Taa, ero yinhîrî takî tî kicicme xa hara xatken̂e Ixaw Yana komo. Kicicme tî Kporin komo n̂een̂akn̂e ehtopo komo. Ero ke Piristew komo mamawno me tî n̂examro pen n̂iir̂akn̂e hara. Pahkî tî ero wara xatken̂e, 40 cimn̂ipu okwe.

2 Taa, Sora pono tî xakn̂e, Manoa tî osotî. Taan yepamtho tî mîk xakn̂e. Yipici tî xakn̂e yîmxîtan me ro makî tî okwe. Yîmxîkîra ro makî tî xakn̂e okwe.

3 Ero yinhîrî takî tî Kporin komo yancun n̂esenpekn̂e wooxam ya. On wara tî kekn̂e yîwya, Yîmxîtanî ro makî ka amoro. Amn̂e tko metahsîyasî. Mewruyasî marha tak kîîrî me.

4 Ero ke uupa yukun men erîhra ro mak tak esko. Kawaxiyem marha erîhra esko ahce na ewkukaxapu. Kicicitho tonohra marha esko wooto.

5 Metahsîyasî tak, kîîrî me mewruyasî. Noro poci papupra ro mak esko. Nasirew me cirko noro amrerî. Kaan ya tîmko noro ciki ewruche rma. Noro tak n̂ihciyasî Ixaw Yana komo yowtopo Piristew komo yai, kekn̂e tî. Ero wa tî kekn̂e ancu Manoa pici ya.

6 Ero yinhîrî takî tî ciin̂o yaka cekn̂e wooxam. Ancu mtapotachonho tî n̂ekatîmyakn̂e yîwya. Kaan yakrono ro moko oroto ohyaka, kekn̂e tî. Ancu me xa wenwo kopi eraspetono ro mak. Ahn̂i xa mîmoko, kahra weexi yîwya. Tosotî yekatîmra marha n̂eexi owya.

7 On wara nîîka owya, Metahsîyasî tak amn̂e. Mewruyasî marha ciki kîîrî me. Ero ke uupa yukun erîhra tak esko. Ahce na kawaxiyem erîhra esko. Kicicitho tonohra marha esko wooto. Nasirew me tak nas amn̂e amrerî Kaan yanmenî ro me ha. Ewrutoponhîrî n̂ixa ro rma ero warai me nasî miya roro twaihtopo pona roro, nîîka owya, kekn̂e tî. Ero wa tî kekn̂e Manoa pici ciin̂o ya.

8 Ero ke Kaan yakro takî tî nîmtapowakn̂e Manoa. On wara tî kekn̂e yîwya, Apa kah yawno, on wara cma re wîîkes awya, Awantonî ro tî men̂epew amna yaka noro xa marha cma re men̂epesî xa hara amna xîkrî por̂mamnotopo yekatîmtîkachome tak amna ya, amn̂e tî n̂ewruya noro por̂mamtome kir̂wan̂he, kekn̂e tî.

9 Taa, Manoa mtapotarî tî n̂encekn̂e Kaan. Ero ke mokyakn̂e xa hara noro Kaan yancun. Wooxam tî xakn̂e mararî po ero yimaw tî n̂esenpekn̂e yîwya. Iin̂o tko tî exihra xa hara xakn̂e cipici yakro ero yimaw.

10 Ero ke kar̂pe tî cekn̂e wooxam ciin̂o yan̂ihso. Tanî tak nas ha, kekn̂e tî. Kaan yanton mokye ohyaka noro rma moko xa hara, kekn̂e tî yîwya.

11 Ero ke nawomyakn̂e Manoa. Cipici yakro takî tî cekn̂e. Tooto warai yaka tmokuche on wara tî kekn̂e yîwya, Kokon̂oro tî nîmtapotai tooto opici yakro noro rma amoro? kekn̂e tî. Noro rma ow ha, kekn̂e tî ancu yîwya.

