Taa, ero yinhîrî anarî kaamo po takî tî Sansaw cekn̂e Kasa pona. Iito tî wooxam n̂een̂akn̂e hara kîîrî pohkan̂e ro kica. Noro yaka tî n̂ewomyakn̂e.

2 Ero yinhîrî Sansaw yekaci takî tî n̂encetken̂e iitono komo Kasa pono komo. Tanî nasî Sansaw kewton po, kacho tî n̂encetken̂e. Ero ke takî tî ewto mamcetken̂e. Sansaw tî momokyatken̂e ewto metataw. Iito tî n̂enmaketken̂e tîtken̂e mak. Enmapuche kr̂a tak tîtwaikexe, ketken̂e makî tî.

3 Iito rma tî ka Sansaw n̂etîrapekn̂e yohno n̂he makî tko. Rakatawro takî tî nawomyakn̂e, ewto potaka cekn̂e. Ero yahruru takî tî nahsîyakn̂e metata komo. Metata mapatan marha tî nahsîyakn̂e asakno roro rma. Ero takî tî mohkekn̂e ahnoro okyo, eemîtî meero metata yecetîtho. Ero mko tî nanîmyakn̂e tmotaka, îîpî meretkoso takî tî naar̂akn̂e Ebron yesamarî yawno meretkoso. Ero pona takî tî n̂ir̂mikyakn̂e. Ero wa n̂iir̂akn̂e Sansaw.

4 Ero yinhîrî takî tî anarî n̂een̂akn̂e Sansaw wooxam hara. Yîîxe xa tî xakn̂e. Soreke woskaran pono tî mîk xakn̂e. Tarira tî xakn̂e noro yosotî.

5 Ero ke noro yaka takî tî cetken̂e Piristew kayaritomon komo. On wara tî ketken̂e yîwya, Sansaw pohkakî kar̂pe xa cehtopo yekatîmtome tak awya, On wara oyexirî ke karpe xa wasî, kachome tak awya. Ero wa kamexpoko ahsîtome tak amna ya. Ero yinhîrî tak amna napomiyasî emetanmetome kr̂a. Ero yekatîmrî ke awya puranta tak nîmyas amna awya 1.100 sikru so prata ha. Ero wicakî so nîmyas amna, ketken̂e tî yîwya.

6 Ero ke on wara tî kekn̂e Tarira Sansaw ya, ahce wa awexirî ke karpe xa mai ke? Mekatîmyasî cma re owya. Ahce ke amiyataw tooto komo ya awotora ro mak tak mai awemetanmetome tak yîwya so ha? kekn̂e tî yîwya.

7 On wara tî n̂eyukyakn̂e Sansaw, Paaka picho meen̂a ha na yuturpamnon, krapa yaci me ciixapu? Ero yipu ke omiyataw, 7 ke mak, kar̂pera tak wasî anarî komo wara rma, kekn̂e tî.

8 Ero ke paaka picho takî tî n̂ekyatken̂e Piristew kayaritomon komo, yuturpamnon, krapa yaci me ciixapu. 7 tî n̂ekyatken̂e. Ero yipu ke takî tî Sansaw n̂imiyakn̂e Tarira.

9 Iito rma tko tî xatken̂e kîrkomo Tarira mîn yaw, mîîmo yamtakpon yaw. Yimiche takî tî Sansaw ya tî kekn̂e Tarira, Ai, Sansaw, moxam ha, Piristew komo mokyaxe awahsîso kopi, kekn̂e tî. Ero yimaw takî tî nawomyakn̂e Sansaw. Paaka pichotho takî tî nawocekn̂e apehceme ro mak. Krewetî n̂etawocesî wehto pona ciir̂ataw ero wara rma n̂etawocekn̂e. Ero ke, Ahce ke na karpe xa nai Sansaw? ketken̂e makî. Yîhtînopîra rma tî xatken̂e.

10 Ero yinhîrî on wara takî tî kekn̂e Tarira Sansaw ya, Kica, ow mak memîknoi kica. Mîcemarontai mak ham ke kica. Yaaro xa ka ekatîmko owya, ahce ke xa cimiso awexitaw etawotora tak nay amitoponhîrî? kekn̂e tî yîwya.

11 Taa, kekn̂e tî Sansaw, omiyataw ruupu ke yaxan ke, ahce na yimitoponho pîn ka, ero yimaw tak kar̂pera wasî anarî komo wara rma, kekn̂e tî.

