1-2 Taa, ero yimaw tî xakn̂e Eprain yepamtho rowon pono, îh ken̂arî pono, Mika tî osotî. Ero yimaw takî tî exihra xakn̂e yîson purantanthîrî, 1.100 sikrunhîrî. Cen̂epan̂em naare ham, kekn̂e noro, yison ha. On wara takî tî kekn̂e Mika tîson ya, Yeme, apurantanthîrî yaan̂enho meremkekn̂e on̂entarî me rma, 1.100 sikru yaan̂enho ha. Ohyaw xa tko nasî, owî rma waare, kekn̂e tî yîwya. Ero ke on wara takî tî kekn̂e yîson, Kporin komo xa awakronomape okopuci, kekn̂e tî.

3 Taa, ero yinhîrî takî tî prata nîmyakn̂e hara tîson ya, 1.100 sikru ha. Ero yinhîrî takî tî on wara kekn̂e yîson, Pahxa rma on wîmye Kporin komo ya puranta. Ponaro kehtopo warai cirpo xe wasî ciin̂e ro ya, yukuixapu. Anarî marha wakîknopu xe wasî yîwya, kekn̂e tî.

4 Ero ke takî tî prata nîmyakn̂e Mika tîson ya hara. Noro takî tî naar̂akn̂e 200 sikru mak prata ciin̂e ro yaka. Noro ya tî n̂irpekn̂e ponaro ehtopo komo warai me. Nukuyakn̂e ponaro ehtopo komo me. Wakîknoyakn̂e anarî hara ero warai me xa marha. Ero yipu takî tî xakn̂e Mika mîn yaw.

5 Taa, on wara tî xakn̂e noro hara Mika, ponaro cehtopo mîn ciki tî xakn̂e yîhyaw. Eepoci marha tî natpopekn̂e. Yaake marha tî n̂enpor̂pekn̂e ponaro cehtopo warai kom hara. Ero yinhîrî tumumuru takî tî n̂iir̂akn̂e ero yipu komo yakro tîmtapotaxmu me kica. Ero wa tî xakn̂e Mika.

6 Ero yimaw Ixaw Yana komo kayaritomon exihra ro makî tî xakn̂e. Tanme ro makî tî cehtopo komo nîhtînoyatken̂e n̂examro.

7 Taa, ero yimaw tak kar̂pamxan tî xakn̂e hara meye n̂he Beren po, rowon po ha. Repita tî mîk xakn̂e.

8 Ero yinhîrî tak Beren poi tî noro cekn̂e ceken yeposo hara anatono hara. Esama yaw tîcetaw Eprain yepamtho rowon pore tî cekn̂e, îh ken̂arî pore. Mika mîn xakn̂e iito. Ero ke noro yaka tî cekn̂e.

9 Ero ke noro takî tî nîmtapotarekn̂e Mika. Ahtononhîrî amoro? kekn̂e tî yîwya. Repita ow Beren pononho, Xuta rowon pononho ha. Anarî tan wepor̂asî oyeken hara, kekn̂e tî.

10 On wara tko kekn̂e Mika yîwya, Ohyaw esko ha ke. Oyîm me tak esko. Ponaro oyehtopo ya onîmrî yakn̂in̂e me marha esko. Ero wa awexitaw 10 sikru wîmyasî awya prata yicimn̂ipuntaxera. Aponon marha wîmyas awya, anahrî marha, kekn̂e tî yîwya.

11 Taa, kekn̂e takî tî Repita, ahyaw wai ham, kekn̂e tî. Ero ke Mika yaw takî tî xakn̂e. Yumumuru wara rma takî tî xakn̂e.

12 Ero ke ponaro cehtopo ya tîmsom yakn̂in̂e me takî tî n̂iir̂akn̂e noro hara, Repita ha. Yîhyawno ro me tî xakn̂e.

13 Ero ke on wara takî tî kekn̂e Mika, Taa, oyakronoman̂e me xa tak Kporin komo wîhtînoyasî oroto. Repita tak nasî ohyaw onîmrî yakn̂in̂e okre. Ero ke oyakronomesî, kekn̂e tî. Ero wa tî kekn̂e Mika.