12 Ero ke on wara tî kekn̂e Manoa yîwya, Amtapotachonhîrî yaw roro rma tak exitaw ahce wa tak tîmxîkrî amna por̂mamnoya ha, ahce pokono me nai amn̂e? kekn̂e tî.

13 On wara tî n̂eyukyakn̂e Kporin komo yancun, Apici men n̂ewetpe omtapotachonho ahnoro ha.

14 Uupa yeperîrî ciixapu apupra ro mak n̂expe, ahce wa na ciixapu ha. Uupa yukun yerîhra marha n̂expe. Kawaxiyem erîhra marha n̂expe uupa yukun ha. Kicicitho tonohra marha n̂expe wooto. Ahnoro men omtapotachonho n̂ewetpe, kekn̂e tî.

15 On wara takî tî kekn̂e Manoa yîwya, Tanî cma re ka masî. Awotî cma re ka amna nupur̂asî kabritu pun, kekn̂e tî yîwya.

16 On wara tî kekn̂e Kporin komo yancun, Taa, tanî rma ka wai ham awanme so. Onahrî tko apupra ro mak was an̂irithîrî kom ha. Kporin komo ya tîmsom ciri xe awexitaw so yîwya xa tîmcoko, kekn̂e tî. Kporin komo yancun mîkro, kahra tî xakn̂e Manoa. Camkî tî n̂een̂akn̂e.

17 On wara tî kekn̂e hara Manoa Kporin komo yancun ya, Onoke awosotî? Ero cma re mekatîmyas amna ya apoko amna yahwotachome tak amn̂e amtapotachonhîrî yaw roro rma exitaw, kekn̂e tî.

18 On wara tî kekn̂e ancu, Ahce kacho oyosotî yenta xe mat ha? Aweserepokacho komo me ro mak nasî oyosotî, kekn̂e tî.

19 Ero yimaw takî tî kamritu pun nakn̂iyakn̂e Manoa Kporin komo ya tîmsom me. Toh pona nakn̂iyakn̂e puruma yatho yakro rma. Ero yimaw eserepokacho komo xa takî tî n̂iir̂akn̂e Kporin komo Manoa komo wero ro rma.

20 Wehto tî ka nawomyakn̂e kahsî Kaan ya tîmsom yakn̂itopo. Ero yinhîrî takî tî Kporin komo yancun nawomyakn̂e wehto chew rma. Ero yipu yenîrî ke Manoa komo ya n̂esewnapetken̂e takî tî roowo pona roro.

21 Ero yinhîrî esenpora xa hara tî xakn̂e Kporin komo yancun Manoa komo ya. Ero ke takî tî nîhtînoyakn̂e Manoa. Ancu xa mîk n̂ex ham kopi, Kporin komo yanton xa, kekn̂e tî.

22 On wara tî kekn̂e cipici ya, Tîtwaiyas ha men okwe. Kaan xa cenwo kopi, kekn̂e tî yîwya.

23 On wara tko tî kekn̂e yipici, Kwaihka xe cexitaw ketaw ha re Kporin komo kînmîthîrî yahsîra xa re n̂exirî ha kamritu pun yakn̂ixapu, puruma yatho yakn̂ixapu marha, keserepokacho marha enpora n̂exirî, kîwya n̂ekatmo ero yipu xa re ekatîmra marha n̂exirî ha. Ero wara exihra n̂exirî ha re kwaihka xe cexitaw ha, kekn̂e tî. Ero wa tî kekn̂e yipici.

24 Ero yinhîrî takî tî n̂ewruyakn̂e wooxam. Sansaw me tî nosohcekn̂e. Ero yinhîrî tî por̂mamyakn̂e. Kporin komo nakronomarî me tî xakn̂e.

25 Ero yinhîrî takî tî ceserepokaxmu me noro n̂iir̂akn̂e Kporin komo Yekatî. Ero wa tî noro n̂iir̂akn̂e Maane Tan po exitaw. On wara nasî Maane Tan, Sora xehxa nasî. Mehxa tak nasî Estaow. Ero wa nasî Maane Tan. Iito tî xakn̂e Sansaw ero wa ciir̂ataw Kaan ya.