12 Ero ke ruupu takî tî nahsîyakn̂e Tarira yaxan. Ero yipu ke takî tî Sansaw n̂imiyakn̂e hara. Kîrkomo xa hara tî xatken̂e amtakpo yaw rma. Yimiche tak on wara tî kekn̂e xa hara Tarira, Ai, Sansaw, Moxam men Piristew komo. Awahsîso mokyaxe kopi, kekn̂e tî. Ero ke ruupu pen takî tî nawocekn̂e Sansaw tapomitoponhîrî. Mawîrka ciki tawocesî ero wara rma tî nawocekn̂e kopi.

13 Ero yinhîrî on wara tî kekn̂e xa hara Tarira Sansaw ya, Ow mak memîknoyasî kica. Mîcemaronwasî rma ha kica. Yaaro xa tak ekatîmko owya, ahce warai ke xa amiyataw awotonî ro me tak nai ha awya? kekn̂e tî yîwya. On wara takî tî kekn̂e Sansaw yîwya, Taa, 7 nasî ohpoci yapomitopo. Ero tak kahko poono kahtopo ke. Iito tak n̂expe ohpoci kahtopo poko rma. Cîk wa xa ehyatkakî ero poko. Ero wa oriyataw kar̂pera tak wasî anarî komo wara mak, kekn̂e tî.

14 Ero ke yîwînîkyataw tak yîhpoci takî tî kahyakn̂e Tarira. Yîhpoci yapimotopo kahyakn̂e 7 kom ha. Poono cheka rma tî kahyakn̂e. Ero yinhîrî n̂ehyatkekn̂e kahtopo poko. Ero wa ciriche Sansaw takî tî n̂enpakekn̂e xa hara. On wara tî kekn̂e, Ai, Sansaw, moxam ha Piristew komo, awahsîso mokyaxe kopi, kekn̂e tî. Ero ke pakekn̂e takî tî Sansaw yîwînxapunhîrî. Nawomyakn̂e takî tî, poono nanîmyakn̂e, kahtopo yakro rma ahnoro makî tî naar̂akn̂e. Ero wa tî xakn̂e kopi.

15 Ero ke on wara takî tî kekn̂e Tarira yîwya, Ahce wa mîîke owya, Aaxe wasî, mîîkes ha re owya tohnaw ro mak kica? Osorwaw ro ow memîknopu kica. Yaaro kahra ro mak mas owya karpe xa awin̂e, kekn̂e tî yîwya.

16 Ero wa karî ke tî n̂erepokekn̂e roro enmar̂atîxera. Ero ke takî tî poketîkekn̂e Sansaw twaihîrî yaro ha tî.

17 Ero yimaw tak cehtopo xa takî tî n̂ekatîmtîkekn̂e yîwya okwe. On wara tî kekn̂e, Ohpoci papupra ro mak wasî. Nasirew me wasî Kaan yantonî ro me ha. Ero wa wasî mehxa ro oyewrutoponho n̂ixa ro. Ohpoci pahyataw tak kar̂pe oyehtoponho tak n̂etowyasî. Kar̂pera tak was ha anarî komo wara mak okwe, kekn̂e tî.

18 Ero yimaw yaarono me xa takî tî Sansaw mtapotarî nîhtînoyakn̂e Tarira. Ero ke Piristew kayaritomon komo takî tî nan̂ikpekn̂e xa hara. Cewn̂e ro xa tak amohcoko. Owya tak cehtopo n̂ekatîmtîka, Kekn̂e tî yîwya so. Ero ke mokyatken̂e xa hara tî Piristew kayaritomon komo. Prata tî n̂ekyatken̂e Tarira yepemacho.

19 Ero yimaw Sansaw tî nîwînîkrekn̂e xa hara Tarira cenaw rma. Yîwînîkyataw yîhpoci pahn̂e tî nan̂ikyakn̂e. Noro takî tî pahyakn̂e Sansaw poci. 7-nhîrî etapomixapu komo rma tî nawocekn̂e okwe. Ero wa kar̂pera takî tî n̂iir̂akn̂e okwe. Ero yimaw tî kar̂pe ehtoponhîrî n̂etowyakn̂e okwe.

20 Ero yinhîrî takî tî Sansaw ya kekn̂e xa hara Tarira, Ai, Sansaw, moxam xa hara kopi, Piristew komo mokyaxe awahsîso, kekn̂e tî. Ero ke pakekn̂e tak. On wara tî kekn̂e, Mîîmo yai kîwcesî pahxa kîwcekn̂e ero wara rma. Etahsîpon me wasî, kekn̂e cma tî re. Kporin komo tak onom okwe, kahra tko tî xakn̂e okwe.

21 Ero ke Sansaw pen takî tî nahsîyatken̂e Piristew komo. N̂ewketken̂e takî tî oko. Kasa pona tî naar̂atken̂e. Iito takî tî nîhraknumiyatken̂e bronse ciixapu ke. Kahrutopo yaka tî nahruyatken̂e. Iito takî tî napicketken̂e puruma yakihtopo poko.

