Taa, ero yinhîrî takî tî Cimnace pona cekn̂e Sansaw. Iito cexitaw wooxam tî n̂een̂akn̂e Piristew wosîn.

2 Ero yinhîrî takî tî, tîmîn yaka cekn̂e hara. On wara tî kekn̂e tîîm ya, tîson ya marha, Cimnace po oyexitaw Piristew wosîn ween̂e okre. Ero ke noro aponko opici me, kekn̂e tî.

3 On wara tko tî n̂eyukyatken̂e yîîm, yîson komo, Exihra ma nai awya wooxam kyananî rma, kpoyino ha? Ahce kacho Piristew komo yaka mîîce apici yahsîso, anpikan komo yemsîrî yahsîso ha? ketken̂e tî. On wara tko tî kekn̂e Sansaw tîîm ya, Aponta rma opici me. On̂enîrî mexe xa nasî, kekn̂e tî yîwya.

4 Kporin komo rma tko tî ero wa Sansaw n̂iirakn̂e, Piristew wosîn xe. Piristew komo waihkan̂e me ehtome tî ero wa n̂iir̂akn̂e. Yîhtînopîra tî xatken̂e yîm, yîson komo. Ero ke, Kporin komo rma ero wa kîmxîkrî n̂iir̂a ham, Piristew wosîn xe, kahra tî xatken̂e. Piristew komo mamawno me thakwa tî xatken̂e Ixaw Yana komo ero yimaw.

5 Ero yinhîrî takî tî Cimnace pona cekn̂e Sansaw tîîm yakro, tîson komo yakro marha. Cimnace pahnoke tî xakn̂e uupa yepu natînano. Ero pahnoke exitaw Sansaw reaw takî tî mayanakn̂e noro wece. Kar̂pamxan warai tî mîk xakn̂e reaw.

6 Ero yimaw takî tî Kporin komo Yekatî mokyakn̂e Sansaw pona karihton̂e me. Ero ke kamara imo pen takî tî narixkekn̂e tamorî ke mak. Kabritu yarixkan̂e wara rma tî kamara imo narixkekn̂e apehceme. Ero yinhîrî cekn̂e rma ewto pona. Ekatîmra tî xakn̂e kamara waihkachonho tîîm ya, tînocwan ya marha.

7 Ero yinhîrî wooxam yenso takî tî cekn̂e Sansaw tîn̂enthîrî yenso. Nîmtapowakn̂e xa hara noro yakro. Yîn̂enîrî mexe xa tî xakn̂e.

8 Amn̂e n̂he tak Cimnace pona takî tî cekn̂e hara Sansaw noro yahsîso tak cipici me. Tîcetaw reaw pen yokoputho tî n̂een̂akn̂e hara. Meyehra tî cekn̂e enso. Weenu tî xakn̂e yupunthîrî yaw. Weenu marha tî xakn̂e iyochîrî yaw.

9 Ero ke takî tî weenu nowyakn̂e tamorî ke. N̂emeyakn̂e esama yaw tîtorî me. Tîîm komo, tîson komo yeen̂ataw xa hara weenu tî nîmyakn̂e yîwya so hara. Reaw pen yokoputho yawnonho tan, kahra tko tî xakn̂e yîwya so.

10 Ero yinhîrî takî tî wooxam yenso cekn̂e Sansaw yîîm. Iito exitaw takî tî erewsî n̂irpekn̂e Sansaw iitono komo yerewusmachome. Ero wa erewusmano n̂iir̂atken̂e cipitaxmu komo ero yimaw.

11 Ero yinhîrî ceseresmaxmu komo yaka takî tî n̂epatakekn̂e Sansaw. Noro yeen̂ataw takî tî 30 kîrkomo n̂ekyatken̂e yîhyaka iitono komo eseresmayem komo.

12 Ero yinhîrî takî tî on wara kekn̂e Sansaw takrono komo ya, Ceyuhsom ka wekatîmyas awya so, camkîno. Ahce warai pokono na tan awya so ceyuhsom? Camkîra oyeyukyataw awya so 7 kaamo yenatîra ka exitaw keseresmacho kom ha, 30 wîmyas awya so aponon komo. 30 marha wîmyas awya so poono yîmkarino hara, kekn̂e tî yîwya so.

