Taa, ero yimaw Ixaw Yana komo kayaritomon exihra xakn̂e. Ero yimaw marha tî Tan yepamtho komo n̂epor̂atken̂e cekenî ro komo. Cekenî ro komo tî ka ahsîra xatken̂e okwe. Anarî komo makî reha tî nahsîyatken̂e cekenî ro komo, Ixaw Yana tribun komo. Ahsîtîkara reha tî ka xatken̂e Tan yepamtho komo.

2 Ero ke 5 kîrkomo takî tî n̂en̂epetken̂e Tan yepamtho komo ceken komo yeposo. Sora pono komo tî mîkyam xatken̂e en̂epexapu komo, Estaow pono komo marha tî. Ahnoro n̂examro poritomon komo yanme en̂epexapu tî mîkyam xatken̂e. Roowo entatko kekenî ro komo yîhtînotome tak awya so, ketken̂e tî yîwya so. Ero ke esama yaw tîcetaw so en̂epexapu komo Eprain yepamtho komo rowon pore tî cetken̂e îh ken̂arî pore. Mika yari tî cetken̂e. Ero ke yîhyaw tî n̂enmayatken̂e.

3 Mika mîn pahnoke cexitaw so Repita mtapotarî tî n̂encetken̂e kar̂pamxanî mtapotarî ha. Tanî nai ham noro, ketken̂e. Ero ke tî iina cetken̂e. On wara tî ketken̂e Repita ya, Onoke awekyakn̂e oona? Ahce poko kyam tan mai? Ahce n̂he nai tan ahyaw ha? ketken̂e tî yîwya.

4 Ero ke cehtoponhîrî tî n̂ekatîmyakn̂e yîwya so. Epethîrî pona oyantomekn̂e moso Mika. Ponaro cehtopo ya tînîmrî yakn̂in̂e me oriyakn̂e, kekn̂e tî yîwya so.

5 Ero ke on wara takî tî ketken̂e yîwya, On wara amna kes awya, Kaan yakro cma re mîmtapowasî amna totopo poko. N̂examro ya na menpe kir̂wan eken kom ha? kacho poko cma re mîmtapowasî Kaan yakro, ketken̂e yîwya.

6 On wara takî tî n̂eyukyakn̂e noro, tîmsom pokono, Erasîra rma etocoko. Kporin komo yanme rma mîîcet ham, kekn̂e tî yîwya so.

7 Ero ke cetken̂e takî tî 5 komo. Rais pona takî tî cetken̂e. Waapa ponarono pîn me ro makî tî iitono komo n̂een̂atken̂e, Siton pono komo wara. Erasîra xatken̂e waapa komo exihtorî ke iito. Anarî komo kayaritomon exihra tî xakn̂e n̂examro yemetanmekn̂e me. Mooxe rma tî xatken̂e Siton pono komo. Cetakronomacerî, kahra ro makî tî xatken̂e anarî komo ya. Ero wa tî xatken̂e iitono komo.

8 Ero yinhîrî takî tî ceken yepon̂enho komo tak cetken̂e hara tîyanan komo yaka hara Sora pona, Estaow pona marha. Ero ke on wara tî ketken̂e iyanan komo yîwya so, Ahce wa mîîcetken̂e? Esekatîmcoko tak ha, ketken̂e tî.

9 On wara tî ketken̂e toxapunhîrî komo, Kaikatko iitono komo yar̂maxi. Yîrowon komo amna n̂een̂e. Kir̂wan xa mîn ha. Awto xera so katî mat ahsîso? Yîkrîpîn me men ehcoko. Kaikatko ahsîso oroto.

10 Iina awcetaw so waapa ponarono pîn komo mak meen̂axe iito. Porinî ro marha mîn roowo okre. Kîwya so wa nîmyasî Kaan. Ero exihra nai iito okwe, kacho pînî ro mak mîn roowo, ketken̂e tî. Ero wa tî ketken̂e tpoyino komo ya.

11 Ero ke takî tî 600 cetken̂e kîrkomo komo, Tan yepamtho kom ha. Sora pono komo tî mîkyam cetken̂e, Estaow pono komo marha. Tuwuhreke so tî cetken̂e waapa me.

12 Tîcetaw so Kiriace Xearin pona tî ka n̂etakriyatken̂e Xuta yepamtho komo chew. Ero ke etathîrî komo takî tî nosohcetken̂e iitono komo Maane Tan me. Ero wara rma nas ero yosotî oroto. Iito rma nasî Kiriace Xearin mîtwo, oesce n̂ixa.

13 Enexa takî tî cetken̂e xa hara Eprain yepamtho rowon pona îh ken̂arî pona. Mika mîn yaka rma tî cetken̂e.

14 Ero pahnoke exitaw so takî tî on wara ketken̂e 5 komo, Raisi pono komo yewton yenîn̂enho kom ha, Ai oyakno komo, tantono yaw nasî eepoci, Mîk hak warai me ciixapu komo. Wakîknoxapu nai, yukuixapu marha nai ponaro ehtopo komo. Ero yipu komo nai tantono yaw. Ero ke ahce wa na kapore nai? Takîhso tîhtînopore men nasî, ketken̂e tî yîwya so.

15 Ero ke Mika roron pona takî tî cetken̂e. Repita yaka takî tî cetken̂e, Mika yawno yaka rma. Noro takî tî nîmtapotaretken̂e.

16 600 sowtatu komo tî n̂ecececetken̂e iito rma yîhroron metataw rma. Tuwuhrekem komo tî mîkyam xatken̂e.

