pen komo okwe. Mararî po so tî waihyatken̂e, esama yaw so marha tî. Asakî tî xakn̂e esama Xibea yesamarî, Betew yesamari marha.

32 On wara tî ketken̂e Benxamin yepamtho komo, Waihkano cicir̂atu haram, kokon̂oro cicir̂atken̂e ero wara rma, ketken̂e tî. On wara tko tî ketken̂e Ixaw Yana komo, Cemahcicerî n̂examro mohtome so tak ewto poi esama yaka ha, ketken̂e tî.

33 Ero ke n̂emahciyatken̂e tî Ixaw Yana komo. Baaw Tama pona tî cetken̂e. Iito takî tî n̂epanacetken̂e. Ero yimaw takî tî eseyamxapunhîrî komo takî tî n̂epataketken̂e Xibea mkai eseyamxapunhîrî komo.

34 Ero yimaw marha takî tî 10.000 Ixaw Yana komo takî tî cetken̂e Xibea pono komo yar̂maxi xa tak. Karitî komo xa tî mîkyam xatken̂e. Kar̂pe so tî n̂etar̂metken̂e oko. Kar̂metu so tak ha men, kahra tko tî xatken̂e Benxamin yepamtho komo.

35 Ero yimaw tak Benxamin yepamtho pen komo tî nar̂mapekn̂e Kporin komo Ixaw Yana komo ya. 25.100 waihketken̂e okwe Benxamin yepamtho pen komo ero kaamo po rma. Kacipara imo ke cemyarkem komo rma re n̂examro pen waihketken̂e okwe.

36 Ero yimaw takî tî tar̂macho komo takî tî nîhtînoyatken̂e Benxamin yepamtho komo. Yihcirme tî ka n̂emahciyatken̂e Ixaw Yana komo eseyamxapu komo ponaro cexirî ke so, Xibea mkai eseyamxapu komo ponaro ha.

37 Ero yinhîrî takî tî n̂epataketken̂e eseyamxapunhîrî komo. Kar̂pe tî cetken̂e Xibea pona. Ewto po cexitaw so n̂etakpayatken̂e iitono komo waihkachome. Waihkano n̂iitîketken̂e iitononhîrî pen komo okwe.

38-39 Pahxa rma ka on wara tî ketken̂e Ixaw Yana komo ceseyamsom komo ya, Mîîmo tak akn̂icoko amn̂e. Ero ke yîsîn tak amna n̂een̂asî. Ero yimaw tak amna n̂etaknamesî Benxamin yepamtho komo yar̂machome tak, ketken̂e tî. Taa, yihcirî me ka Ixaw Yana pen komo waihketken̂e xa hara Benxamin yepamtho komo. 30 sowtatu pen tî ka waihketken̂e. Ero ke on wara tî ka ketken̂e, N̂examro pen n̂emahciyat hara mî kokon̂oro n̂emahciyatken̂e ero wa xa marha, ketken̂e cma ha tî re ka.

40 Ero yinhîrî yîsîn takî tî n̂esenpekn̂e mîîmo pen yecahtopo. Ero ke n̂esewyaknametken̂e takî tî Benxamin yepamtho komo. Yîsîn tî n̂een̂atken̂e ahnoro mîîmo pen yecahtopo.

41 Ero yimaw tak n̂etaknametken̂e takî tî Ixaw Yana komo Benxamin yepamtho komo wece hara. N̂eraswatken̂e takî tî Benxamin yepamtho komo. Kar̂metu so tak ha men okwe, ketken̂e takî tî ero yimaw.

42 Ero ke n̂examro makîrha takî tî n̂emahciyatken̂e. Ixaw Yana komo tak n̂examro pen weken̂emekyatken̂e. Axawa imo wece tî cetken̂e ha re Benxamin yepamtho komo. Waihyatken̂e rma thakwa tî okwe. Esama porero so rma tî xakn̂e ewto komo. Ero pono komo takî tî n̂epataketken̂e hara Benxamin yepamtho pen komo waparî me.

43 Benxamin yepamtho pen komo tî wamcetken̂e, anarî komo weken̂emekyatken̂e. Anarî komo tî waihketken̂e Xibea poi emahcixapu komo, resce yaw roro toxapu kom ha.

44 Ero wa tî waihyatken̂e 18.000 sowtatu komo, Benxamin yepamtho kom ha. Karitînhîrî pen komo mîkyam waihyatken̂e okwe.

45 N̂etaknametken̂e takî tî anarî komo Benxamin yepamtho komo. Axawa imo yesamarî yaw takî tî cetken̂e. Himon Topun pona tî cetken̂e. Esama yaw rma tko 5.000 tî waihketken̂e xa hara tî Ixaw Yana komo. En̂exa cetken̂e rma Benxamin yepamtho komo wenari Xiton pona roro. Ero yesamarî yaw 2.000 tî waihketken̂e hara okwe.

46 Ero ke ero kaamo po rma 25.000 waihyatken̂e okwe Benxamin yepamtho pen komo. Kacipara imo ke cemyarkemînhîrî komo rma re mîkyam waihyatken̂e, karitînhîrî pen kom ha.

47 600 tko tî n̂etaknametken̂e Benxamin yepamtho komo. Axawa imo pona tî n̂emahciyatken̂e Himon Topun pona. Iito takî tî n̂enmayatken̂e pahkî okwe, 4 nuun̂i ha.

48 Ero yinhîrî on wara takî tî xatken̂e Ixaw Yana komo, Benxamin yepamtho pen komo rowon pona tî cetken̂e. Ahnoro ewto komo pona tî cetken̂e. Ero pono pen komo ahnoro tî waihketken̂e. Iyokuthîrî pen komo meero tî waihketken̂e ahnoro tîn̂enîthîrî pen komo. Ewtonthîrî komo marha tî nakn̂iyatken̂e ahnoro cesamarî yawnonhîrî komo. Ero wa tî xatken̂e okwe Ixaw Yana komo ero yimaw.