Taa, ero yimaw Ixaw Yana komo kayaritomon exihra ka xakn̂e. Ero yimaw rma anarî tî xakn̂e hara Repita. Eprain rowon pono tî mîk xakn̂e, îh ken̂arî pono ha. Cewyarono tî mîk xakn̂e, mooxe n̂he xakn̂e ewto. Noro takî tî wooxam nahsîyakn̂e cipici wara cehsom. Beren pono tî mîk xakn̂e yînahsîthîrî, Xuta rowon pono ha.

2 Ero yinhîrî tko tî yîhyai ro xakn̂e kica wooxam. Ciin̂onhîrî tî nahsîpînkekn̂e ro mak okwe. Tîîm yaka takî tî cekn̂e Beren pona hara, Xuta tribun rowon pona. Iito tî xakn̂e 4 nuun̂i.

3 Ero yinhîrî takî tî iin̂onhîrî cekn̂e iina wooxam yakro esentaxi tîhyaka mohtopo poko hara. Tanton tî naar̂akn̂e, tok marha tî naar̂akn̂e buhu asakî. Ewto pona cepatakache tîîm yaka takî tî naar̂akn̂e cipici wara cehsom. Cemsîrî yiin̂o yeen̂ataw tak tî tawake xakn̂e wooxam yîîm. Amohcoko omîn yaka, kekn̂e tî yîwya.

4 Enmapuche on wara takî tî kekn̂e noro woxin, yipici yîîm, Tanî cma re ka menmayaxe pahkî n̂he ha ka, kekn̂e tî yîwya. Ero ke osorwaw kaamo tî n̂enmayakn̂e yîhyaw rma. Iito tî n̂eseresmetken̂e, wok marha tî n̂eer̂atken̂e. Iito marha tî nîwînîkyakn̂e twoxin yaw.

5 4-nhîrî po tak pahxaxaro rma tî paketken̂e mohxapu, cipici wara cehsom yakro tîtotome so. On wara tko tî kekn̂e wooxam yîîm, Meseresmexe cma ha re ka. Cexpore ka awexi xe so wasî. Ero yinhîrî tak mîîcexe yiixe awexitaw so, kekn̂e tî.

6 Ero ke n̂eremetken̂e xa hara n̂examro kîîrî re mak asakî. N̂eseresmetken̂e, wok marha tî n̂eer̂atken̂e. Ero yinhîrî on wara tî kekn̂e wooxam yîîm, Tanî cma re mîkokmamyasî. Tahwore ka esko tan, kekn̂e tî.

7 Nawomyakn̂e rma re pawana tîtotome. Nîmtapowakn̂e xa hara tko noro woxin iito rma enmatopo poko. Cewetîso ro tî nîmtapowakn̂e. Ero ke ero po rma tî kokmamyakn̂e xa hara.

8 Enmapuche xa hara tî pakekn̂e hara pawana tîtotome. Enmarî yakro ro tî pakekn̂e. 5 kaamo tak xakn̂e iito ehtoponhîrî. On wara tko tî kekn̂e xa hara wooxam yîîm, Ceseresmacerî xa hara ka. Amn̂e wow kache mak na mîîcet ha, kekn̂e tî yîwya. Ero ke n̂eseresmetken̂e xa hara tî asakî kîrkomo.

9 Eseresmache so tak pawana tî nawomyakn̂e tîtotome xa tak. Cipici wara cehsom tî nan̂ikyakn̂e, tmaywen marha tî. Mokuche so on wara tî kekn̂e wooxam yîîm, Ai okopuci, kokon̂i exporo tak nas okwe. Meye xa tak nasî kaamo. Ero ke tanî rma ka esko tahwore rma. Pahxaxa tak na mîîcetu amîn yaka pahxaxaro rma, kekn̂e tî twoxin ya.

10 Pîra, oroto rma owto xe wasî, kekn̂e takî tî. Ero ke cekn̂e takî tî Xebus yesamarî yaw (Xerusarenî rma mîn Xebus). Asakno roro rma tî naar̂akn̂e tooku buhu. Keremacho rma tî xakn̂e buhu mkaw. Wooxam marha tî naar̂akn̂e, cipici wara cehsom.

11 Ero yinhîrî Xebus pahnoke takî tî xatken̂e. Kokon̂i xa takî tî n̂ehtîkekn̂e. Ero ke on wara takî tî kekn̂e anton, Tan nai Xebusew komo yewton. Iina cma re tîhcexe etakriso, kekn̂e tî.

12 Pîra, kekn̂e tko tî poritomo, anarî yana komo yewton pona tohra taxe. Ixaw Yana pîn komo mîkyam. Xibeia pona xa kaikatko, kekn̂e tî.

13 On wara marha tî kekn̂e, Amoko rma, Xibea pona kaika. Hama pona anarimaw. Iina xa kaika yîwînso, kekn̂e tî.

14 Ero ke cetken̂e rma tî. Ero yinhîrî Xibea pahnoke exitaw so takî tî kokmamyakn̂e okwe. Benxamin yepamtho komo yewton mîn Xibea.

15 Ero ke ero pona takî tî cetken̂e yîwînso. Ewto roron pona makî tî cetken̂e. Iina takî tî n̂eremetken̂e. Amohcoko omîn yaka yîwînso, kahra tko tî xatken̂e iitono komo okwe yîwya so.

