Ero yinhîrî puruma yeperîrî yenmetopo me exitaw on wara takî tî xakn̂e Sansaw, kabritu tî naar̂akn̂e cipici ya tîmsom. On wara tî kekn̂e cipici yîîm ya, Opici yamtakpon yaka cma re kîwcesî, kekn̂e tî. Pîra, kekn̂e tî yipici yîîm, iina tohra ro mak esko.

2 Yiixatî pîn wara ro mak keen̂e okwe. Ero ke awakrononhîrî ya wîmyakn̂e yipici me. Nasî rma tko tan noro yakno hara, Wooxam yenpotho xa tak. Cenporemu rma re mîk ahcinhîrî, akno xa yo nasî cenpore ro mak. Ero ke noro cma re mahsîyasî apici me, kekn̂e tî.

3 On wara tko tî kekn̂e Sansaw n̂examro n̂entarî me, Piristew komo men wemetanmekyasî. Yaaro ra wemetanmekyasî, Tohnaw mak n̂examro memetanmekya kica, kacho mera ro mak, kekn̂e tî.

4 Ero yinhîrî takî tî rokohci komo yahsîso cekn̂e. Yaake tî nahsîyakn̂e 300 okyo. Noro takî tî n̂imiyakn̂e ematkîrî poko re. Asakî so tî n̂imiyakn̂e ero wara. Ero yinhîrî takî tî poono n̂imiyakn̂e hara matkîrî poko so, katî kwaka yukpaxapu poono.

5 Ero yinhîrî takî tî poono potuhcekn̂e oco. Rokohci takî tî nahsîpînkekn̂e totohme tak Piristew komo natîrî chere puruma chere ro yîhkoton chere ro rma. Ero ke n̂ecakyakn̂e takî tî okwe. Yîhkotoxapu marha tî n̂ecakyakn̂e awrutamixapu ha. Uupa yepu pen marha tî n̂ecakyakn̂e, oripera yepu pen marha.

6 Ero ke on wara tî ketken̂e Piristew komo, Onoke xa knatîthîrî komo nakn̂iye kica? ketken̂e tî. On wara tî n̂eyukyatken̂e iitono komo, Sansaw ha. Noro xa nakn̂iye Cimnace pono woxin. Yihcinhîrî tî nîmyakn̂e yîtamru akrononhîrî ya. Ero poyero tî wehto nahsîmexpekn̂e, ketken̂e tî yîwya so. Ero ke Cimnace pona takî tî cetken̂e Piristew komo. Sansaw cinho takî tî nakn̂iyatken̂e twaihkaxi ro, yîmînhîrî pen marha.

7 Ero poyero on wara takî tî kekn̂e Sansaw Piristew komo ya, Ero warai komo ma amyamro kica? Ero wa awexirî ke so kemetanmekyaxe so xa wa ha oyesepantome, kekn̂e tî yîwya so.

8 Ero ke takî tî Piristew komo tak n̂etapekn̂e Sansaw kar̂pe ro mak. Mer̂pono pîn tî waihkekn̂e. Ero yinhîrî takî tî anana cekn̂e Etan Topun yaka. Iito takî tî xakn̂e ewtarî yaw mak. Ero wa tî xakn̂e Sansaw.

9 Ero yinhîrî takî tî Piristew komo mokyatken̂e Xuta rowon pona. Reei mîtkoso takî tî n̂iir̂atken̂e cetarî komo.

10 Ero ke on wara takî tî ketken̂e Xuta yepamtho komo yîwya so, Ahce kacho amna yakro etar̂maxi mîmohcow hara ke? ketken̂e tî yîwya so. Sansaw yahsîso mak amna moko. Amna n̂emetanmekye ero wa xa marha noro n̂emetanmekyas amna hara, ketken̂e tî.

11 Ero ke Xuta yepamtho komo takî tî cetken̂e Etan Topun yaka. Mer̂pono pîn komo tî mîkyam cetken̂e 3.000 ha tî okyo. Ewtarî yaka tî cetken̂e Sansaw yaka. On wara tî ketken̂e yîwya, Piristew komo naxe kantoman̂e komo me. Yîhtînopîra ma mai? Ahce wa amna miire ke? ketken̂e tî yîwya. On wara tî n̂eyukyakn̂e Sansaw, Oyemetanmekn̂enho mîkyam. Ero ke n̂examro wemetanmekye hara, kesepanîye mak, kekn̂e tî.

12 On wara tî ketken̂e Xuta yepamtho komo yiwya hara, Amiso amna moko Piristew komo nahsîrî me awatome amna ya, ketken̂e tî. Taa, kekn̂e tî Sansaw. On wara makî tko wîîkes awya so, Awaikara ro mak nas amna, kacoko owya. Yaaro men kacoko owya esemîknopîn me ro mak, kekn̂e tî yîwya so.

13 Taa, awaikara rma nas amna, ketken̂e tî. Awapomiyasî mak amna. Ero wa awarasî tak amna Piristew komo nahsîrî me, ketken̂e tî. Ero ke takî tî Sansaw napomiyatken̂e ruupu ke asak hakno ke, yaxan ke ha.

14 Ero yinhîrî takî tî Reei pona Sansaw mokyataw Piristew komo marha mokyatken̂e noro wece hara. Cemtarakaro tî mokyatken̂e. Ero yimaw takî tî Kporin komo Yekatî mokyakn̂e Sansaw pona karihton̂e me xa tak. Ruuputho takî tî xakn̂e ceipura ro mak, riin̂u ecahxapu wara ro mak, apomitoponhîrî ha.

15 Ero yinhîrî takî tî buhu pen yohyatho tak n̂een̂akn̂e Sansaw yaxan ha. Ero tî namekyakn̂e. Iike rma takî tî Piristew pen komo n̂etapekn̂e. 1.000 tî waihkekn̂e okyo.

16 Ero yinhîrî on wara takî tî kekn̂e Sansaw, Buhu yohyatho ke Etapano wiirî. Tukuhkaw ro mak nasî okoputhîrî komo, enmexapu kom ha. Buhu yohyatho ke 1.000 kîrkomo pen waihka, kekn̂e tî.

17 Ero yinhîrî takî tî buhu yohyatho nar̂mekn̂e. Ero ke takî tî iitono nosohcetken̂e ewto Hamace Rei me.

18 Ero yinhîrî takî tî twokru xe tak xakn̂e Sansaw cerewre ro mak. Ero ke Kporin komo yakro tî nîmtapowakn̂e, Apa kah yawno, mer̂pono pîn komo ya owaikapora meexi. Ahce wa tak wai oroto ha, kwaihya katî ow hara owokru exihtorî ke? Ero wa oyexitaw n̂examro rma oyahsîyatu etanpikan komo rma okwe, kekn̂e tî Kporin komo ya.

19 Ero yimaw takî tî ewtarî nahrunkekn̂e Kaan iito rma Reei po rma. Ero yai takî tî n̂epatakekn̂e tuuna. Ero takî tî n̂eer̂akn̂e Sansaw, kar̂pe tak xakn̂e hara. Ero ke takî tî iitono tuuna pîtho nosohcetken̂e En Akore me. Iito rma nasî Reei po.

20 Taa, Ixaw Yana komo yukurunpen̂e me tî xakn̂e Sansaw 20 cimn̂ipu. Ero wa tî xakn̂e Piristew komo exitaw so Ixaw Yana komo yopono me. Ero wa tî xakn̂e.