Taa, ero yinhîrî on wara takî tî kekn̂e Noemi, Huce woxin, Okopuci, on wara wîîkes awya, aweceton̂e cma re wepor̂asî esemetanmekîra awehtome. Ahce wa katî awya?

2 On warai mîk Boas, kyanan komo rma mîk ha, anton komo yakro metapickai noro ha. Oroto tî nai sepata yîpîpîtîkacho po. Tînatîrî tî nîpîpîtîke iito kosope.

3 Ero ke on wara esko, eyehko, ekotopeko marha. Kir̂wan marha amruko aponon. Ero yinhîrî tak etoko yîpîpîtîkacho pona. Esenpora tko esko noro ya eseresmetaw, wooku yeer̂ataw marha.

4 Amn̂e mak etîrapetaw etîrapotopo tak enko, Iina xa noro n̂etîrapo ham, kachome tak awya. Amn̂e tak yîhyaka etoko. Yîhtarî mak womhokakî. Iina tak etîrapoko. Noro tak n̂ekatîmya awya poko awehtopo, kekn̂e tî. Ero wa tî kekn̂e Noemi Huce ya.

5-6 Taa, ero wa wai ham, kekn̂e tî Huce. Ero ke sepata yîpîpîtîkacho pona takî tî cekn̂e. Iito takî tî twoxinî mtapotachonho yaw roro rma xakn̂e.

7 Boas tî ka n̂eseresmekn̂e, wooku marha n̂eer̂akn̂e. Tahwore takî tî xakn̂e. Ero ke etîraposo takî tî cekn̂e. Iito tî xakn̂e sepata mer̂pono pîn tukuhkaw cenmeso. Ero mehxa takî tî cekn̂e etîraposo. Ero wa tî xakn̂e Boas. Ero yinhîrî Huce tî cekn̂e yîhyaka. Yîhtarî tî womhokekn̂e. Iina takî tî n̂etîrapekn̂e yîhtarî mîtkoso.

8 Taa, rakatawro takî tî n̂esekatkekn̂e Boas. Tîhtarî wece tî n̂een̂akn̂e. Kopi, iito tî n̂een̂akn̂e wooxam etîrapoxapu tîhtarî mîtwo.

9 Onok amoro? kekn̂e tî yîwya. Awanton mak ow ha Huce ha, kekn̂e tî yîwya. Ow tak amuhtoko awam ke rma. Waihxapu pen yananînho amoro, kekn̂e tî yîwya.

10 Ai ha, okopuci, kekn̂e takî tî Boas yîwya, awakronomape Kporin komo. Ow mîwakrei marha. Oroto tak ow mîwakretîkesî xa tak okre. Kar̂pamxan komo rma re naxe tupurantayem komo, yupurantamnî komo marha. Noro yipu komo yahsî xera rma mehxe ham aan̂o me.

11 Ero ke erasîn me mak esko okopuci. Amtapotarî yaw roro rma tak kiir̂asî, Ero wa cma re ow miir̂asî, kacho yaw roro. Kir̂wan mîkro wooxam, kexe tantono komo ahnoro apoko.

12 Yaaro rma re mîîkes owya, Waihxapu pen yananînho amoro, mîîkesî. Nai rma tko anarî hara waihxapu pen yananînho xa tak.

13 Ero ke tanî rma enmakî. Pahxaxa tak yîmtapotarî wencesî. Waihxapu pen yepamnopu xe exi xe cexitaw kir̂wan̂he rma, noro rma awahsîpe. Waihxapu pen yepamnon̂e me exi xera cexitaw, ow tak wasî awahsîn̂e me ha. Yaaro wîîkesî, Kporin komo nasî waipîn me ero wa xa marha yaaro wîîkes ero poko. Ero ke tanî rma ka esko cenmakaxi ro, kekn̂e tî. Ero wa tî kekn̂e Boas Huce ya.

14 Ero ke yîhtarî mîtwo rma tî ka xakn̂e Huce tîrapo, cenmakaxi ro. Enmaporo takî tî nawomyakn̂e yohno rma awarpape rma ka exitaw, esenîrî yarohra ka exitaw. On wara tî kekn̂e Boas yîwya, Taa, tîtken̂e men etok ha, Wooxam tomo kosope sepata yîpîpîtîkacho pona, kacho esentara ro mak ehtome, kekn̂e tî yîwya.

15 On wara marha tî kekn̂e yîwya, Xiya ka eeko amotarî wom mak ha. Ero ehyatkak oona, kekn̂e tî. Ero ke takî tî sepata merurkekn̂e ero yaka mer̂pora. 6 ro een yawno merurkekn̂e copoyemînhîrî. Ero wicakî tî nîmyakn̂e yîwya. Ero yinhîrî ewto pona takî tî cekn̂e hara Huce.

16-17 Twoxin yaw cexitaw takî tî on wara kekn̂e Noemi yîwya, Taa, ahce wa nîîka awya, okopuci? kekn̂e tî. Ero ke Boasî mtapotachonho takî tî n̂ekatîmtîkekn̂e Huce yîwya. On wara oriu, kekn̂e marha tî. On nîîm owya sepata 6 een wicak ha. Emyarîra mak tohra esko awoxin yaka, nîîka owya, kekn̂e tî.

18 Ero ke on wara tî kekn̂e Noemi, Ahce na kahra ro makî ka esko okopuci. Amn̂e mencesî yîmtapotarî komo. Expora ro mak nasî Boas anarî mtapotarî yenta xe. N̂encetîkesî oroto cerepore tak cehtome, kekn̂e tî. Ero wa tî kekn̂e Noemi Huce ya.