17 Ero yinhîrî takî tî 5 komo tak cetken̂e mîîmo yaka, roowo yenîn̂enho komo. Iitononhîrî takî tî naar̂atken̂e. Mîk hak warai me ciixaputho mko tî naar̂atken̂e, eepoci marha, ponaro ehtopo komo me wakîknoxapu, yukuixaputho marha. Ero yipu komo tî naar̂atken̂e. Roro metataw rma tî xakn̂e tîmsom pokono 600 sowtatu komo yakro, tuwuhrekem komo yakro ha. Ero wa tî xatken̂e.

18 Taa, on wara tî xakn̂e tîmsom pokono, Mika mîn yaka 5 komo totopo komo tî n̂een̂akn̂e. Mîk hak warai me ciixapu yarîrî tî n̂een̂akn̂e, eepoci yarîrî, wakîknoxapu yarîrî, yukuixaputho yarîrî, ero yipu komo yarîrî tî n̂een̂akn̂e. Ero ke on wara tî kekn̂e noro aan̂e komo ya, Ahce poko mat ha? kekn̂e tî.

19 Atîtmamko, ketken̂e makî tî yîwya. Ahce wa so na kahra ro mak men esko. Amna yakro mak amok ha. Amna yîîm me esko, amna nîmrî pokono me marha esko. Wara kyam mak masî tan cewn̂an yanme mak tîmsom pokono. Amna yakro amokyataw, yaakeno yanme xa tak masî ero yipu me, noro re yepamtho komo yanme xa. Wara n̂he nasî ero wa awehtopo, ketken̂e tî yîwya.

20 Ero ke tawake takî tî xakn̂e tîmsom pokono. Eepoci takî tî naar̂akn̂e, Mik hak warai me ciixapu, wakîknoxapu, ero mko tî naar̂akn̂e. Tan yepamtho komo yakro tî cekn̂e.

21 Ero yinhîrî takî tî cetken̂e Tan yepamtho komo en̂exa. Yîmxîkrî komo tî cetken̂e poturme, iyoh komo marha, cemyawno komo marha tî narpetken̂e tpoturme so. Ero wa takî tî cetken̂e Tan yepamtho komo.

22 Miya n̂he toche so n̂esenmekyatken̂e takî tî Mika mîtwono komo Tan yepamtho komo yaka totohme so.

23 N̂examro yeen̂ataw tak kar̂pe tî nîmtapowatken̂e akro so. Ero ke tîmkai so takî tî n̂een̂atken̂e Tan yepamtho komo. Mika ya tî kekn̂e, Ahce wa mex hara? Ahce kacho amîtwono komo menmekî? ketken̂e tî yîwya.

24 On wara tî n̂eyukyakn̂e Mika, Ponaro oyehtopo maacow okwe on̂irpotho. Onîmrî yakn̂in̂e marha maacow okwe. Ohyai tak mîîtocow ha. Ahce na exihra thakwa nai ohyaw. Ahce kacho, Ahce wa mex hara? mîîket owya? kekn̂e tî.

25 On wara tko n̂eyukyatken̂e Tan yepamtho komo yîmtaka, Amna yakro men yîmtapotara esko. Amtapowataw rma amna yakro tîrwon̂em komo men cetu awar̂maxi okwe. Ero yimaw mîwaiyasî tak okwe. Ahyawnonhîrî komo marha waihyaxe, ketken̂e tî yîwya.

26 Ero ke cetken̂e rma tî Tan yepamtho komo. Kyopo so xa nat ham okwe, kekn̂e tî Mika Tan yepamtho komo poko. Ero ke tîmîn yaka makî tî cekn̂e hara. Ero wa tî xakn̂e Mika.

27 Miya takî tî Mika nakîhtopotho komo naar̂atken̂e Tan yepamtho komo, noro yanme tîmsom pokononho marha. Rais pona takî tî cetken̂e hara. Eserepokan komo mîkyam xatken̂e iitono komo, waapa ponarono pîn ha. N̂examro pen takî tî waihketken̂e Tan yepamtho komo kacipara imo ke. Yîmînthîrî komo tî nakn̂iyatken̂e.

28 Yukurunpen̂e komo exihra tî xakn̂e mooxe exirî ke Siton pono komo. Cetkurunpecerî men amn̂e, kan̂enho pîn mîkyam anarî komo yakro. Ewton komo xakn̂e woskara po, Bece Heobe mîtwono po. Ewtonthîrî yakn̂ipuche iina rma tî n̂iir̂atken̂e mîîmo komo xa hara Tan yepamtho komo. Ero pona takî tî n̂esekenmetken̂e.

29 Tan me takî tî cewton komo nosohcetken̂e tporin pen komo yosotî yaw roro. Ixaw pen mumutho mîk xakn̂e Tan. Rais me tî ka xakn̂e ewto yosotî pahxa.

30 Iina marha tî n̂iir̂atken̂e ciixaputho mko, ponaro cehtopo komo me. Xonatasî takî tî xakn̂e ero yipu ya yînîmrî komo pokono me. Ero wa marha tî xatken̂e yumumuru komo miya roro waapa narîtho me iitono komo pen cehso ro. Tan yepamtho komo yanme xakn̂e ero yipu tîmn̂e me. Xehson yepamtho tî mîk xakn̂e Xonatasî, Manases pen mumutho yepamtho ha.

31 Mika yawnonho poko roro tî xatken̂e, ponaro ehtopo komo me ciixapu poko roro xatken̂e kica. Pahkî tî xatken̂e ero poko, Siro po exitaw ro Kaan mîn. Ero wara roro tî xatken̂e okwe.