13 Camkîra oyeyutopo poko awexitaw so owya xa matko mîmyaxe 30 oponon hara, 30 marha yîmkarino ha, kekn̂e tî. Taa, ketken̂e takî tî Piristew komo. Ero ke camkî ceyuhsom ka ekatîmko amna ya, ketken̂e tî.

14 Ero ke on wara tî kekn̂e Sansaw, Konon̂enhîrî komo yai n̂etowye kn̂emerî komo. Karitînhîrî yai n̂etowye tîkporem okre, kacho tî n̂ekatîmyakn̂e yîwya so. Camkî makî tî n̂encetken̂e, Ero pokono mîn an̂ekatîmthîrî, kahra tî xatken̂e kica. 3 kaamo tî ka camkî xatken̂e okwe.

15 4-nhîrî kaamo po takî on wara takî tî ketken̂e Sansaw pici ya, Ehsamakî men kica aan̂o poko, On wara kacho mîn on̂ekatîmîtho, kachome tak amna ya. Ekatîmra exitaw amna ya awakn̂iyasî kr̂a tak amna amn̂e, aamo pen marha amna nakn̂iyasî, aamo yawno pen komo marha Ero wa men amna awakn̂iyaxe so ekatîmra exitaw noro amna ya. Ahce kacho ma re amna man̂ikye? Amna yemyawno yowso mak ha na kica? ketken̂e tî.

16 Ero yinhîrî takî tî nîwracekn̂e tak Sansaw pici noro yenaw rma. On wara tî kekn̂e yîwya, Ooxera mexe mai ham kica. Yaaro xa wîîkesî. Ceyuhsom mekatîmye opoyino komo ya camkîno. Ero yeyuhtopo tko ekatîmra mîxakn̂e owya kica, kekn̂e tî yîwya. On wara makî tî n̂eyukyakn̂e Sansaw, Apapa komo ya meero ekatîmra wîxakn̂e. Ero ke ahce kacho wekatîmya awya? kekn̂e tî.

17 Ero yinhîrî nîwracekn̂e roro tî yipici miya roro 7 kaamo cehso ro, eseresmacho komo yîtîhkacho pona roro. Ero ke 7-nhîrî po xa takî tî n̂ekatîmyakn̂e yîwya camkîno yeyuhtopo ha. Cerepokarî ke roro makî tî n̂ekatîmyakn̂e yîwya. Ero ke yipici takî tî n̂ekatîmyakn̂e tpoyino komo ya hara.

18 Ero ke 7-nhîrî po tak kokmamporo exitaw on wara takî tî ketken̂e iitono komo kîrkomo Sansaw ya, Ahce re nai ha tîkpore weenu yopo? Onoke xa nai ha kar̂pe xa reaw yopo? ketken̂e tî yîwya. Nhnk, camkîra mîhtînocow ham, kekn̂e takî tî Sansaw. On wara tî kekn̂e noro poko. Oyoku poko mehce ham, paaka poko, woosî poko. Noro ke amararîn komo mîpomoce ham. Noro ke pomohra awexitaw so ketaw ha re camkîra oyeikura mehcerî ha re on̂ekatîmtho poko, kekn̂e tî.

19 Ero yimaw tak Kporin komo Yekatî takî tî mokyakn̂e xa hara Sansaw pona karihtoso xa hara. Ero ke Askaron pona takî tî cekn̂e. Iitono pen komo takî tî waihkekn̂e kîrkomo yaake, 30 ha tî. Pononthîrî komo takî tî mohkekn̂e. Ero takî tî nîmyakn̂e kîrkomo ya hara, camkîra ceyukn̂enhîrî komo ya ha. Nîrwonakn̂e xa tak tî Sansaw ero yimaw. Ero ke cekn̂e hara tîîm yaka hara.

20 Iyarînaw takî tî yihcinhîrî nîmyatken̂e Sansaw yakrononho ya, yipitacho yimaw akrono me xakn̂e noro ya ha. Ero wa tî nîmyatken̂e okwe.