16 Ero yimaw rma takî tî mokyakn̂e poritomo n̂examro yari. Mararî pokononho tî mîk xakn̂e. Eprain yepamtho tî mîk xakn̂e îh ken̂arî pononho. Benxamin yepamtho komo reha tî mîkyam xatken̂e Xibea pono kom ha.

17 Repita komo yari tîcetaw iito rma tî n̂een̂akn̂e pawana komo roro po rma. Ero ke on wara tî kekn̂e poritomo yîwya, Ahna mîîcet ha? Ahn̂ixan amyamro? kekn̂e tî yîwya so.

18 Eprain rowon pona amna cesî, kekn̂e tî pawana. Miya n̂he amna cesî îh ken̂arî pona cewn̂antaka n̂he. Iitono ro ow. Beren pona toxapu ow Xuta rowon pona. Kporin komo mîn yaka kîwcesî. Oyermonopîra tko naxe tantono komo okwe.

19 Amna yoku nahrî rma nas amna yaw puruma yeputho, cuupu marha nasî etîrapotopo. Turke marha nas amna, twokye marha. Ero wa nas amna. Awanton me mak nas amna, owî, wooxam, oyanton marha amna yakrono ha. Ahce na xe kehtopo ken̂arî pîn mîkyam okwe, kacho mera ro mak nas amna, kekn̂e tî yîwya.

20 Taa, amohcoko omîn yaka, kekn̂e takî tî poritomo. Ahwokan me mak ehcoko. Owî rma wîmyasî yiixe awehtopo komo. Tan mak enmapîra ro mak ehcoko roro po mak okwe, kekn̂e tî yîwya.

21 Ero ke tîmîn yaka takî tî naar̂akn̂e. Iyoku tî nînahmekn̂e. Tîhtarî komo koroketken̂e, n̂eseresmetken̂e, wooku marha tî n̂eer̂atken̂e.

22 Taa, tahwore exitaw so kicicitho komo takî tî mokyatken̂e kîrkomo, ero pono kom ha. Mîîmo takî tî mamcetken̂e. Knai knai knai, ketken̂e takî tî metata poko. On wara tî ketken̂e poritomo ya mîîmo yosom ya, Pawana eeko kîîrî. Xiya eeko amna nukukmarî kr̂a, ketken̂e tî kica.

23 Ero ke tîmîn yai takî tî n̂epatakekn̂e osom akro so tîmtapotachome. On wara tî kekn̂e yîwya so, Pîra ro mak oyakno komo. Ero wa exihra ro mak ehcoko kicicitho me ha. Pawana moso, ohyaka mohxapu. Ero ke ero wa cirihra ro mak ehcoko. Kîw mîhyapamnoyaxe kica.

24 Tanî tko nasî oyemsîrî kîîrî pokono pînî ro mak. Pawana pici wara cehsom marha nasî tan. N̂examro xa wekyas ahyaka so. Kicicme n̂examro miir̂atu awanme ro so tak. Ohyaka mohxapu yukukmara ro mak ehcoko kica. Kicicme ro mak nasî ero wa ciino ritopo, kekn̂e tî.

25 Yîmtapotarî yenta xera ro makî tko tî xatken̂e kica kîrkomo. Ero ke takî tî cipici wara cehsom tak naar̂akn̂e pawana katpanaka yîhyaka so okwe. Noro pen takî tî nukukmetken̂e emapona roro mak cenmakaxi ro okwe. Enmayataw takî tî nahsîpînketken̂e.

26 Ero yimaw tak mîîmo yaka takî tî cekn̂e hara wooxam ciin̂o yenmatopo yaka. N̂epîrkekn̂e makî tî okwe mîîmo potaka rma. Iito tî xakn̂e pukno wa mak cenmakaxi ro.

27 Ero yinhîrî takî tî iin̂o pakekn̂e, metata nahrunkekn̂e tîtotome. Iito tî xakn̂e yihcinhîrî wara cehsom pen cepîrkaxi metataw rma. Metata makokorono poko cetahsîso tî xakn̂e.

28 Taa, awomko ha, kaikatko tak ha, kekn̂e takî tî iin̂o yîwya. Eikura ro makî tko tî xakn̂e okwe. Ero yinhîrî cipici wara cehsom pen yokoputho takî tî nakriyakn̂e tooku mkahsî. Esama yaw takî tî cekn̂e ceken pona.

29 Tîmîn yaka n̂ewomyakn̂e, mariya nahsîyakn̂e. Iike takî tî cipici wara cehsom pen yokoputho nakpocakn̂e. Napokekn̂e tî, nîhrekekn̂e marha tî, ahnoro tî yupun nakpocakn̂e okwe. 12 me tak xakn̂e yîraconhîrî. Ero komo takî tî narpekn̂e Ixaw Yana komo chere, miyan komo chere rma yîn̂enîrî komo me.

30 Ero yenîche on wara takî tî ketken̂e enîn̂enhîrî komo, Okwe, ero yipu yenîhra ro mak tîxatken̂e mehxa ro Exitu poi Ixaw Yana komo mohtoponho n̂ixa ro rma. Ahce wa xa cirpore nai ha? Cesehtînocerî ka, cesentacerî marha. Ero wa men cirpore, kacho yîhtînoyataw awya so ekatîmko tak, ketken̂e tî. Ero wa tî ketken̂e Ixaw Yana komo.