Taa, iito tî xakn̂e Noemi yin̂onho yanan kîîrî, Erimereke pen yananînho ha. Boas tî xakn̂e noro yosotî. Cemyawnoyem xa tî mîk xakn̂e Boas.

2 Ero yinhîrî on wara takî tî kekn̂e Huce, Moabita komo wosîn, Noemi ya tî kekn̂e, Owto xe cma re wasî tantono komo mararîn pona. Sepata yeperîrî yamekî xe wasî enmekn̂e komo paputho ha. Ween̂a na opoko tawakem, noro yipu mararîn pona cma re kîwcesî, kekn̂e tî. Taa, etok ha okopuci, kekn̂e tî Noemi.

3 Ero ke mararînano pona takî tî cekn̂e Huce. Iito takî tî namekyakn̂e sepata epahxapu. Yîhkoton̂e komo wenari ro tî cekn̂e amehso. Onok mararîn na tan ha, kekn̂e makî tî Huce yîhtînopîra tî xakn̂e. Boas mararîn tî mîn xakn̂e, Erimereke pen yananînho mararîn ha.

4 Ero yimaw tak Boasî rma tî mokyakn̂e Beren poi. On wara tî kekn̂e sepata yîhkoton̂e komo ya, Awakro so exi xe wasî Kporin komo, kekn̂e tî yîwya so. Kporin komo ya awakronoma xe nas amna hara, ketken̂e n̂examro yîwya hara.

5 Ero yinhîrî on wara takî tî kekn̂e Boas, yîhkoton̂e komo yantoman̂e ya, Onok yanan mîkro emasî? kekn̂e tî.

6 Moabita wosîn tî mîkro, kekn̂e tî yîhkoton̂e komo yantoman̂e. Moabe rowon poi mohxapu tî mîkro Noemi yakro.

7 On wara nîîka owya, Onahrî cma re wamekyasî yîhkotoxapu epahxapu mak. Yîhkoton̂e komo wenari mak kîwcesî amehso, awrutamixapu yotawno mak wamekyasî, nîîka owya. Pahxaxaro rma tomo mararî pona. Ero yinhîrî yîtîtmamra rma namekyasî. Yohno makî tko nîtîtmam roona yaw ceremachome, kekn̂e tî.

8 Ero yinhîrî on wara takî tî kekn̂e Boas Huce ya, Okopuci, on wara cma re wîîkes awya. Anarî mararîn pona tohra esko anahrî yamehso. On poi tohra esko. Tan mak esko oyanton komo yakro, emasî komo yakro.

9 On mak enko mararî. Yîhkoton̂e komo wenari etoko emasî komo yakro. On wara wîîka kar̂pamxan komo ya, Noro pokohra ro mak men ehcoko, wîîka. Awokru xe awexitaw weer̂a yawno eeta tuuna, kîrkomo n̂ekîtho rma, kekn̂e tî.

10 Ero wa entarî ke n̂esewnapekn̂e takî tî Huce. On wara takî tî kekn̂e yîwya, Ahce kacho tawake mai opoko, anarî yana poko ha, kekn̂e tî.

11 On wara tî n̂eyukyakn̂e Boas, Awekaci rma wencesî. Anoci tî makronomekn̂e ro mak aan̂onhîrî pen waipuche. Aamo komo takî tî mahsîpînkekn̂e, awekenhîrî marha tî. Oona tî mîmokye an̂enîrî pîn komo cheka.

12 Ero ke on wara wîîkesî, Kporin komo rma awepemape, akronomano ritoponho yepetho xa nîmpe awya, wîîkesî. Ero wa awepemape Noro, ponaro Ixaw Yana kom ha. Noro yaporî mamawno wara tak mas oroto, yukurun yaw awehtome mîmokye. Noro rma awepemape, kekn̂e tî.

13 Taa, kekn̂e takî tî Huce yîwya, tawake mak oyexi xe was opoko apa. Awanton me mak wasî. Anarî yana rma re ow ha awanton komo warai pîn, emasî komo warai pîn. Wara rma ow mereporesî, tawake mîmtapowasî oyakro, kekn̂e tî. Ero wa tî kekn̂e Huce.

14 Ero yinhîrî takî tî eseresmatopo me exitaw on wara kekn̂e Boas yîwya, Xiya amok ha okopuci. On ha awru. Wooku kwaka yukpakî kawawano kwaka, kekn̂e tî yîwya. Ero ke sepata koton̂e komo yakro Huce n̂eremekn̂e. Sepata yatho takî tî nîmyakn̂e Boas yîwya yupuxapu ha. Tmaxmitaxi ro tî n̂eseresmekn̂e Huce. N̂etîmcekn̂e rma tî yînaputhîrî.

15 Ero yinhîrî takî tî nawomyakn̂e hara Huce, cekn̂e tak sepata yamehso xa hara. Cetaw takî tî on wara kekn̂e Boas kar̂pamxan komo ya, Noro men eihra ro mak ehcoko. Awrutamixapu poyinonho rma mohketaw eihra rma ehcoko.

16 Awrutamixapu poi rma n̂emarakape awanme ro so rma. N̂expe mak noro namekrî me. Eihra ro mak ehcoko, kekn̂e tî. Ero wa tî kekn̂e Boas kîrkomo ya.

17 Ero ke sepata namekyakn̂e Huce Boas mararîn po rma, kokon̂i cehso ro. Ero yinhîrî takî tî eputhîrî n̂etapekn̂e potutome yathîrî. Mer̂pora tî xakn̂e yathîrî, 22 ritru wicakî.

18 Ewto pona takî tî naar̂akn̂e. Yînamekîthîrî takî tî n̂een̂akn̂e yînoci. Tînaputhîrî yakwenho marha tî womhokekn̂e Huce, ero marha tî nîmyakn̂e tînoci ya.

19 On wara takî tî kekn̂e yînoci yîwya, Ahtono mamekî? Ahto xa metapicka? Aponarono nakronomape Kaan, kekn̂e tî. Ero ke tînoci ya takî tî n̂ekatîmyakn̂e Huce mararî po cehtoponhîrî. Iito sepata wamekyakn̂e, kekn̂e. Boas tî mîk noro tmararîyem yosotî, kekn̂e tî.

20 Ai ha, taa, Kporin komo nakronomarî me exi xe wasî noro, kekn̂e tî Noemi Huce ya. Kîpînîn yawno me rma nai ham Kporin komo yîtwen̂ekarîtan me. Waipîn komo pînîn yaw nasî, waihxapu pen komo pînîn yaw marha. Kyananî rma mîkro Boas, kekn̂e tî.

21 On wara marha tî kekn̂e Huce, Moabita wosîn, On wara marha nîîka noro owya, Omararîn pokono komo wenari ro mak etoko, onatîrî yeperîrî yenmekn̂e komo yakro cenatkaxi ro, nîîka owya, kekn̂e tî.

22 On wara tî n̂eyukyakn̂e Noemi, Iito rma cexpore nai ham noro yanton komo yakro rma, emasî komo yakro. Anarî mararîn po awexitaw ahce wa na awir̂atu iitono komo, kekn̂e tî.

23 Ero ke Boas yanton komo yakro cekn̂e roro Huce emasî komo yakro. N̂examro yakro tî epahxapu namekyakn̂e pahkî n̂he, sepata yîhkototopo cenatkaxi ro, puruma yîhkototopo cenatkaxi ro marha. Tînoci yaw tî n̂enmayakn̂e ero yimaw. Ero wa tî xakn̂e Huce.