22 Iito exitaw rma tko yîhpoci natîkwakn̂e xa hara awotoxapunhîrî. Ero wa tî xakn̂e.

23 Ero yinhîrî takî tî on wara xatken̂e Piristew kayaritomon komo, tpoyino komo takî tî n̂enmekyatken̂e tahwotachome so Takon poko, ponaro cehtopo komo poko. Yîwya tîmsom marha tî nakn̂iyatken̂e. On wara tî ketken̂e, Sansaw tak nahsîpoi ponaro kehtopo komo kîwya so okre. Kwapathîrî mîk nahsîpoi okre, ketken̂e tî esenmexapu komo.

24 Sansaw yeen̂ataw tak esenmexapu komo ya, ponaro cehtopo komo poko tî nahwowatken̂e. On wara tî ketken̂e, Kîîxatî pîn komo tak nahsîpoi ham kîwya so okre. Krowon komo wîrîhman̂enho mîkro okwe, mer̂pora ro mak kwaihkan̂enhîrî komo marha mîk okwe, ketken̂e tî.

25 Ero yinhîrî tahwore xa cexitaw so tak on wara tî ketken̂e, Sansaw tak ehcoko noro yeseman̂itome amna n̂enîrî me tak okre, ketken̂e tî. Ero ke takî tî Sansaw n̂ekpetken̂e kahrutopo yawno. Noro takî tî manakn̂e Piristew komo n̂enîrî me. Ero yinhîrî mîîmo mapatan yotaw tî noro naar̂atken̂e.

26 Taa, kar̂pamxan tî Sansaw yamorî nahsîyakn̂e aatome. On wara tî kekn̂e Sansaw noro ya, Ai, okopuci, mîîmo mapatan yape xe wasî mîîmo yecetî kom ha. Oyececetotopo xe kyam wasî, kekn̂e tî.

27 Mer̂pono pîn komo ro makî tî xatken̂e iito mîîmo yaw, kîrkomo, wooxam komo marha. Mîîmo tî nawronohketîketken̂e. Piristew komo kayaritomon komo marha tî xatken̂e iito ahnoro. Mîîmo kanahtaw marha tî xatken̂e 3.000 hara. Sansaw manîmrî tî n̂een̂atken̂e.

28 Ero yimaw takî tî Kporin komo yakro nîmtapowakn̂e Sansaw. On wara tî kekn̂e yîwya, Apa kah yawno, Kaan xa amoro. Oponaro cma re masî. Apa, cewn̂e ro xa cma re ow mîkaricesî. Owî cma re makronomesî Piristew komo yemetanmetome owya cewn̂e ro xa tak ha. Ero wa cma re kesepanîyasî oyewtho poyero, kekn̂e tî. Ero wa tî kekn̂e Kporin komo ya.

29 Ero yinhîrî takî tî mapata nahsîyakn̂e Sansaw asakno roro rma, mîîmo rakatawno ha, mîîmo yecehtotopo xa. Kar̂me tî nahsîyakn̂e anarî, poowa me tî anarînhîrî nahsîyakn̂e hara. N̂ecececekn̂e takî tî ero komo poko.

30 Ero yimaw takî tî on wara kekn̂e Sansaw, Kwaihsî tak ha Piristew komo yakro rma, kekn̂e tî. Ero yinhîrî ciki kekn̂e takî tî mîîmo yecetî poko kar̂pe ro mak. Ero ke n̂epîrkekn̂e takî tî mîîmo kayaritomo pen komo po, mîîmo yawno pen komo pona mer̂pono pîn pona. Ero wa tî Piristew komo waihkekn̂e Sansaw twaihîrî me rma. Mer̂pora xa waihkekn̂e ero yimaw rma, twaipînaw ka waihkekn̂e ero yopo ro mak.

31 Ero yinhîrî Sansaw yakno komo takî tî mokyatken̂e noro pen yokoputho wece. Ahnoro rma tî mokyatken̂e yîîm pen yananînho komo. Okoputhîrî takî tî naar̂atken̂e ahruso. Manoa pen yokoputho yawxaka rma tî nahruyatken̂e, yîîm pen yawxaka rma. Sora mîtwono mîn xakn̂e ahrutopo, Estaow mîtwo marha. Mehxa xakn̂e Sora, xehxa reha xakn̂e Estaow. 20 cimn̂ipu tî noro pen xakn̂e Ixaw Yana komo kurunpen̂e me. Ero wa tî xakn̂e Sansaw.